Ov, Mar ma Chitangil Mamekeshin Anch Nzamb Udi Mwin Chisum?

CHIUKUTWISHA KUTESH: “Nzamb uyikedil mangand, chawiy lel ukat kulet mar ma chitangil; chikwau kand, ufanyidin kwikal mwin chisum.”

CHILEJENAY BIBIL: “Yom yikwau yawonsu ya mu mangand ayitakedil kudi Sakudimban.” (1 Yohan 5:19) Ov, “Sakudimban” winou udi nany? Bibil umumekeshin patok anch ndiy Satan. (Mateu 13:19; Marko 4:15) Ov, chinech chovikenap? Tongin bil chinech: Anch Satan ukwet usu piur pa mangand, kupwa uyibachikin antu ku kwikal ni choy, ku kusot nakash yom ya ku mujimbu, ni kwikal akad kushinshikin nawamp pa yom yidia kurutu mudi kamu mutapu udiay amwinend. Ov, chinech chikutwishap kutukwash chakwel kurumburil mulong wak antu ayipishin nakash mwikadil wau wa divu? Ankaliweny amwing ababeshin anch kuyipish mwikadil wa divu kukutwish kushikij ku mar ma chitangil, pamwingap kusutil ku kumaletish, kumapandikesh, ap kutek chisak cha antu mu ubaj.

Katat, ov, mulong wak Nzamb ulikidil Satan chakwel ikala nich usu mudi winou? Piur pa chakul chinech chirik bil kwinsambishil kwa rusangu ra antu, pabwambwilau anvaj etu akusambish ku Umutakel wa Nzamb. Antu avud alondula rawonsu mu rizau riner. Kutond kwinoku—kwa kudjibul umutakel wa Nzamb—kwateka mangand ma antu mu makas ma mukankuny wa Nzamb, Satan. Yesu wamutazuka Satan anch “mwin kutakel wa mangand minam.” (Yohan 14:30) Ov, Satan ukuyikel chikupu? Bwat kwau!

Yehovaa kaninetinap ku mar maletinay satan. Pakwez, Nzamb ukwet ranaken rikash mulong wa mar ma antu. Chilakej, piur pa yisu yikash yashikena ku muchid wa Isarel, Bibil ulejen anch: pa chisu cha mar mau mawonsu “Ndiy wamana nau mar.” (Isay 63:9) Nich riy, Nzamb watenchika mutapu wa kushesh umutakel wa mwin chisum Satan ku disudiel—oku! Ndiy wamutondin kal Mwanend, Yesu Kristu, kwikal Mwant mwin kutentam ni mwin uyakin wa rawonsu.

MUTAPU CHIKUTADILA: Ap anch umutakel wa Satan waburena kuyichidij antu ku mar ma chitangil, pakwez umutakel wa Yesu ukutwish kusal mwamu. Yesu chisu chimwing wasala mwamu chakwel kuyiking in kwilej end ku rinkind mukash. Bibil ulejen anch: “Ndiy . . . wamubarikin rinkind, wamel mambek anch: ‘Ikuchika kamu kwey zong!’ Chawiy rinkind waneneta, kwikal kamu pukupuku zong.” In kwilej alond anch: “Ov, winou nany, uziyidilau kudi rinkind ni mambek?” (Marko 4:37-41) Chishiken chinech chitwinkishin kashinsh anch Yesu ukuyiking awonsu aziyidila pa chisu cha winyikel wend mudi Mwat.—Daniel 7:13, 14.