Urashobora Kuryohora Ukwibuka Kwawe

YEHOVA IMANA yaremanye ubwonko bw’umuntu ububasha butangaje bwo kwibuka. Yabuhinguye kugira ngo bube ikigega umuntu ashobora kwikorako atarinze gutakaza ibintu vy’igiciro vyari vyarabitswe muri co. Ukuntu ubwonko buhinguye kurajanye n’umugambi Imana ifitiye abantu w’uko bobaho ibihe bidahera.—Zab. 139:14; Yoh. 17:3.

Ariko ushobora kwibaza yuko vyinshi kurenza mu vyo winjiza mu muzirikanyi wawe bitakara. Bisa n’ibitaza igihe ubishakiye. None wokora iki kugira ngo uryohore ukwibuka kwawe?

Niwitwararike

Ukwitwararika ni ikintu gihambaye mu kuryohora ukwibuka. Tugize akamenyero ko kuba abitegereji, kwitwararika abantu hamwe n’ibiriko biraba iruhande yacu, umuzirikanyi wacu urakaburwa. Bizoheza rero birushirize kutworohera guca natwe tugira ubwitwararitsi nk’ubwo nyene igihe dusoma canke twumva ikintu c’agaciro karamba.

Kugira ingorane zo kwibuka amazina y’abantu ni ibintu bisanzwe. Yamara, bwa Bakirisu, turazi ko abantu bafise agaciro—​Abakirisu bagenzi bacu, abo dushingako intahe, hamwe n’abandi tugira ivyo dukorana igihe dutunganya ibintu vya nkenerwa vyo mu buzima. Ni igiki gishobora kudufasha kwibuka amazina twari vy’ukuri dukwiye kwibuka? Intumwa Paulo yaratondetse amazina y’abantu 26 bo mw’ishengero yandikiye. Ukuntu yari abitwararitse kuragaragazwa n’uko ico yari azi atari amazina yabo vyonyene, ariko kandi yaranavuze utuntu tw’ido n’ido dutomoye twerekeye benshi muri bo. (Rom. 16:3-16) Abacungezi b’ingenzi bamwebamwe b’Ivyabona vya Yehova bo mu gihe ca none baragira neza cane mu kwibuka amazina, naho baza barava mw’ishengero baja mu rindi uko indwi itashe. Ni igiki kibafasha? Bashobora kwimenyereza gukoresha izina ry’umuntu incuro nka zingahe igihe baganiriye na we ari bwo bwa mbere. Baragira akigoro ko guhuza izina rya nya muntu n’ingene asa. Si ivyo gusa, baramarana umwanya n’abantu batandukanye mu busuku bwo mu ndimiro n’igihe basangira udufungurwa na bo. Igihe uhuye n’umuntu, mbega uzokwibuka izina ryiwe? Tangurira ku kugira impamvu iboneka yo kwibuka nya zina; maze ugerageze zimwezimwe mu nama zihejeje gutangwa aho haruguru.

Kwibuka ivyo usoma na vyo nyene birahambaye. Ni igiki gishobora kugufasha kuryohora muri ivyo? Ukwitwararika n’ugutegera vyompi birarangura uruhara. Ukeneye kwitaho mu buryo buhagije ivyo uriko urasoma kugira ngo ushire ivyiyumviro vyawe vyose kuri vyo. Ntuzogumya mu bwenge amayagwa nimba umuzirikanyi wawe uri ahandi hantu igihe uriko uragerageza gusoma. Ugutegera kuraryohorwa igihe uhujije ayo mayagwa n’ibintu umenyereye canke n’ubumenyi wari umaze kuronka. Niwibaze uti: ‘Ni gute kandi ni ryari noshobora gukurikiza aya mayagwa mu buzima bwanje bwite? Nshobora gute kuyakoresha mu gufasha uwundi muntu?’ Ugutegera kuraryohorwa kandi mu gihe uza urasoma amajambo nk’angahe udaca, aho kuza urasoma gusa ijambo rimwerimwe. Ntuzotebagana gutegera ivyiyumviro no kugenekereza ivyiyumviro nyamukuru ivyo ari vyo, ku buryo vyoroha kwibuka.

