Wayikata Antu

1, 2. ov, mutapu ik wamekeshay Yesu rukat rikash mulong wa antu?

MWAN wa kusambish wa Nzamb udi chilakej chijim nakash chimekeshina manangu ma Yehova. Wading ni manangu mapandakena, wading “mwant wa mudimu” wasala pamwing ni Tatukwend. Tong bil mutapu wovay musangar pamanay chisu “chatangay [Tatukwend] diur” ni ‘patekay mufulandal wa divu.’ Pakwez, ku yom yawonsu yatangay Tatukwend, Yesu ‘wasangara nakash mulong wa antu.’ (Jinsw. 8:22-31) Mwaning, Yesu wayikata antu nakash kudiosh kwinsambishin.

² Kupwa, Yesu wamekesha rukat ni kushinshaman kwend padiay Tatukwend ni wamekesha kand rukat rikash mulong wa antu chisu chadiokalay mwiur kwa kwisotil ni kwez panap pansh mudi muntu. Wasala mwamu mulong wa kupan “mwom wend mulong wa kuyikwol antu avud.” (Fil. 2:5-8; Mat. 20:28) Rukat mudi ik ramekeshay mulong wa antu! Padingay Yesu pansh pa divu, Nzamb wamwinka usu wa kusal yilay yamekesha mutapu uyikatinay antu. Yilay ya Yesu yamekesha mutapu uyikatinay nakash antu ni yom yiwamp yikuyisadinay piswimp ap.

3. Yom ik tukwileja mu mutu wa mulong winou?

³ Kwez kwa Yesu kwamukwasha kand “kulejan rusangu ruwamp ra want wa Nzamb.” (Luka 4:43) Yesu wading wij anch Want winou wafanyina kutumbish dijin dia Tatukwend ni wawiy ukupwisha milong yin yawonsu ya antu. Palejanangay Yesu, wasala kand yilay yivud, ni yilay yiney yamekesha mutapu wayibanginay antu. Mulong wak chidi cha usey kudi etu? Mulong dilejan tukwilejinamu dikutwinkish kashinsh ni ruchingej mulong wa machuku ma kurutu. El tushinshikinany yilay yinying yasalay Yesu.

‘WADING NICH UKASH WA KUYOK AYEJ’

4. Rumburil rusangu ra Yesu pamutanay kabangkat.

⁴ Yesu wasala nawamp mu mudimu wend wa kulejan, ni mwi ndond mwasadinay nakash mwading mu Galalia. Mu musumb umwing, Yesu watanamu muntu uyedina musong wa mak ap musong wa kusu. (Mar 1:39, 40) Pamanay mutapu wading ukasikena mayej ma muntu winou, mwingang Luka walonda anch wading ni “musong wa ubangkat uvud kamu.” (Luka 5:12) ‘Wamwasila manungun, wamulembijek anch: “Nsalejam, anch ey ukatil, ukutwish kwingok chakwel niwapa.”’ Muntu winou katadikap anch Yesu wading ukwet usu wa kumwok, pakwez, wakimba kwijik anch Yesu wading ukatin kumwok? Ov, mutapu ik wafanyinay Yesu kumwakul muntu winou? Chom ik chatongay Yesu pamumanay muntu winou wading wayipa kal chifu mulong wa mayej? Yesu wafanyina kusal mudi Afaris, ading kuyidiul antu amena mar ni mayej? Chom ik wela kusal?

5. Ov, chom ik chamubachika Yesu kulond anch “Nikatil kusal mwamu,” pamwokay kabangkat?

⁵ Chimeken anch, kabangkat winou wapipeja kwend kutoy anch ‘Nijondil, nijondil!’ mudi mwalejanau mu Chijil cha Moses. Yesu kalikap kusal mwamu. Pakwez, wipana amwinend ni wasala mudi mwading maswir ma muntu winou. (Lev. 13:43-46) Tukutwishap kamu kwijik yading mu manangu ma Yesu, pakwez twij yading mu muchim wend. Nich ranaken, Yesu wamwoka. Yesu wonina chikash chend, wamukwat kabangkat, ni walond nich dizu dia piur dimekeshina usu ni ranaken anch: “Nikatil kusal mwamu. Katat ey, yerik, uwapa!” Chad “musong wa mak wamudiokala.” (Luka 5:13) Chawiy lel, usu wa Yehova wadingaku​—chidiap mulong Yesu wasala yilay, pakwez mulong wamekesha mutapu wadingay uyikatin antu.​—Luka 5:17.

