Twatorewe Kuba Abashemeji b’Abanyamunezero kw Isi Yose
“Shemeze Ya, mwa bantu! Shikane ishemezo, emwe mwa basuku ba Yehova, shemeze izina rya Yehova.”—ZABURI 113:1, NW.
1, 2. (a) Nk’uko biri muri Zaburi 113:1-3, ni nde akwiriye ishemezo dutūrana ubushwashwanutsi? (b) Ni ikibazo ikihe gikwiye kubazwa?
YEHOVA MANA ni we Muremyi Ruheta w’ijuru n’isi, Rugabavyose mu bihe bihora vyose. Arakwiriye rwose ko tumushemezanya ubushwashwanutsi. Ico ni co gituma muri Zaburi 113:1-3 hadutegeka hati: “[Shemeze Ya, mwa bantu! Shikane ishemezo, emwe mwa basuku ba Yehova, shemeze izina rya Yehova, NW]. Izina ry’Uhoraho rishemagizwe, uhereye none ugashitsa ibihe bidashira. Uhereye iy’izuba rirasira ugashitsa iyo rirengera izina ry’Uhoraho rikwiye gushimwa.”
2 Twebwe Ivyabona vy’Imana, ivyo turanezererwa kubikora. Ese ukuntu binyurîra kubona Yehova Mana vuba azotuma iyi ndirimbo y’umunezero y’ishemezo turiko turirimba kino gihe yuzura isi yose uko ingana! (Zaburi 22:27) Ijwi ryawe ryoba ririko ryumvikana muri uwo mugwi w’abaririmvyi munini ukwiye kw isi yose? Niba ririmwo, utegerezwa kuba uterwa umunezero cane n’ukuba waratowe ukuwe muri iyi si y’amacakubiri ibuze umunezero!
3. (a) Ni igiki gituma abantu ba Yehova baba abatandukanye n’abandi? (b) Twashizwe ku ruhande mu buryo ki?
3 Ugushemeza Yehova kwacu dushize hamwe nta nkeka kuratuma tuba abatandukanye n’abandi. Tuvuga dushira hamwe tukigisha dushira hamwe, kandi tugakoresha uburyo bumwe nyene mu kumenyesha ‘ukugira neza kwa Yehova kwinshi.’ (Zaburi 145:7) Egome, uko turi igisata ca Yehova ciyeguye, twashizwe ku ruhande ku bw’igikorwa c’Imana yacu, Yehova. Imana yabwiye igisata cayo ca kera cari carayiyeguriye, ari co Isirayeli, kuguma bitanije n’amahanga abakikuje, no kudahumanywa n’ingeso z’ayo mahanga. (Kuvayo 34:12-16) Yarabahaye amategeko ngo abafashe kugirango ivyo bashobore kubishitsa. N’uno musi nyene, Yehova yaraduhaye Ijambo Ryeranda ryiwe ari ryo Bibiliya. Inyigisho ziri muri ryo ziratwereka ukuntu dushobora kuguma twitanije n’iyi si. (2 Ab’i Korinto 6:17; 2 Timoteyo 3:16, 17) Ntitwashizwe ku ruhande mu kwigungira mu mamonasiteriyo y’abafurera canke y’ababikira, nk’uko bigirwa n’abamonaki be n’ababikira ba Babiloni Hahambaye. Mu gukurikira akarorero ka Yezu Kirisitu, turi abashemeji bakorera ku mugaragaro ba Yehova.
Niwigane Umushemeji Mukuru wa Yehova
4. Yezu yatanze gute akarorero mu vy’ugushemeza Yehova?
4 Yezu ntiyigeze akevya ngo ave ku ntēgo yiwe y’ugushemeza Yehova. Ivyo na vyo vyaramushize ku ruhande bimutandukanya n’isi. Mu masinagogi no ku rusengero i Yeruzalemu, yarashemeje izina ryeranda ry’Imana. Haba kw isonga ry’umusozi canke ku nkengera y’ikiyaga, aho hose amasinzi yaba akoraniye, Yezu yarakwiririza icese ibintu vy’ukuri kwa Yehova. Yamenyesheje ati: “Ndaguhimbaza, Data, Mwami w’ijuru n’isi.” (Matayo 11:25) N’igihe nyene Yezu yari mu rusambo imbere ya Ponsiyo Pilato, yaremeje ati: “Iki ni co navukiye, kand’iki ni co canzanye mw isi, n’ukugira ngo nshingire intahe ukuri.” (Yohana 18:37) Yezu yarategera ukuntu igikorwa ciwe cari gihambaye. Aho yaba ari hose, Yezu yarashingira intahe Yehova kandi akamushemeza ku mugaragaro.
