DILEJAN DIA 40
Mutapu ik Tukutwisha Kwikal Ishitwila ku Mes ma Nzamb?
Tong bil anch maku umwing mwin rukat ukat kumurijek mwanend chakwel aya ku shikol. Ukat kumushinshikin mwan anch wowalang kal mem ni anch masun mend minangin. Chinech chikat kumukwash mwan kwikal ni mujimbu uwamp ni kumekesh kud antu akwau anch anvajend amulamin nawamp. Chilik chimwing, Tatukwetu wa rukat Yehova ukatin anch twikala inangina ku mujimbu ni ishitwila mu yom tutongina, tulondina ni yitusadina. Anch twikal ishitwila, tukutaninamu ayinetu ni tukumutumbish Yehova.
1. Mutapu ik tukutwisha kwinang ku mujimbu?
Yehova utulejin anch: “Ikalany antu atumbila.” (1 Pita 1:16) Mulong wa kwikal atumbila, tufanyidin kwikal ishitwila mu yom tutongina, tulondina, tusadina ni inangina kand ku mujimbu. Tukutwish kwinang ku mujimbu mu kowal mem chisu chawonsu, kutut masun, kulam nawamp chikumbu chetu, motak, moto ap nking yetu. Tukutwish kand kukwash kwinangish Chot chetu cha Want. Anch twikal inangina ku mujimbu, tukumutumbish Yehova.—2 Korint 6:3, 4.
2. Mulong wa kwikal ishitwila, yisalijok ik tufanyidina kwipuk?
Bibil utukasikeshin “kwishitwish ku yom yawonsu yikata kuyipish mijimbu ni mipim yetu.” (2 Korint 7:1) Chinech chirumburikin anch tufanyidin kwikasikesh kwipuk chom chin chawonsu chikutwisha kuyipish mujimbu ap manangu metu. Yitongijok yetu yifanyidin kumusangaresh Yehova, chawiy tufanyidin kusal usu wa kwipuk yitongijok yiyimp. (Kuseng 104:34, NWT) Tufanyidin kand kwikasikesh kusadin mazu mawamp.—Tang Kolosay 3:8.
Yom ik yikwau yikutwisha kutwijondish ku mujimbu ap mu manangu? Yom yimwing yikutwish kuyipish mujimbu wetu. Chawiy, tukat kwipuk yom mud, ruwand, kapond, damb, ni kusadin nayimp drog. Anch twipuk yom yiney, tukwikal ni mujimbu uwamp ni tumekeshin anch tulimishin chipan cha mwom. Tukat kusal kand usu wa kwishitul mu manangu kusutil kurish nich yaku yiyimp mud kwichuk ni kutal pornografi. (Kuseng 119:37; Efes 5:5) Chikutwish kutukasiken kupandakan yaku yiney yiyimp, pakwez Yehova ukutwish kutukwash kusal mwamu.—Tang Isay 41:13.
ILEJA CHIKURIKINA
Jingunin mutapu tukata kumutumbish Yehova anch twinang ku mujimbu ni tal mutapu wa kupandakan yaku yiyimp.
3. Kwinang ku mujimbu kukat kumutumbish Yehova
Tukutwish kwijik chitongijok cha Yehova piur pa kwinang anch twashinshikin yijil yayinkishay in Isarel a pakur. Tang Kubudik 19:10 ni 30:17-19, kupwa isambinany yipul ey:
Maverse minam mamekeshin anch Yehova umening mutapu ik kwinang ku mujimbu?
Yisalijok ik yiwamp yikukukwasha kwinang ku mujimbu chisu chawonsu?
Chitin chisu ni usu mulong wa kwinang ku mujimbu. Pakwez tukutwish kusal mwamu chikalap nchik ndond tushicha ap uvud wa nfalang tukweta. Talany VIDEO, kupwa isambinany chipul ech:
Kulam nawamp yom yetu ni kuyinangish kukutumbish mutapu ik mudimu wa kulejan?
4. Lik yisalijok yiyimp
Yehova ukutwish kukukwash kupandakan chaku chiyimp chin chawonsu
Anch ukat kunang ruwand ap madrog, ukutwish kamu kuman anch chikasiken kulikap yom yiney. Yom ik yikutwisha kukukwash? Tal yibudikin yiyimp yikutwisha kwikalaku. Tang Mateu 22:37-39, ni isambinany yibudikin ya ruwand ni drog pa . . .
urund wa muntu ni Yehova.
antu a mu dijuku diend ni antu akwau adiay nend pamwing.
