Sambilany Bil Kusurib “Kutentam Kwend”

“Pakwez sambilany bil kusurib want wend ni kutentam kwend, chawiy lel yom yawonsu akez kananzukeshilip.”—MAT. 6:33 TMK.

1, 2. Ov, kutentam kwa Nzamb chom ik, ni kwimedin pa chom ik?

“SAMBILANY bil, kusurib want.” (Mat. 6:33, TMK) Nlel unou, Atuman a Yehova ij nawamp chiyul chinech chapanay Yesu Kristu mu Malejan mend ma pa Mukandu. Mu mwikadil wawonsu wa mwom wetu, tufanyidin kusal usu wa kumekesh anch tukatin winyikel wa Want ni tusotil kuziyil ku winyikel winou. Pakez tufanyidin kand kulam mu manangu chikunku cha kaad cha dizu dined, chilondila anch, “ni kutentam kwend.” Ov, kutentam kwa Nzamb chom ik, ni chirumburikin ik kusambil bil kuusurib?

² Dizu dia kusambish dia “kutentam” akutwish kudikarumun anch “yom yisotilay” ap “kuwanyin.” Chawiy lel, kutentam kwa Nzamb kudi kuwanyin kwambatan nich yijil ni yany yend. Chidiay Sakatang, Yehova ukwet mbil ya kutek yijil piur pa uwamp ni uyimp, pa yom yitentamina ni yakad kutentam. (Kuj. 4:11) Pakwez kutentam kwa Nzamb kurumburikinap kutenchik yijil ya chamwamu, yikash ap yivud nakash. Pakwez, kwimedin pa untu wa Yehova ni pa ngikadil yend yijim ya kuburen kasolikany pamwing ni ngikadil yend yikwau yijim ya rukat, manangu, ni dikand. Chawiy lel, kutentam kwa Nzamb, kwambaten nich rusot ni rutong rend. Kuwejinaku ni yom yichingejinay kudi antu awonsu asotila kumusadin ndiy.

3. (a) Ov, chom ik chirumburikina kusambel bil kusurib kutentam kwa Nzamb? (b) Ov, mulong wak tufanyidin kukasikesh yijil yitentamina ya Yehova?

³ Ov, chom ik chirumburikina kusambel bil kusurib kutentam kwa Nzamb? Mu kulond kuswapela, chirumburikin kusal rusot ra Nzamb mulong wa kumusangaresh ndiy. Mu kukimb kutentam kwend mudi kusal usu wa kushakam kwambatan nich yany, yijil yend yiwanyidina ni kangal yetwetu. (Tang Rom 12:2.) Mashakamin minam mitin kwikal arund akin enday Yehova. Chirumburikinap kuziyil ku yijil yend mulong wa wom wa dipup. Pakwez, rukat retu mulong wa Nzamb ritubachikin kusal usu wa kumusangaresh kusutil ku kuchidij yijil yend, pakad kwitekin yijil yetu ayinetu. Twij anch chiwapidil kusal mwamu, chawiy chom chakashinsh tufanyidina kusal. Tufanyidin kukat kutentam mudi kamu mwakatay Yesu Kristu, Mwant wa Want wa Nzamb.—Heb. 1:8, 9.

4. Ov, mulong wak chidi cha usey kukimb kutentam kwa Nzamb?

⁴ Ov, mutapu ik kukimb kutentam kwa Yehova kudi kwa usey? Tongin pa yom yiney: Kupak kwa kusambish kwashikena mu chir cha Eden kwading kwimedin piur pa kuman anch Adam ni Ev akutwish kwitiyij mbil ya Yehova ya kutek yijil ap bwat. (Dis. 2:17; 3:5) Kuburen kwau kusal mwamu, kwayiletina anau mar ni rufu. (Rom 5:12) Mu mutapu ukwau, Dizu dia Nzamb dilondin anch: “Muntu ukata kulondul kutentam ni kudimuk, ukutan mwom ni kutentam.” (Jinsw. 21:21) Mwaning, kusambel bil kukimb kutentam kwa Nzamb kukat kulet urund wa piswimp ni Yehova, ni kusal anch tumana dipandish.—Rom 3:23, 24.

