Ugusenga Imana mu Kuri

Kugira ngo ugusenga kwemerwe n’Imana, gukwiye kuba gushingiye ku kuri. (Yohana 4:23) Bibiliya irerekana yuko abasavyi b’ukuri bari mw’ “[i]shengero ry’Imana nzima, vyongeye ni yo nkingi ishigikiye ukuri.” (1 Timoteyo 3:15) Abagize ishengero ry’Imana ntibemera gusa ukuri kwerekeye Ijambo ry’Imana ariko kandi babaho mu buryo buhuje na ryo kandi bakarirwanira, mu kurimenyekanisha kw’isi iyo iva ikagera.—Matayo 24:14; Abaroma 10:9-15.

IVYABONA VYA YEHOVA baramenyekanye ku bw’igikorwa barangura co kwigisha Bibiliya, ubu kikaba kiriko kirakorwa mu bihugu birenga 200. Bariga Bibiliya kandi bakayigisha nk’aho nyene ari yo kuri, ata kuyonona mu kuyivanga n’amafilozofiya y’abantu. Woba uzi inyigisho zabo zishingiye kuri Bibiliya? Benshi baragira impungenge zo kwumviriza Ivyabona vya Yehova babitumwe n’inkuru zibatyoza zivugwa hirya no hino. Ariko abantu b’imitima ikunda ukuri basabwe kwirabira bo nyene ko inkuru nziza Ivyabona bamamaza yoba ari ukuri canke atari kwo. Ingingo ihambaye mwene iyo umuntu ntakwiye kuyifata yishimikije urukurukuru. Abenshi mu bigiriye iperereza ku vyerekeye inyigisho Ivyabona vya Yehova bigisha barahungukiye cane.

Ukumenya Ukuri Biramara Ubwoba

Rimbura, nk’akarorero, ivyashikiye umwigeme yitwa Eugenia. Yarerewe mu rugo rw’Abagatolika b’intagondozwa. Se yari umwe mu batunganije urugendo rwa papa muri Mexiko mu 1979. Igihe yaja kuramutsa abagenzi, Eugenia yarabonanye n’Ivyabona vya Yehova. Baramufashije atangura kwirabira yitonze ico Bibiliya ivuga. Aribuka ibi: “Ubwa mbere, naratekewe n’ubwoba. Nari nabonye ukuri! Mugabo ivyo vyasobanura ko vyinshi mu vyo nemera imbere y’aho vyari ibinyoma. Umuryango wanje, abagenzi banje, abantu nkunda—bose bemera ibinyoma. Narashushe umutwe. Nagumye nibaza ukuntu umuryango wanje wari kubona ivyo bintu bishasha nari nubuye. Uko igihe carengana kandi ndabifashijwemwo na Yehova, naratanguye kumenyera ivyo bintu bihambaye binshikiye. Umusi umwe nafashe ingingo yo kuganira n’umugenzi umwe wo mu muryango, akaba yari umuporofeseri wa tewolojiya. Ntaco ntamubwiye ku vyerekeye icipfuzo nari mfise co gutora ukuri. Hanyuma yavuze, ati ‘Niba ushaka kumenya ukuri, rondera Ivyabona vya Yehova.’ ”

Nk’uko nyene Eugenia yari yatinye, umuryango wiwe waramwomoye. Ariko rero, Ivyabona barabandanije kumufasha mu vy’umutima. Avuga ati: “Narakomejwe ngo nshigikire ukuri. Nariboneye yuko cari ikintu umuntu akwiye kurwanira. Ikaze nahawe n’Ivyabona vya Yehova yari ihambaye cane. Niyumvisemwo ko nkundwa mw’ishengero rya gikirisu. Ukwiyegereza ishirahamwe ry’Imana vyaramfashije gutsinda ubwoba bw’uko nohavuye mba inyakamwe.”

Rimbura akandi karorero. Sabrina mu kumurera bari bamumenyereje kuyaga ivya Bibiliya ubudahorereza mu muryango. Kukaba nkako, bagize ikintu kimeze nk’ ‘idini y’umuryango.’ Yagize akamenyero ko kuza arifatanya n’abantu bo mu madini anyuranye kugira ngo ashire ku mugaragaro amakosa yabo. Igihe umwe mu Vyabona vya Yehova yamusaba kugira inyigisho ya Bibiliya, yaciye yemera adatevye, afise iciyumviro co kwerekana ko ivyo bemera ari ibinyoma. Aribuka ibi: “Maze umwaka urenga ndiko ndiga, naratinye gutakaza ‘ico nibaza ko ari ukuri mfise.’ Vyari vyaranyoroheye gushira ku mugaragaro ububeshi bw’amadini menshi nari naragiyemwo, ariko ico gihe ho ntivyari vyoroshe.”

