Ibanga Abakirisu Batokwubahuka Kubika!
“Nabarira ab’isi mvyeruye, . . . nta co navugiye mu mpisho.”—YOHANA 18:20.
1, 2. Ijambo ry’Ikigiriki my·steʹri·on rifise insobanuro nki nk’uko rikoreshwa mu Vyanditswe?
IJAMBO ry’Ikigiriki my·steʹri·on rihibanuwe muri Bibiliya Traduction du monde nouveau incuro 25 ngo “ibanga ritagatifu,” incuro 3 na zo rikaba rihibanuwe ngo “ikiyobera.” Ibanga ryitwa ritagatifu ritegerezwa kuba rihambaye vy’ukuri! Uwo wese aterwa agateka k’ukuronka ubumenyi bw’ibanga mwen’iryo akwiye kwiyumvamwo ko atewe iteka vy’ukuri, kubera ko aba yaharuwe mu babereye gusangira ibanga n’Imana Ruheta y’isi n’ijuru.
2 Inzinduzi yanditswe na Vine itaziriwe Expository Dictionary of Old and New Testament Words, iremeza yuko ahenshi “ibanga ritagatifu” ari yo mpibanuro ibereye gusumba “ikiyobera.” Kw ijambo my·steʹri·on ivuga iti: “Mu [Vyanditswe vy’Ikigiriki vya Gikirisu] ico ryerekana, si ikintu c’ikiyoberane (nk’uko biri mw ijambo ry’Icongereza), ariko [ryerekana] ikintu kirengeye ubutahuzi busanzwe bw’umuntu, kigashobora kumenyekanishwa gusa n’impishuro ivuye ku Mana, kandi kikamenyeshwa mu buryo no mu gihe vyagennywe n’Imana, kikamenyeshwa gusa ababonesherejwe n’Impwemu yiwe. Mu nsobanuro isanzwe, ikiyobera rishaka kandi kuvuga ubumenyi bwigumirijwe; insobanuro yaryo yo mu Vyanditswe ni ukuri kwahishuwe. Ni co gituma amajambo ajana canecane na rukozi “ikiyobera” ari ‘camenyekanishijwe,’ ‘cagaragajwe,’ ‘cahishuwe,’ ‘cakwiririjwe,’ ‘gutahura,’ ‘ugutanga.’ ”
3. Ikorane ry’Abakirisu ryo mu kinjana ca mbere ryari ritandukaniye he n’imigwi imwimwe y’akayoberane?
3 Iyo nsiguro irashira ahabona itandukaniro rinini hagati y’imigwi y’ivy’idini y’akayoberane yasagaraye mu kinjana ca mbere, n’ikorane ry’Abakirisu ryari rishinzwe vuba. Naho abari batiwe mu gusenga kwo mu mpisho bakunda kuba bafatiriwe n’indagano y’ukuguma banumye kugirango barinde inyigisho z’idini, Abakirisu ntibigeze bashirwa mu rubuzo mwen’urwo. Ego niko intumwa Paulo yaravuze ivy’“ubgenge bg’Imana bgari bgaragizwe ibanga [“ritagatifu,” NW],” akabwita ko “bgari bgaranyegejwe,” ni ukuvuga, bwanyegejwe “abaganza b’iki gihe.” Ntibwanyegejwe Abakirisu bwari bwarahishuriwe biciye ku mpwemu y’Imana kugirango bashobore kubushira ahabona.—1 Ab’i Korinto 2:7-12; gereranya n’Imigani 1:20.
“Ibanga Ritagatifu” Iryo Ari Ryo
4. “Ibanga ritagatifu” rishimikiye canecane kuri nde, kandi ni kubera iki?