6. Ov, chom ik chisangareshina piur pa yilay yasalay Yesu, ni yimekeshin ik?

⁶ Usu wa Nzamb wamukwasha Yesu kusal yilay kushalijan. Woka mayej kushalijan ni antu a ulim wa mitau yawonsu. Bibil utulejin anch: “Antu ashimwoka nakash pamanau atuman akat kulond, ni ayilim akat kuyerik, ni ayishet akat kwend, ni amputames akat kuman.” (Mat. 15:31) Mulong wa kusal yilay yiney yimekeshina riy, Yesu kaswirikenap chom kanang. Woka yid ya mujimbu kushalijan yading yiyedina! Wokang antu padingay nau, yisu yikwau watumang kwend dizu. (Yoh. 4:46-54) Ov, chom ik yimekeshina yilakej yiney yishimokishina? Mulong Yesu amudishin kal Want mwiur, ukwet usu ni ukwet kuswir kwa kudiosh uyimp wawonsu chikupu. Kwilej mutapu wayisadinay antu kukutwinkish kashinsh anch mwi ngand yisu, uprofet udia mu Bibil ukuwanyin: “Ukwov riy kudi atuzwazu ni ayimana mar.” (Kus. 72:13, TMK) Mwaning, Yesu ukusadin maswir mend ma mu muchim mulong wa kuyikwash antu ayedina.

‘TUMBUK! NON CHIKANG CHEY NI YANG KWEY’

7, 8. Rumburil yom yasalay Yesu kudi muntu wading uyedina mayej ma kalip ku dijiy dia mem dia Betizata.

⁷ Kwinyim kwa angond akemp Yesu watanijana ni kabangkat mu ul wa Galalia. Wadiokala ku Galalia waya ku Yudeya mulong wa kulejan rusangu ruwamp wa Want wa Nzamb. Antu atesha rusangu ra Yesu ni ova katumb ka rukat rend ading avud nakash. Yesu wasota chakin kamu kuyikasikesh atuzwendj ni ayimanamar mulong wa kuyinkish ruchingej.​—Isay 61:1, 2; Luka 4:18-21.

⁸ Chad ngond wa Nisan washika. Mulong waziyila ku yany ya Tatukwend, Yesu waya ku Yerusalem mulong wa kusal musambu wa Kusut kwa Yehova. Musumb wading wizwil ni midimu ya antu eza mulong wa musambu winou utumbila. Ku mutambu wa kurul wa tempel kwading dijiy dia mem diadingau kutazuk anch Betizata, ni Yesu wasankanijana kwinikwa ni muntu umwing uyedina.

9, 10. (a) Ov, mulong wak antu ading kuya ku dijiy dia mem dia Betizata? (b) Chom ik chasalay Yesu ku dijiy, ni chitufundishin ik? (Tal chipich cha kwinsambishil.)

⁹ Chisak chijim cha ayej ni ayilim eza ku dijiy dia mem dia Betizata. Chom ik chayileta antu inay? Mulong antu ayedina inay ading itiyijin anch, ang andam mu dijiy dia mem akuyerik mu chilay. Tongin bil piur pa mutapu wiyovau! Kuburen ruchingej, ushon, ni kuziy yading mu manangu ma ayej inay. Pakwez, ov, chom ik chayileta kudia Yesu, muntu uwanyidina wakad ulim ap umwing? Mulong wova riy, Yesu wamusejina muntu winou wading muyej kudiosh pakuru.​—Tang Yohan 5:5-9.

