Mulong Wak Chifanyidin Kutek Mudimu wa Yehova pa Ndond ya Kusambish?
“Kan kam kakez kulejanang kutentam kwey ni dipandish diey muten wawonsu.” —KUS. 71:15.
MUTAPU IK UKUTWISHA KWAKUL?
Ov, yom ik yamekesha mwikadil wa mwom wa Nowa, wa Moses, wa Jeremiy, ni wa Paul?
Ov, chom ik chikutwish kumekesh ku mutambu wey mutapu usadidila mwom wey?
Ov, mulong wa ukwatin mupak wa kutek mudimu wa Yehova pa ndond ya kusambish?
1, 2. (a) Ov, chom ik chimekeshinau kudi muntu wipanina amwinend kudi Yehova? (b) Mutapu ik tukutwisha kutaninamu kusutil ku kushinshikin yatonday Nowa, Moses, Jeremiy, ni Paul?
ANCH wipan ni wikal mwin kumulondul Yesu ni kutambul dibatish, chirumburikin anch walondul kal jinzau ja usey nakash. Kwipan kwey kudi Nzamb udi mupak wa usey nakash ufanyidina kukwat. Chidi mudi ulondin anch: ‘Yehova, nisotin anch wikala Mwant wam mu mikadil yawonsu ya mwom wam. Nidi kashalapol wey. Nisotin wileja mutapu wa kusadil chisu cham, chom ik nifanyidina kutek pa ndond ya kusambish, ni mutapu ik nifanyidin kusadil mapit mam ni ukaliweny wam.’
2 Anch udi mwin Kristu wipanina kal, chawiy chakin kamu chom washilamu kudiay Yehova. Chifanyidin kukujikitish mulong wa mupak wey; mulong wadinga utentamina ni wa manangu. Ov, mulong wak kwitiyij anch Yehova udi Mwant wey kukwet usu pa mutapu ufanyidina kusadil chisu chey? Chilakej cha Nowa, Moses, Jeremiy, ni kambuy Paul chikutwish kutukwash kushinshikin pa chipul chinech. Muntu ni muntu pakach pau wading ukat kumusadil Yehova ni muchim umwing. Mwikadil wetu udi wa chilik chimwing ni wa awiy. Mipak yakwatau kwambatan ni yom yasalau yikutwish kutukasikesh chakwel tushinshikina pa mutapu tukutwisha kusadil chisu chetu.—Mat. 28:19, 20; 2 Tim. 3:1.
KURUTU KWA MABEB
3. Ov, mutapu ik chidia chirung chetu chilik chimwing ni cha Nowa?
3 Yesu wilikeja chirung cha Nowa ni chisu chetu. Ndiy walonda anch: “Yom yasuta pa chirung cha Nowa, yawiy kand yikez kusut pa chirung cha Mwan a Muntu.” Antu ading ni “kudiang ni kuna, amakundj ni amband atijananga djat ni ku dichuku diandamay Nowa mu waat. Awiy kijikap chom chikushika djat ni pezina mabeb mayijiyish awonsu shutit.” (Mat. 24:37-39) Nlel unou antu avud kakatap kubangin mu mwom wau piur pa kuswapej kwa chirung chetu. Kakap kutesh kubabesh kupaninau kudi atushalapol a Nzamb. Antu avud kakatap kwitiyij anch Nzamb ukez kuyishesh antu ayimp—mudi mwalikau kwitiyij kudi antu a pa chirung cha Nowa. (2 Pita 3:3-7) Chikwau kand, mu mwikadil winou uyimp, ov mutapu ik wasadilay Nowa chisu chend?
