Kuyoborwa n’impwemu y’Imana mu kinjana ca mbere no muri iki gihe

“Ubwo buryo bw’ugukora bwose burangurwa n’impwemu imwe nyene.”​—1 KOR. 12:11.

1. Ni ibiki turimbura muri iki cigwa?

IYO twumvise ijambo Pentekoti, duca twibuka ibintu biteye akamwemwe vyabaye mu 33 G.C. Ico gihe ni ho Imana yasuka impwemu yayo ku basavyi bayo. (Ivyak. 2:1-4) Imana yari itanguye gukoresha impwemu yayo mu kuyobora abasavyi bayo mu bundi buryo. Mu kiganiro giheruka, twarihweje uburyo bumwebumwe impwemu y’Imana yafashije abantu b’abizigirwa ba kera kurangura ibikorwa bigoye mu murimo wayo. Mugabo none ni itandukaniro irihe riri hagati y’ukuntu impwemu y’Imana yakora mu bihe vy’imbere y’ubukirisu n’ukuntu yakora mu kinjana ca mbere? Kandi abakirisu bungukira gute ku kuntu impwemu nyeranda y’Imana ikora muri iki gihe? Reka tubirabe.

“Ehe ndi umushumbakazi wa Yehova!”

2. Ni gute Mariya yari yariboneye ukuntu impwemu nyeranda ikora?

² Mariya yari muri ca cumba co hejuru cagutse i Yeruzalemu igihe impwemu nyeranda yari yarasezeranywe yasukwa ku bigishwa ba Yezu. (Ivyak. 1:13, 14) Yamara, imyaka irenga 30 imbere y’uko ico kintu kiba, yari yariboneye ukuntu impwemu ya Yehova ikora mu buryo budasanzwe butandukanye. Yehova yari yarimuriye ubuzima bw’Umwana wiwe kw’isi abukuye mw’ijuru, atuma Mariya yibungenga akiri isugi. Icari casamwe mu nda yiwe cari caje “bivuye ku mpwemu nyeranda.”​—Mat. 1:20.

3, 4. Ni agatima akahe Mariya yagaragaje, kandi twomwigana gute?

³ Ni kubera iki Mariya yatewe ako gateka ntangere? Umumarayika amaze gusigurira Mariya ivyo Yehova yagomba ku bimwerekeye, uno yavuze atangaye ati: “Ehe ndi umushumbakazi wa Yehova! Nibimbere nk’uko ijambo ryawe rivuze.” (Luka 1:38) Mu kuvuga gutyo, Mariya yarerekanye agatima Imana yari imaze kumubonamwo. Kuba yaciye yishura, vyerekana ko yari yiteguriye kwemera ivyo Imana imugombako. Nta kibazo na kimwe yavyuye ku bijanye n’ukuntu abantu bo mu kibano bovyakiriye bamubonye yibungenze canke ico ivyo vyari gushobora kugira ku bucuti yari afitaniye n’uwari amureheje. Mu kuvuga ko ari umushumbakazi wo hanyuma y’abandi, Mariya yari yerekanye ko yizigira adakeka yuko Yehova ari we Shebuja wiwe.

⁴ Vyoba bimaze gushika ukumva umenga urarengewe n’ingorane canke amabanga ufise mu murimo w’Imana? Vyoba vyiza umwe wese muri twebwe yibajije ati: ‘Noba nizigira Yehova ntakeka yuko azotunganya ibintu yisunze ivyo agomba? Noba vy’ukuri niteguriye gukora ivyo Yehova agomba?’ Nuhere amazinda ko Imana iha impwemu yayo abayizigira n’umutima wabo wose bakongera bakayigamburukira nka yo Mutware.​—Ivyak. 5:32.

Petero yarafashijwe n’impwemu nyeranda

5. Ni mu buryo butandukanye ubuhe Petero yari yariboneye ukuntu impwemu nyeranda ikora imbere ya Pentekoti yo mu 33 G.C.?