5. Ibiri muri Zaburi 22:22 vyerekeye bande, kandi ni agatima akahe dukwiye kugira?
5 Muri Zaburi 22:22, tuhasanga aya majambo menyeshakazoza yerekeye Umushemeji Mukuru wa Yehova: “Nzobarira bene Data izina ryawe, nzogutazirira hagati y’ishengero.” Mu Baheburayo 2:11, 12 na ho, intumwa Paulo arakoresha iyo mirongo ayerekeza ku Mukama Yezu, no ku bo Yehova Mana yerāje ngo bazoronke ubuninahazwa bwo mw ijuru. Nk’uko na Yezu yari ameze, ntibaterwa isoni n’ugushemeza izina rya Yehova hagati y’ikorane rizima. Twoba tugira ako gatima nyene igihe twitaba amahwaniro y’ikorane? Ukujamwo mu mahwaniro kwacu n’ubushwashwanutsi, haba mu vyiyumviro no mu kuvuga, kurashemeza Yehova. Ishemezo ryacu ry’umunezero none rirangirira aho?
6. Ni ibanga irihe Yezu yahaye abigishwa biwe, kandi ni mu buryo ubuhe inkunzi z’umuco baninahaza Imana?
6 Nk’uko biri muri Matayo 5:14-16, Umukama Yezu kandi yaratumye abagendanyi biwe kureka umuco wabo urase ku buryo abandi boshemeza Yehova. Yavuze ati: “Mur’umuco w’isi. . . . Umuco wanyu ubonesh[e] imbere y’abantu, ngo babone ibikorwa vyanyu vyiza, bahimbaze So wo mw ijuru.” Inkunzi z’umuco barazanira Imana ubuninahazwa. Ivyo boba babigira gusa mu kuvuga no mu kugira ibintu vyiza vy’ugutabara imbabare? Oya, ahubwo ivyo babigira mu kuninahaza Yehova bashize hamwe. Egome, inkunzi z’umuco bariyegurira Imana hanyuma bagacika abashemeji b’abanyamunezero biwe. Iyo ntambwe y’umunezero woba umaze kuyitera?
Umunezero Uva mu Gushemeza Yehova
7. Ni kubera iki abashemeza Yehova ari abanyamunezero cane, kandi ni umunezero nyabaki bari bifitiye ku musi wa Pentekote mu 33 G.C.?
7 Ni kuki abashemeji ba Yehova ari abanyamunezero cane gutyo? Kubera yuko umunezero ari icamwa c’impwemu yera y’Imana. Mu B’i Galatiya 5:22, umunezero uza buno nyene havuye urukundo. Abigishwa ba Yezu mu kinjana ca mbere baragaragaje ico camwa c’impwemu ya Yehova. Mbere, ku musi wa Pentekote mu 33 G.C., igihe Imana yasuka impwemu yayo ku bigishwa nk’120 ba Yezu, bose uko bangana batanguye gushemeza Yehova mu ndimi zitandukanye. Abayuda bakunda gusenga bari baje i Yeruzalemu bavuye mu mahanga menshi ‘barumiwe baratangara.’ Baritangaje bati: “[Tu]bumva bavuga mu ndimi zacu ibitangaza vy’Imana”! (Ivyakozwe n’intumwa 2:1-11) Ukwo gushemeza Yehova mu ndimi nyinshi gutangaje kwamutsemwo iki? Abayuda hamwe n’abakebanukiye Ubuyuda bangana nk’3 000 barakiriye inkuru nziza y’Ubwami yerekeye Mesiya. Barabatijwe, bararonka impwemu yera, hanyuma n’ishaka ryinshi bungako amajwi yabo bwa bashemeji b’abanyamunezero ba Yehova. (Ivyakozwe n’intumwa 2:37-42) Ese uwo muhezagiro!