Ubaj wa Kwikal in Kutentam ku Mes Kwetu Ayinetu

5. Ov, ubaj ik utufanyidina kwipuk?

⁵ Payifundinay in Kristu adinga ku Rom, kambuy Paul wakasikeshina piur pa ubaj utufanyidina etwawonsu kwipuk anch tusotin kutwish kusambel bil kusurib kutentam kwa Nzamb. Pisambinay piur pa ambay nend in Yuda, Paul walonda anch: “Am nidi Kaman wau, awiy akata kwipan nakash kudi Nzamb. Pakwez kijap mutapu uwamp wa kwipan. Awiy kwovilap kurumburik kwa mutapu ukata kuyikandishau antu atentamina kudi Nzamb. Chad apakisha kurijek mutapu wa kutentam kwau ayinau. Chawiy alika kuziyil ku mutapu ukata kutentamishau antu kudi Nzamb.” (Rom 10:2, 3) Kwambatan ni yalonday Paul, in kwifukwil inay kakezap kutesh nawamp kutentam kwa Nzamb mulong ading akwatiken nich kupakish kutek kutentam kwau ayinau.a

6. Ov, mwikadil ik tufanyidina kwipuk, ni mulong wak?

⁶ Chom chimwing chikutwisha kutuwish mu mupit winou chidi anch twaman mudimu utukata kumusadil Nzamb mudi kubambel, ni kwiyisikej ayinetu ni antu akwau. Mwikadil winou ukutwish kutubachik swa ku kutongijokin nakash pa manangu ni chaku chetu chiwamp. Pakwez, anch twasambisha chakin kamu kusal mwamu, twela kuvuramen kutentam kwa Yehova. (Gal. 6:3, 4) Chitongijok chiwamp chitubachikina kusal yom yitentamina chidi cha rukat retu mulong wa Yehova. Anch twasal usu wa kumekesh kutentam kwetu, yitulondina anch tumukatin yikutwish kwikal ya chamwamu.—Tang Luka 16:15.

7. Ov, mutapu ik wisambinay Yesu piur pa kwikal in kutentam ku mes kwa muntu amwinend?

⁷ Yesu wading wakamin piur pa “antu ading achingejin kuwap kwau ayinau, chad ayidiwol antu akwau.” Ndiy wisambina piur pa mulong wa kwikal in kutentam ku mes kwa muntu amwinend kusutil ku kulejan chishimu chinech anch: “Kwading antu aad akaninika kuya ku chikumbu cha Nzamb mulong wa kulembil. Umwing wading Mufaris, mukwau wading mwin kulambwish yitad. Mufaris wimana pa amwinend, walembila anch: ‘A! Nzamb, nakujikitish mulong am kinikwetap ris, kinikwetap makasu, ap kwimik dis mudi antu akwau. Nakujikitish kand mulong am kinidiap mudi mwin kulambwish yitad winou. Nikat kujilang yakudia tupamp twaad pa rubing, nikat kukwinkish ey chadikum cha mapit mam mawonsu.’ Pakwez mwin kulambwish yitad wimana kulemp ni Mufaris, katwishap kuzambul mes kutal mwiur. Pakwez wibula pa ntul, walembil anch: ‘A! Nzamb ngovilap am mwin yitil riy!’” Yesu washikena mu kulond mu wiswimp anch: “Nakulejany anch, mwin kulambwish yitad winou wayinga nich kurutu kwa Nzamb, chad waya kwol kwend pakwez Mufaris, bwat. Muntu mwawonsu ukata kwijimbish amwinend, akez kamushikumwish, pakwez muntu mwawonsu ukata kwishikumwish amwinend, akez kamujimbish.”—Luka 18:9-14.

Ubaj Ukwau wa—‘Kupandakesh Kutentam’

8, 9. Ov, chom ik chirumburikina ‘kupandikesh kutentam,’ ni kukutwish kutushikij ku kusal ik?

