Ov, Ukez ‘Kuchishany ku Mes’?

1, 2. (a) Ov, chom ik chalonday Yesu piur pa machuku ma kwinsudiel? (b) Ov, yipul ik tukushinshikina mu mutu wa mulong winou?

TONGIN mutapu ushichay Yesu pa mukandu wa Olivet—ukat kutal tempel wa mu Yerusalem​—chisu chilondinay piur pa uprofet wend ujim nakash. Pita, Andre, Jakobu, ni Yohan ading amuteshin Yesu chisu chadingay kuyirumburil uprofet wend wafanyina kuwanyin machuku ma kurutu. Wayileja piur pa yom yafanyina kusadika machuku ma kwinsudiel ma ditenchik diyimp dined, chisu chafanyinay kuyikel Want wa Nzamb. Wayileja anch pa chisu chinech, “Kashalapol [wend] ushishamena ni kubabal” wafanyina kumumekesh Yesu pa mangand, kuyinkish atushalapol end yakudia ya muspiritu yiswiridinau.​—Mat. 24:45-47, TMK.

² Chikwau kand, mu uprofet winou kand, Yesu walonda piur pa chishimu cha ayangadim dikum akad kal kwachik. (Tang Mateu 25:1-13.) Tushinshikinany amboku yipul yiney: (1) Ov, rusangu ik ra pa kampwil ridia mu chishimu chinech? (2) Mutapu ik usadidinau azizidilau many ashinshamena chiyul chidia mu chishimu chinech, ni yibudikin ik? (3)  Mutapu ik ukutwishay muntu ni muntu wa pakach petu kutaninamu mu chishimu cha Yesu chinech nlel?

OV, RUSANGU IK RIDIA MU CHISHIMU CHINECH?

3. Mu mivu ya kwinyim ey, ov, mikand yetu yapana kurumburik piur pa chishimu cha ayangadim dikum akad kal kwachik, nich chibudikin ik?

³ Twashinshikinang mu mutu wa mulong wasutina ou anch, mu mivu yasutina ey, kashalapol ushinshamena warumburila pakemp pakemp Mifund piur pa kurumburik kwa yom ya uprofet wa mu Bibil. Mu mivu ya kwinyim ey, mikand yetu yapananga kurumburik piur pa chishimu cha Yesu chinech cha ayangadim dikum akad kal kwachik, kuwejinaku ni mend ya kasu, many, ni milond yikwau ya many. Ov, kudi mutapu wa kushinshikin piur pa tuyom tukemp tudia mu chishimu chinech chiswapela, mu uruu wa kuswapej winou? Mudi mutukumana, yakul yidi ya usey nakash.

4. Mu chishimu chinech, ov, chom ik twija piur pa (a) ngatan? (b) ayangadim akad kal kwachik?

⁴ Tushinshikinany amboku rusangu ra pa kampwil ridia mu chishimu cha Yesu chinech. Chakusambish, tushinshikin yom yidia mu chishimu chinech. Ov, nany udia ngatan mu chishimu chinech? Yesu. Chidi mwamu mulong mwi ndond yikwau wimekeshin amwinend mudi ngatan! (Luka 5:34, 35) Ov, anany adia ayangadim akad kal kwachik? Mu chishimu, Yesu walonda anch ayangadim inay akwet chisend cha kwikal ni mend yau yikweta kasu chisu chikushikay ngatan. Katat, shinshikin chalonday Yesu piur pa ‘chisak chikemp cha amikoku’ azizidilau many: “Irijekany, kasikeshany may, limikany mend yend ya kasu. Chifanyidin en wikalany mudi atushalapol ababela akata kumuchingel nsalejau kuchirik kudiokal ku musambu wa kwatan kwayay.” (Luka 12:32, 35, 36) Chikwau kand, kambuy Paul ni Yohan ku ukwash wa mwiku utumbila ayifanikesha in Kristu azizidilau many nich ayangadim akad kal kwachik ap akad kal kwijik amakundj. (2 Kor. 11:2; Kuj. 14:4) Chimeken patok anch, mazu ni chiyul yidia mu chishimu cha Yesu chifundilau mu Mateu 25:1-13 chilondin piur pa in Kristu azizidilau many.

