‘Dipandish Dien Didi Piswimp’!

1. Yom ik yasadika mu muvu wa 66? (Tal chipich chidia kwinsambishil.)

TONG bil mudi anch wading mwin Kristu ushicha mu Yerusalem mu muvu wa 66. Kudi yom yivud yisadikina. Florus mukurump wa amasalay wiy kal a talent 17 mu chipau chidia mu tempel. In Yuda ov kal ujim pakad kulab. Ajip kal amasalay avud a in Rom ni alond kal anch kadiap kand mwishin mwa umutakel wa in Rom. Pakwez, in Rom asambish kal njit pakad kulab. Mu angond asatu, Cestius Gallus watakel kal yisak ya amasalay 30 000 awombamu musumb wa Yerusalem. Antombwij in Yuda achinin kal mu tempel mulong wa kwiking, pakwez amasalay a in Rom akandamin piur pa rubumbu ra tempel ni asadin usu wa kurubumun. Muntu mwawonsu udia mu musumb wov kal wom nakash. Ov, ukwiyov nchik mu mashakamin minam?

2. Ov, chom ik chafanyinau in Kristu kusal panyingumokau musumb kudi amasalay in Rom, ni mutapu ik watwishau kusal mwamu?

² Mivu kurutu, Yesu wayibabesha in kwilejend piur pa yinship ni wayileja anch: “Piukumananya amasalay awombamu musumb wa Yerusalem, chad ukez kwijikany anch, udi piswimp ni kusheshik. Pa chisu chinicha chifanyidin antu awonsu adia mu Yudeya achinyin ku mikandu. Antu awonsu adia mu musumb chifanyidin kudiokalamu, chawiy antu awonsu adia mu makunku kangal aya mu musumb.” (Luka 21:20, 21) Ov, mutapu ik wafanyinau antu kuziyil chiyul cha Yesu cha kubudik mu Yerusalem chisu chanyingumukau amasalay musumb? Chom chishimokishena chasadika. Amasalay in Rom adiokala mu Yerusalem kapamp kamwing! Mudi mwalonday Yesu, ‘akepisha uvud wa machuku’ ma njit jau. (Mateu 24:22) Kupwa kwa amasalay kuya, chading chisu chiwamp cha in Kristu ashinshamena kuziyil ku chiyul cha Yesu cha kubudik kapamp kamwing kuchinin ku mikandu.a (Tal mazu madia kwishin kwa paj.) Kupwa, mu muvu wa 70, amasalay in Rom achirika kand ku Yerusalem. Eza katat mulong wa kushesh musumb. Pakwez antu awonsu aziyila ku chiyul cha Yesu, apanda.

3. Ov, mikadil ik ya chilik chimwing ni yasadika yikeza kuyishiken in Kristu piswimp ap, chom ik tukwileja mu mutu wa mulong winou?

³ Dibabesh ni chiyul cha Yesu yidi kand ya usey nlel. Tukwikal niyetu mu mashakamin ma chilik chimwing piswimp ap. Yesu wasadina yinship yasadika mu yitot ya mivu ya kusambish mulong wa kulejan yikeza kusadik pa chirungu chikeza kusambish ‘mar makash.’ (Mateu 24:3, 21, 29) Mudi mwapandau in Kristu ashinshamena pasheshau Yerusalem, ‘chisak chipandakena kujimb’ cha antu chikez kupand ku mar makeza kwikal pa mangand mawonsu. (Tang Kujingunik 7:9, 13, 14.) Chidi cha usey kudi etu kusadil yitulejinay Bibil piur pa yinship yikeza kasadik. Ov, mulong wak? Chidi mulong wa kupand. Chawiy lel, twilejany amboku mutapu ukeza kwikal yom yiney nich usu pa mashakamin metu.

