Muntu Ukutwish Kusal Yom Yimusangareshina Nzamb?

Nshakur Job amulejen mudi mwin “kumwov Nzamb wom ni kwiyep ku kuyip.” (Job 1:1) Lot amutazuka anch: “muntu . . . utentamina.” (2 Pita 2:8) Ni alonda piur pa David anch wading kusal “yom yitentamina” ku mes ma Nzamb. (1 Ant 14:8) Pakwez, tushinshikinany amboku pa mashakamin ma antu inay a mu Bibil. Tukuman (1) anch arumbuka ni asala yom yiyimp, (2) mutapu wa kwilejin ku yilakej yau, ni (3) anch antu akad kuwanyin akutwish kumusangaresh Nzamb.

ARUMBUKA NI ASALA YOM YIYIMP

Job wamana mar makash kushalijan mamekana kwikal makad kuwanyin. Wikala ni chitongijok chiyimp ni walonda anch Nzamb kamubanginap ap anch wading ukwet ritiy mudi ndiy. (Job 9:20-22) Job wading ni kashinsh anch udi muntu utentamina kuyisutamu antu akwau ni kumusutamu kand Nzamb.​—Job 32:1, 2; 35:1, 2.

Lot widjidjeka pa kukwat mupak uswapela ni wovikena nawamp. Wovanga ushon mulong wa usund wa antu mu Sodom ni Gomor, kushik ni ku ‘kunenganesh muchim’ wa muntu utentamina winou mulong wa yisal yau yiyimp. (2 Pita 2:8) Nzamb wakana anch ukushesh misumb yiyimp yiney ni kumupandish Lot ni dijuku diend. Ukutwish kutong mutapu wafanyinay Lot kudiokal mu musumb winou swaa. Pa chisu chinech chikash, ndiy walaba. Angel atumau mulong wa kumupandish ndiy ni dijuku diend, ashikena ku kuyikwat ku makas mulong wa kuyibudish pol pa musumb ni kuyitek mu diking.​—Disambishil 19:15, 16.

David, chisu chimwing wakanganya kwilam ni wasala masandj ni mband wayen. Cha ushon, wamujipisha nfumwend a mband winou mulong wa kujindjik chitil. (2 Samwel, shapitre 11) Bibil ulondin anch: “chom chasalay David chamusangareshap [Yehova, NWT].”​—2 Samwel 11:27.

Job, Lot, nend David arumbuka ni asala yom yiyimp, yimwing yiyimp nakash. Pakwez, mudi mutukumana, akata kumuziyil Nzamb nich muchim umwing. Ita dilikishin kwa kwisotil ni aswimpa mwikadil wau. Chawiy lel, Nzamb wayanakena ni cha usey nakash Bibil uyitazukin anch antu ashinshamena.

CHOM IK TUKUTWISHA KWILEJINAKU?

Mulong tudi antu akad kuwanyin, tukutwish kurumbuk ni kusal yom yiyimp. (Rom 3:23) Pakwez anch twarumbuk, tufanyidin kukarumuk ni kusal usu wa kusal yom yiwamp.

Mutapu ik watwishay Job, Lot, ni David kukarumuk ni kusal yom yiwamp? Job wading muntu ushinshamena mu muchim wend. Kupwa kwa Nzamb kwambamb nend, Job wikal nich chitongijok chiwamp ni wifisha nich mulong wa mazu malonday. (Job 42:6) Mutapu wamanangay Lot yisal ya usund ya antu a mu Sodom ni Gomor wakwatijana kamu ni yany ya Nzamb. Pakwez wakanganya mwikadil wa kusal swa swa. Wachina mu misumb yiney ni wapanda ku dirumburish dia Nzamb. Waziyila pa kulik kutal yom yashay kwinyim kwend. Ap anch David wasala chitil chijim pa kujip chijil cha Nzamb, wamekesha yading mu muchim wend pa kumekesh kukarumuk kwakin ni kumwit Nzamb dilikishin.​—Kuseng 51.

Nzamb wading ni chitongijok chiwamp piur pa antu inay, kakatap kuyit antu kusal yakadiau kutwish. Nzamb “wij mutapu watungay, ndiy ukat kuvurik anch, etu tudi kwetu rufunfut.” (Kuseng 103:14) Pakwez, anch Nzamb wij anch tukutwish kurumbuk ni kusal yom yiyimp, chom ik chitwitinay anch tusala?

ANTU AKAD KUWANYIN AKUTWISH KUMUSANGARESH NZAMB

Chiyul chamwinkau Salomon kudi David chitulejin mutapu tukutwisha kumusangaresh Nzamb. “Ey, mwanam Salomon, mwijika Nzamb wa tatukwey, ni kumusadil ndiy nich muchim wawonsu.” (1 Jinsangu 28:9) Kwikal ni “muchim wawonsu” chom ik? Muntu ukweta muchim wawonsu umukatin Nzamb ni ukwatin mupak wa kwijik ni kusal rusot rend. Kwikal ni muchim wawonsu kurumburikinap kwikal muntu uwanyidina, pakwez kurumburikin kumusadil kwa kuziyil ni kusal usu wa kwitiy chiyul kwa kwisotil. Kumukat Nzamb ni kwikal ni rusot ra kumuziyil kwamukesha kwikal mwin “kumwov Nzamb wom,” Lot mudi muntu “utentamina,” nend David mudi mwin “kusal ching yom yitentamina” ku mes kwa Nzamb. Ap anch arumbuka ni kusal yom yiyimp, atwisha kumusangaresh Nzamb.

Chawiy lel, anch twashiken kwikal ni yitongijok yiyimp, ap kulond yom yakad kuwanyin ni kusal yom yiyimp, yilakej twileja kal ey yikutwish kutukasikesh. Nzamb wij nawamp anch tudi akad kuwanyin. Pakwez, utuchingejidin anch tumukata ni tusala usu wa kumuziyil. Anch twikal ni muchim wawonsu kudi ndiy, niyetu tukwikal nich kashinsh anch tukutwish kumusangaresh Nzamb.