5. Ov, mutapu ik wamekeshay Yesu chisu chikeza kuwanyin chishimu chend chinech?

⁵ Kupwa, tushinshikinany pa chisu cha yom yiney. Ov, chisu ik chafanyina mazu ma Yesu minam kusadik? Yesu utukwashin kwijik chisu kusutil ku mazu mend ma kwinsudiel mu chishimu chinech palonday anch: “Ngatan washika.” (Mat. 25:10) Mudi mutwileja mu nimero wa Kalol 15, 2013, wa Chinong cha Kalam, uprofet wa Yesu udia mu Mateu shapitre wa 24 ni wa 25 dizu ‘kushik’ kwend didiamu tupamp chinan; pa ndond yiney yawonsu asadidinamu kand dizu dia Grek. Mwi ndond yiney yawonsu, Yesu ulondin piur pa chisu cha mar makash, chisu chikezay kurumburish ni kushesh ditenchik dined diyimp dia yom. Chakin, tukutwish kulond anch chishimu cha Yesu chinech achisadidin mulong wa machuku ma nsudiel, pakwez chikez kuwanyin pa chisu cha mar makash.

6. Kukwatijan ni mazu madia kurutu kwa chishimu chinech, ov, rusangu ik ra pakampwil ridia mu chishimu chinech?

⁶ Ov, rusangu ik ra pakampwil ridia mu chishimu chinech? Vurik yom yifundinau kurutu kwa kufund rusangu riner. Yesu wambamba ni in kwilejend ni walonda piur pa “kashalapol ushinshamena ni kubabal.” Kashalapol winou wafanyina kwikal kachisak kakemp ka amakundj azizidilau many afanyina kutakel chisak cha in Kristu a mu machuku ma kwinsudiel. Yesu wababesha amakundj inay anch afanyidin kwikal ashinshamena. Kupwa, wapana chishimu chinech cha ayangadim dikum akad kal kwachik mulong wa kuyibabesh in kwilejend awonsu azizidilau many a mu machuku ma nsudiel anch ‘ababala’ mulong wa kulik kushadish difut diau dia mwiur. (Mat. 25:13) Tushinshikinany katat chishimu chinech ni mutapu ukutwishau azizidilau many kusadil chiyul chinech.

MUTAPU IK WASADILAU AZIZIDILAU MANY CHIYUL CHA MU CHISHIMU CHINECH?

7, 8. (a) Ov, yom ik yaad yimekeshina anch ayangadim ababela ading achila ku mes? (b) Ov, mutapu ik wamekeshau in Kristu azizidilau many anch ading itenchikin?

⁷ Chishimu cha Yesu chilondidin nakash piur pa ayangadim ababela ading achingedila kwez kwa ngachik, kulik ayangadim ayisup. Mulong wak? Mulong wa yom yiney yaad: kwirijek nawamp ni kucha ku mes. Ayangadim ababela ashala achila ku mes mulong wa kuchingel kwez kwa ngatan ni mend yau ya kusu yadandamena kumunyik mu chikumbu uchuku wakabuj kushik ni pakusadikina musambu. Chinyim ni ayangadim ayisup, ayangadim atan akad kal kwachik itenchika kurutu chakin kamu, asenda many makwau mu milond mulong wa kutek mu mend yau ya kasu. In Kristu azizidilau many, ov, amekesha niyawiy anch itenchikin mulong wa kwez kwa Kristu?

