ICIGWA CA 6

Gusigura neza ivyanditswe

Yohani 10:33-36

INCAMAKE: Ntupfe gusa gusoma icanditswe ngo uce wigira ku ciyumviro gikurikira. Nurabe neza ko abakwumviriza babona neza isano riri hagati y’icanditswe wasomye n’iciyumviro muriko muraganirako.

UKO WOBIGIRA:

Nushire ahabona amajambo nyamukuru. Uhejeje gusoma icanditswe, nushimike ku majambo afitaniye isano n’iciyumviro nyamukuru. Ushobora kubigira mu gusubiramwo ayo majambo canke mu kubaza ikibazo gituma abakwumviriza bayatora.

Nimba usubiyemwo iciyumviro kiri mu canditswe mu majambo yawe bwite, niwitwararike ko abakwumviriza baguma babona neza isano riri hagati y’amajambo yakoreshejwe muri Bibiliya n’iciyumviro nyamukuru.
Nushimike ku ciyumviro nyamukuru. Nimba werekanye impamvu ugiye gusoma icanditswe, niwerekane ukuntu amajambo nyamukuru ari muri co ashigikira iyo mpamvu.

Igihe usigura icanditswe, nugume uzinguruye Bibiliya. Ivyo birafasha abakwumviriza kubona ko ivyo uriko urababwira bihuye n’ibivugwa mu canditswe.
Ntushimike ku bintu bidakenewe. Niwirinde gusigura amajambo adahuye n’iciyumviro nyamukuru. Ufatiye ku vyo abakwumviriza basanzwe bazi ku ciyumviro muriko muraganirako, nuhitemwo amakuru akenewe yobafasha kugitahura neza.