Tinhlayu

35 Yehovha a ya mahlweni a vulavula na Moxe a mananga ya le Mowabu kusuhi ni Yordani, a Yeriko, a ku: 2 “Byela Vaisrayele leswaku ka pfindla ledzri va taka dzri yamukela va fanela ku nyika Valevhi a madoropa akuva va tsrhama ka wone, va fanela ku va nyika ni mbangu wa ku byisela ka wone mintlhambi ka mimbangu leyi nga kusuhi ni madoropa. 3 Va ta tsrhama a madoropeni wolawo nakone a mimbangu ya ku byisela ka yone yi ta va ya mintlhambi yavu, ya mintxhumu yavu ni swifuyu swavu hinkwaswu leswin’wana. 4 A mbangu wa ku byisela ka wone mintlhambi ka madoropa lawa mi taka ma nyika Valevhi, wu ta leha 445 wa mametru* ku sukela ka muru lowu nga matlhelweni ka doropa. 5 Hi le handle ka doropa ka tlhelo dzra le wuxeni mi ta pima 890 wa mametru,* ka tlhelo dzra le nyingitimu mi ta pima 890 wa mametru, ka tlhelo dzra le mpeladambu mi ta pima 890 wa mametru ni le ka tlhelo dzra le n’walungu mi ta pima 890 wa mametru, kutani a doropa dzri kumeka hi le makazri. Leyi yi ta va mimbangu ya ku byisela ka yone a madoropeni yenu.

6 “Handle ka 42 wa madoropa laman’wana mi ta nyika Valevhi 6 wa madoropa ya wutumbelo, akuva lweyi a dlayiki mhunu a tsrutsrumela ka wone. 7 A madoropa hinkwawu lawa mi fanelaka ku nyika Valevhi i 48 wa wone, ku patsra ni mimbangu ya wone ya ku byisela ka yone. 8 A madoropa lawa mi taka nyika Valevhi mi ta ma pambula ka lawa ma nga pfindla dzra Vaisrayele. Ka mintlawa leyikulu mi ta teka ya manyingi, ka mintlawa leyitsrongo mi ta teka ya matsrongo. Ntlawa wun’wana ni wun’wana wu ta nyika Valevhi madoropa ya kukazri hi ku ya hi pfindla ledzri wu taka nyikiwa dzrone.”

9 Yehovha a ya mahlweni a byela Moxe a ku: 10 “Byela Vaisrayele u ku: ‘Mi ta tsremakanya nambu wa Yordani mi ya tikweni dzra Kanana. 11 Tihlawulelani madoropa lawa ma fanelekaka leswaku ma va madoropa ya wutumbelo, akuva mhunu a tsrutsrumela ka wone loko a txhuka a dlaya mhunu mun’wana hi mphazamu.* 12 A madoropa lawo ma ta tizra swanga mbangu wa ku tumbela ka wone loko mhunu wa kukazri a djula ku tidzrihisela hi mhaka ya lweyi a dlayiwiki, akuva lweyi a dlayiki mhunu a nga fi na a nge si na thethisiwa hi nhlengeletanu. 13 A 6 wa madoropa ya wutumbelo lawa mi taka ma hlawula ma ta tizrela swoleswo. 14 Mi ta hlawula madoropa mazrazru ka tlhelo ledzri dzra Yordani, ni madoropa mazrazru a tikweni dzra Kanana akuva ma va madoropa ya wutumbelo. 15 A madoropa wolawo ya 6 ma ta tizra swanga mbangu wa ku tumbela ka wone wa Vaisrayele, wa valuveli ni wa vhanu va matiko man’wana lava tsrhamaka na vone, akuva mun’wana ni mun’wana lweyi a dlayaka mhunu mun’wana hi mphazamu a tsrutsrumela ka wone.

16 “‘Kambe loko e ba mhunu wa kukazri hi ntxhumu wa nsimbi a va a fa, i mudlayi. Nakunene a mudlayi a fanela ku dlayiwa. 17 Loko e ba mhunu hi zribye dzra ku dzri nga dlaya, a va a fa, i mudlayi. Nakunene a mudlayi a fanela ku dlayiwa. 18 Loko e ba mhunu hi ntxhumu wa pulangu wa ku wu nga dlaya, a va a fa, i mudlayi. Nakunene a mudlayi a fanela ku dlayiwa.

