Igitabu wokwizigira​—Igice ca 3

IGISAGARA ca Babiloni ca kera, icari mu kiyaya cimbuka nko ku bilometero 80 mu bumanuko bwa Baghdad yo mu gihe ca none, mu vy’ukuri cari giteye igomwe. Kubera ko cari gikikujwe n’uruhome amahero rurimwo zibiri kikaba kandi cari gikikujwe n’umugende w’amazi, casa n’ikitomenwa. Ico gisagara cari kizwi cane kubera insengero zaho zibereye ijisho, ubusitani bwaho buri hejuru be n’insengero zaho zimeze nk’iminara. Kubera ko Babiloni cari kimwe mu bisagara bihambaye cane vyariho ico gihe, giheruka kuvugwa ko cari igisagara carimwo ibintu vy’akaroruhore.

Muri Bibiliya ciswe “Umugabekazi w’Ibihugu vy’abami” kikaba cari umurwa mukuru w’inganji nganzasi igira gatatu ivugwa mu nkuru ya kahise dusanga muri Bibiliya. (Yesaya 47:5) Cokimwe n’inganji nganzasi ya Misiri n’iya Ashuri zabayeho imbere yayo, inganji nganzasi ya Babiloni yaragize uruhara rukomeye mu nkuru ya kahise ivugwa muri Bibiliya, ivyo bikaba bituma dushobora kugereranya ivyo Bibiliya ivuga ku vyerekeye iyo nganji be n’ivyo inkuru za kahise zitari izo muri Bibiliya zivuga.

Inkuru ya kahise yo kwizigirwa

Igitabu co muri Bibiliya ca Daniyeli kiratubwira yuko umuntu yitwa Belushazari yigeze gutwara ari umwami i Babiloni. (Daniyeli 5:1) Ariko rero, hariho amasôko adashingiye kuri Bibiliya yavuze muri kahise yuko, naho Belushazari yari akomeye, atigeze aba umwami. None Bibiliya yoba itavuze ukuri? Abacukuzi barubuye utubumbano tumeze nk’ingegene z’ibiti mu bisigarira vy’igisagara ca Uri muri Mezopotamiya. Kuri kamwe muri utwo tubumbano hari handitseko ibintu mu nyandiko yitwa cunéiforme, muri ivyo bintu hakaba harimwo isengesho ryatuwe n’Umwami wa Babiloni ari we Nabonide asabira “Bel-sar-ussur [ari we Belushazari], imfura [yiwe].” Mu nyuma, ibintu vyubuwe vyaremeje yuko Belushazari yari “yarakoze ari icegera c’umwami mu myaka irenga igice c’iyo se wiwe yamaze ari ku ngoma, muri ico kiringo akaba yari nk’umwami.”—Ivyo bivugwa n’inyizamvugo imwe y’ivya Bibiliya (New Bible Dictionary).

Inkuru ya kahise irerekana kandi yuko Babiloni ya kera cari igisagara cakorerwamwo ivyo gusenga mu buryo burenze urugero, cari cuzuyemwo ivyo kuragurira ku nyenyeri n’ivy’ubupfumu. Nk’akarorero, muri Ezekiyeli 21:21, dusoma yuko umwami wa Babiloni yikoze ku buraguzi kugira ngo amenye nimba yotera Yeruzalemu. Bibiliya ivuga yuko uwo mwami “yaravye mu gitigu.” Kubera iki igitigu ari co yaravyemwo? Abanyababiloni barakoresha ico gihimba barondera kumenya ibizoba. Igitabu kimwe (Mesopotamian Astrology) kitubwira ko mu gace kamwe gusa ka Babiloni ha kera, abacukuzi bahubuye “[utubumbano] 32 dufise imero y’igitigu, twose tukaba twari twanditsweko” ibimenyetso vyerekana ibizoba.

Umucukuzi azwi cane yitwa Nelson Glueck yarigeze kuvuga ati: “Maze imyaka mirongo itatu ngira ubucukuzi mfise Bibiliya mu kuboko kumwe mu kundi hari umwiko, kandi mu bijanye n’ibintu vyabaye muri kahise sinigeze mbona ko Bibiliya yihenda.”

Ubuhanuzi bwo kwizigirwa

Wovyakira gute nka hamwe hoba hari umuntu yakubwiye yuko umurwa mukuru ukomeye nka Beijing, Moscou, canke Washington D.C, uzocika ahantu h’umusaka hatakiba abantu? Birumvikana ko wokekeranya. Yamara, ivyo ni vyo vyashikiye Babiloni ha kera. Imyaka nka 200 imbere y’igihe, nko mu mwaka wa 732 B.G.C., Yehova Imana yarahumekeye umuhanuzi w’Umuheburayo yitwa Yesaya kugira ngo yandike ubuhanuzi bwerekeye iherezo ry’igisagara gihambaye ca Babiloni. Yanditse ati: “Babiloni, ca kirezi c’ubwami, . . . itegerezwa gucika nka ca gihe Imana yatembagaza Sodomu na Gomora. Nta wuzokwigera ahaba, eka ntizogira aho iba, uko iyaruka rikurikira irindi.”—Yesaya 13:19, 20.