8. Inyuma ya Pentekote, ni igiki Abakirisu bagize kugira bongereze umunezero wabo?
8 Iyo nkuru irabandanya iti: “Imisi yose bāshishikara kuja mu rusengero n’umutima uhūye, kand’i wabo bāmanyagura umutsima, bakarya banezerewe n’imitima itagira akarohe, bahimbaza Imana, kandi na bo bāshimwa n’abantu bose. [Yehova, NW] akabongera imisi yose abama barakizwa.” (Ivyakozwe n’intumwa 2:46, 47) Ukuja hamwe kwabo hamwe n’ugusangirira hamwe imfungurwa vyoba ari vyo vyonyene vyabazaniye ukunezerwa kunini? Oyaye, umunezero mukuru wabo wava ku gushemeza Yehova Mana uko bukeye uko bwije. Kandi umunezero wabo warakomeye igihe babona abantu ibihumbi bakira ubutumwa bwabo bw’agakiza. No kuri twebwe ni ko biri muri iki gihe.
Abashemezi b’Abanyamunezero mu Mahanga Yose
9. (a) Ni ryari kandi mu buryo ubuhe Imana yatanguye guha abantu bo mu mahanga yose akaryo k’ukwumva inkuru nziza yiwe? (b) Ni kubera iki impwemu yera yasutswe kuri Koruneliyo hamwe n’abagenzi biwe imbere y’uko babatizwa?
9 Yehova ntiyashatse ko umurimo abasuku biwe barangura wo gutwara umuco ugarukira kw ihanga rimwe. Guhera mu 36 G.C. rero, yarahaye abantu bo mu mahanga yose akaryo ko kwumva inkuru nziza yiwe. Petero, ayóbowe n’Imana, yaragiye ku nzu y’intwazangabo w’Umupagani i Kayisariya. Yahasanze Koroneliyo akoraniye hamwe n’abagenzi biwe ba cane, hamwe n’umuryango wiwe. Uko bumviriza amajambo ya Petero bivuye inyuma, baragaragaje ukwizera Yezu mu mitima yabo. Ivyo tubimenya dute? Kubera ko impwemu yera y’Imana yaje kuri abo bantu bizeye b’Abapagani. Ubusanzwe, ingabire y’impwemu y’Imana yatangwa gusa inyuma y’ibatisimu, ariko ico gihe Yehova yarerekanye ko ashimye abo bantu batari Abayuda, imbere y’uko bibizwa. Iyo Yehova atagira ivyo, Petero ntiyomenye yuko Imana ico gihe yari yemeye ko Abapagani baba abasuku bayo n’uko bakwije ibisabwa kugira babatizwe mu mazi.—Ivyakozwe n’intumwa 10:34, 35, 47, 48.
10. Vyari vyavuzwe gute kera yuko abantu bo mu mahanga yose boshemeje Yehova?
10 Guhera mu bihe vya kera, Yehova yari yaravuze yuko abantu bo mu mahanga yose bomushemeje. Yoronse abashemeji b’abanyamunezero mu gihugu kimwekimwe cose. Kugira ivyo bitangirwe agahinyuza, intumwa Paulo yarasubiyemwo ivyari vyaravuzwe mu Vyanditswe vy’Igiheburayo. Yabwiye ikorane ririmwo abo mu mahanga menshi ryari i Roma ati: “Mwemerane, nk’uko Kristo na we yabemeye, kugira ngw Imana ishimishwe. Ico mvuga n’uko Kristo yacitse umukozi w’abākebge wo kubagaburira ivy’Imana, kubg’ukuri kwayo, kugira ngw ashitse ivyo ba sogokuru bāsezeraniwe, kandi ngw abanyamahanga bahimbarize Imana imbabazi zayo, nk’uko [muri Zaburi 18:49] handitswe, ngo Ni co gituma nzogutazira mu mahanga, ndirimbe izina ryawe. Kandi yongera kuvuga, [muri Gusubira mu vyagezwe 32:43], ati Yemwe banyamahanga ni munezeranwe n’abantu bayo. Kand’arongera [muri Zaburi 117:1], ati Yemwe banyamahanga mwese, ni mushime Uhoraho, kand’amoko yose amuhimbaze.” (Impirikano ni izacu.)—Abaroma 15:7-11.