Nufate Umwanya wo Gusubiramwo

Abahinga mu gisata c’inyigisho barashimika ku gaciro k’isubiramwo. Mw’itohoza rimwe ryagizwe, umwigisha umwe wo kuri kaminuza yarerekanye yuko umunuta umwe umuntu yomara asubiramwo ibintu adatevye wogwiza kabiri igitigiri c’amayagwa asigarana mu bwenge. Nuko rero, buno nyene uhejeje igisomwa cawe canke igihimba kiboneka caco, nusubiremwo mu bwenge ivyiyumviro nyamukuru kugira ngo ubishimangire mu muzirikanyi wawe. Niwiyumvire ukuntu wosigura mu majambo yawe bwite iciyumviro ico ari co cose gishasha wize. Wiyibukije vuba umaze gusoma iciyumviro, uzoba wongereje umwanya uzomara wibuka nya kintu.

Maze mu misi mikeyi ikurikira, nurondere akaryo ko gusubiramwo ivyo usoma mu kubwira nya mayagwa uwundi muntu. Ivyo woshobora kubigira uri kumwe n’umuntu wo mu bagize umuryango, umuntu wo mw’ishengero, uwo mukorana ku kazi, uwo mwigana kw’ishure, umubanyi, canke umuntu muhura uri mu busuku bwo mu ndimiro. Nugerageze gusubiramwo atari gusa ibintu bikurubikuru vyabaye, ahubwo kandi ivyiyumviro vyo mu Vyanditswe bijana na vyo. Ivyo ubigize bizokwungura​—bigufashe gushimangira ibintu bihambaye mu kwibuka kwawe—​vyongeye bizogira ico vyunguye abandi.

Nuzirikane ku Bintu Bihambaye

Turetse ugusubiramwo ivyo usomye n’ukubibwira abandi, uzosanga kuzirikana ku bintu bihambaye wize ari nzanakunguko. Abanditsi ba Bibiliya Asafu na Dawidi ivyo barabigira. Asafu yavuze ati: “[“Nzokwibuka,” NW] ibikorwa vy’Uhoraho, kuko nzokwibuka ibitangaza vyawe vya kera. Nzokwiyumvira ivyo wakoze vyose, nshire umutima ku bikomeye wakoze.” (Zab. 77:11, 12) Dawidi na we nyene yanditse ati: “[Nda]kwibuka ndi ku buriri bganje,” yongera ati “nkakwiyumvira mu bihe vy’amaterama.” “Nibutse imisi ya kera; Ndimbūra ivyo wakoze vyose.” (Zab. 63:6; 143:5) Ivyo woba uhora ubigira?

Ukwo kwiyumvira kwimbitse, ata gusamara, aho uzirikana ku bikorwa vya Yehova, kuri kamere ziwe no ku biserura ukugomba kwiwe, ntibigufasha gusa gusigarana ibintu vyabaye. Mu gihe wimenyereje kwiyumvira mwene gutyo, bizoshimangira vy’ukuri ibintu bihambaye mu mutima wawe. Bizobumba umuntu wewe uri imbere. Ukwibuka kugirwa kuzoba ari uguserukira ivyiyumviro ufise imbere muri wewe.—Zab. 119:16.

Uruhara rw’Impwemu y’Imana

Igihe tuba turondera kwibuka ibintu vy’ukuri vyerekeye imirimo ya Yehova hamwe n’ibintu vyavuzwe na Yezu Kirisitu, ntituba twatawe ngo twibeko. Mw’ijoro rya buca Yezu apfa, yabwiye abayoboke biwe ati: “Ivyo ndabibabariye nkiri kumwe namwe, arik’Umwitsa, ari we [m]pwemu [y]era, uwo Data azorungika mw izina ryanje, ni we azobigisha vyose, kand’azobibutsa ivyo nababariye vyose.” (Yoh. 14:25, 26) Matayo na Yohani bari mu bari aho. None impwemu yera yoba yaragaragaje ko yari umwitsa mwene uwo kuri bo? Ego cane! Imyaka nk’umunani inyuma yaho, Matayo yaranonosoye kwandika inkuru ya mbere y’ido n’ido y’ubuzima bwa Kirisitu, harimwo ibintu vyo kwibuka vy’agaciro ntangere nka ya Nsiguro yo ku Musozi hamwe na ca kimenyetso c’ido n’ido c’ukuhaba kwa Kirisitu hamwe n’ic’insozero y’urunkwekwe rw’ibintu. Imyaka 65 inyuma y’urupfu rwa Yezu, intumwa Yohani yaranditse Injili yiwe, harimwo ido n’ido ry’ivyo Yezu yavuze mw’ijoro rya nyuma intumwa zamaranye n’Umukama imbere y’uko atanga ubuzima bwiwe. Nta nkeka, Matayo na Yohani bompi ico gihe baribuka neza ibintu Yezu yari yaravuze n’ivyo yari yarakoze igihe bari kumwe na we, mugabo impwemu yera yararanguye uruhara nyamukuru kugira ngo ntibibagire ibintu vy’ido n’ido bihambaye Yehova yashaka ko bishirwa mw’Ijambo ryiwe ryanditswe.

