WENJIL
Mutapu wa Kupwish Milong ya Nfalang
Mudi muyilejenau mu 1 Korint 6:1-8, kambuy Paul wisambina piur pa milong yikutwisha kuyishikij in Kristu ku kufundijan. Ndiy walonda nich runeng ku muchim mulong in Kristu amwing a mu Korint adinga ni mulong ayanga “kutwal mulong winou kudi antu akad kwikal in Kristu.” (Verse 1) Paul wapana yiyingish yikash yifanyidinau in Kristu kulondul chakwel amana mutapu wa kupwish milong yau mu yikumangen pa ndond pa kufundijan kwamburamatad. El amboku tushinshikinany yiyingish yimwing yamubachika Paul chakwel apana chiyul chinech chapepilau, ni kupwa, tukwisambin mitapu yimwing yikemp ya mashakamin yakad chiyul chinech kuwanyin.
Anch tukwet mulong wa nfalang ni mbay netu mwin Kristu, tufanyidin kukimb kuchipwish mu mutapu usotinay Yehova, pakwez, tufanyidinap kupwish mu mutapu tusotina etu. (Jinswir 14:12) Mudi mwalonday Yesu, chidi cha manangu kupwish mulong swa kurutu wikala ujim. (Mateu 5:23-26) Chaushon, in Kristu amwing ashikining ku kukakalijan nakash pamwing ni kufundijan kwamburamatad. Paul wafunda anch: “Chidi chiyimp anch mukach mwen ukat kufundijanany muntu ni mukwau.” Ov, mulong wak? Diyingish dijim didi anch kupwish milong mutapu winou kuyipishining katumb ka chikumangen ni katumb ka Nzamb twifukwidininga. Chawiy lel, chidi cha manangu kusadil chiyul chenday Paul chidia mu chipul chipwila anch: “Ov, mulong wak kiushimpishinanyap muchim anch muntu wakusalany nayimp?”—Verse 7.
Paul wamekesha kand mu kulond kwend anch Nzamb watenchika mu chikumangen chitenchik chiwamp chakwel kuman mutapu wa kupwishang milong yivud. Amakurump adi in Kristu atambwilinga ronganyin kusutil ku uyakin udia mu Mifund, ni Paul walonda kand anch: awiy akwet “manangu ma kurumburish milong ya pakach pa in Kristu” chisu kulankininga “milong yikash.” (Verse 3-5) Yesu wamekesha anch, anch in Kristu aad akwet milong yijim mudi kumudimbin muntu makasu ni kwiy, chifanyidin kulondul jinzau jisatu chakwel kupwish milong yiney: Rizau ra kusambish, afanyidin kusal usu wa kupwish mulong wau ayinau. Rizau ra kaad, anch kaupwishinap ayinau, akutwish kukimb muntu umwing ap aad ija nawamp mulong winou. Rizau ra kasatu, anch akangeny mutapu wa kuwupwish kamu, afanyidin kuya nich mulong winou mu chikumangen kudi amakurump.—Mateu 18:15-17.
Chikwau, amakurump in Kristu kadiap ankalansambu ap in kupan yiyul mu milong ya nfalang, ni kichidiap chisend chau. Awiy katekiningap yany piur pa mutapu wa kupwish milong ya nfalang pakach pa akadivar. Pakwez, chikimbiningau chidi kuyikwash akweta milong yiney nich rutong ra kusadil chilondinay Bibil ni kukimb mutapu wa kushakam mu chisambu. Anch mulong winou ukasiken, akutwish kumwipul kalam wa munyingumuku ap kwipul ku biro wa mutiy wa Atuman a Yehova chakwel ayileja chifanyidinau kusal. Pakwez, kuding milong yikwau yakad kwambatan nich kusadil chiyul chinech cha Paul. Ov, mudi milong ik?
Mu mitapu yimwing ya mashakamin, antu akutwish kuya kwa mburamatad chakwel alondula chilodinau mu yany ya ngand ap kand mulong wa kulam chisambu kusu. Chilakej, afanyidin kuya kwa mburamatad mulong wa kujip uruw, kutambul mbil ya kulam an, kwijik uvud wa nfalang jikezay ikundj kupanang chakwel adishang nich an chisu chipwishiningau uruw, kwit nfalang ku chapu cha mudimu (mudi ku Sonas), chisu kusadikininga akisida, chakwel ayifuta nfalang jau jidia ku chapu kanang chisu chifilinga, ni kufwatul pa mukand ukufunday muntu chakwel ijika chikezau kusal ni dipit diend pakezay kufa. Mwin Kristu ukutwish kand kuya kwa mburamatad mulong wa kwichidij ku milong kanang yamufundinau.a
Anch muntu uyil ni mulong winou kwa mburamatad pakad rutong ra kusal nayimp, kasadinap chom chilikina kwambatan nich chiyul cha Paul chapepilau.b Chikalap nchik mwamu, rutong ra mwin Kristu rifanyidin kwikal ra kutumbish dijin dia Yehova pamwing ni kukimb chisambu ni uumwing mu chikumangen. In Kristu ijiken nakash mulong wa rukat rau, ni “rukat . . . kirikat kwisotilangip yom yau irinau.”—1 Korint 13:4, 5; Yohan 13:34, 35, TMK.
a Chikutwish kand kusadik pa yisu yimwing kuman mwin Kristu wamusadil mbay nend mukaritiy uyimp kanang ujim mudi kusal nend masandj ku usu, kumubul nakash, kujip muntu ap kwiy chom chijim. Kufund mulong mudi winou kwa mburamatad kudiap kujiril yany ya mu Bibil chikalap nchik dirumburish dikumurumburishau.
b Chakwel utana jinsangu jivud, tal amboku Chinong cha Kalam cha pa Rish 15, 1997, pa paj wa 17-22 ni cha pa Mwinkind 1991, pa paj wa 25-28, mu Français.