4 “Ibanga ritagatifu” rya Yehova rishimikiye canecane kuri Yezu Kirisitu. Paulo yanditse ati: “[Yehova ya]twātiye ibanga [“ritagatifu,” NW] ry’ivy[o a]gomba, nk’uko vya[mu]himbaye, [a]gabiye kera muri we, vy’ingene [a]zogenza vyose, igihe gikwiye gishitse, gukoraniriza vyose muri Kristo, ibiri mw ijuru n’ibiri mw isi.” (Abanyefeso 1:9, 10) Paulo mbere yaravuze atomora akǎme ka nya “banga ritagatifu” igihe yadoma urutoke ku vy’uko hakenewe “kumenya ibanga [“ritagatifu,” NW] ry’Imana, ni ryo Kristo.”—Ab’i Kolosayi 2:2.
5. Mw “ibanga ritagatifu” harimwo ibiki?
5 Ariko harimwo n’ibiruta ivyo, kubera “ibanga ritagatifu” ari ibanga rifise imice myinshi. Si ukugenekereza Yezu gusa ko ari we Rubuto rwasezeranywe canke Mesiya; harimwo kandi uruhara ashinzwe kurangura mu mugambi w’Imana. Birerekeye intwaro y’ijuru, Ubwami bwa kimesiya bw’Imana, nk’uko Yezu yabisiguye neza igihe yabwira abigishwa biwe ati: “Mwebge mwahawe kumenya amabanga [matagatifu] y’ubgami bgo mw ijuru, ariko bo ntibābihawe.” (Impirikano ni izacu.)—Matayo 13:11.
6. (a) Ni kuki ari vyo kuvuga yuko “ibanga ritagatifu” ryari “ryahozwe uhereye kera hose”? (b) Ryagiye rirahishurwa dondidondi gute?
6 Ikiringo kirekire cabwirijwe kurengana hagati y’igihe hatangura kuvugwa ivy’umugambi Imana ifise w’ugutanga ishingiro ry’Ubwami bwa Mesiya n’igihe “ibanga [ritagatifu] . . . [ryoheraherejweko].” (Ivyahishuriwe Yohana 10:7; Itanguriro 3:15) Uguherahezwa kwaryo kwozananye n’ishingwa ry’Ubwami, nk’uko igereranywa ry’Ivyahishuriwe Yohana 10:7 na 11:15 ribigaragaza. Mu vy’ukuri, imyaka nk’4 000 yararenganye kuva aho isezerano ry’ivy’Ubwami ritangiwe muri Edeni gushika kw iseruka ry’Umwami-Mugenwa mu 29 G.C. Iyindi myaka 1 885 yararenganye imbere yuko Ubwami bushingwa mw ijuru mu 1914. Gutyo rero nya “banga ritagatifu” ryagiye rirahishurwa dondidondi (bukebuke) ku kiringo c’imyaka nk’6 000. (Raba ku rupapuro 30.) Paulo mu vy’ukuri ntiyihenze igihe yavuga ivyo “guhishurwa kw’ibanga [“ritagatifu,” NW] ryahozwe uhereye kera hose, ariko mur’iki gihe riraseru[ka].”—Abaroma 16:25-27; Abanyefeso 3:4-11.