Ariko none ni igiki catumye Imana ivuga imbere y’igihe ibijanye n’ugutikizwa kwa Babiloni? Mu 607 B.G.C., ingabo z’Abanyababiloni zaratikije Yeruzalemu maze abacitse kw’icumu zibatwara i Babiloni, aho bafashwe bunyamaswa. (Zaburi 137:8, 9) Imana yari yaravuze yuko abo basavyi bayo bobwirijwe kumara imyaka 70 bafatwa nabi muri ubwo buryo kubera ibikorwa vyabo bibi. Mu nyuma Imana yobarokoye ikabareka bagasubira mu gihugu cabo c’amavukiro.—Yeremiya 25:11; 29:10.

Mu buryo buhuye n’ayo majambo y’ubuhanuzi Imana yari yaravuze, mu 539 B.G.C., ya myaka 70 Abayuda bomaze mu bunyagano iri mu kurangira, ico gisagara ca Babiloni casa n’ikitoneshwa caratembagajwe n’ingabo z’Abamedi n’Abaperesi. Mu nyuma, ico gisagara caracitse ikirundo c’ibihomvagurike nk’uko nyene vyari vyaravuzwe. Nta muntu n’umwe yari gushobora kumenyesha imbere y’igihe ikintu gitangaje nk’ico. Nta gukeka ko igikorwa co kuvuga ubuhanuzi, ari kwo kumenyesha imbere y’igihe ibizoba, gituma Uwandikishije Bibiliya ari we Mana y’ukuri Yehova aba uwutandukanye n’iyindi mana iyo ari yo yose.—Yesaya 46:9, 10.

Umuhango ushobora kwizigira

Yamara, hariho ubundi buhanuzi buriko buraranguka mu buryo bwibonekeje muri iki gihe cacu. Ubwo buhanuzi bujanye n’Umwami Nebukadinezari wa Babiloni be n’ivyo yarose vyerekeye igishusho amahero. Ico gishusho cari kigabuwemwo ibihimba bitanu, ni ukuvuga umutwe, igikiriza n’amaboko, inda n’amatako, amaguru be n’ibirenge, kimwe cose kikaba cari kigizwe n’ubutare butandukanye. (Daniyeli 2:31-33) Ivyo bihimba vyo mu butare vyagereranya ukuntu intwaro canke ubwami, zogiye zirakurikirana, zikaba zahereye kuri Babiloni zirabandanya gushika ku nganji nganzasi y’Abongereza n’Abanyamerika, ari na yo igira indwi ivugwa mu nkuru ya kahise dusanga muri Bibiliya.—Daniyeli 2:36-41.

Daniyeli arahishura yuko ku birenge n’amano vy’ico gishusho habaye ihinduka riboneka ry’ibintu bigize ico gice. Uti gute? Ubutare butavanze n’ikindi kintu bwasubiriwe n’icuma kivanze n’ibumba ribisi. Daniyeli yasiguriye Nebukadinezari ati: “Ko wabonye icuma kivanze n’ibumba ribisi, bizovangana n’uruvyaro rw’abantu; ariko ntibizofatana, ngo kimwe gifatane n’ikindi, nk’uko nyene icuma kitavangana n’ibumba ribumbabumvye.” (Daniyeli 2:43) Egome, kuvanga icuma n’ibumba bivamwo ikintu kidakomeye; “ntibifatana.” Ese ukuntu ivyo bidondora mu buryo butagiramwo amakosa isi tubamwo muri iki gihe yiciyemwo ibice mu vya politike!

Daniyeli arahishura kandi ikindi kintu gihambaye kiba. Mu vyo Umwami Nebukadinezari yarose, yarabonye ibuye ryasituwe ku musozi munini. Iryo buye ryaradugijwe hejuru maze “rikubita ca gishusho ku birenge vyaco vy’icuma n’ibumba ribumbabumvye ri[r]abijanjagura.” (Daniyeli 2:34) Ivyo none bisobanura iki? Daniyeli ubwiwe arishura ati: “Mu misi y’abo bami, Imana yo mw’ijuru izoshinga ubwami butazokwigera busenyurwa. Kandi ubwo bwami ntibuzohabwa ikindi gisata c’abantu. Buzojanjagura ubwo bwami bwose bubuherengeteze, yamara bwobwo buzohangama gushika ibihe bitagira urugero.” (Daniyeli 2:44) Ubwo buhanuzi bwerekeza ku Bwami ata ho busa busana n’izindi ntwaro z’abantu. Umwami wabwo ni Yezu Kristu, ari we Mesiya. Nk’uko twabivuze mu biganiro vy’imbere y’iki vyo muri uru rukurikirane rw’ibiganiro, Yezu azojanjagura Shetani n’abayoboke biwe bose, ni ukuvuga abantu n’ibiremwa vy’impwemu bimushigikiye, gutyo atume mu vyaremwe vyose haba amahoro n’uguhuza.—1 Abakorinto 15:25.