⁸ Mwaning! Nakash mu machuku minam ma kwinsudiel, in Kristu azizidilau many asadining mudi mwasalau ayangadim ababela, irijeka mulong wa kuwanyish chisend chau nich kushinshaman djat ni kwinsudiel. Asadin usu wa kusal mudimu utumbila nich kushiman, akwet kashinsh anch kuwanyish chisend chau kusutin kwikal nich mapit mavud ma pa mangand ma Satan. Ipanin ayinau kudi Yehova ni akat kumusadil, chidiap anch mulong machuku ma nsudiel madi piswimp, pakwez mulong wa rukat rikwetau kudi ndiy ni Mwanend. Akat kulam kushinshaman kwau, kakatap kwilikidij anch spiritu wa mangand minam mayimp ayiyikela piur pa ris ra nfalang, masandj, ni yisalijok ya choy. Adandamedin kucha ku mes, kupan chitokish, ashinshamen mu kumuchingel ngachik ap anch umeken anch ulabin.​—Fil. 2:15.

9. (a) Ov, kubabesh ik kwapanay Yesu piur pa kuzel tul? (b) Ov, mutapu ik wakulau in Kristu azizidilau many pateshau dizu dilondina anch: ‘Ngatan wez kal’? (Tal kand mazu ma kwinshin.)

⁹ Chom chakaad chayikwasha ayangadim inay chading kucha ku mes. Chikutwish kushiken anch in Kristu azizidilau many alala tul nakash pakad kuchish ku mes? Mwaning. Shinshikin yalonday Yesu piur pa ayangadim dikum anch “asambisha kuzel” palabay ngatan kushik. Yesu wading wij nawamp anch, ap anch muchim wau wading akatin kuchingel pakwez mijimbu yau yafanyina kuziy. In Kristu azizidilau many asadin usu kusadin chiyul chinech mu kusal mudimu ni kushal ababela ni achila ku mes. Mu chishimu chinech, ayangadim dikum akula ku dizu diateshau mukach mwa uchuku anch: ‘Ngatan wez kal!’ Pakwez ching ayangadim ajijamana djat ni kwinsudiel. (Mat. 25:5, 6; 26:41) Chidi nchik piur pa in Kristu azizidilau many a nlel? Pakwez mu machuku minam ma kwinsudiel, in Kristu azizidilau many akwil ku dizu ditoyinau anch, ‘Ngatan wez kal’​—usotil kamu kushik. Ajijamen ni adandamedin kucha ku mes djat kamu pakushikinay Ngatan.a Chad, tushinshikinany katat chikunku cha nsudiel cha chishimu cha Yesu chimedina pa chisu cha nsudiel. Ov, mutapu ik?

DIFUT KUDI ABABELA NI CHIBAU KUD AYISUP

10. Ov, chom ik tukutwisha kwiyipul piur pa mambamb pakach pa ayangadim akad kal kwachik ababela ni ayisup?

¹⁰ Piswimp ni kwisudiel chishimu chinech, ayangadim akad kal kwachik ayisup ayita ababel chakwel ayinkisha many ma kutek mu mend yau ya kasu. (Tang Mateu 25:8, 9.) Mu mambamb minam mulankin chipul chinech: “Mu rusangu ra antu, ov, chisu ik chalikawap kal in Kristu azizidilau many kuyikwash antu ayitina ukwash?” Mulong wa kutan chakul tushinshikinany bil piur pa kwikalaku kwend. Tuvurikany anch twateshin kal nawamp anch Yesu, Ngatan, ukushik kwinsudiel kwa mar makash mulong wa kurumburish. Ov, chimeken anch chikunku cha chishimu chinech chikez kuwanyin kwinsudiel kwa mar makash? Mwaning, mulong chisu chinicha azizidilau many akez kwikal atambwil kal chijingidij chau cha nsudiel.

11. (a) Ov, chom ik chikusadika kurutu kwa mar makash kusambish? (b) Ov, chom ik chadingau kutong ayangadim ababela payilejau ayisup anch yang ulandany many?