¹⁰ Ukutwish kutongin kuburen kwa ruchingej kwadingay nich muyej winou pamwipulau kudi Yesu anch, ov, usotin kuyerik? Wakula kapamp kamwing. Muntu winou wading ukatin kuyerik pakwez kasotap kwijik mutapu ukuyerikay, mulong kwadingap mwin kumukwash kutuntuk mu dijiy dia mem. Chad Yesu wamuleja kusal yom yikasikena​—kunon chikang chend ni kuya. Wasala yamulejau kudi Yesu, wanona chikang chend ni wasambisha kwend. Chikasikeshin mudi ik pituchingedina yikusalay Yesu mwi ngand yisu! Mu chilay chinech, tumenamu kand ranaken ra Yesu. Wading kuyikimb antu aswirikedina ukwash. Chilakej cha Yesu chitubachikin kudandamen kuyikimb antu mu teritwar wetu aziyina mulong wa yom yiyimp yikata kuyishiken mu mangand minam.

‘NANY WAMPUKUNA KAL KU MASWIN MAM?’

11. Ov, mutapu ik umekeshinay Marko 5:25-34 anch Yesu wading ni ranaken nakash mulong wa ayej?

¹¹ Tang Marko 5:25-34. Mu mivu 12, mband winou wadinga ni mayej makwatishena usany. Mayej mend minam mading ni usu nakash mwom wend wawonsu, kuwejinaku ni difukwil. Ap anch “wamana mar nakash pamwokangau kudi amingang avud. Washesha yom yend yawonsu yakwetingay,” washala kamu makas mamwamu. Pakwez, dichuku dimwing, mband winou wamana kuswimp kukash. Wasala usu wa kusej piswimp nend Yesu. Wisila mu chisak cha antu ni wamupukuna Yesu ku maswin mend. (Lev. 15:19, 25) Yesu wova anch usu wamudiokal kal, chawiy lel, wipula anch nany wampukuna kal. Mband winou ‘Weza ni kuzal nich wom, was manungun ku mend yend, wamulej yom yawonsu patok.’ Pamanay anch Tatukwend Yehova wamwok kal mband winou, Yesu wamuleja nich ranaken anch: “Mwanam mband, ey wayerik kal mulong wa ritiy rey. Yang kwey nich chisambu, musong wey wapwa kal kamu chikupu.”

12. (a) Ov, yom ik wileja kal, mutapu ik ukutwisha kurumburil piur pa Yesu? (b) Chilakej ik chatushilay Yesu?

¹² Yesu wading muntu muwamp mudi ik! Etu twij anch wading uyikatin nakash ayej. Satan usotin twitiyija anch Yesu katukatinap ni anch tukwetap usey kudi ndiy. Kusutil yilay yiney, Yesu wamekesha patok anch ukat kubangin chakin kamu milong yetu. Mwant ni Mwin Kupesh Mujim muwamp mudi ik! (Heb. 4:15) chitukasikedin kwijik mutapu wovangau antu inay ading ni mayej makad kupwang, nakash anch kandikal kwetu tuyelangap mayej minam. Tufanyidin kwijik anch Yesu kadingap uyedin, pakwez witekanga pa ndond ya antu ayedina. El chilakej cha Yesu chikutubachik kusal chilik chimwing, kulondwish ukaliweny wetu.​—1 Pita 3:8.

“YESU WADILA”

13. Ov, divumbuk dia Lazar diamekesha ik piur pa untu wa Yesu?

¹³ Yesu wova nayimp mulong wa mar ma antu akwau. Chilakej, chisu chafay murund nend Lazar, Yesu “wova ushon” ni “wanenganan nakash.” Ap anch wova mwamu, pakwez wading wij anch, wading ufanyidin kumuvumbul Lazar. (Tang Yohan 11:33-36.) Yesu kovap usany wa kumekesh yovil yend. Antu eza ku chidil amana mutapu wadinga umukatinau Lazar ni anamakwend kudi Yesu. Ranaken mudi ik ramekeshay Yesu pasadinay usu wamwinkau kudi Nzamb mulong wa kumuvumbul murund nend!​—Yoh. 11:43, 44.

