Ku mukuru w’abaririmvyi. Ni indirimbo y’abahungu ba Kora+.
44 Ewe Mana, amatwi yacu yaravyumvise.
Ba sokuruza bacu baratwiganiye+
ibikorwa wakoze mu gihe cabo,
mu misi ya kera cane.
2 Warirukanye amahanga n’ukuboko kwawe+,
uraheza ushira ba sokuruza bacu mu kibanza cayo+.
Waramenaguye amahanga maze urayomora+.
3 Inkota yabo si yo yatumye bigarurira igihugu+,
ntibatahukanye intsinzi kubera ukuboko kwabo+.
Ahubwo ni ukuboko kwawe kw’ukuryo, ububasha bwawe+ n’ubuntu bwawe,
kuko wabakunze+.
4 Ewe Mana yanje, ni wewe Mwami wanje+.
Tanga itegeko Yakobo atahukane intsinzi bimwe bishitse.
5 Biciye ku bubasha bwawe, tuzosubiza inyuma abansi bacu+,
kandi abaturwanya, tuzobatsinda mw’izina ryawe+.
6 Kuko ntizigiye umuheto wanje,
kandi inkota yanje ntishobora kunkiza+.
7 Ni wewe wadukijije abaturwanya+.
Ni wewe wamaramaje abatwanka.
8 Tuzoshemeza Imana burinde bwira,
kandi tuzohayagiza izina ryawe ibihe vyose. (Sela)
9 Ariko ubu waradutaye uratumaramaza,
kandi ntukijana n’ingabo zacu.
10 Uguma utuma duhunga abaturwanya+,
abansi bacu bakitwarira ibintu vyose bashatse.
11 Wadutanze ku bansi bacu kugira batwice nk’intama,
udushwiragiza mu mahanga+.
12 Ni nk’aho ugurisha abantu bawe kuri gusa+,
nta nyungu na nkeyi ubaronkako.
13 Watugize iceyi ku babanyi bacu,
utugira agatwengo n’agacokoro ku badukikuje bose.
14 Watugize iciro ry’umugani mu mahanga+,
abantu baratubona bakazunza umutwe.
15 Nirirwa ntekewe n’isoni,
nkumva ndengewe n’ibimaramare,
16 kubera urwamo rw’agacokoro n’ibitutsi vyabo,
kubera abansi bacu bariko baratwihora.
17 Naho ivyo vyose vyadushikiye, ntitwigeze tukwibagira
kandi ntitwarenze kw’isezerano ryawe+.
18 Umutima wacu ntiwigeze uguhemukira.
Ntitwigeze duta inzira yawe.
19 Ariko watujanjaguriye aho imbwebwe ziba,
udupfukisha umwiza w’umuzitanya.
20 Nimba twaribagiye izina ry’Imana yacu,
canke tukaduza amaboko dusenga iyindi mana,
21 none Imana ntiyobimenya?
Irazi amabanga yo mu mutima+.
22 Twirirwa turicwa kubera wewe.
Abansi bacu batubona nk’intama zo gukererwa+.
23 Vyuka Yehova! Kubera iki uguma usinziriye+?
Ikangure! Ntuduhebe burundu+.
24 Kubera iki uduhisha mu maso hawe?
Kubera iki wibagira amarushwa n’agacinyizo turimwo?
25 Twarunamitswe hasi mu mukungugu,
imibiri yacu irambaraye hasi+.
26 Haguruka udutabare+!
Turokore kubera urukundo rwawe+.