4. Ov, mutapu ik wasadilay Nowa chisu chend kupwa kwa kutambul chisend chend kudiay Yehova, ni mulong wak?
4 Pamulejau anch Nzamb usotin kusal chom kanang ni patambulay chisend chend, Nowa watunga waat chakwel alama mwom wa antu ni annam. (Dis. 6:13, 14, 22) Nowa walejana kand anch dirumburish dia Nzamb didi piswimp. Kambuy Pita umutazukin anch “mwin kurumburil yom yitentamina,” ni kulejan anch Nowa wasala usu wa kuyikwash atej nend chakwel amana anch mwikadil wau wading uyimp nakash. (Tang 2 Pita 2:5.) Ov, utongin anch chela kwikal chom chiwamp kudi Nowa ni dijuku diend kushinshikin usu wau mu kukasikesh mudimu wa kwisak, kuya kurutu pakach pa antu a pa chirung chau, ap kutenchik mwom uwamp? Chakin kamu bwat! Pijikau yom yidia kurutu, awiy ipuka kuzuwol mudi kwinoku.
KUTOND KWA MWAN A MWANT WA IDJIBIT
5, 6. (a) Ov, malejan matambulay Moses mading mulong wa kumurijek ku kusal yom ik? (b) Mulong wak Moses walika yom yelay kutambul mu Idjibit?
5 Chikwau kand, talany amboku chilakej cha Moses. Ndiy amulila mu chikumbu cha mwant wa Idjibit mudi mwan wa changandim wa Farao. Mudi mwan a mwant, amulila mu “manangu mawonsu ma in Idjibit.” (Mid. 7:22; Kub. 2:9, 10) Kumulej kwinoku kwadinga nich rutong ra kumurijek mulong wa mudimu mu chikumbu cha Farao. Ndiy wela kwikal ni katumb mu winyikel wa dikand pa chirung chend, ni mwom uwamp nakash, ni yisend, ni musangar welay kutambul mu yisend yiney. Ov, rutong ra Moses rading rimedina pa kusanger kwa yom yiney?
6 Mulong wa malejan matambulay kudi anvajend akin padingay uchidi mwanikanch, Moses wading wij chom chashilayimu Yehova kudi angakend Aburaham, Isak, nenday Jakob. Moses wateka ritiy mu yakushilamu yiney. Ndiy wafanyidina kutongijokin nawamp piur pa mwom wend wa kurutu ni kushinshaman kwend kudi Yehova. Chawiy lel, pashika chisu cha kutond pakach pa kwikal mwan a mwant wa Idjibit ap kwikal kashalapol mwin Isarel, ov, wakwata mupak ik? Moses “watonda kuman mar nau antu a Nzamb, katondap musangar wa yitil ya kachisu kakemp.” (Tang Hebereu 11:24-26, TMK) Kupwa, ndiy walondula umutakel wa Yehova piur pa mutapu wafanyidinay kusadil mwom wend. (Kub. 3:2, 6-10) Ov, mulong wak wasalay Moses mwamu? Mulong witiyija mu yakushilamu ya Nzamb. Ndiy wamana anch mu Idjibit mwadingap dikez kudi ndiy. Chikwau kand, muchid wakwachika ni yipupu dikum yadiokala kudi Nzamb. Ov, umen dilejan pa chinech mulong wa antu ipanina kudi Yehova nlel unou? Pa ndond pa kushinshikin piur pa mudimu ap musangar win wawonsu udia mu ditenchik dined dia yom, tufanyidin kushinshikin padiay Yehova ni pa mudimu wend.
JEREMIY WADING WIJ YOM YEZINA KURUTU
7. Mutapu ik wadinga mwikadil wa Jeremiy chilik chimwing ni wetwetu?
7 Muntu mukwau wateka mudimu pa ndond ya kusambish wadinga muprofet Jeremiy. Yehova wamuteka Jeremiy kwikal muprofet chakwel alejana uruu wa dirumburish dia Yerusalem ni Yudeya wabwambwila. Chawiy lel, Jeremiy washakama ‘mu machuku mansudiel ma chirung chinicha.’ (Jer. 23:19, 20) Ndiy wijika nawamp anch ditenchik mwadingay dikezap kudandamen mudi muchadinga.
8, 9. (a) Mulong wak chitongijok cha Baruk chading chiswiridin kuchitenchik? (b) Ov, chom ik tufanyidina kutongin pitukwatina mipak?
