Kukwikal Chakin Kamu Nsudiel Ya Yisal Yiyimp!

NZAMB watwinkisha Dizu diend diapepilau, dimekeshina mulong wak antu asadin yom yiyimp. Ndiy watwinkisha kand want ipau ni ukaliweny wa kwilam, chakwel yitukwasha kutond pakach pa uwamp ni uyimp. (Kuvurik Yijil 30:15, 16, 19) Pachinech, tukutwish kujingunin yibachikin yiyimp yin yawonsu tukutwisha kwikal nich ni kusal yawonsu yiswiridina chakwel kuswimp. Chawiy lel, anch twalik kusal yom yiyimp tukez kwikal ni musangar pamwing ni antu atuyingumukina.—Kuseng 1:1.

Pakwez, kwikil chom chikasikena nakash mudi kupakish kwipuk kusal yom yiyimp, mulong mangand madandamedin kuyip nich yisal yiyimp yisadinau kudi ambay netu. Bibil ubabeshin anch: “Ijik anch, machuku ma kwinsudiel makez kikal ma mar nakash.” Mulong wa kulejan yikeza kusal anch machuku mikala “ma mar nakash,” Bibil wadandamena kulejan anch: “Antu akez kikal in kwikat ayinau, in kukat nfalang, in kwibaz, in kwishimek, in kumusaal Nzamb masaal, in kuyibwambwil anvajau. Akez kikal akad kujikitishang, akad kulimish yom yitumbila. Akwikal in michim yichinchikina akad kwitiy jinkand, in matungu akad kwikand ayinau, in chisum, in kukis yom yiwamp. Akez kikal in kutungunijan matungu, akad kubangaku antu akwau, in kwitutul, in kukat yom ya kwisangaresh ayinau kupandakan kumukat Nzamb. Akufanakan yisalijok mudi in kwitiyij, pakwez a kulik ukash wa ritiy rakin, chawiy ey yichina antu inay kulemp!”—2 Timote 3:1-5.

Wamen kal pamwingap dizu “machuku ma kwinsudiel” mu mazu ma uprofet majimbwilau kiur oku. Ov, chinech chirumburikin ik kudi ey? Mudi muteshinau antu avud, kulond anch “machuku ma kwinsudiel” kumekeshin anch chom kanang chikez kushik kwinsudiel. Ov, chikutwish kwikal chom ik? Talany yom yakanay Nzamb mu Dizu diend.

Antu ayimp akez kuyishesh awonsu.

“Mulong kwashal kal kachisu kakemp, chad antu ayimp kakwikalakup kand. Anch wayikimbap nchik, kiukez kayimanap kand. Pakwez itudishina akez kaswan ngand, akez kasangar nakash ni kuzangijal mu chisambu”—KUSENG 37:10, 11.

“[Yehova] ukat kuyichidij antu awonsu amukatila ndiy, pakwez ukuyishesh antu ayimp.”—KUSENG 145:20.

Kukwikalap kand kuyizengol antu.

“Ukat kumukamunin chimanamar umutazukina, ni kazwendj kand uburedina mwin kumukwash. Ukat kuyikwol ku kuzengol ni ku chisum. Mom yau yikwet usey kudi ndiy.”—KUSENG 72:12, 14.

“Mulong yom yatangay yikutwish kudiokal kand iyinau mu uswik wa yom yivundila, ni kwez ku kwikol kwa uyaj wa an a Nzamb.”—ROM 8:21, TMK.

Antu akez kuwanyish maswir mau ma ku mujimbu.

“Antu awonsu akez kashakam mu chisambu mu yir yau ya mitond ya nviny, ni mitond ya nfung. Kwikil muntu ap umwing ukeza kayakamish.”—MIKE 4:4.

“Awiy akez katung yikumbu ni kushakamamu ayinau. Akez kadim yir ya mitond ya nviny ni kudia mabuj mau. Awiy kakez katungap chakwel muntu mukwau ashakamamu, ap kakez kadimap chakwel muntu mukwau adia. Antwam akez kazangijal mulong wa midimu ya makas mau.”—ISAY 65:21, 22.

Kutentam kukez kupandakan.

“Ov, Nzamb kakez kayiyingishap antwend akata kumulembijek muten ni uchuku . . . ? Nakulejany, Ndiy ukez kayiyingish swa.”—LUKA 18:7, 8.

“Mulong [Yehova] ukatil kutentam, kakuyilikangap antwend a kashinsh. Ndiy ukat kuyilam chikupu.”—KUSENG 37:28.

Choy akez kuchidiosh ni kuswinkeshap kutentam.

“Awiy akez kilej dirumburish ditentamina.”—ISAY 26:9.

“Tukat kuchingej maur masu ni mangand masu mudi mwashilaumu Nzamb. Chad kwinikwa kwawiy kukeza kikal kutentam.”—2 PITA 3:13.

Nlel Unou—Antu Akat Kukarumuk

Chakin kamu, etwawonsu tukez kusanger ya kushilamu yiney. Pakwez ukashinsh ik udiaku umekeshina anch yom yiney yikez kusadik? Mulong uman umekeshina anch yakushilamu ya Nzamb yikez kwikal yakin umeken nlel unou. Ov, udi uman ik? Udi uman wa kwel anch tutikit twa antu adia mu mangand mawonsu nlel unou akwet musangar wa kulik mikadil ya choy, ya masandj, ap ya chisum ni ileja kwikal antu a kashinsh, awamp, ni a chisambu. Nlel unou, Atuman a Yehova, adia uvud wa tunan sambwad ni kusut, adia mu ukadivar wa mangand mawonsu pakad mipak ya ulombu wa chikit, ya kabil, ya wan a ngand, ya chipolitik, ni ya nfalang, yaleta rukis, chisum, ni kujipijan mu mivu yisutina.a Kukarumuk kwinoku kusadikina nlel unou kuletin mufulandal ukash wa kwitiyij anch kushilamu kwa Nzamb kukez kuwanyin pa mangand mawonsu.