19 “‘A mudzrihiseli wa ngati hi yene a taka dlaya mudlayi. A ta mu dlaya loko a mu kuma. 20 Loko o txhovha mhunu wa kukazri a fa, kumbe a fa hi mhaka ya leswi a mu txukumeteliki hi ntxhumu wa kukazri hi nkongometo wa ku biha, 21 kumbe e mu ba hi voko hi mhaka ya leswi a mu nyenyaka, a va a fa, nakunene na yene a ta dlayiwa. I mudlayi. A mudzrihiseli wa ngati a ta mu dlaya loko a mu kuma.

22 “‘Kambe loko e mu txhovha hi mphazamu, nakone a li leswaku a ngo mu nyenya, kumbe e mu txukumetela hi ntxhumu na a nga na nkongometo wa ku biha, 23 kumbe loko e tsrhika zribye dzri wa dzri mu djeka na a nga mu voni, a va a fa, nakone na a nga li nala wake, futsrhi a a nga na nkongometo wa ku mu vavisa, 24 a nhlengeletanu yi fanela ku yavanyisa a makazri kwake ni mudzrihiseli wa ngati, hi ku landzra minkongomiso leyi. 25 Nakone a nhlengeletanu yi fanela ku huluxa mhunu lweyi a dlayiki a mavokweni ya mudzrihiseli wa ngati, yi va yi mu tlhelisela a doropeni dzra ku tumbela ka dzrone lomu a tsrutsrumeliki kone, kutani a fanela ku tsrhama kohala ku ya tlhasa loko ku fa muprista lwenkulu lweyi a hlawuliwiki hi ku totiwa mafuzra ya ku xwenga.

26 “‘Kambe loko mhunu lweyi a dlayiki a huma handle a tlula ndzrelekanu wa doropa dzrake dzra ku tumbela ka dzrone lani a tsrutsrumeliki kone, 27 kutani a mudzrihiseli wa ngati a mu kuma handle ka doropa dzrake dzra ku tumbela ka dzrone, a va a mu dlaya, a mudzrihiseli wa ngati a nge ti va ni nandzru wa kuva a dlaye mhunu.* 28 Hikusa a fanela ku tsrhama a doropeni dzrake dzra ku tumbela ka dzrone ku ya tlhasa loko muprista lwenkulu a fa. Kambe ntsrhaku ka ku fa ka muprista lwenkulu, a nga tlhelela a kaya kwake. 29 A minkongomiso leyi yi ta va nawu wa wuyavanyisi wa hi lani ku nga helikiki a tinxakeni tenu hinkwatu, hinkwaku lomu mi taka tsrhama kone.

30 “‘Mun’wana ni mun’wana lweyi a dlayaka mhunu a fanela ku dlayiwa, loko ku ni wumboni bya timboni; kambe a ku fanelanga ku dlayiwa mhunu loko ko va ni wumboni bya mboni yin’we ntsena. 31 Mi nga ntxhumu mi pfumela leswaku mhunu lweyi a dlayiki mhunu wa kukazri hi maxivomu a tizruliwa, hikusa nakunene a fanela ku dlayiwa. 32 Nakone mi nga txhuki mi pfumela leswaku mhunu lweyi a tsrutsrumeliki doropeni dzrake dzra ku tumbela ka dzrone a tizruliwa a va a tlhelela kaya kwake na muprista lwenkulu a nge si na fa.

33 “‘Mi nga txhuki mi ntxhimisa tiko ledzri mi tsrhamaka ka dzrone, hikusa a ngati yi ntxhimisa tiko, nakone a ku na ku dzrivaleliwa ka ngati leyi halatiwiki a tikweni, ku to va ni ku dzrivaleliwa ntsena loko ku dlayiwa lweyi a halatiki ngati. 34 Mi nga txhuki mi ntxhimisa tiko ledzri mi tsrhamaka ka dzrone, ku nga lani na mine ni tsrhamaka kone; hikusa mine Yehovha ni tsrhama a makazri ka Vaisrayele.’”