Yitwilejina Kusutil Kudiay Yesu

Piur pa Mwom wa mu Dijuku

Chom ik chikata kusadik mu uruw chikata kusangaresh majuku?

Uruw udi kwinung kutumbila. Pamwipulau Yesu anch chidi chiwamp kujip uruw, ndiy walonda anch: “Kand kal utanganyip anch, Wayitanga pakusambish watanga ikundj ni mband, walond anch: mulong wa chinech ikundj ukez kamusha tatukwend ni makwend, ukez kilimikin kudi mukajend; ni awiy aad akez kwikal mujimbu umwing? Chawiy awiy kadip aad, pakwez ikalang kal mujimbu umwing. Chawiy chabombakeshay kal Nzamb wachinung, pikil muntu wachauril. . . . Muntu wawonsu ukumulika mukajend wakad kusotan, wakachik kudi muntu windjing, ndiy wasotan kal.” (Mateu 19:4-6, 9) Anch antu atijadina alondul chiyul cha Yesu ni ashinshamen umwing kudi mukwau, awonsu adia mu dijuku akwiyov anch ashich zoong ni akwet musangar.

Mulong wak kumukat Nzamb kusadil majuku mikala mu musangar?

Yesu walonda anch: “[Ukamukata] Mwant [Yehova, NW] Nzamb wey nich muchim wey wawonsu, nich mupim wey wawonsu, nich manangu mey mawonsu. Chinech chawiy chijil chipandakena ni cha kusambish.” Chad chisu chijil cha kaad chipandakena? Yesu walonda anch: “Ukamukata mukwen [pamwing ni antu ashichinga piswimp ney—dijuku diey] mudi ey amwiney.” (Mateu 22:37-39) Komb chom cha usey mulong wa musangar mu dijuku chidi kwikal ni urund uwamp ni Nzamb mulong kumukat kwetu ndiy kutubachikin tukatijana muntu ni mukwau.

Mutapu ik ukutwishau angatan ni angachik kwisangaresh umwing ni mukwau?

Angatan akat kuyisangaresh akajau pakatau kulondul chilakej cha Yesu. Ndiy wipana mu rukat rend mulong wa mukajend wa chifanikesh, chikumangen. (Efes 5:25) Yesu walonda anch: “Mwan a muntu kezilap ni kusadish pakwez ni kusadil.” (Mateu 20:28) Yesu kadingap mwin kusadishan yom ku usu ap mwin kuyiswejin antu adinga mwishin mwend pakwez wadinga mwin kwitudish pantaliken nau. (Mateu 11:28) Chawiy lel, angatan, afanyidin kusadil ulabu wau mu mutapu uwamp ukutwisha kuyisadil yom yiwamp antu awonsu adia mu dijuku.

Angachik niyau atanyidinaku ku chilakej cha Yesu. Bibil ulondil anch: “Mutu wa Kristu ndiy Nzamb.” Kupwa uwejidinaku kand anch: “Mutu wa mband ndiy ikundj.” (1 Korint 11:3) Yesu kamanap kumuziyil Nzamb mudi kudi kumusupish. Ndiy wadinga umulimishin nakash Tatukwend. Yesu walonda anch: “Nikat kusal machuku mawonsu yom ya kumushimek ndiy.” (Yohan 8:29) Mband uziyidila ku umutu wa nfumwend nich rukat ni kalimish ka Nzamb ukusal yom yivud chakwel dijuku diend dikala mu musangar.

Chom ik chikutwishau anvaj kwilejin kudiay Yesu pa mulong wa an?

Yesu wadinga ni kusutish chisu pamwing ni an ni wadinga ni kusanger kutesh yikulondau ni yitonginau. Bibil ulondil anch: “Yesu wayitazuk an, walond anch: ‘[Yilikany, NW] anikanch eza kwau kudi am.’” (Luka 18:15, 16, MM) Dichuku dimwing, antu ayilonda nayimp ansangarum amwing adinga ni kulond patok ya ritiy rau mudiay Yesu. Pakwez Yesu wayijikitisha ansangarum inay, ni wayela antu adinga ni kuyilond nayimp anch: “Ing! Ov kand kal utanganyip anch, Ey warijekina kal kushiman mukan mwa an akemp ni achidia kwamu?”—Mateu 21:15, 16.

Chom ik chikutwishau an kwilejin kudiay Yesu?

Yesu wayishila an chilakej chiwamp cha kusanger yom ya muspiritu. Padingay ni mivu 12, amutana “mu tempel, ushich mukach mwa alej ni kuyitesh ni kuyipol yom.” Kwadinga chibudikin ik? “Awonsu amutesha akwamoka mulong wa kwijik ni kwakul kwend.” (Luka 2:42, 46, 47) Chikalap nchik, Yesu kadingap ni chibeng mulong wa ronganyin rend. Pakwez ramwikadisha mwin kuyilimish anvajend. Bibil ulondil anch: “Ndiy wayiziyila.”—Luka 2:51, MM.

Anch usotin jinsangu jikwau jivud, tal shapitre wa 4 mu buku Chom Ik Chakin Kamu Chifundishinay Bibil?a

[Dizu didia Kwishin kwa paj]