7. Ni kuki dushobora kwishimira rwose wa mugwi w’umushumba w’umwizerwa kandi w’incabwenge?
7 Yehova aho anyuraniye n’abantu bafise ubuzima bugufi, ntaho yigera yumva ko akajijwe n’igihe ngo ahishure amabanga yiwe hataragera. Ivyo bikwiye kutubuza ukutagumya umutima igihe hari ibibazo bimwebimwe vyerekeye Bibiliya bidashobora gusigurwa ubu ngo twumve ko tunyuzwe. Ukwicisha bugufi kwa wa mugwi w’umushumba w’umwizerwa kandi w’incabwenge, uwatumwe kugaburira inzu y’Abakirisu imfungurwa ku gihe kibereye, kurawubuza kwidundarika ngo wite imbere upfe kwiyumvira bukabakabe ibintu bikiri ibidatomotse. Uwo mugwi w’umushumba uragerageza kwirinda kwemeza inyigisho ku nguvu. Kubera ukutishima, uwo mugwi uremera yuko ubu udashoboye kwishura ikibazo ico ari co cose, ukaguma wibuka Imigani 4:18, bimwe bitomotse. Ariko ese ukuntu bihimbaye cane kumenya yuko Yehova, mu gihe ciwe kibereye no mu buryo bwiwe bwite azobandanya guhishura amabanga yiwe yerekeye imigambi yiwe! Ntidukwiye kwigera tubura kugumya umutima w’ukurindira intondeko ya Yehova, ngo tugerageze n’ubujuju n’akantu kwita imbere ya wa Muhishuzi w’amabanga. Ese ukuntu dusubirizwa umutima mu nda n’ukumenya yuko umuhora Yehova ariko akoresha muri iki gihe utagira ivyo! Ni umuhora mwizerwa kandi w’incabwenge.—Matayo 24:45; 1 Ab’i Korinto 4:6.
Ibanga Ryahishuwe Ritegerezwa Kuvugwa!
8. Tumenya dute yuko “ibanga ritagatifu” ritegerezwa kumenyekanishwa?
8 Yehova ntiyahishuriye Abakirisu “ibanga ritagatifu” ryiwe kugira bagume barihishije. Ni ukugira rimenyekanishwe, mu buryo buhuye n’ingingo ya Yezu yandikiwe abigishwa biwe bose—atari gusa abungere ba Ekeleziya: “Mur’umuco w’isi. Igisagara cubatswe ku mpinga y’umusozi ntigishobora guhishwa. Nta bodomeka itara ngo baryubikekw igisimbo, ariko barishira ku gitereko caryo, ngo riboneshereze abari mu nzu bose. Abe ari k’umuco wanyu ubonesha imbere y’abantu, ngo babone ibikorwa vyanyu vyiza, bahimbaze So wo mw ijuru.”—Matayo 5:14-16; 28:19, 20.
9. Ni igiki kigaragaza yuko Yezu atari umugumutsi nk’uko bamwe babivuga?
9 Yezu nta migabo y’ubugumutsi yari afise yo gushinga iyungungane riri mu rwihisho ry’abigishwa biwe bo gukurikirana imigambi y’ivy’ibanga. Mu gitabu Early Christianity and Society, Robert M. Grant yaranditse ibiraba ububuranizi umuvugizi Justin Martyr wo mu kinjana ca kabiri yagiriye Abakirisu ba kare, ati: “Iyaba Abakirisu bari abagumutsi bari kuguma bihisha kugira bashikire ico barondera.” Ariko Abakirisu bari gushobora gute “kuguma bihisha” ubwo nyene bakamera nk’“igisagara cubatswe ku mpinga y’umusozi”? Ntibari kwubahuka kunyegeza umuco wabo munsi y’igisimbo! Intwaro rero nta na kimwe yari butinye ku murimo wabo. Uwo mwanditsi yabandanije abadondora ngo ni bo “[bantu] bari kumwe n’umwami w’abami mu kurondera amahoro n’umutekano.”
10. Ni kuki Abakirisu badakwiye kugumiza akaranga kabo mu mpisho?
10 Yezu ntiyashaka ko abigishwa biwe bagumya bwa kabanga akaranga kabo k’uko ari abagize iciswe akadumbi k’idini. (Ivyakozwe n’intumwa 24:14; 28:22) Ukutareka ngo umuco wacu wake muri iki gihe vyogira kudahimbara Kirisitu na Se wiwe, we Muhishuzi w’amabanga, kandi nta buhirwe twogira.
11, 12. (a) Ni kuki Yehova yipfuza ko Ubukirisu bumenyekanishwa? (b) Ni mu buryo ki Yezu yatanze akarorero kabereye?