¹¹ Chawiy lel, kurutu kwa mar makash kusambish, azizidilau many ashinshamena awonsu adia pa divu akutambul chijingidij chau cha nsudiel. (Kuj. 7:1-4) Kupwa chad, akuya mwiur. Pakwez tong bil piur pa mivu ya kurutu kwa mar makash kusambish. Ov, chom ik chikuyishikena azizidilau many akukanganya kushal achila ku mes, akushadisha kujijaman kwau? Akushadish difut diau dia kuya mwiur. Chawiy nlel, kafanyidinap kutambul chijingidij chau cha nsudiel kurutu kwa mar makash kusambish. Mu chisu chinicha, in Kristu akwau ashinshamena akuyizizil niyawiy many. Pakusambisha mar makash, ayangadim ayisup akujiman pakumanau kusheshik kwa Babilon Mujim. Chinech chawiy chikumekesh anch kadingap itenchikina mulong wa kushik kwa Ngatan. Mu chisu chinicha, ov, chom ik chikushikena anch ayisup inay it ukwash? Chakul chidi mu chishimu cha Yesu. Ayangadim ababela alika kupan many mau kudi ayisup, ayileja anch aya akalanda many. Pakwez, vurik anch mwading “mukach mwa uchuku.” Ov, ela kutan many ma kuland chisu chinech? Bwat kwau. Chisu chading chasutang kal.

12. (a) Chisu cha mar makash, ov, chom ik chikuyishikena azizidilau many akeza kushadish kushinshaman kwau kurutu kwa kutambul chijingidij chau cha nsudiel? (b) Ov, chom ik chikeza kuyishiken antu akwikal mudi ayangadim ayisup?

¹² Chilik chimwing, mu chisu cha mar makash, azizidilau many ashinshamena kakutwishap kumukwash ap umwing ukulika kwikal ushinshamena. Kukwikalap kand ukwash. Chisu chikwikal chasutang kal. Chom ik chikuyishikena antu inay akad kushinshaman? Yesu urumburil chikushikena chisu chayau ayangadim ayisup kukimb many ma kuland anch: “Ngatan washika. Ayangadim atan ababela ading irijekina andama nend ku musambu wa kwatan, chad apata ku chis.” Chisu chikezay Kristu kwez kwinsudiel kwa mar makash mu uyaj wend, ukez kuyikumangej azizidilau many ashinshamena mulong wa kuya mwiur. (Mat. 24:31; 25:10; Yoh. 14:1-3; 1 Tes. 4:17) Pakwez, Yesu ukuyilik antu aburedina kushinshaman inay, adia mudi ayangadim ayisup. Chad, akusambish kutoy anch: “Mwant! Mwant! itwanzurila ku chis!” Pakwez akez katambul chakul mudi chapanay Yesu mulong wa antu avud adia mudi ampemb chisu cha dirumburish anch: “Nakulejany chakin, kinikwijanyap kwam.” Cha ushon mudi ik!​—Mat. 7:21-23; 25:11, 12.

13. (a) Ov, mulong wak tufanyidinap kulond anch in Kristu azizidilau many avud akez kushadish kushinshaman kwau? (b) Mulong wak tukutwish kulond anch chishimu cha Yesu chimekeshin kashinsh kakwetay mudiau in Kristu azizidilau many? (Tal chipich chidia kwinsambishil.)