Ubwoba Sabrina yari afise bwatumye ahagarika inyigisho ya Bibiliya yagirana n’Ivyabona vya Yehova. Mugabo rero yumvise agaragara mu vy’umutima. Yafashe ingingo yo gusubira gutangura ya nyigisho hanyuma amaherezo aremera ukwo kuri yari aronse. Sabrina yarateye imbere gushika aho ashaka gusangira n’abandi ivyo yariko ariga. Yaranasavye ko yoherekeza Ivyabona mu gikenurwa c’inzu ku nzu barangura. Sabrina asigura ati: “Imbere y’uko nemererwa kwamamaza inkuru nziza n’Ivyabona vya Yehova, nabajijwe uku: ‘Ubwo vy’ukuri ushaka kuba umwe mu Vyabona vya Yehova?’ Nishuye nti ‘Oya!’ Ubwoba bwarongeye kuntekera.” Impera n’imperuka, Sabrina amaze kubandanya kwitaba amakoraniro yose kandi akihweza igisata c’Imana n’ingene bashira mu ngiro ingingo za Bibiliya, yarabonye ko kwari ukuri koko. Yarabatijwe, ubu akaba ari umwamamaji w’inkuru nziza w’igihe cose.

Ni Kuki Batandukanye n’Abandi Gutyo?

Hari igihe umuntu yobaza ati: ‘Ni kuki inyigisho z’Ivyabona vya Yehova zitandukanye n’iz’ayandi madini?’ Ukubitije akajisho ku vyo Ivyabona bemera bizogufasha kubona ko ari Abakirisu b’inziraburyarya, abatohoji ba Bibiliya babishizeko umutima. Turakuremesheje ngo wirabire muri Bibiliya yawe bwite ivyanditswe vyerekana mu ncamake ibintu bemera vy’ishimikiro nk’uko biboneka aho hepfo.

Mu gihe wicaye ugatohoza ivyo Ivyabona vya Yehova bemera n’ukuntu bumira ku vyo Bibiliya yigisha, urashobora guhezagirwa mu kuronka umwidegemvyo uzanwa n’ukuri. (Yohana 17:17) Nta mpamvu n’imwe iriho yotuma utinya ukuri. Gira wibuke ivyo Yezu yasezeranye: “Muzomenya ukuri, kand’ukuri kuzobaha kwidegemvya.”—Yohana 8:32.

[Uruzitiro ku rup. 6]

Ibintu Bikurubikuru Bimwebimwe Ivyabona vya Yehova Bemera

◯  Yehova ni we Mana mushoboravyose. Izina ryayo ry’uruharo riboneka incuro zirenga 7 000 mu vyandiko vya mbere na mbere vya Bibiliya.—Zaburi 83:18.

◯  Yezu Kirisitu ni Umwana w’Imana, uwaje kw’isi gutanga ubuzima bwiwe ku bw’abantu. (Yohana 3:16, 17) Ivyabona vya Yehova bakurikira inyigisho za Yezu Kirisitu nk’uko ziri mu Njili.

◯  Izina Ivyabona vya Yehova rishingiye kuri Yesaya 43:10, ahavuga ngo: “Ni mwebge vyabona vyanje, ni k’Uhoraho [“Yehova,” NW] agize.”

◯  Ubwami abantu basaba muri ca gisabisho ca “Data wa Twese” ni intwaro yo mw’ijuru igiye gukuraho vuba ubucumukure bwose n’umubabaro wose biri mw’isi kugira ngo bibise Iparadizo Bibiliya isezerana.—Yesaya 9:6, 7; Daniyeli 2:44; Matayo 6:9, 10; Ivyahishuriwe 21:3, 4.

◯  Umuntu wese akora ivyo Imana ishaka arafise akaryo ko kuzoronka imihezagiro izova ku Bwami ibihe bidashira.—Yohana 17:3; 1 Yohana 2:17.

◯  Abakirisu bategerezwa guhuza uburyo bigenza n’ivyo Bibiliya ivuga. Bategerezwa kwita ku rutare kugira ngo babe inzirabugunge, bagire ubuzima butyoroye, burangwe n’ukwigenza runtu, kandi bagaragarize urukundo bagenzi babo.—Matayo 22:39; Yohana 13:35; 1 Ab’i Korinto 6:9, 10.

[Ifoto ku rup. 5]

Ivyabona vya Yehova baramenyesha abantu ukuri kwa Bibiliya mu bihugu bisaga 200