Yipul ya in Kutang

Chisu chamulejau Ev kudi Satan anch kakufap kwend anch wadia dibuj dia mutond wa ronganyin ra kuwap ni kuyip, ov, Satan wandjika mu manangu ma Ev chitongijok chipalangena nlel cha mupim wakad kufang?

Chimeken anch bwat. Djabul kamulejap Ev anch ang wadia dibuj diakangeshay Nzamb, ukumekan kusu kwend mudi wafa kal pakwez chikunku kanang chakad kumekanang cha mujimbu wend (chitazukinau kudi antu amwing nlel anch mupim wakad kufang) chikudandamen kushakam mwi ndond kanang. Palonday kusutil nnak, Satan wamuleja Ev nich kashinsh anch ang wadia dibuj dia mutond winiwa, ‘chakin kamu kafanyinap kufa.’ Satan wamekesha anch Ev wafanyina kudandamen kwikal mwom ni kusanger mwom upandikena kuwap pa divu, pakad kulondul umutakel wa Nzamb.—Dis. 2:17; 3:3-5.

Anch mafundish ma makasu ma mupim wakad kufang mafundishinau nlel masambishinap mu Eden, ov masambisha lel chisu ik? Tukutwishap kamu kulond nich kashinsh. Twij anch difukwil diawonsu dia makasu diasheshika ku Mabeb ma pa chirung cha Nowa. Kwadingap chitongijok chiyimp cha chirelijon chapanda ku Mabeb mulong ching kusu Nowa ni dijuku diend awiy apanda—in kwifukwil akin.

Chawiy, chimeken anch mafundish ma mupim wa muntu wakad kufangang masambisha kupwa kwa Mabeb. Chisu charumbageshay Nzamb mazu pa chirung cha Babel ni papalanganau antu “pansh pawonsu,” pakad kwidjidjek chimeken anch chawiy chisu chapalanganau antu nich chitongijok cha kwel anch antu akweting mupim wakad kufangang. (Dis. 11:8, 9) Chikalap nchik chisu chasambisha chitongijok chinech cha makasu, tukwet kashinsh anch “tatuku wa makasu,” Satan Djabul, ndiy wayibachika antu kutong mwamu ni wasangara nakash pa kuman mutapu chitongijok chinech chapalangana pa mangand mawonsu.—Yoh. 8:44.