Fund yom ufanyidina kusal mulong wa kulik chaku chiyimp.a Talany VIDEO.
Tang Filip 4:13, kupwa isambinany chipul ech:
Kwikal ni chaku cha kulembil, kwilej Bibil ni kukumangan chisu chawonsu kukutwish mutapu ik kumukwash muntu kulikap yaku yiyimp?
5. Rishikish yitongijok ni yisal yiyimp
Tang Kolosay 3:5, kupwa isambinany yipul ey:
Mutapu ik twija anch pornografi, kutum ma sexto,b ni kwichuk yid yom yijondila ku mes ma Yehova?
Ov, utongin anch tukutwish kwikal ishitwila mud mukatinay Yehova? Mulong wak?
Jingunin mutapu wa kurish ni yitongijok yiyimp. Talany VIDEO.
Yesu wasadina chilakej mulong wa kumekesh anch tufanyidin kusal usu mulong wa kushal ishitwila mu manangu. Tang Mateu 5:29, 30, kupwa isambinany chipul ech:
Yesu kalondap anch tufanyidin kwisal nayimp ku mujimbu, pakwez wamekesha anch tufanyidin kwikasikesh kusal chom kanang. Mipak ik yikash yikutwishay muntu kukwat mulong wa kwipuk yitongijok yiyimp?c
Anch urishin mulong wa kupandakan yitongijok yiyimp, Yehova ukwatin nich usey usu usadina. Tang Kuseng 103:13, 14, kupwa isambinany chipul ech:
Anch urishin ni chaku chiyimp, verse winou wakukasikesh kal mutapu ik kudandamen kurish?
Kangal waziy!
Chiswapel kutong anch ‘nalikap kal kwam mulong nakangany kal.’ Pakwez tong bil: Anch mwin kubambil wipwakal ni wawa, chinech chirumburikinap anch wakangany kal kubambil ni ufanyidin kusambishiril kand. Chilik chimwing, kuchirikinamu chaku chey chiyimp kurumburikinap anch kwapwa kal ukutwishap kand kupandakan chaku chinech. Ni kujimwangeshinap usu wawonsu wasadina kal. Yisu yimwing, ukutwish kukashimuk wachirikinangamu kal chaku chey chiyimp—yikat kushikenang. Kangal waziy! Nich ukwash wa Yehova, ukutwish kupandakan chaku chiyimp.
ANCH MUNTU WAKWEL ANCH: “Yangandamin kal nakash. Nikutwishap kwimik.”
Verse ik ukutwisha kusadin mulong wa kumulej anch ku ukwash wa Yehova ukutwish kulikap chaku chiyimp?
YOM TWILEJA KAL
Tukat kumusangaresh Yehova anch twinang ku mujimbu, mu manangu, ni mu yisal yetu.
Ov, uvurikin?
Mulong wak chid cha usey nakash kwikal ishitwila?
Mutapu ik ukutwisha kwinang ku mujimbu?
Mutapu ik ukutwisha kulam yitongijok yey ni mwikadil wey wishitwila?
JINGUNIN KAND
Yom ik yiswapela ukutwisha kusal mulong wa kwinang ku mujimbu ap anch ukwetap nfalang jivud?
Jingunin yom ya ukwash ukutwisha kusal mulong wa kwimik kuna ruwand.
“Mutapu wa Kwimik Kuna Ruwand” (Lankany!, wa Ngond wa 5, 2010)
Tal yibudikin yiyimp ya kutal pornografi.
“Pornografi—Ov, Uwapin Bil Anch Uyipin?” (Chinong cha Kalam cha 1 Ngond wa 8, 2013)
Jingunin mutapu wapandakanay ikundj umwing chaku cha kutal pornorgrafi.
“Nakanganya Tupamp Tuvud Kurutu Nitwisha” (Chinong cha Kalam cha Ngond wa 7, 2016)
a Mutu wa mulong ulondina anch “Mutapu wa Kulik Kuna Ruwand,” udia mu chikunku Jingunin Kand mu dilejan dined ulejen yom ya ukwash yikutwishay muntu kusal mulong wa kulikap chaku chinech.
b Sexto urumburikin kutum ma mesaj, yipich ap mavideo makweta yom ya masandj mu kusadin telefon, tablet ap ordinater.
c Mulong wa kupandakan chaku cha kwichuk, tal mutu wa mulong “Mutapu ik Nikutwisha Kupandakan Chaku cha Kwichuk?” mu buku Yakul ya Ukwash ku Yipul Yikatau Ansand Kwiyipul, Volim wa 1, shapitre wa 25.