DISAMBISHIL DIA MAR MAKASH

4. Ov, chisu ik chikusambish mar makash?

⁴ Ov, mutapu ik ukeza mar makash kusambish? Nich kusheshik kwa marelijon ma makasu. Mu Bibil, atazukin ma relijon ma makasu anch “Babilon Mujim, ndiy makwau wa in kusochik.” (Kujingunik 17:5-7) Ov, mulong wak atazukin relijon wa makasu anch mband wa kusochik? Mulong antakel au adi akad kushinshaman kudiay Nzamb. Pa ndond pa kumukwash Yesu ni Want wend, akat kupan ukwash wau ku ma guvernema ni alikin kwitiyij yom yifundishinay Bibil yikutwisha kwikal ni usu padi awiy. Difukwil diau dishitwilap mudi dia azizidilau many. (2 Korint 11:2; Jakobu 1:27; Kujingunik 14:4) Pakwez, nany ukeza kashesh Babilon Mujim? Yehova ukez kutek rusot rend mu “misengu dikum” ya ‘nnam musunz’ ra ‘kuwanyish rusot rend.’ ‘Nnam musunz’ umekeshin Nations Unies, ni “misengu dikum” yimekeshin mant mawonsu ma chipolitik mamukwashina.​—Tang Kujingunik 17:3, 16-18.

5, 6. Mulong wak tulondin anch disheshik dia Babilon Mujim dirumburikinap anch antu awonsu adia mu marelijon ma makasu akufa?

⁵ Ov, antu awonsu adia mu marelijon wa makasu akez kufa chisu chikezau kushesh Babilon Mujim? Bwat kwau. Yehova wamupepila muprofet Zakariy kufund piur pa yom yikeza kushiken. Chisu chinicha, antu amwing adinga mu relijon wa makasu akez kulond anch: “[‘Nidiap muruu wa Nzamb’, NWT.] ‘Nidi mwin kudim. Nading mwin kudim mivu yam yawonsu.’ Chad anch muntu wamwipul anch: ‘Ov, yin yidur yidia pa ntul yey yak?’ ndiy ukez kamwakul anch: ‘Antapa yom yiney ku chikumbu cha murund nam.’” (Zakariy 13:4-6) Chawiy lel, amakurump amwing a marelijon akez kulik marelijon mau ni akez kwitun ni kulond anch kadingap kwau mu marelijon minam ma makasu.

⁶ Ov, chom ik chikeza kuyishiken antu a Nzamb chisu chinicha? Yesu warumburila anch: “Pakwez Nzamb watonda kal kukepish kuvul kwa machuku minam. Anch ndiy kasalap mwamu, ing kwikil muntu wela kupand. Pakwez Nzamb ukez kukepish kuvul kwa machuku minam mulong wa antwend atonday.” (Mateu 24:22) Mu mivu chitot ya kusambish, ‘akepisha’ uvud wa machuku ma mar ma mu Yerusalem. Chom chinech chayikwasha “antwend atonday,” in Kristu azizidilau many kuchin. Chilik chimwing, chikunku cha kusambish cha mar makash akez ‘kuchikepish’ mulong wa “antwend atonday.” Mant ma chipolitik, ap “misengu dikum,” makezap kutwish kushesh antu a Nzamb. Ap mwamu, kukwikal kachisu kakemp ka chisambu kurutu kwa disheshik kwez.

CHISU CHA YOZIU NI CHA DIRUMBURISH

7, 8. Ov, yirungu ik yikeza kwikalaku kupwa kwa disheshik dia relijon wa makasu, ni mutapu ik ukezau antu a Nzamb ashinshamena kwiman dang pa chisu chinicha?

⁷ Chom ik chikeza kushiken kupwa kwa disheshik dia relijon wa makasu? Chikez kwikal chisu cha kumekesh yom yidia mu michim yetu. Chisu chinicha antu avud akez kuya kukimb diking ni ukwash mu yitenchik ya antu yidia mudi “mayal ma mikandu.” (Kujingunik 6:15-17) Pakwez antu a Yehova akez katek ruchingej rau mudiay ndiy. Chisu ‘chimikau’ njit mu chitot cha mivu cha kusambish, chadingap chisu cha in Yuda awonsu kukarumuk kwikal kapamp kamwing in Kristu. Pakwez, chading chisu cha awonsu adinga in Kristu akin kubudik mu Yerusalem mudi mwatakelay Yesu kuyilej. Chilik chimwing kand machuku ma kurutu, chisu ‘chikwimikau’ njit pantaliken ni Babilon Mujim, chikwikalap chisu cha antu avud kukarumuk kwikal in Kristu akin. Pakwez, chikwikal chisu chiwamp kudiau akata kumwifukwil Yehova kumekesh rukat rau kudi ndiy ni kuyikwash azizidilau many.​—Mateu 25:34-40.

