Rusangu Ruwamp Mu Jindim 500
MUKACH mwa njit ja an a angand ja mu Rwanda, ka chisak kakemp ka in kukarumuk kachina ku yikumbu yau, asha mapit mau. Pakwez, asala usu wau ni asenda tu maordinater tukemp-tukemp twa kusendin ku makas, aya nich mu yibeng ya in kuchin. Mulong wak? Chadinga mulong wa kwel anch adandamena nich kukarumun mikand yengamidina pa Bibil mu rudim ra Kinyarwanda.
Changadim umwing wa mu Aziy wa ku mutambu wa pakach pa Kurul ni Kwingangel wafunda pa ordinater wend mukach mwa uchuku, kura nich kuziy, chirungul, ni kukatwok chisu ni chisu kwa kasu ka nzembu kadinga ni kwimik mudimu wend wa kukarumun. Wadinga ni rutong ik? Wadinga usotin kulondul program wa kuchap nich watenchikau kal.
In kukarumun inay adi chikunku cha chisak cha antu 2 300 in kwipan ayinau asadila mudimu winou mu jindond 190 ni kusut mu mangand mawonsu. Akwet mivu kusambish ni 20 djat ku mivu piswimp 90 ni ipanin nakash pakad kuziy chakwel anch antu atwisha kutambul rongoj ra uruu udia mu Bibil mu jindim 500.—Kuburik 7:9.
Kushik Kudi Antu Alondila Jindim Kushalijan
Mu mivu ya katat, mudimu wa kukarumun wa Atuman a Yehova wayil kal kurutu nakash. Chilakej, mu muvu wa 1985, Chinong cha Kalam adinga ni kuchipalangesh kapamp kamwing mu jindim 23—pa chisu chinicha wadinga mudimu ujim nakash. Nlel, Chinong cha Kalam chidiaku mu jindim 176, ni manimero mawonsu minam akat kumabudish kapamp kamwing chakwel anch in kutang awonsu adia mu mangand atwisha kwilej awonsu rusangu rumwing pa chisu chimwing.
Mu jindim piswimp 50, Chinong cha Kalam ndiy jurnal umwing kusu upalangeshiningau chisu ni chisu. Mulong wak chidia mwamu? Yapu yikata kusal mudimu wa kwisak mu kuchap mikand kiyikatap kusanger kupalangesh mikand mu jindim ja pol pau. Pakwez Atuman a Yehova a pa mangand mawonsu akat kusang mapit mau chakwel anch Dizu dia Nzamb ni mikand yengamidina pa Bibil yikalaku kwawonsu kuyiswiridinau.—2 Korint 8:14.
Antu akat kusanger nakash uruu wa Bibil mu rudim rau. Chilakej, mikand yengamidina pa Bibil yasambishin kal katat kamu ak kubudik mu Miskito, rudim rilondilau kusu kudi antu piswimp 200 000 adinga mu Nicaragua. Mband umwing wita buku Recueil d’histoires bibliquesa mu rudim ra Miskito, ni paster wa pol pau wadingap pa chisu chamwinkishau buku winou. Pamanay mukand winou uwamp, paster wasota anch wikala wendendiy. Mband winou walika kumwinkishau, ni paster wasota kumwinkish 20 kg wa kafe chakwel amwinkisha mukand winou!
Pa kusut kwa mivu dikum, mikand yengamidina pa Bibil ayikarumwin kal mu jindim dikum ni jaad ni kusut ja an a ngand a mu Mexique, pamwing ni rudim ra Maya, Nahuatl ni Tzotzil. Mu mivu yikemp yakad kuwanyin dikum, kwikala antu avud ni yikumangen ya Atuman a Yehova mu rudim ra yijingidij mwi ngand yiney kudiokal ku uvud wa antu 72 kushik ku antu 1 200 ni kusut. Atuman a Yehova akat kukun uruu udia mu Bibil mu michim ya antu, pakwez akat kumulikin Nzamb amwinend akudisha mbut ja uyakin.—1 Korint 3:5-7.
Dikarumun dia Bibil dia Katat mu Jindim 80
Mu mivu ya katat, Atuman a Yehova asadil mudimu ukash mulong wa kupalangesh Les Saintes Écritures — Traduction du monde nouveau mwawonsu wa kabuj ap chikunku mu jindim 80. Kudi chibudikin ik? Kaman umwing wa Afrik wa Kurul walonda piur pa Bibil wa mu rudim ra Tswana anch: “Udi cham cha mudimu chamushena mudi ik. Ukwintwishish nisangaresha nakash Dizu dia Nzamb. Amufundin mu mutapu uswapela kutang ni usangareshina nakash.” Ikundj umwing wa mu Mozambique utangininga rudim ra Tsongan wafunda anch: “Ap anch ukwet mikand yawonsu yengamidina pa Bibil, kuburen Bibil kudi mudi kwikalaku kwa yidjimin ni milayilay ya nzaj pakad ruval kunak! Pakwez, ruval wanak kal nich kubudikin kwa Traduction du monde nouveau mu Tsongan.”
Mu mutapu umwing ujim nakash, antu akata kukarumun ni kupalangesh rusangu ruwamp rudia mu Bibil akat kuwanyish uprofet umwing wa pakur nakash. Yesu Kristu amwinend ndiy walonda anch: “Chifanyidin Rusangu Ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.”—Mateu 24:14, MM.
[Mazu madia kwishin kwa paj]
a Wapalangeshau kudi Atuman a Yehova.
[Graf udia pa paj wa 30]
(Chakwel kutan mazu mawonsu, tal mu mukand)
TRADUCTION DU MONDE NOUVEAU
Udiaku wa kabuj ap chikunku
1950 1
1970 7
1990 13
2000 36
2010 80
MIKAND YIKWAU
1950 88
1960 125
1970 165
1980 190
1990 200
2010 500
[Yipich chidia pa paj wa 24, 25]
In kwipan 2 300 akarumwin mikand yengamidina pa Bibil mu jindim 500
BÉNIN
SLOVÉNIE
ÉTHIOPIE
GRANDE-BRETAGNE