Baronka impwemu nyeranda

Haciye imisi cumi Yezu asubiye mw’ijuru, abigishwa biwe bararonse impwemu nyeranda. Hari kuri Pentekoti yo mu 33 kandi abantu bo mu turere dutandukanye bari baje i Yeruzalemu kuri uwo musi mukuru. Abigishwa nka 120 bari bakoraniye mu cumba co hejuru. Bagiye babona ikintu gitangaje: ku mutwe w’umwumwe wese haraje ikintu kimeze nk’urubeya, baca batangura kuvuga izindi ndimi! Muri iyo nzu haciye humvikana urwamo nk’urw’umuyaga w’igihuhusi.

Abantu bari baje i Yeruzalemu bavuye mu bindi bihugu barumvise urwo rwamo, baca birukayo kuraba ibibaye. Baratangaye bumvise abigishwa bariko bavuga indimi zabo. Bavuze bati: ‘Aba bantu ni ab’i Galilaya! None bashoboye gute kuvuga indimi zacu?’

Petero n’izindi ntumwa baciye bahagarara imbere y’abo bantu. Petero yarababwiye ko Yezu yishwe n’uko Yehova yamuzuye. Yaciye ababwira ati: ‘Ubu Yezu ari mw’ijuru i buryo bw’Imana kandi yaturungikiye impwemu nyeranda yari yaradusezeraniye. Ni co gituma mubona ibi bitangaro.’

Abantu barashimye ivyo Petero yababwiye, baca bamubaza bati: ‘None dukore iki?’ Yababwiye ati: ‘Nimuhebe ivyaha vyanyu hama mubatizwe mw’izina rya Yezu. Na mwebwe muzoronka ingabire y’impwemu nyeranda.’ Kuri uwo musi, abantu nka 3.000 barabatijwe. Kuva ico gihe, abigishwa baciye batangura kwongerekana cane i Yeruzalemu. Intumwa zibifashijwemwo n’impwemu nyeranda, zarashinze ayandi mashengero kugira zishobore kwigisha abandi ivyo Yezu yabategetse.