DILEJAN DIA 37
Yom Yilondinay Bibil Piur pa Mudimu ni Nfalang
Ov, wiyakamishinap kal nakash piur pa mudimu ap nfalang? Chikutwish kutukasiken kuwanyish maswir metu ni kumwifukwil Yehova mu mutapu uwanyidina. Bibil upanin yiyul yiwamp yikutwisha kutukwash.
1. Yom ik yilondinay Bibil piur pa mudimu?
Nzamb ukatin anch tusangera mudimu. Bibil ulondin anch “chom chipandakena kuwap kudi muntu chidi . . . kusanger mu mapit ma midimu yend.” (Mulej 2:24) Yehova usadining mudimu nakash. Anch twamwimburij mu kusal mudimu nich mushiku, tukat kumusangaresh, niyetu ayinetu tukwov musangar.
Mudimu ud wa usey. Pakwez tufanyidinap kuulik anch wikala wa usey nakash kusutamu difukwil dietu tumwinkishina Yehova. (Yohan 6:27) Utukanin anch ang twamutek pa ndond ya kusambish, ukuwanyish maswir metu ma ku mujimbu.
2. Chitongijok ik chisikena tufanyidina kwikal nich piur pa nfalang?
Ap anch Bibil witiyin anch ‘nfalang jikat kuchidijan,’ utubabeshin kand anch nfalang ajinaj jikutwishap kutuletin musangar. (Mulej 7:12) Chawiy, utukasikeshin kulik kukat nfalang, pakwez utulejin anch “sangarany nich yom yiukwetany.” (Tang Hebereu 13:5.) Anch twadandamen kusanger yom tukweta, tukwiyakamishap anch tukwetap nfalang jivud. Tukwipuk kwandam mu mabaz makad usey. (Jinswir 22:7) Ni tukwipuk ubaj wa kusengan masengan ma nfalang ni milad ya ubaj ya kupit swa swa pakad kusal usu.
3. Mutapu ik ukutwisha kusadin nfalang pakad choy?
Yehova uding Nzamb mwin kupan, ni tukat kumwimburij anch twikal “in makas monikina, in kuyikwashap akwau.” (1 Timote 6:18) Tukutwish kusadin nfalang jetu pakad choy mu kukwash chikumangen ni kuyikwash antu akwau adia mu maswir, nakash anamakwetu in Kristu. Yehova ukat kusanger nakash yibachikin yitubachikina kupan, kadiap uvud wa yom tupanina. Anch twapan nich muchim wetu wawonsu, tukwikal ni musangar ni tukumusangaresh Yehova.—Tang Midimu 20:35.
ILEJA CHIKURIKINA
Tal yiyukish ya kwikal ni chitongijok chiwamp piur pa mudimu ni kusanger yom ukweta.
4. Mutumbisha Yehova kusutil mutapu usadina mudimu wey
Urund wetu ni Yehova ufanyidin kutubachik kwikal ni chitongijok chiwamp piur pa mudimu. Talany VIDEO, kupwa isambinany yipul ey:
Mu video winou, yom ik yakusangaresha kal piur pa chitongijok cha Jason ni mwikadil wend pa ndond ya mudimu?
Yom ik yasalay kal mulong wa kutek mudimu pa ndond yau?
Tang Kolosay 3:23, 24, kupwa isambinany chipul ech:
Mulong wak chitongijok chetu piur pa mudimu chid cha usey?
Mudimu ud wa usey. Pakwez tufanyidinap kuulik anch wikala wa usey nakash kusutamu difukwil dietu tumwinkishina Yehova
5. Kusanger yom tukweta kukat kutukwash
Antu avud akat kusal usu nakash wa kwiruzukin nfalang. Pakwez Bibil utukasikeshin kusal chom chikwau. Tang 1 Timote 6:6-8, kupwa isambinany chipul ech:
Yom ik yitukasikeshinay Bibil kusal?
Ap anch tukwet kwetu nfalang jikemp, tukutwish kwikal ni musangar. Talany VIDEO, kupwa isambinany chipul ech:
Ap anch majuku minam makwet kwau nfalang jikemp, yom ik yiyinkishina musangar?
Pakwez chid nchik anch tukwet nfalang jivud ni twovil kand ja kukimb jikwau? Yesu walejana rusangu rilejena ubaj wa kusal mwamu. Tang Luka 12:15-21, kupwa isambinany chipul ech:
Yom ik wileja kal kusutil chilakej cha Yesu?—Tal verse wa 15.
Tang ni ilikej Jinswir 10:22 ni 1 Timote 6:10. Kupwa isambinany yipul ey:
Utongin anch chom ik chidia cha usey nakash? Kwikal murund wa Yehova anch kwikal ni nfalang jivud? Mulong wak?
Antu akata kusurabang nfalang akweting milong ik?
6. Yehova ukuwanyish maswir metu
Milong ya nfalang ni mudimu yikutwish kupak ritiy retu mudiay Yehova. Talany VIDEO mulong wa kuman mutapu tukutwisha kurish ni milong yiney yipakina ritiy, ni kupwa isambinany yipul ey:
Mu video winou, yikokujol ik yarishay nich mukadivar?
Yom ik yasalay mulong wa kurish nawamp ni milong yend?
Tang Mateu 6:25-34, kupwa isambinany chipul ech:
Yehova ukanin anch ukuyisadin yom ik antu amutekina pa ndond ya kusambish?
ANCH MUNTU WAKWEL ANCH: “Nifanyidin kusal mudimu nakash mulong wa kukwash dijuku diam. Chawiy, nikutwishap kwez ku yikumangan rubing rawonsu.”
Verse ik ukwinkishina kashinsh anch kutek difukwil dia Yehova pa ndond ya kusambish ud mupak uwamp nakash?
YOM TWILEJA KAL
Mudimu wa ku mujimbu ni nfalang yid ya usey, pakwez yifanyidinap kutukangesh kumusadin Yehova nawamp.
Ov, uvurikin?
Yom ik yikutwisha kukukwash kulam chitongijok chiwamp piur pa mudimu?
Kusanger yom tukweta kukat kutukwash mutapu ik?
Mutapu ik ukutwisha kumekesh ruchingej rey mu kushilamu kwa Yehova anch ukuwanyish maswir ma antu end?
JINGUNIN KAND
Tal bil anch Bibil ulondin anch nfalang jid jiyimp.
“Ov, Nfalang Jawiy Musul wa Yom Yawonsu Yiyimp?” (Mutu wa mulong udia pa jw.org)
Ileja mutapu tukutwisha kusadin nfalang jetu mulong wa kumusangaresh Nzamb.
“Yom ik Yilondinay Bibil Piur pa Kupan?” (Mutu wa mulong udia pa jw.org)
Ov, masengan ma nfalang makwetap kwau ubaj?
“Chitongijok cha Bibil Piur pa Masengan ma Nfalang” (Lankany! wa Ngond wa 3, 2015)
Tal yom yamubachika muntu umwing wading mwij ni mwin kusengan masengan ma nfalang kuswimp mwom wend.
“Nakatang Nakash Kwendish Atubar” (Chinong cha Kalam cha 1 Ngond wa 11, 2011)