11 Yehova “nt[a]gomba ko hagira abahona, arikw [a]gomba ko bose bihana.” (2 Petero 3:9; Ezekiyeli 18:23; 33:11; Ivyakozwe n’intumwa 17:30) Ishingiro ry’ukurekurira ivyaha abantu bihana ni ukwizera inkuka y’incungu ya Yezu Kirisitu, uwitanze bwa ncungu ya bose—atari iya bakeyi gusa—kugira “ng’ūmwizera wese ntaz’apfe rubi, arikw ahabge ubu[zima] budashira.” (Yohana 3:16) Ni ivya nkenerwa ko abantu bafashwa gutera intambwe zikenewe zizobakwizisha ibisabwa kugira babonwe nk’intama, atari nk’impene, mu gihe ca rwa rubanza ruriko ruraza.—Matayo 25:31-46.
12 Ubukirisu bw’ukuri si ubwo guhisha; ni ubwo kumenyesha mu buryo bwose bubereye bushoboka. Yezu ubwiwe yaratanze akarorero kabereye. Igihe yabazwa n’umuherezi mukuru ivyerekeye abigishwa biwe hamwe n’inyigisho yiwe, yavuze ati: “Nabarira ab’isi mvyeruye, nahora nigishiriza mu masinagogi no mu rusengero ah’Abayuda bose bakoranira, nta co navugiye mu mpisho.” (Yohana 18:19, 20) Turavye ivyo, ni nde muntu atinya Imana yokwubahuka ngo agumize mu mpisho ico Imana yamenyesheje ko gitegerezwa kumenyeshwa bose? Ni nde yokwubahuka guhisha “urupfunguzo rw’ubumenyi” bujana mu buzima bwamaho? Kugenza gutyo kwotuma amera nka ba biyorobetsi bo mu vy’idini bo mu kinjana ca mbere.—Luka 11:52; Yohana 17:3.
13. Ni kuki dukwiye gukwiririza ata kugisha akaryo na kamwe?
13 Ese hatoba n’umwe yigera ashobora kuvuga yuko twebwe Ivyabona vya Yehova twagumije mu mpisho ubutumwa bw’Ubwami bw’Imana! Ubwo butumwa babwemera canke babwiyama, abantu bategerezwa kumenya yuko bwakwiririjwe. (Gereranya na Ezekiyeli 2:5; 33:33.) Ntitugishe akaryo na kamwe rero, kugira tubwire bose ubutumwa bwerekeye ukuri, aho dushoboye kubasanga hose.
Ugushira Amagera mu Mibangabanga ya Shetani
14. Ni kuki tudakwiye kugonanwa ku vyerekeye ugukorera ku mugaragaro mu vy’ugusenga kwacu?
14 Mu mihingo myinshi, Ivyabona vya Yehova barushiriza kuja baravugwa mu makuru. Nk’uko vyashikiye Abakirisu ba kare, kenshi baravugwa uko batari kandi bagashirwa mu mugwi umwe n’ivy’insengo z’amadini hamwe n’amashirahamwe yo mu mpisho biteye amazinda. (Ivyakozwe n’intumwa 28:22) Ugukorera ku mugaragaro kwacu mu bukwiririji none kwoshobora gutuma duterwa? Mu vy’ukuri twitaye mu mpaka zidakenewe ntivyoba biranga ubwenge, kandi ntivyoba bijanye n’impanuro ya Yezu. (Imigani 26:17; Matayo 10:16) Ariko rero, igikorwa ngirakimazi c’ugukwiririza ivy’Ubwami n’ugufasha abantu kuryohora ubuzima bwabo si ico guhisha. Kiraninahaza Yehova, kikamushemagiza, kikamurata we n’Ubwami bwiwe bwashinzwe. Ukuntu abantu bariko bitaba ukuri kwa Bibiliya mu buryo buhimbaye mu Buraya bw’Ubuseruko no mu mihingo yo muri Afirika, mu ruhande vyashobotse kubera ugukorera ku mugaragaro kwongerekanye gushobora gukoreshwa ubu mu gukwiririza ukuri aho hantu.