Pakwez, chom ik chikeza kukarumun yom mwamu? Chakul chidi mu kushilamu kukwau kwa Bibil, kwafundau kudi muprofet Isay. Ndiy wafunda anch:

“Chawiy kangol ni mukoku akez kashakam pamwing nich chisambu. Chisump ukez kalal pamwing ni mwan a mpemb. Mwan a ngomb, ni mwan a ntambu akez kadil pamwing. Chad mwanikanch ukez kayilam. . . . Ikwal a ntambu ukez kadia masuku mudi ngomb. Mwan uchidia ku mayel ukez kasengan piswimp ni isilantat, ni mwan wasumukina kal ku mayel ukez katek chikas ku dibuku dia nnak wa ulemb. Kukez kikalap chom cha ubaj ku Sion, wawiy mukandu utumbila wa Nzamb. Ngand yikez kizul nich ronganyin ra [Yehova], mudi mukata kwizul mem mu karung.”—Isay 11:6-9.

Ov, uprofet winou wisambidin ching kusu chisu chikezau anam kushakam pamwing ni antu? Bwat, kukwikal yom yivud kupandakenamu yiney. Tal mutapu chisambidina chikunku cha nsudiel cha verse winou piur pa chom chikeza kulet kukarumuk kwinoku: “Ngand yikez kizul nich ronganyin ra [Yehova].” Ov, ronganyin ra Nzamb rikutwish kukarumun mwikadil wa nnam? Bwat kwau. Pakwez, ukutwish kuyikarumun antu! Uprofet winou wabwaka anch antu akutwisha kwikal ni yibachikin ya anam akez kayidiosh ni akez kukudish ngikadil ya win Kristu mulong wa kwilej ni kusadil yilejenay Bibil.

Tal chilakej cha Pedro.b Ndiy watonga anch wading urishin mulong wa kutentam pandamay mu dirijek dia ateroriste. Kupwa kwa kumwijidish, amwinkisha mbil ja kushesh yikumbu ya ampurish. Padingay ni kwirijek chakwel asala mwamu, amukasa. Pedro wasutisha angond 18 mu rukan, mwadandamenay nich mujikit wend uyimp. Pa chisu chinicha, mukajend a Pedro wasambisha kwilej Bibil ni Atuman a Yehova. Pamudioshau mu rukan, Pedro ni ndiy wasambisha kwilej Bibil. Ni yilejay piur pa Yehova Nzamb yamubachika ku kushiken ku kukarumuk nakash mu mwikadil wend ni mu yitongijok yend piur pa mwom. Pedro ulondin anch: “Nimujikitishin Yehova mulong kinajipap kwam muntu ap umwing mu mivu nasala midimu ya uteroriste. Katat nikat kusadin mpak ja musamun ja spiritu wa Nzamb, Bibil, mulong wa kuyinkish antu uruw wakin, wa chisambu ni wa kutentam—rusangu ruwamp ra Want wa Nzamb.” Pedro waya ap kand ku yikumbu ya ampurish yelay kushesh mulong wa kuyilej rusangu ra chisambu ni ra mangand makad chisum.

Usu ukash wa Dizu dia Nzamb ukutwisha kwikal padi antu udi diyingish dikwau ditukasikeshina chakwel twikal nich ritiy mu kushilamu kwa Nzamb anch disudiel dia yisal yawonsu yiyimp dikwikalaku. Mwaning, antu kakezap kudandamen kusal uyimp chikupu pakwez akez kukarumuk ni kwikal antu awamp. Piswimp ap Yehova ukez kumudiosh mwin kusambish yisal yiyimp, Satan Djabul, utakedila yom yiney, ukat kukasikesh milong yisadikina mu mangand. Bibil ulondin anch: “Yom yikwau yawonsu yidia mu mangand ayitakedin kudi Sakudimban.” (1 Yohan 5:19) Pakwez, piswimp ap ndiy ukez kumudjibul kulemp. Akez kayidiosh antu awonsu alikina nich chibud kudiokal mu mwikadil wau muyimp. Mwom ukwikal wamushena mudi ik pa chisu chinech cha yiyukish!

Ov, chom ik chifanyidinay kusal muntu chakwel ataninamu mu machuku minam ma kurutu? Vurik anch “ronganyin ra [Yehova]” rawiy rikarumwina mwom wa antu nlel unou ni rikez kakarumun mangand mawonsu mu machuku ma kurutu madia piswimp ap. Kusutil kukutambul ronganyin ra Bibil ni kurisadil mudi mwasalay—Pedro—niyey ukutwish kuchingejin kushakam mu mangand mukeza “kikal kutentam.” (2 Pita 3:13) Chawiy lel, tukukasikeshin chakwel usadila chisu chiukweta chakwel kutambul ronganyin ra Nzamb ni ra Yesu Kristu, mulong kusal mwamu kukez kurumburik mwom wa chikupu kudi ey.—Yohan 17:3.

[Mazu madia kwishin kwa paj]

[Dizu dirumburila chipich chidia pa paj wa 9]

Ni yey ukutwish kuchingejin kushakam mu mangand mukeza “kikal kutentam.”—2 PITA 3:13