Kurish Nich Mar ma Chitangil
Mulong wa kupandakan mu kudandamen ni kusheshan kwa mar ma chitangil, ov chom ik chikutwishay muntu kusal chakwel arisha nich? Talany amboku yom kushalijan ya usey tukutwisha kusal.
Diokalany kwindond kudia yom yikash. Bibil ulejen anch: “Muntu wa manangu anch waman yom yikash, ukat kwijindjik, pakwez antu amwamu akat kuya kurutu ni kwimesh mar.” (Jinswir 22:3) Chitwishikin kusadil chiyul chinech cha manangu mulong wa mar ma chitangil. Anch kudi kubabesh piur pa kasu ka volkan, kwizul kwa men mu ul, ap kwez kwa chipepil ap rinkind mukash, manangu makutwish kuyibachik antu adia mwindond yikeza kusadik mar ma chitangil chakwel abudika ni aya kwindond yiwamp. Mulong mwom udi wa usey kupandakanamu chikumbu ap yom yikwau ya ku mujimbu.
Kudi antu amwing, chitwishikin kwipuk kuya kushakam kwindond kukutwisha kusalik mar ma chitangil. Muntu nyikel umwing ulejen anch: “Mar ma chitangil makat kusadik yisu yivud mu jindond jidia piur. Kachikunku kakemp nakash ka Divu kakutwish kwikal nich mar makash ma chitangil.” Chinech chikutwish kwikal chakin mu jindond jidia piswimp ni karung ap piswimp ni jinjil ja kuzal kwa divu. Anch ukutwish kwipuk kushakam mu jindond mukutwish kusadik mar ma chitangil, ukez kwipuk kuman mar ma chitangil.
Tenchik yom. Chikalap nchik yom ukutwisha kutenchik, ukutwish pamwing ap kuwil mu mar makad kuchingejin. Chitwishikin kurish nich anch watenchik yom kurutu kwa chisu. Chinech chikwatijadin kamu nich chiyul twajimbulang chidia mu Jinswir 22:3. Ov, warijekin kal yom ya usey yikutwisha kukukwash ni kwikal tayad mulong wa kuchin? Buku 1-2-3 wa Malejan piur pa Mar ma Chitangil ulejen anch chifanyidin kutenchik yom yiney: Yom ukutwisha kusadil pa ndond ya Kusambish, mem ma kuna, yakudia yakad kuvund, ni mikand ya usey. Chiwapin kwisambin pamwing ni dijuku diey piur pa mutapu ukutwisha kwikal mar ma chitangil makeza kusadik.
Lam urund wa piswimp ni Nzamb. Chinech chikutwish kukukwash yisu yawonsu. Bibil ulejen piur pa Nzamb anch udi “mwin riy, ndiy Nzamb ukata kupan kwongoj kwawonsu! Ndiy ukata kutwongoj mu mar metu mawonsu.” Verse mukwau ulejen anch ndiy udi Nzamb “ukata kuyongoj antu aziyila ku michim.”—2 Korint 1:3, 4; 7:6.
Mwaning, Nzamb ukat kubangin chakin kamu piur pa yom yikata kuyishiken antu atekina ritiy rau mudi ndiy. Ndiy udi Nzamb wa rukat ni upanin dikasikesh dikash mu mitapu kushalijan. (1 Yohan 4:8) Chifanyidin kulembil chakwel tutambula ukwash wa spiritu utumbila ukash wa Nzamb mu mikadil yawonsu, pakad kuchingejin ching kusu yilay. Spiritu utumbila ukutwish kutuvurish maverse ma Bibil makutwisha kuyikasikesh ni kuyitudish antu amena mar. Chakin kamu atushalapol ashinshamena a Nzamb, awiy akutwish kwiyov mudi mwiyovay David, mwant wa pasak wa in Isarel, walonda anch: “Mwaning, anch nasutilip nchik mu ruwengil ra urel wa kufa kinikwovip wom wa kuyip, mulong Ey udi kal niyamam, mukombu wey ni diland diey yikat kwingongojang.”—Kuseng 23:4.
Ambay in Kristu akat kukwashijan umwing ni mukwau. Mu chitot cha mivu chakusambish, muprofet mwin Kristu watazukau anch Agabus walejana anch “kukez kikal kamungun mujim pa mangand mawonsu; wasuta mu machuku ma Claude.” Kamungun kashika mu mutapu ukash kudi in kwilej a Yesu adinga mu Yudeya. Ov, chom ik chasalau in kwilej pateshau anch mar makat kuyishiken ambay nau in Kristu? Rusangu rilejen anch: “in kwitiyij a ku Antiosh atonda muntu ni muntu kutum chom mudi mukutwishay kusal, mulong wa kuyikwash anamakwau mu ritiy ashicha mwi ngand ya Yudeya.” (Midimu 11:28, 29) Awiy itiyija nich rukat mulong wa kuyikwash.
Pakata kushiken nlel unou mar makash, atushalapol a Nzamb asadining niyawiy mwamu. Atuman a Yehova ijiken nawamp anch akat kuyikwash ambay nau akaritiy. Chilakej, pashikena kuzal kwa divu mu Chili pa Kasan 27, 2010, Atuman a Yehova itiyija swaa kuyikwash antu adinga mu mar. Karla wadinga ni chikumbu chajiya mu mem pasuta rinkind mukash utazukinau anch tsunami, walejana anch: “Chading chikasikeshina mud ik pa kuman anch dichuku dialondulaku [ambay netu Atuman] adiokala ku ul ukwau mulong wa kwez chakwel atukwasha. Pakad ntad, Yehova watukasikesha kusutil ku uwamp wa in kwipan inay. Niyova kwikal ukatinau ni diking.” Ngakend, wakad kwikal Kaman, wamana ukwash winou. Washikena ku kulond anch: “Chinech chishalijadin nakash nich yom nadinga nimena mu egliz wam.” Yamanay yamubachika kuyit Atuman a Yehova chakwel ileja nend Bibil.
Kwikal mu urund ni antu amukatina Nzamb kukutwish kwikal kwa ukwash nakash pa chisu cha mar. Ap mwamu, ov, kukez kwikal chisu chikeza kulik kwikalaku kwa mar ma chitangil pa divu? Talany amboku yilondinay Bibil pa mulong winou.
[Chipich chidia pa paj wa 6]
Ov, warijekin kal yom ya usey yikutwisha kukukwash ni kwikal tayad mulong wa kuchin?
[Chipich chidia pa paj wa 7]
Chifanyidin kulembil chakwel tutambula ukwash wa spiritu utumbila mu mikadil yawonsu, pakad kuchingejin ching kusu yilay
[Chipich chidia pa paj wa 7]
Ambay in Kristu akat kukwashijan umwing ni mukwau mulong wa kurish nich yibudikin ya mar ma chitangil
[Chipich chidia pa paj wa 7]
“Niyova kwikal ukatinau ni diking”