“Talany! Am Nayikarumwish Kal Yom Yawonsu Kwikal Yisu”

Ov, uswirikedin anch ey ni dijuku diey wikalany ni ukash wa mujimbu ni mwom ulemp? Usotin kushakam mu mangand mukwikala mwakad kusansan, mar, ni rufu? Mangand mudi minam madiap ringany bwat. Chinyim ni chinech, mangand masu matentamina makwikalaku piswimp ap, mulong Yehova Nzamb ndiy wakana mwamu. Tal mutapu ulejenau piur pa kuwanyin kwa rutong rend rilejenau mu Kujingunik 21:3-5.​—Tang.

“[Nzamb] ukez kuyikusol mansoj mawonsu ku mes mau.” (Kujingunik 21:4) Mansoj ma mutapu ik makezay kukuswol? Madiap mansoj ma musangar ap malamininga mes metu bwat. Pakwez kushilamu kwa Nzamb kwisambidin piur pa mansoj madiokila ku mar ni ku runeng. Nzamb kakezap ching kukusul mansoj, pakwez ukez kumaumish shitit ni kujiyish misul yawonsu yiletininga mansoj​—mar ni runeng.

“Kukez kwikalap kand rufu.” (Kujingunik 21:4) Kudioshaku mukankuny wetu rufu, yom ik yikwau yikata kuletang mansoj makad kwisotin? Yehova ukuyikol antu amuziyidina ku uswik wa rufu. Mutapu ik? Pakudioshay musul wakin wa rufu: chitil chitwaswana kudi Adam. (Rom 5:12) Yehova ukuyinkish antu amuziyidina kuwanyin kusutil chakupesh cha difut dia Yesu.a Kupwa mukankuny wansudiel “ukez kusheshay” udi rufu. (1 Korint 15:26) Antu ashinshamena akez kushakam mudi mwading rutong ra Nzamb piur pa mashakamin mau​—chikupu nich ukash wa mujimbu uwanyidina.

“Kukez kwikalap kand . . . kusansan.” (Kujingunik 21:4) Kusansan kwa mutapu ik kukulika kwikalaku? Kusansan kwawonsu kwa mu manangu, kwa mu yovil, kwa kumujimbu kudiokila ku chitil ni kuburen kuwanyin ni kumeshina ma miliyon ma antu mar, kukwikalakup kand.

Piswimp ap, mwom wakad mansoj, rufu, ni kusansan ukwikalaku chakin kamu. Ukutwish kwiyipul anch ‘mwom winou ukwikal kwisu?’ ‘Nzamb washilamu pamwing ap piur pa mwom mwiur?’ Bwat. Shinshikin mulong wak bwat. Chakusambish, kushilamu kwinoku kusambishin anch “ndond ya kushakam ya Nzamb yidi pakach pa antu,” ni antu ashiching pa divu. (Kujingunik 21:3) Chakaad, kushilamu kwinoku kulejen anch pa mangand ‘pakez kwikalap kand rufu’​—mangand makweta rufu, makez kwikalakup. Mwiur kandikal mwikalangap rufu, pakwez ruding pa divu kudiosh pakur. Choviken patok anch, kushilamu kwa Nzamb kwa mwom uwamp kukez kuwanyin nawamp pa divu ap.

Yehova usotin anch twitiyija kushilamu kwend piur pa mangand masu matentamina. Kupwa kwa kujimbul yiyukish yidia kurutu oku, ukasikeshin kushilamu kwend, palondinay anch: “Talany! Am nayikarumwish kal yom yawonsu kwikal yisu.” Wawejinaku kand anch: “Mazu minam madi makin, mafanyidina kumachingej.” (Kujingunik 21:5, TMK) Umenap anch chifanyidin kwilej nakash piur pa mutapu ukutwisha ey ni antu aukatina kwikal pakach pa in kwifukwil akweta musangar akeza kuman kuwanyin kwinoku kwamushena kwa kushilamu kwa Nzamb?