Impwemu yera yoba ikora bwa mwitsa ku basavyi b’Imana muri iki gihe? Neza rwose! Birumvikana, iyo mpwemu yera ntishira mu mizirikanyi yacu ibintu tutigeze twiga, mugabo irakora bwa mwitsa mu kugarukana mu mizirikanyi yacu ibintu bihambaye tuba twarize muri kahise. (Luka 11:13; 1 Yoh. 5:14) Maze igihe bikenewe, ubushobozi bwacu bwo kwiyumvira buravyurwa kugira ngo “[t]wibuke amajambo yavuzwe kera n’abāvugishwa n’Imana bera, [t]wibuke n’icagezwe c’Umwami [ari] we Mukiza.”—2 Pet. 3:1, 2.

‘Utegerezwa Kutibagira’

Yehova incuro n’izindi yaragabishije Isirayeli ati: ‘Mutegerezwa kutibagira.’ Si ukuvuga yuko yari abitezeko kwibuka akantu kose ata kabasovye. Ahubwo ntibari bakwiye kwisuka mu kwironderera ivyabo gushika aho inkuru z’ivyo Yehova yagize bazihindira inyuma nk’ikoti. Bategerezwa kuguma bibuka neza ukuntu Yehova yabahabuje hamwe umumarayika yasasika abana bose b’imfura bo mu Misiri, hamwe nyene n’igihe Yehova yasatura Ikiyaga Gitukura hanyuma maze akagiteranya, agasomesha nturi Farawo n’intwaramiheto ziwe. Abisirayeli bategerezwa kwibuka yuko Imana yabahaye Ivyagezwe vyayo ku Musozi Sinayi be n’uko yabarongoye ibacanye mu bugaragwa gushika no mu Gihugu c’Isezerano. Bategerezwa kutibagira mu buryo bw’uko ukwibuka ivyo bintu kwari kubandanya kugira ngo bigire ikintu kigera kure bikoze ku buzima bwabo bwa misi yose.—Gus. 4:9, 10; 8:10-18; Kuv. 12:24-27; Zab. 136:15.

Na twebwe nyene turakwiye kwiyubara kugira ntitwibagire. Uko twirwanako mu mikazo yo mu buzima, turakeneye kwibuka Yehova, tukagumiza mu muzirikanyi ukuntu ameze, be n’urukundo yagaragarije mu ngabirano yatanze y’Umwana wiwe, uwatanze incungu ku bw’ivyaha vyacu kugira ngo dushobore kuzogira ubuzima butagira agasembwa ibihe bidahera. (Zab. 103:2, 8; 106:7, 13; Yoh. 3:16; Rom. 6:23) Ugusoma Bibiliya hamwe n’ukugira uruhara mu makoraniro y’ishengero be no mu busuku bwo mu ndimiro tudahorereza bizotuma ivyo bintu vy’ukuri, vy’agaciro biguma ari bizima muri twebwe.

Igihe uhanzwe no gufata ingingo, zaba nininini canke ntonto, niwibuke ivyo bintu vy’ukuri bihambaye, hanyuma ubireke vyoshe ukwiyumvira kwawe. Ntiwibagire. Hanga amaso Yehova aguhe ubuyobozi. Aho kubona ibintu mu buryo gusa bw’umubiri canke ngo wizigire akanyengetera k’umutima munyagasembwa, niwibaze uti: ‘Ni impanuro iyihe canke ingingo izihe zo mw’Ijambo ry’Imana nkwiye kwifadikiza mu ngingo nza gufata?’ (Imig. 3:5-7; 28:26) Ntushobora kwibuka ibintu utigeze usoma canke utigeze wumva. Mugabo uko ukura mu bumenyi butagira agakosa hamwe no mu rukundo ukunda Yehova, ca kigega c’ubumenyi impwemu y’Imana ishobora kugufasha kwibuka kizokwaguka, kandi urukundo ukunda Yehova rudasiba gukura ruzogusunikira ku gukora ubwisunga.