8 Ov, chisu chadinga chibudikin chiwamp cha kwitiyij kwa Jeremiy? Ndiy kapakishap kukasikesh dikez diend mu ditenchik didia piswimp ni kusheshik. Ov, kusal mwamu kwading kurumburikin ik? Pakwez, pa chisu chinicha Baruk kalerik wa Jeremiy, kamanap yom nawamp. Chawiy lel Nzamb wamuleja Jeremiy kusutil ku spiritu wend chakwel amuleja kalam wend wa ujindj anch: “Pakwez am, . . . nikat kuumbwol yom yinatunga kal, nikat kubwit yom yinakuna. Nikez kasal mwamu mwi ngand yakabuj. Ov, ey ukat kuchingej yom yiwamp ching kusu kudi ey amwiney? Kangal kusal mwamu, bwat. Am nikat kulet kusheshik kudi antu awonsu, pakwez ey kwawonsu kuukeza kaya ukez kakatwokaku.”—Jer. 45:4, 5.
9 Tukutwishap kwijik nawamp “yom yiwamp” yadinga yikimbinay Baruk mulong wa amwinend.a Twij anch yikutwish kwikal pamwing ap yom yakad kwikal nich machuku ma kurutu, yom yila kusheshik pa chisu chakwatau Yerusalem mu muvu 607 K.C.C. kudi in Babilon. Ov, umen anch padi dilejan ik kudi etu? Pa kutambul yom ya usey mulong wa mwom wetu chifanyidin kukwat mipak yimwing mulong wa machuku ma kurutu. (Jinsw. 6:6-11) Ov, chikwikal cha manangu anch twasutish yisu yivud ni usu wetu mu kukimbijol yom ya usey wa chisu chikemp? Pakwez, dirijek dia Yehova didandamedin kukwat mipak mulong wa Yot ya Want yisu, ma biro ma mutiy, ni yom yikwau ya uteokras. Pakwez mijikit yiney yikwet machuku ma kurutu mulong rutong rau ridi ra kukasikesh yisakin ya Want. Chidi cha usey komb kudi antu awonsu ipanina kudi Yehova kwitekin chilik chimwing yom ya kutek pa ndond ya kusambish pakwatinau mipak yau. Ov, ukwet kashinsh mu muchim wey anch ‘ukimbin bil Want wa Nzamb ni yom yisotilay [Yehova]’?—Mat. 6:33.
“NIYIMEN ANCH YIDI KWAU DISHIT DIVUNDILA”
10, 11. (a) Ov, pisu patekay Paul usu wend kurutu kwa kwikal mwin Kristu? (b) Ov, mulong wak rutong ra Paul rakarumuka kapamp kamwing?
10 Kupwa, shinshikinany amboku chilakej cha Paul. Kurutu kwa kwikal mwin Kristu, ndiy wamekana anch ukez kwikal nich mwom wa kurutu wa katumb. Ndiy wileja chijil cha in Yuda kudi alej a katumb nakash a pa chirung chend. Watambula uyaj kudi mwin kupesh mujim wa in Yuda. Ni waya kurutu nakash mu win Yuda kupandakanamu antu avud a pa chirung chend. (Mid. 9:1, 2; 22:3; 26:10; Gal. 1:13, 14) Pakwez, yiney yawonsu yakarumuka pamanay Paul anch Yehova kakatap kuyukish kand muchid wa in Yuda.
11 Paul witiyija anch kusal mu ditenchik dia in Yuda kwadingap kwa usey ku mes kwa Yehova, ni kwadingap nich machuku ma kurutu. (Mat. 24:2) Mufaris winou wa pasak washikena ku kulond anch kwilikej nich kutesh kwa patok kwinoku kusu, ronganyin rovikena ra rutong ra Nzamb ni chisend cha mudimu wa in Kristu, chadingay chimenay anch chidi cha usey katat wasambisha kuman mudi “dishit divundila.” Paul walikal kudandamen ni win Yuda ni wapana mwom wend wawonsu washalaku pa divu mu kulejan rusangu ruwamp.—Tang Filip 3:4-8, 15; Mid. 9:15.
