Guhagarika Ikiza c’Ubusumbane bw’Abantu

Umuremyi vuba agiye gushitsa ca cipfuzo gikomeye abantu bafise c’ukubaho bangana. Mu gihe tutarahashika, n’imiburiburi turashobora gutera intambwe zo guhagarika ikiza c’ubusumbane bw’abantu butubangamiye bukongera bukabangamira imiryango yacu. Nk’uko Nelson Mandela yahoze ari perezida wa Afirika y’Epfo yabivuze, “igitandukanya umuntu n’uwundi ni ukuntu dukoresha ivyo dufise, si ibintu duhabwa.”

INKURU y’ivyabaye iremeza ayo majambo yiwe. Hariho abagabo n’abagore benshi bahawe bike bavutse, mugabo mu gukoresha ivyo bari bafise bakaba bararoraniwe bituma batandukana n’abo barukanye kumbure babarusha ingabirano. Igihushanye n’ivyo, abandi bantu bahezagiwe bakagira ivyiza vyinshi bakivuka, barasesaguye ivyo bari bafise, maze bananirwa gukoresha ivyo bari bafise vyose.

Nukoreshe Neza Ivyo Ufise!

Ivyabona vya Yehova baritwararika cane gufasha abantu kumenya imigambi y’Imana biciye ku nyigisho ya Bibiliya. Yamara baratahura yuko kugira ngo abantu bungukire neza ku bintu bivugwa muri Bibiliya, bategerezwa kuba bazi gusoma no kwandika. Kubera ico, Ivyabona vya Yehova barigishije abantu ibihumbi mirongo gusoma no kwandika, dushizemwo n’abantu 23 000 (nko hagati y’imyaka y’1990) mu gihugu kimwe gusa co muri Afirika yo mu Buseruko. Ikinyamakuru kimwe, San Francisco Examiner, carerekeje ku gikorwa c’igitangaza Ivyabona vya Yehova barangurira ikibano kigira giti: “Ushobora kubafata nk’abanyagihugu b’intangakarorero. Barariha amakori bivuye inyuma, bakabungabunga abarwayi, bakarwanya ukutamenya gusoma no kwandika.”

Vyongeye, biciye ku vyigwa baza baratanga mu vy’ukuvugira ku mugaragaro, Ivyabona vya Yehova baramenyereje abantu ibihumbi amajana gucika abashikirizansiguro babishoboye, bashobora kuvuga bitabagoye ku mugaragaro. Muri abo bantu ibihumbi n’ibihumbi harimwo bamwebamwe bahoze bafise ingorane zikomeye zo kuvuga. Rimbura ivy’uyu mugabo wo muri Afirika y’Epfo yanditse ati: “Naragigimiza bimwe bibi ku buryo nari nsigaye nigunga, kenshi nkama niheka ku bandi ngo bamvugire. . . . Igihe ninjira mw’Ishure ry’Igikenurwa ca Gitewokarasi maze ngategerezwa gusoma Bibiliya imbere y’abantu bakeyi . . . , naragigimije cane ku buryo ntashoboye kurangiza ico kigabu mu mwanya nari nahawe. Iryo koraniro rirangiye [umuhanuzi] abigiranye umutima mwiza yarampaye impanuro ngirakimazi. Yangiriye inama yo kwimenyereza kwisomera n’ijwi ryumvikana. Ivyo narabigize, ku musi ku musi nkamara umwanya nsoma Bibiliya yanje n’ikinyamakuru Umunara w’Inderetsi n’ijwi rirenga.” Uwo mugabo yarateye imbere neza ku buryo ubu ashikiriza insiguro z’icese imbere y’abantu bashika amajana eka mbere n’ibihumbi.

Twinovore Ukungana Hagati y’Abavukanyi

Ku biraba amashure, ukubungabunga amagara, ubutunzi bw’umuntu be n’ikibanza afise mu kibano, uko ibintu vyifashe mu Vyabona vya Yehova kuratandukanye cane. Ubwo budasa bugaragaza gusa yuko baba mw’isi y’inyagasembwa. Mugabo aho batandukaniye n’iyindi migwi y’amadini, muri bo amacakubiri ashingiye ku moko, ku kibanza umuntu afise mu kibano no ku butunzi, nka yose yararanduranywe n’imizi.