11. Ni mu buryo ubuhe Imana yafashije abantu bo mu mahanga yose kwiga ibintu vy’ukuri kwiwe, ivyo bikaba vyavuyemwo iki?
11 Abantu bose ntibashobora gushemeza Yehova bashize hamwe atari gusa igihe bashize ivyizigiro vyabo kuri Yezu Kirisitu, uwo Imana yagennye ngo azotegeke abantu bo mu mahanga yose. Kugira Imana ibafashe bategere ibintu vy’ukuri kwiwe bijana mu buzima buhoraho, Imana yarashizeho urutonde rw’ukwigisha mu mahanga yose. Iriko itanga ubuyobozi ibicishije kuri wa mugwi w’umushumba w’umwizerwa wayo. (Matayo 24:45-47) Vyamukamwo iki? Amajwi arangwa umunezero arenga imiliyoni zitanu ariko araririmba amashemezo ya Yehova mu bihugu birenga 230. Kandi ayandi mamiliyoni ariko yerekana ko ashimishwa n’ukugira nk’ukwo nyene. Raba abitavye Icibutso mu 1996 uko bangana: 12 921 933. Ni igitangaza pe!
Ishengero Ryinshi ry’Abashemeji b’Abanyamunezero Ryaravuzwe Kera
12. Intumwa Yohani yeretswe ibiki vy’igitangaza, kandi biranguka gute?
12 Mu vyo intumwa Yohani yeretswe, yarabonye “ishengero ryinshi” rivuye mu mahanga yose. (Ivyahishuriwe Yohana 7:9) Umutwe-shimikiro w’amashemezo iryo shengero ryinshi ririko riririmbana n’amasigarira y’abasīzwe b’Imana n’uwuhe? Yohani atubwira ati: “Agakiza n’ak’Imana yacu ivyagiye kur’irya ntebe n’ak’Umwagazi w’Intama.” (Ivyahishuriwe Yohana 7:10) Ivyo biriko biratangazwa bimwe bishimitse mu mihingo yose y’isi. Nk’aho twoba turiko tuzungagiza amashami y’ibisandasanda, turatera impundu Imana dushize hamwe, ko ari yo Rugabavyose, kandi tukaturana umunezero imbere y’ijuru n’isi yuko agakiza kacu ‘tugakesha’ we hamwe n’Umwana wiwe, wa Mwagazi, Yezu Kirisitu. Yo, ese ukuntu intumwa Yohani ategerezwa kuba yarashitswe n’ukubona ivyo bintu yeretswe vy’igitangaza vyerekeye iryo shengero ryinshi! Kandi ese ukuntu dushikwa muri iki gihe n’ukwibonera neza ivyo Yohani yabonye, kandi mbere tukaba turi muri vyo!
13. Ni igiki gishira igisata ca Yehova ku ruhande bagatandukana n’isi?
13 Bwa basuku ba Yehova, turitirirwa izina ryiwe dufise akamwemwe. (Yesaya 43:10, 12) Ukuba turi Ivyabona vya Yehova kuratuma tuba abatandukanye n’iyi si. Iyumvire ntuze ukuntu ari umunezero kwitirirwa izina ritandukanye n’ayandi ry’Imana kandi intēgo dufise mu buzima ikaba ari ugukora igikorwa c’Imana! Intēgo ruheta Yehova afise y’ukwerāza izina ryiwe ryeranda no kwemeza ko ari we Rugabavyose akoresheje Ubwami bwiwe yaratumye ubuzima bwacu bugira ico buvuze. Yaradufashije kandi kugira ikibanza mu ntēgo yiwe, ku biraba izina ryiwe n’Ubwami bwiwe. Ivyo yabigize mu buryo butatu.