SHINSHIKIN PA YOM UTEKINA PA NDOND YA KUSAMBISH
12. Ov, pa chom ik pashinshikinay Yesu kupwa kwa dibatish diend?
12 Nowa, Moses, Jeremiy, Paul, ni antu akwau mudi awiy asutisha chisu chau chawonsu ni usu wau mu mijikit ya uteokras. Atwinkishin chilakej chiwamp nakash. Chakin kamu, mujim nakash pakach pa atushalapol awonsu ipana kudi Yehova udi Yesu. (1 Pita 2:21) Kupwa kwa kutambul dibatish, Yesu wapana mwom wend wawonsu pa divu mu kulejan rusangu ruwamp ni mu kumutumbish Yehova. Mwin Kristu witiyin anch Yehova udi Mwant wend ufanyidin kulond anch kumusadil Yehova kufanyidin kwikal pa ndond ya kusambish mu mwom wend. Ov, utongin mwamu? Ni mutapu ik kulondul ntong ja uteokras akutwisha kukwisikej nich mijikit ya ku mujimbu?—Tang Kuseng 71:15; 145:2.
13, 14. (a) Ov, in Kristu awonsu ipanina kal ayikasikeshin kusal ik? (b) Ov, musangar ik ukutwishau kusanger antu a Nzamb?
13 Mu mivu yasutina, dirijek dia Yehova diadandamedin kuyikasikesh in Kristu chakwel atongina mu malembil anch akutwish kusal mudimu wa uchibol. Mulong wa mayingish mavud, mikadil ya atushalapol amwing ashinshamena a Yehova yasalap anch atwisha kwipan ayinau mu mudimu wa kulejan mu kusal asaa 70 pa ngond. Kafanyidinap kwov kuyip mulong wa kuburen kusal mwamu. (1 Tim. 5:8) Pakwez chidi nchik mulong weyey? Ov, ukutwishap chakin kamu kusal mudimu wa uchibol?
14 Tongin bil pa musangar wadingau nich antu a Nzamb avud pa chirung cha Chivurikish mu muvu winou. Mwi ngond wa Rish, ditenchik dimwing dia pakampwil dia yikwasha ayibol nkwash chakwel atonda anch akutwish kusal asaa 30 ap 50 mu mudimu wa chingand. (Kus. 110:3) Ma miliyon ma antu asala mudimu wa uchibol nkwash, ni yikumangen yatambula dikasikesh ni musangar. Ov, ukutwish kutenchik yisakin yey chakwel wikala ni musangar wa mutapu winou yisu yawonsu? Kwinsudiel kwa dichuku ni dichuku, mwin Kristu wipanina kal ukutwish kwikal nich musangar wa kulond anch, “Yehova, nasadil usu wam wawonsu mu mudimu wey.”
15. Ov, rutong ik rifanyidinay kwitekin nsand mwin Kristu piur pa shikol?
15 Anch washik kal kwinsudiel kwa shikol wey, ukutwish kuman anch ukwet ukash wa mujimbu ni mutapu wa kusal yisend kanang. Ov, ukutwishap kushinshikin anch ukutwish kusambish mudimu wa uchibol wa rawonsu? Pakwez, amakurump a ku shikol akutwish kutong chakin kamu anch ukutwish kutaninamu anch walondul shikol ya piur ni ukwirijek chakwel usala mudimu wa ku mujimbu. Chikwau kand, ruchingej rau rimedin pa kwikal nich mwom uwamp ni nfalang mu ditenchik dikweta chisu chikemp. Ku mutambu ukwau, mu kusal mudimu wa uteokras, ukez kulondul chakin kamu jintong ja usey ni ja chikupu. Ni ukez kulondul chilakej chiwanyidina cha Yesu. Mupak winou wa manangu ukez kusal anch wikala ni musangar. Ni ukez kukulam. Ni ukez kumekesh anch wakwatin kal mupak wa kushakam kwambatan ni kwipan kwey kudi Yehova.—Mat. 6:19-21; 1 Tim. 6:9-12.
