Ikigabane ca Cumi na Rimwe
‘Banza Witwararike Ubwami’
1. (a) Ni kuki Yezu yahimirije abamwumviriza kubanza kwitwararika Ubwami? (b) Ni ikibazo ikihe dukwiye kwibaza?
MU NSIGURO Yezu yashikirije i Galilaya, ubu hakaba haciye imyaka irenga 1.900, yahimirije abamwumviriza ati: “Mubanze mwitwararike ubgami bg’Imana n’ukugororoka [kw’Imana], ni ho ivyo vyose muzovyongerwa.” Ni kuki yabasavye kubwihutira gutyo? Mbega igihe Kirisitu yoronkeyeko ububasha bw’Ubwami nticari kigisigaje ibinjana vyinshi? Egome, mugabo Ubwami bwa Mesiya ni bwo bwobaye uburyo Yehova yokoresheje kugira ngo yemeze ukugaba n’ukuganza kwiwe, akongera akarangura umugambi uhambaye afitiye isi. Umuntu wese atahura koko ukuntu ivyo bintu bihambaye, yohaye Ubwami ikibanza ca mbere mu buzima bwiwe. Nimba ivyo ari ko vyari mu kinjana ca mbere, ese rero ukuntu birushirije kuba ari ukwo biri muri iki gihe, aho Kirisitu yimitswe ngo abe Umwami! Ni co gituma haca haza iki kibazo: Mbega uburyo mbayeho bwoba bwerekana yuko ndiko ndabanza kwitwararika Ubwami bw’Imana?—Matayo 6:33.
2. Ni ibintu ibihe usanga abantu muri rusangi bakurikirana babishashaye?
2 Muri iki gihe, hariho abantu amamiliyoni kw’isi yose mu vy’ukuri bariko babanza kwitwararika Ubwami. Bariko berekana ko bashigikiye ubutware bw’Ubwami mu gushingira ubuzima bwabo ku gukora ivyo Yehova agomba, bakabikora baramwiyeguriye. Ku rundi ruhande, abantu benshi cane usanga bitwararitse kurondera ibintu vy’isi. Abantu barakurikira amahera n’amatungo, be n’ibibahimbara bishobora kuzanwa n’amahera. Canke na ho ugasanga bakoresha inguvu zose bafise mu guteza imbere ubuzi bwabo. Uburyo babaho buragaragaza yuko bishishikaye ubwabo, yuko bitwararitse ibintu vy’umubiri be n’ibibahimbara. Bashira Imana mu kibanza ca kabiri, nimba na ho nyene bayemera.—Matayo 6:31, 32.
3. (a) Ni ubutunzi nyabaki Yezu yaremesheje abigishwa biwe kurondera, kandi kuki? (b) Ni kuki bidakenewe guhagarika umutima bimwe birenze urugero ku bintu vy’umubiri?
3 Ariko rero, Yezu yahaye iyi mpanuro abigishwa biwe: “Ntimukīrundanirize ubutunzi mw isi,” kuko ata na kimwe muri ayo matungo camaho ibihe bidahera. Avuga ati: “Ariko mwirundanirize ubutunzi mw ijuru” mu gukorera Yehova. Yezu yahimirije abayoboke biwe kugumana ijisho “riremuruye” (NW) mu gukoresha cane ubwenge bwabo n’inguvu zabo ku gukora ivyo Imana igomba. Yababwiye ati: “Ntimushobora gusaba Imana n’Itunga.” Bite hoho ku bintu umuntu akenera vy’umubiri, nk’ibifungurwa, ivyambarwa, n’uburaro? Yezu yahanuye ati: “Ntimukiganyire.” Yarababwiye ivy’inyoni: Imana irazigaburira. Yezu yararemesheje abayoboke biwe gukura icigwa ku mashurwe: Imana irayambika. None abasavyi ba Yehova bo kw’isi ntibafise agaciro kuruta ico ari co cose muri ivyo? Yezu yavuze ati: “Mubanze mwitwararike ubgami bg’Imana n’ukugororoka kwayo, ni ho ivyo vyose [mukenera] muzovyongerwa.” (Matayo 6:19-34) Ibikorwa vyawe vyoba vyerekana yuko ivyo uvyemera? Ivyo ukora vyoba vyerekana ko uvyemera?