⁵ Cokimwe na Mariya, intumwa Petero yariboneye ubwiwe ukuntu impwemu nyeranda y’Imana ikora mu buryo bukomeye imbere ya Pentekoti yo mu 33 G.C. We hamwe n’izindi ntumwa, Yezu yari yarabahaye ububasha bwo kwirukana amadayimoni. (Mrk. 3:14-16) Vyongeye, naho Ivyanditswe ata bintu vyinshi bibivugako, bisa n’uko Petero yakoresheje ubwo bubasha. Ububasha bw’Imana bwaragaragaye kandi igihe Yezu yasaba Petero ngo aze iyo ari agendera ku Kiyaga ca Galilaya, maze akabigira. (Soma Matayo 14:25-29.) Biragaragara ko Petero yiheka ku mpwemu nyeranda kugira ngo imufashe gukora ibikorwa vy’ububasha. Iyo mpwemu ntiyotevye gukorera kuri Petero no ku bigishwa bagenziwe mu bundi buryo butandukanye.

6. Ni ibiki Petero yashoboye gukora kuri Pentekoti yo mu 33 G.C. be n’inyuma y’aho biciye ku mpwemu nyeranda?

⁶ Ku musi mukuru wa Pentekoti yo mu 33 G.C., Petero n’abandi barahawe ku gitangaro ubushobozi bwo kuvuga mu ndimi zavugwa n’abantu bari baje i Yeruzalemu. Inyuma y’aho, Petero yaraserukiye abandi arashikiriza insiguro abari bakoraniye ng’aho. (Ivyak. 2:14-36) Egome, uwo mugabo vyashika agakora ibintu gihuruduka canke akagira ubwoba, yaragize umutima rugabo arashinga intahe abigiranye ubutinyutsi naho yariko aragirwako iterabwoba yongera ahamwa. (Ivyak. 4:18-20, 31) Petero yaramenya ibintu bidasanzwe abihishuriwe n’Imana. (Ivyak. 5:8, 9) Yarahawe mbere ububasha bwo kuzura umuntu.​—Ivyak. 9:40.

7. Ni inyigisho za Yezu izihe Petero yatahuye aho gusa amariye kurobanurwa?

⁷ N’imbere ya Pentekoti, Petero yaratahura ibintu vyinshi vyerekeye ukuri Yezu yigisha. (Mat. 16:16, 17; Yoh. 6:68) Mugabo hariho ibintu bimwebimwe atatahura mu nyigisho za Yezu imbere ya Pentekoti. Nk’akarorero, Petero ntiyatahura yuko Kristu yozuwe ari ikiremwa c’impwemu ku musi ugira gatatu; eka kandi ntiyatahura ko Ubwami bwobaye buri mw’ijuru. (Yoh. 20:6-10; Ivyak. 1:6) Petero ntiyatahura iciyumviro c’uko abantu bobaye ibiremwa vy’impwemu maze bakaganza mu Bwami bw’Imana. Amaze kubatirishwa impwemu nyeranda maze agahabwa icizigiro co kuba mw’ijuru, ni ho gusa yashoboye gutahura izo nyigisho za Yezu.

8. Ni ibiki abarobanuwe hamwe n’abo mu “zindi ntama” bamenya?

⁸ Abigishwa ba Yezu bamaze kuronka impwemu nyeranda, barashoboye gutahura inyigisho batatahura imbere y’aho. Impwemu nyeranda yarahumekeye abanditsi b’Ivyanditswe vy’ikigiriki vya gikirisu kugira ngo basigure ku bw’inyungu yacu ukuri gutangaje kwerekeye intumbero y’Imana. (Ef. 3:8-11, 18) Muri iki gihe, abarobanujwe impwemu hamwe n’abo mu “zindi ntama” barafungurira hamwe mu buryo bw’impwemu, bakamenya ukwo kuri nyene. (Yoh. 10:16) Woba ukenguruka kuba impwemu nyeranda igufasha kumenya no gutahura ibiri mw’Ijambo ry’Imana?