⁸ Twijap kamu nawamp chikeza kusadik pa chisu chinech cha yoziu. Pakwez, twij anch mashakamin makez kwikal makash ni kwipan kukwikal kwa usey nakash. Mu chitot cha mivu ya kusambish, in Kristu afanyina kusha yikumbu yau ni kurish nich yoziu yadingaku mulong wa kupand. (Marko 13:15-18) Tufanyidin kwiyipul anch: ‘Ov, nikez kusot kushadish yom yam ya kumujimbu? Nikez kusal yom yidia ya usey mulong wa kulam kushinshaman kwam mudiay Yehova?’ Tongin pa chom chinech. Chisu chinicha, tukwikal antu amwing kusu amwifukwidila Nzamb wetu mudi mwadingay muprofet Daniel chikalap nchik yom yikeza kushiken.​—Daniel 6:10, 11.

9, 10. (a) Ov, uruu ik ukezau antu a Nzamb kulejan pa chisu cha mar makash? (b) Ov, chom ik chikezau kusal akankuny a antu a Nzamb?

⁹ Chisu cha mar makash chikwikalap chisu cha kulejan “rusangu ruwamp ra Want wa Nzamb.” Chisu cha kulejan rusangu chikwikal chasutin kal. Chikwikal chisu cha kwez kwa “disudiel”! (Mateu 24:14) Antu a Nzamb akez kulejan kamu uruu wa dirumburish dikash ukwikala nich usu padi antu awonsu. Uruu winou ulondin anch mangand mayimp ma Satan makusheshik kamu. Bibil ufanikeshin uruu winou nich ruvul wa mayal palondinay anch: ‘Mayal ma ruvul majim makweta kulim kwa akilo makum manying mayiwila antu. Chad antu amusaala Nzamb masaal, mulong wa chipupu cha mayal ma ruvul. Chipupu chinech chading chipandaken kuyip.’​—Kujingunik 16:21.

¹⁰ Akankuny netu akutesh uruu winou ukash. Yehova wamupepila muprofet Ezekiel chakwel arumburila mutapu ukeza kusal chisak cha michid, chitazukinau mu Bibil anch Gog wa mwi ngand ya Magog, anch: “Dined diawiy dizu dialonday [Yehova] Nsalejam kudi mwant Gog anch: ‘Anch chisu chinech chashik, ey ukez kukwat mpung yiyimp. Ukez kutond kwandam nich usu mwi ngand yakad usu, mushichau antu zong nich chisambu mu misumb yakad mpwembu ni mapat. Ukez kubuu yom ya antu ashicha mu misumb yading yibumbur. Awiy akumangejau kudiokal ku mangand makwau, katat akwet yivam, ni mapit, awiy kamu ashicha pakach pa mangand mawonsu.’” (Ezekiel 38:10-12) Antu a Nzamb akushalijan ni antu akwau, mudi anch ashicha “pakach pa mangand mawonsu.” Michid yikezap kuziy. Yikez kudandamen kuyirishish azizidilau many a Yehova ni antu ayikwashina.

11. (a) Ov, chom ik tufanyidina kwijik piur pa yom yikeza kusadik pa chisu cha mar makash? (b) Ov, mutapu ik ukezau antu kusal chisu chikumanau yijingidij?

¹¹ Kupwa, ov, chom ik chikeza kusadik? Bibil katulejinap kamu nawamp yom yikeza kusadik, pakwez yom yimwing yikez kulondulijan chisu chimwing. Papanay uprofet piur pa disudiel dia ditenchik dia yom, Yesu walonda anch: “Kukez kwikal yijingidij ku muten, ni kwi ngond, ni ku atutumbu. Chad panap pansh antu awonsu a mangand mamwing akez kukatuk mong, mulong wa wom wa kwon kwa karung ni mambek makash. Antu akez kufa mutentu pakuchingelau yom yikeza kushik pa mangand mawonsu, mulong wa atutumbu akez kudiokal mwiur, apalik, ni ukash ulamina yom ya piur ukez kunyikek. Chad Mwan a Muntu ukez kumekan, ukez kwezil mu madj nich ukash ujim ni uyaj.” (Luka 21:25-27; tang Marko 13:24-26.) Ov, mu kuwanyin kwa uprofet winou mudi kand ni yijingidij yakamishena ni yom yikeza kusadik mwiur? Tufanyidin kuchingel mulong wa kuman. Pakwez, tufanyidin kwijik anch, chisu chikumanau akankuny a Nzamb yijingidij, akez kuzal-zal ni kwov wom.