Ntureke ngo Ukuri Kwerekeye Ubwami Kunyohwe
4. Igihe umuntu ashimitse kurenza urugero ku kurondera ibintu vy’umubiri, bishobora kuvamwo iki?
4 Birabereye ko umuntu yokwitwararika kugira ibikwiye vyotuma yironsa ibintu vy’umubiri we n’abo mu rugo rwiwe bakeneye. Ariko rero, mu gihe umuntu yitwararitse ibintu vy’umubiri kurenza urugero, bishobora kumukwegera akarambaraye. Naho yoshobora kuba avuga yuko yemera Ubwami, nimba mu mutima wiwe ashira ibindi bintu mu kibanza ca mbere, ukuri kw’Ubwami kuzonyohwa. (Matayo 13:18-22) Nk’akarorero, igihe kimwe hari umutegetsi umwe akiri muto yabajije Yezu ati: “Nkore iki, ngo nze ndagwe ubu[zima] budashira?” Yari umuntu yigenza runtu akaba kandi yarafata neza abandi, mugabo yaguma ku matungo yiwe y’umubiri kurenza urugero. Ntiyashobora kwitandukanya na yo kugira acike umuyoboke wa Kirisitu. Ni co gituma yitesheje akaryo kari gutuma bimushobokera kuzoba kumwe na Kirisitu mu Bwami bwo mw’ijuru. Yezu yavuze ico gihe ati: “Erega biragoye kw aba vyinshi binjira mu bgami bg’Imana!”—Mariko 10:17-23.
5. (a) Paulo yaremesheje Timoteyo kubumbwa n’ibiki, kandi kuki? (b) “[U]gukunda amahera” Shetani agukoresha gute bwa mutego wonona?
5 Haciye imyaka, intumwa Paulo yarandikiye Timoteyo uwari muri Efeso, ico kikaba cari igisagara aho ivy’urudandaza vyari bisagamvye. Paulo yaramwibukije ati: “[N]ta co twazanye mw isi kand[i n]ta co dushobora kuyivanamwo. Arikw iyo dufise ivyo turya n’ivyo twambaye biba bitubūmvye.” Kwihata kugira ngo umuntu yironse ‘ibifungurwa n’ivyambarwa’ vyiwe n’ivy’umuryango wiwe, birabereye. Mugabo Paulo yabuye ati: “Abagomba kuba abatunzi bagwa mu nyosha no mu mutego no mu kwifuza kwinshi kw’ubupfu gusinzikaza, kudobeza abantu mu bibonona bikabarandura.” Shetani akora ku rwenge. Ubwa mbere, yoshobora gukwegakwega umuntu mu buryo butobuto. Ivyo bishobora gukurikirwa n’umukazo uhambaye kuruta, kumbure nya muntu akaronka akaryo ko kuduzwa igiti canke akaronka akazi keza kuruta kamuhemba menshi kuruta, mugabo kakamusaba gukoresha umwanya wari usanzwe ubikiwe ibintu vy’impwemu. Tutabaye maso, “gukunda amahera” kurashobora kunyoha ibintu vy’Ubwami bihambaye kure n’iyo. Paulo yabivuze uku: ‘Bamwe barayifuje, barazimira, bata ukwizera, bitobekeranisha imibabaro myinshi.’—1 Timoteyo 6:7-10.
6. (a) Kugira ngo twirinde gufatwa n’umutego w’ugukunda amaronko, dutegerezwa gukora iki? (b) Ni ukwizigira ukuhe dushobora kugira turavye uko ivy’ubutunzi vyifashe mw’isi muri iki gihe?
6 Paulo yarahimirije umuvukanyi wiwe w’Umukirisu ari we Timoteyo bivuye ku rukundo nyakuri yari amufitiye, ati “Wame uhunga ivyo,” arongera ati “wame urwana intambara nziza yo kwizera.” (1 Timoteyo 6:11, 12) Akigoro gakomeye karakenewe, nimba dushaka kwirinda gutwarwa na kwa kubaho kwo kwironderera amaronko, kwo muri iyi si idukikije. Mugabo mu gihe twihase twisunze ukwizera kwacu, Yehova ntazokwigera aduta. Tutaravye ukuntu ibintu bizimvye hamwe n’ubushomeri bukwiragiye, azoraba neza yuko dufise ivyo dukeneye koko. Paulo yanditse ati: “Gukunda amahera ntikube mu ngeso zanyu; ivyo mufise bibabumbe; kuk’[Imana] ubgayo yavuze, iti Nta ho nzoguhemukira, nta ho nzoguta. Ni co gituma tuvuga dushize ubgoba, tut’Uhoraho n’umutabazi wanje, sinzotinya: non’umuntu yoshobora kungira iki?” (Abaheburayo 13:5, 6) Umwami Dawidi na we yanditse ati: “Uhereye nkiri muto, none ndashāje, ariko sinigeze kubona umugororotsi yahebge, cank’uruvyaro rwiwe rusēgerereza ivyo kurya.”—Zaburi 37:25.