Paulo ‘yuzura impwemu nyeranda’

9. Ni ibiki Paulo yashoboye kurangura afashijwe n’impwemu nyeranda?

⁹ Haciye umwaka umwe canke urenga Pentekoti yo mu 33 G.C. ibaye, hariho uwundi muntu yaronse ingabirano Imana itanga y’impwemu nyeranda. Uwo muntu yari Sauli, uwahavuye yitwa Paulo. Impwemu yarakoreye kuri we mu buryo butandukanye twungukirako muri iki gihe. Impwemu y’Imana yarahumekeye Paulo kugira ngo yandike ibitabu 14 vya Bibiliya. Kandi nk’uko vyagenze kuri Petero, impwemu y’Imana yarafashije Paulo gutahura no kwandika mu buryo butomoye ivyerekeye icizigiro c’uko abantu bobaye mw’ijuru bafise ukudapfa n’ukutabora. Paulo afashijwe n’impwemu nyeranda yarakijije abarwayi, arirukana amadayimoni, eka mbere arazura uwapfuye! Ariko rero, ububasha yaronse biciye ku mpwemu nyeranda bwari bufise intumbero irushirije kuba iyihambaye, abasavyi b’Imana bo muri iki gihe bose bakaba bahabwa ububasha ku bw’iyo ntumbero nyene, naho bataburonka ku gitangaro.

10. Impwemu nyeranda yafashije gute Paulo kuronka ubushobozi bwo kuvuga?

¹⁰ Paulo, uwari “yuzuye impwemu nyeranda,” yarahambariye umupfumu umwe abigiranye ubutinyutsi. Ese ukuntu ivyo vyagize ico bikoze ku mutegetsi mukuru yatwara izinga rya Shipure yariko arumviriza ico kiyago cose! Uwo buramatari yaremeye ukuri, “kuko yari ajorejwe n’inyigisho ya Yehova.” (Ivyak. 13:8-12) Biragaragara ko Paulo yari azi neza akamaro k’impwemu nyeranda y’Imana ku bijanye no kuvuga ivyerekeye ukuri. (Mat. 10:20) Mu nyuma, yaringinze ishengero ry’i Efeso ngo ritakambe ku bwiwe kugira ngo ahabwe “ubushobozi bwo kuvuga.”​—Ef. 6:18-20.

11. Paulo yayobowe gute n’impwemu y’Imana?

¹¹ Impwemu nyeranda ntiyatumye gusa Paulo ashobora kuvuga, ariko kandi vyarashika ikamubuza kuvuga mu turere tumwetumwe. Igihe Paulo yariko aragira ingendo z’ubumisiyonari, yari ayobowe n’impwemu nyeranda. (Ivyak 13:2; Soma Ivyakozwe 16:6-10.) Yehova aracayobora igikorwa co kwamamaza abicishije ku mpwemu yiwe. Cokimwe na Paulo, abasavyi ba Yehova bose bagamburuka barihatira kumenyesha ivyerekeye ukuri babigiranye ubutinyutsi n’umwete. Naho ubuyobozi Imana itanga butibonekeza muri iki gihe nk’uko vyari mu gihe ca Paulo, turashobora kwemera tudakeka ko Yehova akoresha impwemu nyeranda yiwe kugira ngo yiyemeze neza ko abantu babereye bumva ukuri.​—Yoh. 6:44.

“Uburyo bw’ugukora butandukanye”

12-14. Impwemu y’Imana yoba ikorera ku basavyi b’Imana bose mu buryo bumwe? Sigura.