15, 16. (a) Ugukorera ku mugaragaro kwacu hamwe n’ugusagamba kwacu mu vy’impwemu bimara iki, ariko ivyo vyoba bikwiye kuduhagarika umutima? (b) Ni kuki Yehova ashira amagera mu mibangabanga ya Shetani?
15 Ni ivy’ukuri, ugukorera ku mugaragaro mu gukwiririza kw’Ivyabona vya Yehova, iparadizo yo mu vy’impwemu bifitiye, hamwe n’isagamba ryabo—haba mu vyerekeye abantu canke mu matungo y’ivy’umubiri—ntivyijana. Naho ivyo bintu bituma hakwegērwa abantu b’umutima uzira ubugunge, birashobora gutera iseseme ababarwanya. (2 Ab’i Korinto 2:14-17) Kukaba nkako, ivyo bishobora gutuma inteko za Shetani ziryosharyoshwa ngo zitere igisata ca Yehova.
16 Ivyo none vyoduhagarika umutima? Inyishu ni oya, twishimikije ibimenyeshakazoza dusanga muri Ezekiyeli ikigabane ca 38. Bino bimenyesha yuko Gogi w’i Magogi—imvugo idondora Shetani ya Diyǎbule kuva aho yururukirijwe mu micungararo y’isi inyuma y’ishingwa ry’Ubwami mu 1914—azotera igitero igisata c’Imana. (Ivyahishuriwe Yohana 12:7-9) Yehova abwira Gogi ati: “Uzovuga, uti Hinge ndūge ntere igihugu c’imihana itubakiwe inzitiro z’amabuye, ngīre abibereye impore ata co binona, bose uko bangana baba ahatubakiwe inzitiro, ata n’imyugariro cank’amarembo bagira; kugira ng’uhasahure, uhanyage iminyago, ubangurire ukuboko kwawe ahāhoze ar’imisaka hagasubira kubamw’abantu, no ku bgoko bgākoranirijwe hamwe buvuye mu mahanga, bāmaze kwironkera amatungo n’ibintu, bakibera hagati mw isi.” (Ezekiyeli 38:11, 12) Ariko rero umurongo wa 4 urerekana yuko igisata c’Imana kidakeneye kwirirwa kiraterwa ubwoba n’ico gitero, kubera ko bizoba bigizwe na Yehova. Ariko ni kubera iki Imana yoreka—egome, mbere igasomborotsa—igitero simusiga ngo kigirwe ku gisata cayo? Mu murongo wa 23 tuhasoma iyi nyishu ya Yehova: “Nzogaragaza icubahiro canje, niyerekane ko nd’Uwera, kandi nzokwimenyekanisha mu maso y’amahanga menshi; maze bazomenya yuko jewe nd[i Yehova, NW].”
17. Dukwiye kubona dute igitero cimirije ca Gogi?
17 Gutyo, aho kubaho mu bwoba bw’agakongataza bw’igitero ca Gogi, igisata ca Yehova kiriteze bimwe vya ntibugica iryo rindi ranguka ry’ibimenyeshakazoza vya Bibiliya. Ese ukuntu bihimbaye cane kumenya yuko mu gusagambisha no mu guhezagira iyungungane ryiwe riboneka Yehova ahatangira amagera mu mibangabanga ya Shetani akamukwega we n’ingabo ziwe za gisirikare abajana ku gutsindwa impaga!—Ezekiyeli 38:4.
Ubu Kuvugira ku Mugaragaro Biraruta Uko Vyigeze!
18. (a) Abantu ubu bariko batahura ibiki, kandi ni kuki? (b) Ivyo abantu bavuga ku bukwiririji bw’ivy’Ubwami bitubera akavyurambaga gakomeye gute?