Abigishwa bo mu Ntango Baraduha Icitegererezo
7. Ni amabwirizwa ayahe ajanye n’ukwamamaza inkuru nziza Yezu yahaye abigishwa biwe, kandi ni kuki ayo yari abereye?
7 Yezu amaze kumenyereza neza intumwa ziwe, yabarungitse muri Isirayeli kwamamaza inkuru nziza no kumenyesha bati: “Ubgami bgo mw ijuru buri hafi.” Mbega ukuntu bwari ubutumwa buteye akanyamuneza! Yezu Kirisitu, we Mwami Mesiya, yari hagati muri bo. Kubera ko intumwa zariko zirakorana umwete mwinshi mu murimo w’Imana, Yezu yabahimirije kwizigira yuko Imana yobitwararitse. Ni ho yavuga ati: “Ntimugire ico mujana ku nzira, ar’inkoni cank’isaho, cank’impamba, cank’amahera: kandi ntimugire amapfundo abiri. Kand’inzu yose muzokwinjiramwo, abe ari yo mugumamwo, kugeza aho muzovira aho hantu.” (Matayo 10:5-10; Luka 9:1-6) Yehova yoravye neza yuko ivyo bakeneye babironswa n’Abisirayeli bagenzi babo, muri bo ukwakira bakavantara ukaba wari nk’umugenzo.
8. (a) Imbere gato y’uko Yezu apfa, ni kuki yatanze ayandi mabwirizwa ajanye n’ukwamamaza inkuru nziza? (b) Ni igiki cari kigikwiye kuja mu kibanza ca mbere mu buzima bw’abayoboke ba Yezu?
8 Mu nyuma, imbere gatoyi y’uko Yezu apfa, yaragabishije intumwa ziwe ku vy’uko muri kazoza boranguye igikorwa cabo ibintu vyifashe ukundi. Kubera yuko igikorwa cabo corwanijwe bishigikiwe n’ubutegetsi, vyoshobotse ko badashoka bakirwa muri Isirayeli. Vyongeye, mu nyuma bogiye barajana ubutumwa bw’Ubwami mu bihugu vy’Abanyamahanga. Ico gihe rero babwirizwa kwitwaza “amahera” be n’ “isaho y’impamba.” Naho vyari ukwo, babwirizwa kuguma babanza kwitwararika Ubwami bwa Yehova hamwe n’ukugororoka kwiwe, bizigiye neza yuko Imana yobahezagiriye utwigoro bagira two kuronka ibifungurwa n’ivyambarwa bakeneye.—Luka 22:35-37.
9. Ni mu buryo ki Paulo yashize Ubwami mu kibanza ca mbere mu buzima bwiwe yongera arironsa ivyo akeneye vy’umubiri, kandi ni impanuro iyihe yatanze kuri ivyo?
9 Intumwa Paulo yarabaye akarorero keza k’umuntu yakurikije impanuro ya Yezu. Paulo ubuzima bwiwe bwari bwubakiye ku busuku. (Ivyakozwe 20:24, 25) Igihe yaja mu karere kamwe ngo yigishirizeyo, yaritunga, mbere agakora ivyo kujisha amahema. Ntiyari yiteze ko abandi bobaye ari bo bamutunga. (Ivyakozwe 18:1-4; 1 Ab’i Tesalonike 2:9) Yamara, yaremera kwakirwa, akakira n’ingabirano bamuhaye abigiranye ugushima igihe abandi baba baseruye urukundo bafise muri ubwo buryo. (Ivyakozwe 16:15, 34; Ab’i Filipi 4:15-17) Ico Paulo yaremesheje Abakirisu, si ukwirengagiza ivyo bajejwe mu ngo zabo kugira biyamamarize inkuru nziza, ahubwo nyabuna ni ukurimbanya amabanga anyuranye bajejwe. Yabahanuye gukora, gukunda ingo zabo no gusangira n’abandi. (Abanyefeso 4:28; 2 Ab’i Tesalonike 3:7-12) Yabahimirije kwizigira Imana, ntibizigire amaronko, no gukoresha ubuzima bwabo mu buryo bwerekana ko batahura vy’ukuri ibintu bihambaye kuruta ivyo ari vyo. Mu buryo bujanye n’inyigisho za Yezu, ivyo vyasigura kubanza kwitwararika Ubwami bw’Imana n’ukugororoka kwayo.—Ab’i Filipi 1:9-11.