12, 13. (a) Ov, chom ik chikeza kusadik chisu chikwezay Yesu nich “ukash ujim ni uyaj”? (b) Chom ik chikezau kusal atushalapol a Nzamb chisu chinicha?

¹² Ov, chom ik chikeza kusadik chisu chikwezay Yesu nich “ukash ujim ni uyaj”? Ukwez kuyifut antu ashinshamena ni kuyipup antu ayimp. (Mateu 24:46, 47, 50, 51; 25:19, 28-30) Yesu wasadila chilakej mulong wa kurumburil yom yiney nawamp, palonday anch: “Pakwezay Mwan a Muntu mudi Mwant pamwing nau aruu end awonsu a mwiur, ukez kushakam pa ditand diend dia uyaj. Antu a michid yawonsu akez kukumangan kurutu kwend. Chad ukez kuyauril mu yisak yaad, mudi mukat kwaurilay kafung amikoku ni ampemb. Ukez kutek antu adia mudi amikoku ku chikas chend cha katatuku, pakwez antu adia mudi ampemb ukez kuyitek ku chikas chend cha kamaku.” (Mateu 25:31-33) Ov, chom ik chikeza kuyishiken amikoku ni ampemb? Akez kayirumburish. Ampemb, ap antu akad kushinshaman, “akez kuyitwal mulong wa kuyilej kadimu ka chikupu.” Pakwez amikoku ap antu ashinshamena akez katambul mwom wa chikupu.​—Mateu 25:46.

¹³ Ov, chom ik chikusalau ampemb pakwijikau anch akuyijiyish? “Akez kudil.” (Mateu 24:30) Pakwez, chom ik chikezau kasal antu azizidilau many ni antu akwau ayikwashina? Akulondul chiyul chayilejau Yesu anch: “Piyikusambisha kumekan yom yiney, imanany piur, zambulany mes, mulong dipandish dien diez kal piswimp.”​—Luka 21:28.

KUZUT MUDI MUTEN MU WANT

14, 15. Mudimu ik wa kukumangej ukusadika kupwa kwa njit ja Gog wa mwi ngand ya Magog, ni chom chikushikena?

¹⁴ Yom ik yikusadika kupwa kwa Gog wa mwi ngand ya Magog kusambish kuyirishish antu a Nzamb? Bibil ulondin anch Mwan a muntu “Ukez kuyitum aruu a mwiur kuya ku mitambu ni mitambu ya ngand, mulong wa kuyikumangej antu atonday Nzamb adia ku mitambu yawonsu ya ngand.” (Marko 13:27; Mateu 24:31) Mudimu winou wa kukumangej umekeshinap chisu chiyitondinau kapamp ka kusambish in Kristu azizidilau many. Ni umekeshinap chijingidij cha nsudiel cha azizidilau many achidia kal pa divu. (Mateu 13:37, 38) Yijingidij yiney akuyitek kurutu kwa mar makash kusambish. (Kujingunik 7:1-4) Ov, mudimu wa kukumangej winou chom ik? Chidi chisu chikutambulau azizidilau many difut diau ni kuya mwiur. (1 Tesalonik 4:15-17; Kujingunik 14:1) Yom yiney yikusadik kapamp kamwing kupwa kwa Gog wa mwi ngand ya Magog kusambish njit. (Ezekiel 38:11) Chikusadik mudi mwalonday Yesu anch: “Antu atentamina akez kuzut mudi muten mu Want wa Tatukwau.”​—Mateu 13:43.b (Tal mazu madia kwishin kwa paj.)

¹⁵ Ov, chinech chirumburikin anch, antu azizidilau many akez ‘kayizambul’? Antu adia mu ma relijon ma makasu alondining anch in Kristu akez kuya mwiur nich mijimbu ya mbij. Atongining kand anch akez kamuman Yesu nich mes mau pakuchirikay mulong wa kuyikel pa divu. Pakwez, Bibil ulejen patok anch kwez kwa Yesu kudi kwakad kumekan ku mes palondinay anch: “Chijingidij cha Mwan a muntu chikez kumekan mwiur” ni Yesu ukwez kez mu “madj ma mwiur.” (Mateu 24:30) Bibil ulondin kand anch ‘mbij ni mash yikutwishap kuswan Want wa Nzamb.’ Komb antu akuya mwiur aswiridin chakusambish kwikal ‘akarumwinau mu ka chisu kakemp mudi kufet kwa dis, pakeza kabulau mpuny ya disudiel dia mangand.’c (Tal mazu madia kwishin kwa paj.) (Tang 1 Korint 15:50-53.) Tusadidinap dizu ‘kuyizambul’ mulong wa kurumburil yom yiney, mulong yikwatijadin nich mafundish ma makasu ma Kristendom. Pa chinech, komb ashinshamena azizidilau many achidia kal pa divu akez kuyikumangej pamwing kapamp kamwing.