14, 15. (a) Ov, chom ik chimekeshina anch Yehova ukwet kuswir nakash kwa kudiosh mar ma antu? (b) Ov, mulong wak dizu “mwi nzay [ya chivurikish]” didi dia usey?

¹⁴ Bibil ulondin anch Yesu “ndiy kand ufanakenay nend [Sakatang].” (Heb. 1:3) Kusutil ku yilay yend, Yesu wamekesha anch ndiy ni Tatukwend akwet kuswir kwa kupwish misong ya mayej ni rufu. Maswir minam malejen yom yikemp kusu piur pa kuvumbuk kulejenau mu Bibil. Yesu walonda anch: “Chisu chikat kwez chikez kuteshau afu awonsu adia mwi nzay [ya chivurikish, NWT] . . . chad akez kuvumbuk kwikal kand aom.”​—Yoh. 5:28, 29.

¹⁵ Dizu diasadinay Yesu anch “mwi nzay [ya chivurikish]” diwanyidin, mulong adi mu manang ma Nzamb. Nzamb wa Dikand Diawonsu, watanga ngand yawonsu, ukutwish kuvurik yom yawonsu yasalau anamakwetu kurutu afa, kuwejinaku ni untu wau. (Isay 40:26) Chidiap anch mulong ukutwish kuyivurik pakwez chidi mulong ndiy ni Mwanend asotin kusal mwamu. Kuvumbuk kwa Lazar ni kukwau kulejenau mu Bibil yidi yilakej yisangareshina ya yom yikusadika mwi ngand yisu.

YITUKUTWISHA KWILEJIN KU YILAY YA YESU

16. Ov, chisend ik cha usey chikwikalau nich atushalapol ashinshamena a Nzamb?

¹⁶ Anch twalam kushinshaman kwetu kwa win Kristu, tukutwish kupan uman wa yilay yijim chisu chawonsu​—mudi chilay cha kupand ku mar mapandikena. Machuku makemp kupwa kwa njit ja Armagedon, yilay yivud yikez kuwanyin, mulong wa kuyichirishin antu ukash wa mujimbu uwanyidina. (Isay 33:24; 35:5, 6; Kuj. 21:4) Tong bil mutapu ukulikau antu kudjal makalash ma mes, ukulikau kwend ni mikombu, ma bekiy (béquilles), nking ya ayilim, yom ya kutesh nich, ni yom yikwau kand. Yehova ukez kayinkish antu akupanda ku Armagedon ukash wa mujimbu uwanyidina. Antu inay akupanda akwikal ni mudimu wa kusal. Akez kutenchik divu diakabuj chakwel dikala Paradis.​—Kus. 115:16.

17, 18. (a) Ov, yilay ya Yesu yitwinkin kashinsh ik? (b) Mulong wak ufanyidin kusal usu chakwel ushakama mwi ngand yisu?

¹⁷ Kwok kwasalay pasak kukasikeshin “chisak chijim” cha antu nlel, kukasikeshin kand ruchingej rau ra kuyerik ku mayej mau mawonsu. (Kuj. 7:9) Kuyerik kwinoku kumekeshin kand mutapu uyikatinau antu kudi Mwan wa kusambish wa Nzamb. (Yoh. 10:11; 15:12, 13) Ranaken ra Yesu rimekeshin rukat rikash rikwetay Yehova mulong wa kashalapol wend mwawonsu.​—Yoh. 5:19.

¹⁸ Mangand mizwil nlel unou too nich mar, ni rufu. (Rom 8:22) Tukwet kuswir kwa ngand yisu ya Nzamb, mukwikala ukash wa mujimb uwanyidina watukanay. Malakiy 4:2 utwinkishin kashinsh anch tukez ‘kusangar midi an a nnam akata kumatok,’ akweta musangar mulong ayikwol kal ku usuk wa kuburen kuwanyin. El tumujikitishany Yehova ni el ritiy retu mu kushilamu kwend yitubachika kusal yawonsu yitwishikina chakwel tushakama mwi ngand yisu. Chikasikeshin mudi ik kwijik anch yilay yasalay Yesu yading kwau yilakej ya yom yikusangerau antu piswimp ap mu umutakel wend!