16, 17. Ov, yipul ik yifanyidina kwiyipul piur pa mudimu wa ku mujimbu ni mijikit yikwau?
16 Nlel unou, atushalapol a Nzamb avud akat kusutish yisu yivud ku mudimu mulong wa kuwanyish maswir ma ku mujimbu ma majuku mau. Chikwau kand, amwing akutwish kusal yisu yivud pa ndond pa kusutish chisu chiwanyidina. (1 Tim. 6:8) Mangand ma in kwisak masadil usu wawonsu mulong wa kutulej anch tukutwishap kushakam pakad yom yivud yisadilau ni yom yisu yilandishinau. Pakwez in Kristu akin kakutwishap kusot anch mangand ma Satan mayileja ku usu yifanyidinau kutek pa ndond ya kusambish. (1 Yoh. 2:15-17) Kudi antu abudikina kal ku mudimu wa kumujimbu, chidi chom chiwamp mud ik anch asadil chisu chau mu mudimu wa uchibol, ni kutek mudimu wa Yehova pa ndond ya kusambish?
17 Atushalapol awonsu ipanina kal kudi Yehova afanyidin kwiyipul anch: Ov, chom ik chidia pa ndond ya kusambish mu mwom wam? Ov, nitekin yisakin ya Want pa ndond ya kusambish? Ov, nikat kwimburij mwikadil wa Yesu wa kwipan? Ov, niteshining chiyul cha Yesu cha kudandamen kumulondul? Ov, nitenchikin program wam chakwel nisutisha yisu yivud mu mudimu wa kulejan Want ap nisala mijikit yikwau ya uteokras? Ap anch mikadil yam yikatap kwintwishish kuya kurutu mu mudimu wam, ov nidandamedin kukudish spiritu wa kwipan?
“WIKALANY NICH RUSOT, WIKALANY KAND NICH USU WA KUSAL”
18, 19. Ov, chom ik tufanyidina kwit mu malembil, ni mulong wak malembil minam makutwish kumusangaresh Yehova?
18 Chisangareshin kuman mushiku wa antu a Nzamb. Pakwez, amwing kakutwishap kwikal nich chibachikin cha kusal mudimu wa uchibol ap kuwanyish yitinau chakwel asal mudimu winou—ap anch mikadil yau yikutwish kuyikwash kusal uchibol. (Kub. 4:10; Jer. 1:6) Chifanyidin kusal ik? Ov, chitwishikinap kutek milong yiney mu malembil? Mwaning. Paul wayileja ambay nend akaritiy anch Yehova, “ukat kusal machuku mawonsu mu en chakwel wikalany nich rusot, wikalany kand nich usu wa kusal mudi mudia kutenchik kwend.” (Fil. 2:13) Anch ukwetap usu wa kuya kurutu mu mudimu wey wa kulejan, mulembila Yehova chakwel akwinkisha rusot ni ukaliweny wa kusal mwamu.—2 Pita 3:9, 11.
19 Nowa, Moses, Jeremiy, Paul nenday Yesu awonsu ading antu ipanina. Awiy asadila chisu ni usu wau mulong wa kulejan uruu wa kubabesh wa Yehova. Kalikidilap kuzuwol kuyisheshina chisu bwat. Disudiel dia ditenchik dia yom didi piswimp; chawiy lel, etwawonsu twapanina kal mwom wetu kudi Nzamb tuswiridin kwikal nich kashinsh anch tudandamedin kusal usu wetu wawonsu chakwel tulondula yilakej yiney yiwamp nakash yidia mu Bibil. (Mat. 24:42; 2 Tim. 2:15) Anch twasal mwamu, tukutwish kumusangaresh Yehova ni kutambul yiyukish yend yivud.—Tang Malaki 3:10.
[Dizu didia Kwishin kwa paj]
a Tal buku Dieu nous parle par Jérémie, pa paj wa 104-106.
[Chipich chidia pa paj wa 22]
Antu katekap matu ku kubabesh kwa Nowa
[Chipich chidia pa paj wa 25]
Ov, watonginap kal nakash piur pa kwikal pakach pa ayibol a rawonsu?