Gumiza Ubwami mu Kibanza ca Mbere mu Buzima Bwawe
10. Bisobanura iki kubanza kwitwararika Ubwami?
10 Ubwacu tugeza hehe mu kugira uruhara mu gikorwa co kubwira abandi inkuru nziza y’Ubwami? Ku ruhande rumwe, ivyo biva ku kuntu ivyacu vyifashe, no ku kuntu ugukenguruka kwacu kungana. Urama wibuka yuko Yezu atavuze ngo ‘Uritwararika ubwami igihe ata kindi ufise ukora.’ Kubera yari azi ukuntu Ubwami buhambaye, yaraseruye ukugomba kwa se mu kuvuga ati: “[Mugume] mwitwaririka ubgami bgiwe.” (Luka 12:31) Naho benshi muri twebwe bakeneye gukora kugira bironse ivyo bakeneye be n’ivy’ingo zabo zikeneye, mu gihe dufise ukwizera ubuzima bwacu buzoguma bushingiye ku gikorwa c’Ubwami Imana yadushinze. Ico gihe nyene, tuzokwitwararika amabanga tujejwe mu rugo.—1 Timoteyo 5:8.
11. (a) Yezu yagereranije gute yuko bose batoshoboye gukora cokimwe mu gukwiragiza ubutumwa bw’Ubwami? (b) Ni ibintu ibihe vyo kurimbura bifise ico bikora ku kuntu ivyo dushobora gukora vyongana?
11 Bamwebamwe muri twebwe barashobora gutanga umwanya mwinshi kuruta abandi, mu gikorwa co kwamamaza inkuru nziza y’Ubwami. Mugabo muri wa mugani Yezu yaca werekeye ubwoko bunyuranye bw’ivu, yarerekanye yuko abantu bose b’imitima imeze nk’ivu ryiza bazokwama ivyamwa. Bovyamye ku rugero rungana iki? Ibintu ntivyifashe kumwe. Imyaka umuntu afise, amagara afise be n’amabanga ajejwe mu rugo, ni bimwebimwe mu bintu vyo kurimbura. Mugabo igihe hariho ugukenguruka nyakuri, harashobora gukorwa vyinshi.—Matayo 13:23.
12. Ni umugambi mwiza uwuhe wo mu vy’impwemu abakiri bato baremeshwa canecane kurimbura?
12 Ni vyiza kugira imigambi izodufasha kwongereza uruhara tugira mu busuku bw’Ubwami. Abakiri bato barakwiye kwiyumvira bitonze akarorero keza nta ngere ka Timoteyo, wa Mukirisu w’umusore w’umunyamwete. (Ab’i Filipi 2:19-22) Ni igiki cobabera ciza kuruta kwinjira mu busuku bw’igihe cose igihe barangije amashure yabo yo mw’isi? Abakuze kuruta na bo nyene bazokwungukira ku kwishingira imigambi yo mu vy’impwemu.
13. (a) Ni nde agena ivyo ubwacu dushoboye gukora mu murimo w’Ubwami? (b) Mu gihe vy’ukuri tubanza kwitwararika Ubwami, tuba tugaragaje iki?