⁸ Ubaj utufanyidina kwipuk aulejen mu Mulej 7:16 anch: “Kangal wapandakesh kutentam, ap kangal wawejaku nakash manangu. Ov, mulong wak wisheshina amwiney?” Mwin kufund Bibil wapepilau wadandamena kutwinkish diyingish dia kwipuk mwikadil wa mutapu winou mudi mulejenau mu verse wa 20 anch: “Pa mangand pikil muntu ap umwing utentamina wakad kusal yitil.” Muntu ‘upandakeshina kutentam’ ukat kwitekinang yijil yend amwinend piur pa kutentam ni kuyirumburish antu akwau kusutil ku yijil yiney. Chikwau kand, ukangeny kwijik anch kusutil ku kusal mwamu, utekin yijil yend piur pa yijil ya Nzamb ni wimekeshin amwinend anch katentaminap kudi Nzamb.

⁹ ‘Kupandakesh kutentam,’ ap mudi mukarumwinau mu ma Bibil makwau, anch ‘kutentam mu mutapu upandikena’ ap kwikal ‘mwin kutentam upandikena’ kukutwish ap kutubachik kutadik piur pa mutapu ukatay Yehova kupwish milong. Pakwez tufanyidin kuvurik anch, anch twatadik piur pa kutentam kwa mipak ya Yehova, chimeken anch twasambish kal kutek yijil yetu yitentamina piur pa yijil ya Yehova. Chikwikal mudi tumutekin Yehova mu choziu ni kumurumburish kusutil ku yijil yetu ayinetu piur pa uwamp ni uyimp. Pakwez Yehova ndiy kusu ukweta mbil ja kutek yijil yitentamina, pikil etu!—Rom 14:10.

10. Mudi Job, ov, chom ik chikutwisha kutubachik ku kumurumburish Nzamb?

¹⁰ Ap anch kwikil muntu pakach petu ukeza kusot kumurumburish Nzamb kwa kwisotil, mwikadil wetu wa kuburen kuwanyin ukutwish kutubachik tuwila mu mupit winou. Chinech chikutwish kushiken pitumena anch kudi chom chimwing chakad kutentam ap anch ayinetu twaman mar nakash. Ap Job muntu ushinshamena wasala ni ndiy uyimp winou. Cha kusambish alejana anch Job wading “uyingila, chad kand utentamina. Wading ni kumwov Nzamb wom ni kwiyep ku kuyip.” (Job 1:1) Pakwez pamanay Job mar makash malondulijadina, ndiy wamekana kwikal wakad kutentam. Chinech chamubachika Job ku “kwiyingish nich amwinend kurutu kwa Nzamb.” (Job 32:1, 2) Job wafanyidina kuswimp mutapu wend wa kutong. Chawiy lel, tufanyidinap kushimok anch yisu yimwing, twashiken ayinetu ku kuwil mu mwikadil wa chilik chimwing ni Job. Anch chinech chashiken, ov, chom ik chikutwisha kutukwash chakwel tuswimpa mutapu wetu wa kutong?

Twijingap Milong Yawonsu

11, 12. (a) Ov, chom ik tufanyidina kuruvurik, anch twaman anch kudi chom kanang chidia chakad kutentam? (b) Mulong wak antu amwing akutwish kutesh anch chishimushimu cha Yesu cha in kusal mudimu wa mu chir cha nviny chilejen chom chimwing chakad kutentam?

¹¹ Chakusambish chitufanyidina kuvurik chidi anch twijingap milong yawonsu. Chinech chading chakin piur pa Job. Ndiy kadingap wija chom piur pa kukumangan kwa an a Nzamb angel mwiur pasambishay Satan kumufish nich. (Job 1:7-12; 2:1-6) Job kajinguninap anch yikokujol yend ayileta kudi Satan. Pakwez, twijap anch Job wading wij anch Satan udi nany chakin kamu! Chawiy lel, ndiy widimba anch milong yend ayileta kudi Nzamb. Mwaning, chiswapeling kushiken ku kulond nayimp anch twijap milong yawonsu.