Ivyo babishitseko mu gukora uko bashoboye kwose ngo bashire mu ngiro ivyo bize muri Bibiliya. Barakurikiza n’umutima wabo wose ingingo ngenderwako za Bibiliya nk’izi: “[Imana ntiraba] nk’ukw abantu barāba: kukw abantu barāba ku rukoba gusa, ariko Uhoraho [ar]āba mu mutima.” (1 Samweli 16:7) “Imana [nti]robanura abantu ku butoni, ariko mu mahanga yose ūyubaha, agakora ivy’ukugororoka, iramwemera.” (Ivyakozwe 10:34, 35) “Ntimusubirize umuntu mu nkōko ikibi yabagiriye; mubabare gukora ivyiza imbere y’abantu bose. Namba bishoboka, mu ruhande rwanyu, mwuzure n’abantu bose.”—Abaroma 12:17, 18; raba kandi 1 Timoteyo 6:17-19; Yakobo 2:5, 9.

Kubera yuko Ivyabona vya Yehova bumira cane kuri izo ngingo ngenderwako za Bibiliya ziremesha ubumwe, baranka kwihanganira muri bo akantu ako ari ko kose gasumbanisha abantu gafatiye ku budasa bushingiye ku moko, ku kibanza umuntu afise mu kibano, canke ku butunzi. Nk’akarorero ivyo bintu nta ruhara bifise mu gufata ingingo y’uwohabwa uduteka tw’umurimo mw’ishengero rya gikirisu. Ibibanza vy’amabanga nk’ivyo kwigisha no gucungera, bitangwa hishimikijwe gusa kamere nziza zo mu buryo bw’impwemu.—1 Timoteyo 3:1-13; Tito 1:5-9.

Ku bantu bacumukujwe n’ubusumbane bw’abantu muri iyi si isinzikajwe n’amacakubiri, ese ingene vyeza umutima kubona abandi babafata nk’abavukanyi n’abavukanyikazi bangana imbere y’Umuremyi wabo! Ivyo Martina arashobora kuvyiyemerera. Se wiwe amaze guta umuryango, yarerewe mu rugo rukene rurimwo umuvyeyi umwe. Uwo mukobwa kenshi yafatwa nk’umuntu wo gukumira mu kibano, akumva ko ataco amaze, kandi bikamugora kwumvikana n’abandi. Yaratsimbataje agatima ko kutagira ico yitaho. Yamara ibintu vyarahindutse aho atanguriye kwiga Bibiliya no kuba Icabona ca Yehova. Avuga ati: “Biracari ngombwa ko ndwanya ivyiyumviro bibi, mugabo ubu iyo ngorane ndashobora kuyitsinda mu buryo bworoshe kuruta. Nararushirije kwumva ko ndi n’ico maze, kandi mvuga nshize amanga. Ukuri kwatumye mbona ko hari ico nshobora gukora. Ubu ndazi ko Yehova ankunda kandi ko kubaho bifise akamaro.”

Kubera ko Ivyabona vya Yehova bagize umugwi w’Abakirisu bava mu mahanga menshi, mu bihugu birenga 230 barafise urugero rutari ruto rw’ukungana, vy’ukuri kikaba ari ikintu c’imbonekarimwe mw’isi y’iki gihe. Hoba hariho irindi shirahamwe ry’idini na rimwe rishobora kuvuga ko rishitsa ivyo kandi rikabigaragaza mu ngiro?

Yamara Ivyabona vya Yehova ntibashaka kwiyemera. Bariyemerera ata kurya umunwa yuko kubera barazwe agasembwa, badashobora gukuraho ubusumbane bw’abantu, nk’uko nyene abantu bamaze ibinjana babigerageza bikabata ku w’amazi. Yamara rero, Ivyabona baranezerezwa n’uko muri bo bakoze ibitari bike kugira bahagarike ico kiza kibi. Kandi babigiranye ukwizera isezerano ry’Imana gukomeye, barindiranye umushasharo isi nshasha y’ukugororoka aho ubusumbane buzoba umugani ibihe bidashira.

Egome, abantu bagamburuka bose vuba bagiye kugira ka “gateka n’uburenganzira” bingana, Umuremyi wabo yari yashatse ko bagira kuva mu ntango. Ese ingene ari iciyumviro ciza ntangere! Kandi ico gihe kizoshika ata kabuza!

[Ifoto ku rup. 7]

Ivyabona vya Yehova bararwanya ubujuju mu kwigisha abantu ibihumbi mirongo gusoma no kwandika

[Ifoto ku rup. 8]

Ukuri kwa Bibiliya kurafasha kurandurana n’imizi amacakubiri ashingiye ku kibanza umuntu afise mu kibano, ku mavuko, no ku butunzi