Twarabikijwe Ukuri
14, 15. (a) Ni uburyo bumwe ubuhe Imana yadufashije kugira ikibanza mu ntēgo y’Imana ku biraba izina ryiwe n’Ubwami bwiwe? (b) Ubwami bwashinzwe mu 1914 G.C., butandukaniye he n’ubwabogojwe mu 607 B.G.C.?
14 Ubwa mbere, Yehova yarabikije ukuri igisata ciwe. Ikintu cahishuwe giteye akamwemwe bisumbirije ni uko Ubwami bwiwe bwatanguye gutegeka mu 1914. (Ivyahishuriwe Yohana 12:10) Iyo ntwaro yo mw ijuru iratandukanye na bwa bwami bw’ikigereranyo bwari i Yeruzalemu, aho abami bo mu muryango wa Dawidi bahora bimikirwa. Ubwo bwami bwarabogojwe, kandi guhera mu 607 B.G.C., Yeruzalemu yashizwe rwose mu maboko y’ubutegetsi bw’ububasha bw’isi ya gipagani. Ubwami bushasha Yehova yashinze mu 1914 ni ububasha bwo mw ijuru butazokwigera buhabwa uwundi n’umwe kiretse Yehova, canke ngo bwigere busenyurwa. (Daniyeli 2:44) Vyongeye, ubutegetsi bwabwo bumeze ukundi. Gute? Mu Vyahishuriwe Yohana 11:15 hishura hati: “Mw ijuru hakurikira amajwi arenga, at’Ubgami bg’isi buhindutse ubg’Umwami wacu n’ubga Kristo wiwe, kand’azohora ahangamye ibihe bitazoshira.”—Impirikano ni izacu.
15 ‘Ubgami bg’Umukama wacu n’ubga Kristo wiwe’ burafise ububasha kw isi yose y’abantu uko ingana. Iyo nseruro nshasha y’ukuba Segaba kwa Yehova kwo kurimwo Umwana wiwe ari we Mesiya, hamwe n’abavukanyi 144 000 ba Yezu, benshi muri bo ubu bakaba barazuriwe ubuninahazwa bw’ijuru, si ikintu gusa kivugwa mu vy’ubwenge bw’ishure—ikintu gusa giherera mu vyiyumviro abanyeshure bonezerwa no guharirako. Ubwo Bwami bw’ijuru riho ni intwaro nyakuri. Kandi icizigiro gihimbaye dufise c’ukubaho ibihe bidashira mu bukemuke bivuye ku butegetsi bwayo kiraduha impamvu ihagije y’ukubandanya tunezerwa. Kuba twarabikijwe ibintu mwene ivyo vy’ukuri kw’Ijambo rya Yehova, biratuma nantaryo turiyaga neza. (Zaburi 56:10) Wewe ivyo woba uriko ubigira udahengeshanya mu kubwira uwo ari we wese yuko Ubwami bw’Imana bwahawe Mesiya ubu butegeka mw ijuru?
Turafashwa n’Impwemu Yera be n’Ikivukano co kw Isi Yose
16, 17. Uburyo bugira kabiri na gatatu Imana yadufashije ngo turonke ikibanza mu ntēgo yayo ni ubuhe?
16 Uburyo bugira kabiri Imana yadufashije kugira ikibanza mu ntēgo yayo, ni mu kuduha impwemu yera yayo, ari yo idushoboza kwimbuka ivyamwa vyayo mu buzima bwacu kandi Imana igaheza ikadushima. (Ab’i Galatiya 5:22, 23) Si ivyo gusa, Paulo yarandikiye Abakirisu basīzwe ati: “Twāhawe [im]pwemu [i]va ku Mana, kugira ngo tumenye ivy’Imana yatugabiye.” (1 Ab’i Korinto 2:12) Tuyobokeye impwemu ya Yehova, twese turashobora kumenya no gutahura ibintu vyiza bihari yaduhanye ubuntu—imihango yiwe, amategeko yiwe, ingingo ziwe, n’ibindi.—Gereranya na Matayo 13:11.