¹² Chilakej, shinshikin piur pa chishimushimu cha Yesu cha antu in kusal mudimu mu chir cha nviny. (Tang Mateu 20:8-16.) Pinap, Yesu ulejen anch mwin chikumbu uyifutina in mudimu end awonsu nfalang uvud wa chilik chimwing, ap anch asala mudimu dichuku diakabuj ap asala saa umwing kusu. Ov, ukutwish kutong nchik pa chinech? Ov, chinech chimeken anch chidi chom chitentamina? Ukutwish pamwing ap kuyijingunin swaa antu asala mudimu dichuku diakabuj pa muten ukash. Chimeken chakin kamu anch ading afanyidin kuyifut nfalang jivud! Anch twimedin pa chitongijok chinech, mwin chikumbu ukumekan anch kakwetap rukat ni kadiap mwin kutentam. Ap anch chakul chend chayakulay in mudimu inay ita nfalang jau, chikutwish kumekan anch udi mwin kusadil nayimp ulabu wend. Pakwez, ov, twij milong yawonsu yasala ayinkisha mwamu?

13. Ov, chitongijok ik chikwau tukutwisha kwikal nich pantaliken nich chishimushimu cha Yesu piur pa in kusal mudimu mu chir cha nviny?

¹³ Shinshikinany amboku chishimushimu chinech mu mutapu ukwau. Choviken anch mwin chikumbu ulejenau mu chishimushimu chinech wamana anch antu awonsu inay ading aswiridina kudish majuku mau. Mu chirung cha Yesu, in kusal mudimu mu chir ading ayifutin nfalang ja pa dichuku. Majuku mau madinga ni kuchingejin piur pa difut dia dichuku ni dichuku. Nich chinech mu manangu, tongin bil piur pa mwikadil wa antu atanau kudi mwin chikumbu urel ni pakwez asala saa umwing kusu. Pamwing ap kelap kutwish kudish nawamp majuku mau ni nfalang ja chisu chimwing; chikwau kand, awiy asota pamwing ap kusal mudimu ni achingela dichuku diakabuj mulong wa kuyilej chifanyidinau kusal. (Mat. 20:1-7) Chadingap kurumbuk kwau anch kayinkishap mbil ya kusal dichuku diakabuj. Kwikil chom chimekeshina anch alika kusal mudimu kwa kwisotil. Tongin bil anch wachingela dichuku dia kabuj, mulong wij anch antu akwau akez kutaninamu mu yiukeza kutambul dichuku dinidia. Ukez kujikitish mud ik pa kutan mudimu umwing wa kusal—ukez kukashimuk mudi ik pa kutambul difut diwanyidina mulong wa kudish dijuku diey!

14. Ov, dilejan ik dia usey twilejina piur pa chishimushimu cha chir cha nviny?

¹⁴ Katat shinshikinany amboku pa yom yasalay mwin chikumbu. Kamufutap muntu ap umwing nfalang jikemp. Pakwez, wayimana antu awonsu a mudimu mudi antu aswiridina nfalang mulong kwikwash ayinau ni majuku mau. Ap anch mwikadil winou ukutwish wamekan mudi anch kwading antu a mudimu avud, mwin chikumbu wela kutaninamu mu mwikadil winou mulong wa kumusadil mudimu wakad kuyifut nfalang jivud. Pakwez ndiy kasalap mwamu. Antu a mudimu end awonsu achirika kwol kwau ni yakudia yiwanyidina mulong wa kudish majuku mau. Kushinshikin pa yom yiney kachom ni kachom kukutwish kuswimp yitongijok yetu piur pa yom yasalay. Mupak wend wading wa rukat ni kwadingap kusadin kuyimp kwa ulabu. Ov, dilejan ik tukutwisha kutaninamu? Shinshikinany yom yimwing yikutwisha kutubachik chakwel twikala ni yitongijok yiyimp. Chikwau kand, chishimushimu chinech chilejen kujimb kwa kutentam kwa Nzamb, kwakad kwimen pa yijil ni pa usu wa muntu amwinend.

Chitongijok Chetu Chikutwish Kwikal Chiyimp ap Chikweta Mipak

15. Ov, mulong wak chitongijok chetu piur pa kutentam chikutwish kwikal chiyimp ap chikweta mipak?

¹⁵ Chom cha kaad chitufanyidina kuvurik piturishina nich mwikadil umwing ukutwisha kumekan mudi wakad kutentam chidi anch chitongijok chetu chikutwish kwikal chiyimp ap chikweta mipak. Akutwish kuchiyipish kudi kuburen kuwanyin, katond, ap yaku ya antu. Akutwish kuchikepish kand kudi kuburen kwetu kwa kujingunin yibachikin ni kuburen kwijik yidia chakin kamu mu michim ya antu. Pakwez, Yehova ni Yesu kakwetap mipak yiney.—Jinsw. 24:12; Mat. 9:4; Luka 5:22.