¹³ Piur pa yom yawonsu twileja kal ey, ov, chom ik tukutwisha kulond? Ov, Yesu walonda anch azizidilau many avud akez kushadish kushinshaman kwau ni kukwikal kuswir kwa kuyiswinkan? Bwat. Vurik anch wamubabesha kwend “kashalapol [wend] ushinshamena ni kubabal” anch kangal wikal kashalapol muyimp. Chinech chirumburikinap anch wading wij chafanyina kushiken. Chilik chimwing, chishimu chinech chikwet kubabesh kukash. Ching mudi mwading ayangadim atan ayisup ni atan ababela, uzizidilau many mwawonsu ufanyidin kutond mutapu wa kwikal ubabela ni uchila ku mes ap kwikal chisup ni wakad kushinshaman. Kambuy Paul wapepilau chisu chayifundinay anamakwend in Kristu azizidilau many dibabesh mudi dined. (Tang Hebereu 6:4-9; ilikej nich Kuvurik Yijil 30:19.) Ijik anch kubabesh kwa Paul kwading kukash, pakwez wayikasikesha nich mazu ma rukat anch “yom yipandakena kuwap” yiyichingedin akadivar ni anambaz in Kristu. Chilik chimwing, kubabesh kudia mu chishimu chinech cha Yesu kumekeshin anch Yesu uyichingejidin azizidilau many nakash, nich rukat. Kristu wij anch uzizidilau many mwawonsu ukutwish kushal ushinshamena ni kutambul difut!

OV, MUTAPU IK UKUTWISHAU “AMIKOKU AKWAU” A KRISTU KUTANINAMU?

14. Ov, mulong wak “amikoku akwau” akutwish niyawiy kutaninamu mu chishimu cha ayangadim dikum akad kal kwachik?

¹⁴ Mulong chishimu cha Yesu cha ayangadim dikum akad kal kwachik chilondin piur pa azizidilau many, ov, tukutwish kulond anch “amikoku akwau” a Kristu kakutwishap kutaninamu? (Yoh. 10:16) Bwat kwau! Vurik anch, rusangu ridia mu chishimu chinech riswapel: “Chishany ku mes.” Ov, mazu minam afanyidin kumasadin ching kudiau azizidilau many? Yesu walonda anch: “Yom yinikulejinanya en niyilejen kand kudi antu awonsu anch: Chishany ku mes!” (Mar. 13:37) Yesu wayileja in kwilejend awonsu anch atenchika michim yau mulong wa kusal mudimu nich kushinshaman ni kwikal achila ku mes. Chawiy lel, in Kristu awonsu alondwil chilakej chashilau kudi azizidilau many pa mulong winou, pa kwimburij chilakej chau chiwamp ni kutek mudimu wa kulejan pa ndond ya kusambish mu mwom wau. Muntu ni muntu pakach petu ufanyidin kwijik anch ayangadim akad kal kwachik ayisup ayita ababela chakwel ayinkap many. Kwit kwau kwa usup kutuvurishin anch kwikil muntu ukutwisha kwikal ushinshamena pa ndond yetu, kwikal uyakin pa ndond yetu, ap kucha ku mes pa ndond yetu. Muntu ni muntu pakach petu, ukez kwisambin amwinend kurutu kwa Yehova nzuj mujim utentamina. Tufanyidin kubabal. Ni wezin kamu!

15. Ov, mulong wak uruw wa Kristu ni ngachik wend akez kutaninamu kudi in Kristu awonsu akin?

¹⁵ In kristu awonsu akutwish kutaninamu kand mu yom ya mu chishimu cha Yesu. Kupwa, nany pakach petu wakad kwikal ni musangar piur pa uruw wa mu chishimu chinech? Azizidilau many akez kuya mwiur; kupwa kwa njit Harmagedon, akez kikal ngachik wa Kristu. (Kuj. 19:7-9) Antu awonsu akwikala pa divu akez kataninamu mu uruw winou wa mwiur, mulong udi guvernema uwanyidina mulong wa antu awonsu. Chikalap nchik ruchingej tukweta mulong wa machuku ma kurutu, ra mwiur ap ra pa divu, tudandamenany amboku kwilej mafundish madiokila mu chishimu cha Yesu cha ayangadim dikum akad kal kwachik. Tumekeshany amboku anch tubabel pa kutenchik michim yetu ni kwikal achila ku mes, mwamu tukusanger machuku ma kurutu matenchikay Yehova mulong wetu!