¹² Inkuru zijanye n’ukuntu Yehova yahezagiye ishengero ry’abarobanuwe ryo mu kinjana ca mbere zoba ziremesha cane abasavyi b’Imana biyeguye bo muri iki gihe? Cane nyene. Niwibuke amajambo yahumetswe Paulo yabwiye ishengero ry’i Korinto ku bijanye n’ingabirano z’impwemu zatanzwe ku gitangaro mu gihe ciwe, ayagira ati: “Hari rero ingabirano zitandukanye, mugabo hari impwemu imwe; hari kandi ubusuku butandukanye, yamara hari Umukama umwe; hari kandi uburyo bw’ugukora butandukanye, yamara Imana imwe ni yo ikorera ivyo vyose mu bantu bose.” (1 Kor. 12:4-6, 11) Egome, impwemu nyeranda irashobora gukorera mu buryo butari bumwe ku basavyi b’Imana batandukanye ku bw’intumbero yinaka. Nkako, “ubusho buto” bwa Kristu hamwe n’“izindi ntama” ziwe bararonka impwemu nyeranda. (Luka 12:32; Yoh. 10:16) Yamara iyo mpwemu ntiyama ikorera kuri umwumwe wese mu bagize ishengero mu buryo bumwe.

¹³ Nk’akarorero, abakurambere bagenwa n’impwemu nyeranda. (Ivyak. 20:28) Ariko abarobanujwe impwemu nyeranda bose ntibasukura ari abacungezi mw’ishengero. Ivyo none bikwiye gutuma dushika ku ciyumviro ikihe? Bikwiye gutuma dushika ku ciyumviro c’uko impwemu y’Imana ikorera ku bagize ishengero mu buryo butari bumwe.

¹⁴ Impwemu ituma abarobanuwe baronka “impwemu y’ukugirwa abana,” ni ukuvuga ituma biyumvamwo ko ari abana b’Imana, ni ya mpwemu nyene Yehova yakoresha mu kuzura mu bapfuye Umwana wiwe w’ikinege akamuha ubuzima budapfa mw’ijuru. (Soma Abaroma 8:11, 15.) Yehova yakoresheje iyo mpwemu nyene mu kurema ibiriho vyose. (Ita. 1:1-3) Yehova akoresheje iyo mpwemu nyeranda nyene, yaratumye Bezaleli ashobora gukora igikorwa kidasanzwe kw’itaberenakulo, araha Samusoni ubushobozi bwo gukora ibikorwa vyasaba inguvu zidasanzwe, yongera aratuma Petero agendera ku mazi. Nimuze rero ntitwitiranye kuronka impwemu y’Imana no kurobanuzwa impwemu y’Imana. Kurobanuzwa impwemu y’Imana ni uburyo budasanzwe bumwe gusa impwemu ikora. Imana ni yo ihitamwo abo irobanuza impwemu.

15. Ivyo kubatirisha impwemu nyeranda vyoba bizobandanya? Sigura.

¹⁵ Impwemu nyeranda y’Imana yamye ikorera ku basavyi b’Imana b’abizigirwa mu buryo butandukanye. Yaramaze imyaka ibihumbi ikorera kuri bo imbere y’uko Imana itangura kurobanura abantu. Kuri Pentekoti yo mu 33 G.C. ni ho abantu batanguye kurobanuzwa impwemu, mugabo ntibizobandanya ibihe vyose. Kubatirishwa impwemu bizohagarara, mugabo impwemu nyeranda izobandanya gukorera ku basavyi b’Imana kugira ngo bashobore gukora ivyo igomba ibihe vyose.