16, 17. Ov, mulong wak Yehova kasadilap chijil chend piur pa masandj pa chisu chasalay David chitil ni Batisheba?

¹⁶ Shinshikinany amboku pa rusangu ra masandj ma David masalay nenday Batisheba. (2 Sam. 11:2-5) Kwambatan nich chijil cha Moses, awiy afanyidina kuyijip. (Lev. 20:10; Kuv. 22:22) Ap anch Yehova wayipupa, ndiy kelap kusadil chijil chend. Ov, chinech chading kuburen kutentam ku mutambu wa Yehova? Ov, ndiy wamekesha katond kudi David ni kujiril yijil yend yitentamina? In kutang Bibil amwing atonga mwamu.

¹⁷ Pakwez, chijil chinech Yehova wachipana kudi ankalansambu akad kuwanyin, akad kutwish kwijik yom yidia mu muchim. Chikalap nchik mipak yau, chijil chinech chasala anch atwisha kurumburish nawamp. Chikwau kand, Yehova ukutwish kutang mu michim. (Dis. 18:25; 1 Jsng. 29:17) Chawiy lel tufanyidinap kuchingejin anch Yehova amukangesha kudi chijil chapanay kudi ankalansambu akad kuwanyin. Anch chading mwamu, ov, chinech chelap kwikal mudi kumukasikesh muntu umena nawamp chakwel adjala makalash ma mes masalau mulong wa kuyikwash antu akad kuman nawamp amana nawamp? Yehova watwisha kutang mu michim ya David nenday Batisheba ni kuman kukarumuk kwau kwakin. Patonginay pa chinech, ndiy wayirumburisha kwambatan nich kukarumuk kwinoku, nich ranaken ni rukat.

Dandamen Kusurib Kutentam Kwa Yehova

18, 19. Ov, chom ik chikeza kutukwash chakwel twipuka kumurumburish Yehova kusutil ku yijil yetu?

¹⁸ Chawiy lel anch twaman chisu chimwing anch kudi chom kanang chitumena mudi chidi chakad kutentam ku mutambu wa Yehova—ap anch twachitang mu rusangu ra Bibil ap chatushiken mu mwom wetu—kangal twamurumburishany amboku Nzamb kusutil ku yijil yetu ya kutentam. Vurikany anch twijap milong yawonsu ni chitongijok chetu chikutwish kwikal chiyimp ap chikweta mipak. Kangal twavuramen anch ap anch “muntu wajiman kakutwishap kuwanyish yom yitentamina kurutu kwa Nzamb.” (Jak. 1:19, 20) Mu mutapu winou, michim yetu yikezap “kumujimen [Yehova].”—Jinsw. 19:3.

¹⁹ Mudi Yesu, dandamenany kwitiyij amboku anch Yehova amwinend kusu ndiya ukweta mbil ya kutenchik chijil piur pa yom yitentamina ni yiwamp. (Mar. 10:17, 18) Ikasikeshany kwikal nich ‘ronganyin rakin’ ap ‘ronganyin ra kashinsh’ piur pa yijil yend. (Rom 10:2; 2 Tim. 3:7) Kusutil ku kuyitiyij ni kwambatish mwom wetu ku rusot ra Yehova, tukez kumekesh anch tukimbin bil “kutentam kwend.”—Mat. 6:33.

[Dizu didia kwishin kwa paj]

Ov, Ukutwish Kuvurik?

• Mulong wak chidi cha usey kusurib kutentam kwa Yehova?

• Ov, ubaj ik waad utufanyidina kwipuk?

• Mutapu ik tukutwisha kusurib bil kutentam kwa Nzamb?

[Chipich chidia pa paj wa 17]

Ov, dilejan ik twileja kusutil ku chishimushimu cha antu aad alembila ku tempel?

[Chipich chidia pa paj wa 18]

Ov, kwading kuburen kutentam payifutau antu a mudimu asala pa saa wa 11 chilik chimwing ni antu asala dichuku diakabuj?