18 Muri ibi bihe vya none Ivyabona vya Yehova barakoreye ku mugaragaro cane mu vy’uguserura ivyiyumviro bafise bishingiye kuri Bibiliya, naho nyene ivyo bitabaye agakundwa na bose. Baramaze imyaka mirongo babūra ingeramizi ziri mu kunywa itabi n’ibiyayuramutwe, ukujujuta kuri mu vy’ukurera abana bagakura uko bagomba, inkurikizi mbi z’umwisamazo ubogabogamwo ivy’ukumarana inambu y’umubiri kutemewe hamwe n’ubukazi, tutibagiye uguhakwa kuri mu vy’uguterwa amaraso mu mubiri. Baradomye urutoke kandi ku vy’uko inyigisho y’ivy’ihindagurika itumvikana. Kenshi ubu abantu basigaye bavuga, bati “Ivyabona vya Yehova ubiravye neza bavuga vyo.” Iyo tutamenyesha abantu ku mugaragaro ivyiyumviro dufise, ntibovuze gutyo. Kandi ntiwirengagize yuko igihe bavuga ivyo baba bariko baratera intambwe mu nzira y’ukuvuga bati, “Shetani we, uri umubeshi; Yehova ubiravye neza ni we munyakuri.” Ese ukuntu ari akavyurambaga gatuma tubandanya gukurikira akarorero ka Yezu, tukavuga imbere y’abantu ijambo ry’ukuri!—Imigani 27:11.
19, 20. (a) Ni umwiyemezo muki igisata ca Yehova caseruye mu 1922, kandi ayo majambo yoba agikora n’ubu? (b) Dukwiye kubona dute “ibanga ritagatifu” rya Yehova?
19 Abo mu gisata ca Yehova baramaze igihe kirekire batahuye ibanga bajejwe muri ivyo. Kw iteraniro ry’agakura ryo mu 1922, J. F. Rutherford, uwari ico gihe perezida w’Ishirahamwe Watch Tower, yaranyuze abamwumviriza mu kuvuga ati: “Mube abanyarugero, mube maso, mukore, mube abagabo. Nimubere Umukama ivyabona bizerwa kandi nyakuri. Nimugende mu rugamba gushika umuranga wose wa Babiloni usibanganye. Nimumenyeshe ubutumwa irya n’ino. Isi itegerezwa kumenya ko Yehova ari Imana n’uko Yezu Kirisitu ari Umwami w’Abami n’Umukama w’Abakama. Uwu ni wo musi uruta yose. Nimurabe, Umwami arahangamye! Muri abakozi bamwamamaza. None rero, tangaze, tangaze, tangaze Umwami n’ubwami bwiwe.”
20 Nk’uko ayo majambo yari ahambaye mu 1922, iyumvire ukuntu arushirije kuba ayahambaye ubu haheze imyaka 75, aho ihishurwa rya Kirisitu bwa Mucamanza n’Umuhōzi ryegereje cane! Ubutumwa bwerekeye Ubwami bwashinzwe bwa Yehova hamwe n’iparadizo yo mu vy’impwemu igisata ciwe cibereyemwo ni “ibanga ritagatifu” ry’agakomeye rwose ku buryo ata woryigumizako! Nk’uko Yezu ubwiwe yabivuze atomora, abigishwa biwe, báfashijwe n’impwemu yera, bategerezwa kuba ivyabona “no gushitsa ku mpera y’isi” ku vyerekeye ikibanza gikuru afise mu mugambi wamaho wa Yehova. (Ivyakozwe n’intumwa 1:8; Abanyefeso 3:8-12) Kukaba nkako, ko turi abasuku ba Yehova, we Mana ihishura amabanga, ntitwokwubahuka kwigumizako iryo banga!
Wokwishura Ute?
◻ “Ibanga ritagatifu” ni iki?
◻ Tumenya dute yuko rikwiye kwamamazwa?