16, 17. Ov, yom ik yikusadika kurutu kwa uruw wa mwan a Mukoku usadika?

¹⁶ Chisu chikuyau azizidilau many 144 000 awonsu mwiur, pawiy pakupwishau kutenchik kwa uruw wa mwan a Mukoku. (Kujingunik 19:9) Pakwez chom chikwau chikutwish kusadik kurutu kwa chirungu chinech. Vurik anch Gog ukez kayirishikish antu a Nzamb chisu chichidiau ashadilap a azizidilau many pansh pa divu. (Ezekiel 38:16) Chom ik chikusalau antu a Nzamb? Akez kuziyil kwi mbil yiney: “Kiukaswiranyap kwen kurish njit. Imanany kwen kwinikwa, lamany jindond, ukamanany dipandish dia [Yehova, NWT] didia kudi en. . . . Kangal wakamany kwen, kangal wovany wom.” (2 Jinsangu 20:17) Yisu yimwing kupwa kwa njit ja Gog kusambish, ashadilap awonsu azizidilau many adia pansh pa divu akuya chadi mwiur. Chawiy chitulejinay Kujingunik 17:14 piur pa yom yikusadika mwiur pakurishay Gog. Akankuny a antu a Nzamb “Awiy akez kurish njit nend Mwan a Mukoku, pakwez Mwan a Mukoku ukez kuyipandakan, mulong ndiy udi Nsalejau wa ansalejau, udi kand Mwant wa ant. Ukez kushakam nau aend atazukay, awiy atonday adinga ni kumulondul nich win yakin.” Mwamu, Yesu pamwing nau azizidilau many 144 000 adia ant mwiur, akuyipandish antu a Nzamb panap pansh.

¹⁷ Kupand kwinoku, kukushikij kwi njit ja Harmagedon jikuleta katumb pa dijin ditumbila dia Yehova. (Kujingunik 16:16) Antu awonsu akurumburishau mudi ampemb ap akad kuwanyin, akez kuyijiyish. Kukwikalap kand uyimp pa divu ni “chisak chijim” chikupand ku Harmagedon. Pa chinech, mazu ma nsudiel ma makand wa Kujingunik makuwanyin, malondila mulong wa uruw wa mwan a Mukoku! (Kujingunik 21:1-4)d (Tal mazu madia kwishin kwa paj.) Antu awonsu akupanda panap pansh akusanger ranaken ra Nzamb ni akuman rukat rend rijim ni muchim wend uwamp. Tuchingedin nich kashinsh yom yikusadika kurutu oku. Ukwikal musambu wa uruw uwamp mud ik!​—Tang 2 Pita 3:13.

18. Piur pa yom yatakelau kulond yikusadika kurutu oku, ov, tufanyidin kukwat mupak wa kusal ik?

¹⁸ Piur pa yom yikash yikushikena kurutu oku, ov, chom ik chifanyidina umwing ni umwing wa pakach petu kusal katat? Yehova wamuleja kambuy Pita kufund anch: “Mulong yom yiney yawonsu yikez kusheshik mutapu winou, ov, ukwikalany antu a mutapu ik? Chifanyidin en kwikalany nich mwom utumbila, wikalany kand in kudandamen kudi Nzamb, piuchingedilany dichuku dikurumburishay Nzamb . . . Chawiy, arund nam, piuchingedilany dichuku dined, salany usu wa kwikal zwang wakad kufa nich kurutu kwa Nzamb, ikalany nich chisambu pakach penen nend ndiy.” (2 Pita 3:11, 12, 14) Komb el tukwatany mupak wa kulam difukwil dietu dishitwila, pakad kudibomb ni relijon wa makasu ni tumukwashany Mwant wa Chisambu, Yesu Kristu.