13 Aho gucishamwo ijisho abo twoba twiyumvira ko boshoboye gukora vyinshi kuruta, ukwizera gukwiye gutuma twigora ngo tugire ivyo ubwacu dutunganije kugira ngo dushobore kumbure gukorera Imana bimwe bishitse, uko tubishobojwe n’ukuntu ivyacu bwite vyifashe. (Abaroma 14:10-12; Ab’i Galatiya 6:4, 5) Nk’uko vyerekanwa n’ivyashikiye Yobu, Shetani avyura amahane avuga yuko ivyo twitwararika canecane ari amaronko, ukwidibamira hamwe n’ukwimerererwa neza, akanavuga yuko ngo imvo ituma dukorera Imana ari iy’ubwikunzi. Mugabo nimba vy’ukuri tubanza kwitwararika Ubwami, tuba turiko turagira uruhara mu kwereka Shetani ko ari umwangushi katwa koko. Tuba turiko dutanga ikimenyamenya c’uko ikintu kija imbere mu buzima bwacu ari ugukorera Imana. Mu mvugo no mu ngiro, tuba rero twerekanye urukundo rugera kure dufitiye Yehova, ukuntu dushigikira ukugaba n’ukuganza kwiwe tudahemuka, hamwe n’urukundo dukunda abantu nka twe.—Yobu 1:9-11; 2:4, 5; Imigani 27:11.
14. (a) Ni kuki urutonde rw’ubusuku bwo mu ndimiro ari ngirakamaro? (b) Ivyabona benshi bariko bagira uruhara muri ubwo busuku bwo mu ndimiro ku rugero rungana iki?
14 Urutonde rurashobora kudufasha kurangura ibiruta ivyo twoshikako dukoze ukundi. Yehova ubwiwe arafise ‘igihe yashinze’ aho azoshitsa umugambi wiwe. (Kuvayo 9:5; Mariko 1:15) Nimba bishoboka, ni vyiza ko tugira uruhara mu busuku bwo mu ndimiro ku gihe kimwe canke vyinshi vyashinzwe, ku ndwi ku ndwi. Ivyabona vya Yehova ibihumbi amajana bo hirya no hino kw’isi bariyandikishije kuba abatsimvyi bafasha, bakamara amasaha nk’abiri ku musi bariko baramamaza inkuru nziza. Abandi ibihumbi amajana barasukura ari abatsimvyi basanzwe, bagakoresha amasaha nk’abiri n’igice ku musi mu kwamamaza ubutumwa bw’Ubwami. Abatsimvyi badasanzwe hamwe n’abamisiyonari baramara umwanya mbere uruta uwo, mu murimo w’Ubwami. Turashobora kandi kurondera uturyo two kubwira icizigiro c’Ubwami umuntu wese azotwumviriza, iyo akaryo kizanye. (Yohana 4:7-15) Icipfuzo cacu gikwiye kuba ukugira uruhara rwuzuye muri ico gikorwa twisunze uko ivyacu bibidushoboza, kuko Yezu yabuye ati: “Ubu butumwa bgiza bg’ubgami buzovugwa mw isi yose, ngo bube ikimenyetso kiber[a] icabona amahanga yose, maz’umuhero uzoca uza.”—Matayo 24:14; Abanyefeso 5:15-17.
15. Ku bijanye n’ubusuku bwacu, ni kuki wewe wiyumvamwo yuko impanuro yo mu 1 Ab’i Korinto 15:58 ihuye n’igihe?
15 Ivyabona vya Yehova bunze ubumwe, ata kuraba igihugu babamwo, mu mihingo yose yo kw’isi bariko baragira uruhara muri ako gateka baterwa k’umurimo. Bariyerekezako iyi mpanuro yahumetswe yo muri Bibiliya igira iti: “Mukomere ntimunyiganyige, murushirize imisi yose gukora ibikorwa vy’Umwami wacu, kuko muzi yuk’ubutame bganyu atar’ubg’ubusa mu Mwami.”—1 Ab’i Korinto 15:58.
Ikiganiro c’Isubiramwo
• Igihe Yezu yavuga ngo ‘tubanze twitwararike ubwami,’ yariko yerekana ko ari ibiki bikwiye gushirwa mu kibanza ca kabiri?
• Dukwiye kubona gute ibiraba ukwironsa ivyo twebwe n’ingo zacu dukeneye mu vy’umubiri? Ni imfashanyo iyihe Imana izoduha?
• Dushobora kugira uruhara mu mice iyihe y’umurimo w’Ubwami?
[Ifoto ku rup. 107]
Mu gihugu ico ari co cose, Ivyabona vya Yehova muri iki gihe bariko baramamaza inkuru nziza imbere y’uko umuhero uza