◻ Ni igiki kizana igitero ca Gogi ku gisata ca Yehova, kandi ivyo dukwiye kubibona dute?
◻ Umwe wese muri twebwe akwiye kwiyemeza kugira iki?
[Uruzitiro ku rup. 30]
“Ibanga Ritagatifu” Ryagiye Rirahishurwa Dondidondi
◻ Inyuma yo mu 4026 B.G.C.: Imana isezerana guhagurutsa Urubuto rwo gusangangura Shetani.—Itanguriro 3:15
◻ 1943 B.G.C.: Isezerano rya Aburahamu riremezwa, bisezeranwa yuko urwo Rubuto ruzoza biciye kuri Aburahamu.—Itanguriro 12:1-7
◻ 1918 B.G.C.: Ivuka rya Isaka ngo abe samuragwa wa nya sezerano.—Itanguriro 17:19; 21:1-5
◻ Nko mu 1761 B.G.C.: Yehova yemeza yuko nya Rubuto ruzoza biciye kuri Yakobo mwene Isaka.—Itanguriro 28:10-15
◻ 1711 B.G.C.: Yakobo yerekana yuko nya Rubuto ruzoza biciye ku muhungu wiwe Yuda.—Itanguriro 49:10
◻ 1070-1038 B.G.C.: Umwami Dawidi amenya yuko nya Rubuto ruzoba ari uwumukomokako rukazotegeka ibihe bidashira bwa Mwami.—2 Samweli 7:13-16; Zaburi 89:35, 36
◻ 29-33 G.C.: Yezu arangwa ko ari we Rubuto, Mesiya, umucamanza wo muri kazoza, na we Mwami-Mugenwa.—Yohana 1:17; 4:25, 26; Ivyakozwe n’intumwa 10:42, 43; 2 Ab’i Korinto 1:20; 1 Timoteyo 3:16
◻ Yezu ahishura yuko azogira abategetsi n’abacamanza bagenziwe, yuko Ubwami bw’ijuru buzogira abatwarwa bo kw isi, n’uko abigishwa biwe bose bobaye abakwiririji b’Ubwami.—Matayo 5:3-5; 6:10; 28:19, 20; Luka 10:1-9; 12:32; 22:29, 30; Yohana 10:16; 14:2, 3
◻ Yezu ahishura yuko Ubwami buzoshingwa ku gihe cagezwe, nk’uko bigaragazwa n’ibiba mw isi.—Matayo 24:3-22; Luka 21:24
◻ 36 G.C.: Petero amenya yuko abatari Abayuda na bo nyene bazoba ba samuragwa b’Ubwami.—Ivyakozwe n’intumwa 10:30-48
◻ 55 G.C.: Paulo asigura yuko ba samuragwa b’Ubwami bazozurirwa ukudahwera n’ukutabora mu gihe c’ukuhaba kwa Kirisitu.—1 Ab’i Korinto 15:51-54
◻ 96 G.C.: Yezu, uwari amaze gutegeka ku bigishwa biwe basīzwe, ahishura yuko igitigiri cabo ntabanduka kizoba 144 000.—Abanyefeso 5:32; Ab’i Kolosayi 1:13-20; Ivyahishuriwe Yohana 1:1; 14:1-3
◻ 1879 G.C.: Ikinyamakuru Zion’s Watch Tower kidoma urutoke ku 1914 yuko ari umwaka uri n’ico uvuze gihambaye w’irangurwa ry’“ibanga ritagatifu”
◻ 1925 G.C.: Umunara w’Inderetsi usigura yuko Ubwami bwavutse mu 1914; “ibanga ritagatifu” ryerekeye ubwo Bwami ritegerezwa kwamamazwa.—Ivyahishuriwe Yohana 12:1-5, 10, 17
[Amafoto ku rup. 29]
Cokimwe n’Indongozi yabo Yezu, Ivyabona vya Yehova baramenyesha mu bantu Ubwami bwa Yehova