17 Nayo uburyo bugira gatatu bw’ukuntu Imana iriko iradufasha, turafise ikivukano cacu gikwiye kw isi yose hamwe n’intunganyo iteye akamwemwe ya Yehova mw iyungungane, kugira tumusenge. Intumwa Petero yaravuze ivyayo igihe yadusaba ashimitse ‘gukunda umuryango wose w’abavukanyi.’ (1 Petero 2:17) Umuryango wacu wuzuye urukundo, w’abavukanyi n’abavukanyikazi bakwiyé mu mahanga yose uradufasha gukorera Yehova dufise umunezero mwinshi mu mutima, nk’uko muri Zaburi y’100:2 habibwiriza hati: “Musabe Uhoraho munezerewe: muze mu nyonga ziwe muririmba.” Ku murongo wa kane na ho, haravuga hati: “Mushike mu birimba vyiwe mushima, no mu nyubakwa ziwe muhimbaza; mumukengurukire, mushemagize izina ryiwe.” Nuko rero, twaba turiko dukwiririza mu bantu canke twitaba amahwaniro yacu, turashobora kugira umunezero. Ese amahoro n’umutekano twaronse mu birimba biteye igomwe vy’urusengero rw’ivy’impwemu rwa Yehova!
Shemeza Yehova n’Umunezero!
18. Ni kubera iki dushobora kunezerwa mu gushemeza Yehova naho twogira uruhamo canke izindi ngorane bidusugereza?
18 Naho twoba dusugerezwa n’ibintu bigoye ibihe, rwaba uruhamo, canke izindi ngorane, ntunezerwa none kubona turi mu nzu y’ugusengeramwo ya Yehova. (Yesaya 2:2, 4) Ibuka yuko umunezero ari kamere nziza y’umutima. Abavukanyi n’abavukanyikazi bacu b’Abakirisu ba kare bari abashemeji b’abanyamunezero ba Yehova naho bashikirwa n’amagume menshi kandi bagahomba vyinshi. (Abaheburayo 10:34) Abizeye bagenzi bacu muri iki gihe bameze nka bo nyene.—Matayo 5:10-12.
19. (a) Ni akamo nyabaki gasubirwamwo kenshi kadutuma gushemeza Yehova? (b) Kugira turonke ubuzima budashira bizova ku ki, kandi twiyemeje iki?
19 Twese abakorera Yehova turafise akamwemwe k’ukugamburuka akamo duterwa na Bibiliya ngo tumushemeze. Incuro nyinshi, igitabu c’Ivyahishuwe kija kirongera ku mashemezo y’Imana imvugo ngo “Shemeza Ya”! (Ivyahishuriwe Yohana 19:1-6) Muri ya mirongo itandatu igize Zaburi y’150, tubwirwa incuro 13 gushemeza Yehova. Ako ni akamo gaterwa ivyaremwe vyose ngo vyiyunge ku kuririmba ishemezo rya Yehova n’umunezero. Kugira turonke ubuzima budashira, bizova ku kuntu twiyunga kuri ico citabirizo kinini ca Haleluya! Egome, igisata conyene kizobaho ibihe bidashira ni ic’abatura Yehova ishemezo ridacika. None rero, twiyemeje kwumira rwose kw ikorane ryiwe ridahemuka rikwiye kw isi yose, uko umuhero uja uregereza. Maze turashobora kwizigira kubona ya majambo arangiza Zaburi y’150 aranguka bimwe bitagira agahaze: “Igihumeka cose ni gishime [Yehova, NW]! Haleluya!”
Wewe Wokwishura Ute?
◻ Ni igiki gituma abantu ba Yehova baba abatandukanye n’abandi?
◻ Ni kubera iki abasuku ba Yehova ari abanyamunezero cane?
◻ Ni igiki kidushira ku ruhande kikadutandukanya n’isi?
◻ Uburyo butatu Imana yadufashije ngo tugire ikibanza mu ntēngo yayo ni ubuhe?
[Ifoto ku rup. 27]
Yezu aho yaba ari hose, yarashingira intahe Yehova kandi akamushemeza ku mugaragaro