16. Ni igiki abasavyi b’Imana bariko barakora muri iki gihe babifashijwemwo n’impwemu yayo?

¹⁶ Ni igiki canecane kiriko kirakorwa kw’isi muri iki gihe biciye ku mpwemu nyeranda ya Yehova? Mu Vyahishuwe 22:17 hishura hati: “Impwemu na wa mugeni biguma bivuga biti: ‘Ingo!’ Kandi uwo wese yumva navuge ati: ‘Ingo!’ Kandi uwo wese anyotewe naze; uwo wese ashaka niyakire amazi y’ubuzima ku buntu.” Muri iki gihe, abakirisu babifashijwemwo n’impwemu y’Imana baratumira “uwo wese ashaka” ngo yakire amazi y’ubuzima. Abakirisu barobanuwe baraja imbere muri ivyo. Yamara, abo mu zindi ntama barifatanya na bo mu gutanga ubwo butumire. Iyo migwi yompi irakurikiza ubuyobozi butangwa n’iyo mpwemu nyeranda nyene mu kurangura ico gikorwa. Abo muri iyo migwi yompi barerekanye ko biyeguriye Yehova mu kubatizwa “mw’izina rya Data n’iry’Umwana n’iry’impwemu nyeranda.” (Mat. 28:19) Kandi bose barareka impwemu y’Imana igakorera mu buzima bwabo, ikama muri bo icamwa cayo. (Gal. 5:22, 23) Cokimwe n’abarobanuwe, abo mu zindi ntama barareka impwemu y’Imana ikabafasha. Bafashijwe na yo, barakora uko bashoboye kwose kugira ngo bashitse ivyo Yehova abasaba bijanye n’ubweranda.​—2 Kor. 7:1; Ivyah. 7:9, 14.

Nugume usaba impwemu nyeranda

17. Twokwerekana gute ko dufise impwemu y’Imana?

¹⁷ Ku bw’ivyo, icizigiro wahawe n’Imana caba ico kubaho ibihe bidahera mw’ijuru canke kw’isi, Yehova arashobora kukuronsa “ububasha burengeye ubusanzwe” kugira ngo ugumane ugutungana kwawe maze uronke impera yawe. (2 Kor. 4:7) Kuba ubandanya kwamamaza inkuru nziza y’Ubwami vyoshobora gutuma utyekezwa. Mugabo uribuka yuko ‘nimba utukwa uhorwa izina rya Kristu, uhiriwe, kubera ko impwemu y’ubuninahazwa, mbere impwemu y’Imana, iguma kuri wewe.’​—1 Pet. 4:14.

18, 19. Yehova azogufasha gute akoresheje impwemu nyeranda yiwe, kandi wiyemeje iki muri ivyo?

¹⁸ Impwemu nyeranda ni ingabirano ya gusa Imana iha abayirondera ata buryarya. Irashobora kuryohora ubuhanga ufise ikongera igatuma urushiriza kugira icipfuzo co gukora uko ushoboye kwose mu murimo w’Imana. ‘Imana ni yo iriko ikorera muri wewe, nk’uko biyihimbara, kugira ngo ugire ugushaka wongere ukore.’ Ingabirano y’agaciro y’impwemu nyeranda, iri kumwe n’utwigoro turangwa ubwira tugira kugira ngo “[tugumye] rwose rya jambo ry’ubuzima,” bizodufasha ‘kuguma dushitsa ubukiriro bwacu dutinya kandi tujugumira.’​—Flp. 2:12, 13, 16.

¹⁹ Ku bw’ivyo rero, nushire umutima ku gikorwa cose uhabwa, ube umuhanga muri co, kandi uhange amaso Yehova kugira ngo agufashe, ivyo ubigire wizigiye impwemu y’Imana uherejeko. (Yak. 1:5) Azokuronsa ivyo ukeneye kugira utahure Ijambo ryiwe, wihanganire ingorane zigushikira mu buzima, wongere wamamaze inkuru nziza. ‘Nugume usaba, uzohabwa; ugume urondera, uzoronka; ugume udodora, uzokwugururirwa,’ aho hakaba harimwo gusaba impwemu nyeranda. (Luka 11:9, 13) Egome, nugume utakambira Yehova kugira ngo ushobore kumera nk’abantu b’abizigirwa, baba aba kera canke ab’ubu, bayoborwa n’impwemu nyeranda y’Imana.

Woshobora kubisigura?

• Cokimwe na Mariya, ni agatima akahe twogaragaza bigatuma duhezagirwa?

• Paulo yayoborwa gute n’impwemu y’Imana?

• Abasavyi b’Imana bayoborwa gute n’impwemu y’Imana muri iki gihe?

[Ifoto ku rup. 24]

Impwemu y’Imana yarafashije Paulo gutsinda impwemu mbi

[Ifoto ku rup. 26]

Muri iki gihe, impwemu nyeranda irafasha abakirisu, naho boba bafise icizigiro ikihe