Buku Dzra Wubidzri Dzra Samuwele
16 Nkama lowu Davhida a fulamelaka nhava, a kuma Ziba, ku nga mutizri wa Mefiboxeti, na a mu yimelile na a ni timbongolo tibidzri leti a ti zrwale 200 wa mapawu, 100 wa mabolu lawa ma hambiwiki hi mawuvha ya ku woma, 100 wa mabolu lawa ma hambiwiki hi mihandzru ya malanga* ni hotsro ya yikulu ya vhinyu. 2 A hosi yi vutisa Ziba yi ku: “Ha yini u buyise mintxhumu leyi?” Ziba a yi hlamula a ku: “A timbongolo ti bekiseliwe kuva ku ta khwela va le kaya kwaku we hosi, a mapawu ni mihandzru ya ku womisiwa ya malanga ku ta da masotxha, kasi a vhinyu ku ta nwa lava va taka txhuka va kazrala a mananga.” 3 A hosi yi vutisa Ziba yi ku: “A n’wana* wa hosi yaku a kwini?” Ziba a hlamula a ku: “A sale Yerusalema, hikusa a tibyele leswi: ‘Hi namunhla lani a Vaisrayele va taka ni tlhelisela a mfumu wa papayi wanga.’” 4 Hiloko hosi yi byela Ziba yi ku: “Ku sukela ka swoswi, hinkwaswu leswi swi lumbaka Mefiboxeti i swaku.” Ziba a ku: “Ni khinsama a mahlweni kwaku we hosi, ingiki u nga ni nyonxela we hosi yanga.”
5 Loko Davhida a tlhasa Bahurimi, wanuna wa kukazri wa ndangu wa ka Sawulo, lweyi a vitaniwaka Ximeyi n’wana wa Gera, a mu tlhangaveta na a mu zruketela. 6 A a txukumetela mazribye ma kongoma hosi Davhida ni malandzra yake hinkwawu kun’we ni vhanu hinkwavu ku patsra ni tinhenha leti a ti sizrelela hosi, leti a ti le tlhelweni dzra xinene ni dzra ximatsri dzra hosi. 7 Ximeyi a a zruketela a ku: “Suka, suka lani! Mudlayi ndzriwena, xiphunta! 8 Yehovha o ku khatisa hi mhaka ya nandzru wa ngati ya va ndangu wa ka Sawulo, lweyi u mu tekeliki wuhosi, nakone Yehovha a teke wuhosi a byi nyika n’wanaku Absalomu. Swoswi u teliwa hi makhombo lawa hikusa u mudlayi!”*
9 Hiloko Abixayi n’wana wa Zeruya a byela hosi a ku: “Hosi yanga, ha yini ku tsrhikiwa mbyana leyi, leyi fiki, yi ku zruketela? Ni pfumeleli ni ya mu tsrema nhloko swoswi.” 10 Kambe a hosi yi ku: “Kasi ni na yini na n’wine, n’wine vana va Zeruya? Mu tsrhiki a ni zruketela, hikusa Yehovha a mu byele a ku: ‘Zruka Davhida!’ Xileswo i mani lweyi a nga mu vutisaka a ku: ‘Ha yini u yentxa leswi?’” 11 Hiloko Davhida a byela Abixayi ni malandzra yake hinkwawu a ku: “Loko a n’wananga lweyi ne ke mu pswala* a ni hlota* akuva a ni dlaya,* swi nga kuyini hi mhunu wa ka Benjamini? Mu tsrhikani a ni zruketela hikusa a zrumiwe ha Yehovha. 12 Yehovha a nga ha vona ku xaniseka kwanga, a va yene Yehovha a ni tovokisa a matsrhan’wini ya ku ni tisela swizruku leswi ni zrukiwaka ha swone namunhla.” 13 Xileswo Davhida ni masotxha yake va tama va famba hi ndlela na Ximeyi a famba hi le tlhelweni ka nhava na a zruketela, a va txukumetela hi mazribye, a va dluvuxela ni ntsrhuzri ku ku mphum!
14 Hi wugamu, a hosi ni hinkwavu lava a va li na yone va tlhasa lomu a va ya kone na va kazrale ngopfu, va tlhasa va wisa.
15 Ka nkamanyana wolowo, Absalomu ni vavanuna hinkwavu va Israyele va tlhasa a Yerusalema nakone a va na Ahitofele. 16 A munghanu wa Davhida, Huxayi lweyi wa Muarkhiti, a ya ka Absalomu a tlhasa a ku: “Hosi, hanya hi masiku! Hosi, hanya hi masiku!” 17 Hi kola ka leswo, Absalomu a vutisa Huxayi a ku: “Xana leswi u swi yentxaka swi kombisa wunene ka munghanu waku? Ha yini u nga fambanga na yene?” 18 Hiloko Huxayi a hlamula Absalomu a ku: “A ni nge swi yentxi leswo! Mine ni yima ni lweyi a hlawuliwiki hi Yehovha, hi xitsrhungu lexi ni hi vavanuna hinkwavu va Israyele nakone ni ta seketela mhunu yelweyo. 19 Handle ka leswo, i mani lweyi ni fanelaka ku mu tizrela? Xana a hi n’wana? Xileswo ni ta ku tizrela hi lani ni mu tizreliki ha kone papayi waku.”
20 Hiloko Absalomu a vutisa Ahitofele a ku: “Ni pfuni hi mavonela, hi yentxa yini swoswi?” 21 Ahitofele a byela Absalomu a ku: “Yentxa swa tinkuku ni vasati lavatsrongo va papayi waku lava a va siyiki akuva va bekisa muti.* Loko Vaisrayele hinkwavu va tiva leswaku papayi waku a sungule ku ku nyenya, lava va yimaka na wene va ta ya va va ni ntamu.” 22 Xileswo va gwimba tende a henhla ka yindlu. Kutani Absalomu a ya yentxa swa tinkuku ni vasati lavatsrongo va papayi wake ka dzrone, na Vaisrayele hinkwavu va swi vona.
23 A masikwini lawo, a mavonela lawa a ma nyikeliwa hi Ahitofele a ma voniwa swanga zritu dzra Xikwembu Nkulukumba wa ntiyiso. Davhida na Absalomu a va ma vona hi ndlela yoleyo a mavonela hinkwawu ya Ahitofele.