Kubera iki abantu batacubaha abo mu muryango?
IGITUMA KWUBAHA ABO MU MURYANGO BIHAMBAYE
Iyo abagize umuryango bubahana, biratuma babana mu mahoro.
Igitabu kimwe (The Seven Principles for Making Marriage Work) kivuga ko igihe abubakanye bubahana, bituma bagaragarizanya urukundo «buri musi atari gusa mu bintu bininibinini, ariko no mu tuntu dutoduto.»
Ubushakashatsi bwerekana ko abana bigishijwe kwubaha abandi bumva ko hari ico bamaze, bakumvikana n’abavyeyi babo kandi ni gake bagira ingorane zo mu mutwe.
IVYO WOKORA
Nimuganire n’abo mu muryango ivyo mwokora. Ubwa mbere, nimwiyemeze ko abagize umuryango bose batahura ico bisobanura «kugaragaza icubahiro.» Ubwa kabiri, nimwandike ingeso vyitezwe ko abo mu muryango bose bagaragaza n’izo bakwiye kwirinda. Ubwa gatatu, uko mugize umuryango nimuganire ivyo mwanditse kugira ngo mwese mutahure ivyo mwokora kugira mugaragaze icubahiro.
Nube intangakarorero. Woba uhora utora amahinyu abagize umuryango kubera udukosa bakoze? Woba uhora unebagura ivyiyumviro bashikiriza? Woba uhora ubirengagiza igihe bakuyagira canke ukabaciramwo?
Impanuro: Nubone ko utegerezwa kwubaha uwo mwubakanye n’abana bawe, n’aho woba ubona umenga ntibabibereye.
Niwubahe abandi naho woba utemera ivyo bavuze. Igihe uvugana n’abo mu muryango, niwirinde imvugo nk’izi «wewe wama» canke ngo «wewe ntiwigera.» Imvugo nk’izo zirababaza abandi kandi zituma akagorane gatoyi gakomera.
IVYO IVYABONA VYA YEHOVA BARIKO BARAKORA
Ivyabona vya Yehova bararemesha abagize umuryango kwubahana, ivyo akenshi bakabigira babicishije mu biganiro basohora, mu bitabu, mu dutabu no mu mavidewo. Ivyo vyose umuntu arashobora kubironka ata co arishe.
KU BUBAKANYE: Ibiganiro bivuga ngo Icofasha umuryango birashobora gufasha abagabo n’abagore . . .
kumenya gutegana yompi
kwirinda kuguba ukanka kuvugisha uwo mwubakanye
kureka gushwana
(Raba kuri jw.org ahavuga ngo «Icofasha umuryango»)
KU BAVYEYI: Ibiganiro bivuga ngo Icofasha umuryango birashobora gufasha abavyeyi kwigisha abana babo . . .
kugamburuka
gukora udukorwa two muhira
kuvugana urupfasoni no gushima
(Raba kuri jw.org ahavuga ngo «Kurera abana» na «Kurera imiyabaga»)
Nurabe kandi inyongera ivuga ngo «Ibibazo abavyeyi bibaza», mu gitabu Ibibazo urwaruka rwibaza—Inyishu ngirakamaro, Igitabu ca 1. (Raba kuri jw.org ahavuga ngo «Ibibazo abavyeyi bibaza»)
KU BAKIRI BATO: Igice co kuri jw.org kivuga ngo Imiyabaga n’abageze mu bigero kirimwo ibiganiro, amavidewo n’udukorwa vyofasha abakiri bato . . .
kwumvikana n’abavyeyi babo hamwe n’abo bavukana
kuganira n’abavyeyi babo babigiranye icubahiro ku mategeko babashingira
gutuma abavyeyi babo babizigira
(Raba kuri jw.org ahavuga ngo «Imiyabaga n’abageze mu bigero»)
Kuja ku rubuga rwa jw.org ni ku buntu. Ntibisaba kuriha, kwiyandikisha canke kuba umunywanyi, eka kandi ntibagusaba gutanga amakuru akwerekeye.