Ubusumbane bw’Abantu—Imana Yoba Ari yo Yabishatse?

Mw’ijambo rimwe, inyishu ni oya. Reka turabe igituma.

IMANA yari yashatse ko abantu bose baronka uturyo tungana two kwinovora ubuzima n’ubuhirwe. Ku vyerekeye iremwa ry’umuntu dusoma duti: “Imana iravuga, iti Tureme umuntu mw ishusho yacu, ase natwe: aganze amafi yo mu kiyaga, n’ibiguruka mu kirere, n’ibitungano, n’isi yose, n’ivyikwega vyose, bigenda bikwega inda hasi.” Irema ry’ibiri kw’isi rirangiye, “Imana yihweza ivyo yaremye vyose, kandi vyari vyiza cane.”—Itanguriro 1:26, 31.

Ubwo Imana yovumera yuko uku gusumbana kw’abantu kwo muri iki gihe kubabaje ari “[kw]iza cane”? Nta na gato, kubera yuko “Imana ar’urukundo.” (1 Yohana 4:8) Bivugwa ko ‘itagira nkunzi’ n’uko ‘igikorwa cayo ari agahore, inzira zayo zose zigororotse, Imana yo kwizigirwa, itarimwo kugabitanya, iroranya, kandi y’inyakuri.’ (Gusubira mu Vyagezwe 10:17; 32:4; gereranya na Yobu 34:19.) Intumwa Petero na we yashitse kuri iki ciyumviro: “N’ukuri ni ho nkimenya yukw Imana itarobanura abantu ku butoni, ariko mu mahanga yose ūyubaha, agakora ivy’ukugororoka, iramwemera.”—Ivyakozwe 10:34, 35.

Kubera ko Imana ari inyarukundo, itagira nkunzi, inyabutungane, iroranya kandi ikaba igororotse, yoshoboye gute kurema abantu batangana mu biraba uburenganzira bafise bwo kwinovora ubuhirwe? Imana iretse ivangura mu bantu ikongera ikabashira mu vy’ukuza barasumbasumbana, vyobaye binyuranye cane na kamere yayo. Yagabiye ko bose “bavuka bidegemvya kandi bafise agateka n’uburenganzira bingana.” Yamara muri iki gihe biragaragara ko ibintu bitifashe ukwo. Kubera iki?

Umuzi w’ivy’Ugusumbana

Kuvuga yuko Imana yaremye abantu kugira bangane ntibisobanura yuko yagabiye ko bose bangana mu kantu kose. Boshobora kuba batandukanye mu buhanga, mu bibashimisha, no muri kamere zabo. Boshobora kandi gutandukanira ku kibanza barimwo canke ku rugero rw’ubukuru bafise. Nk’akarorero, umugabo n’umugore ntibangana mu tuntu twose, mugabo Imana yaremye umugore nk’ “umufasha” w’umugabo. (Itanguriro 2:18) Biragaragara ko abavyeyi n’abana batandukanye mu vy’ubukuru. Ariko rero naho hariho ubwo budasa, abantu bose—abagabo, abagore n’abana—bokwinovoye uburenganzira Imana itanga bwo kuronka uburyo bungana bwo gushitsa ibintu vy’ishimikiro bisabwa vyotuma bagira ubuhirwe. Bose bogize agateka kangana kandi bagafatwa kimwe imbere y’Imana.

Abana b’Imana bo mu buryo bw’impwemu, abaremwe imbere y’abantu, na bo nyene bashinzwe ibikorwa n’amabanga bitandukanye. (Itanguriro 3:24; 16:7-11; Yesaya 6:6; Yuda 9) Naho ari ukwo, ata kurenga imipaka y’ivyo bahawe, bose bari bashoboye kwinovora ku rugero rungana intunganyo Imana yagize zerekeye ubuzima n’ubuhirwe. Gutyo baragaragaza mu buryo butangaje ukutagira nkunzi kw’Imana.

Ikibabaje ni uko ikiremwa kimwe c’impwemu kitabumbwe n’urutonde Imana yashizeho rutagiramwo nkunzi. Cashatse ibiruta ivyo Imana yagihaye, cipfuza ikibanza kiri hejuru gusumba, gikirurutse kuruta. Mu gutsimbataza ico cipfuzo kibi, ico kiremwa catanguye kurwanya Yehova, we afise uburenganzira bwo kugira ikibanza kiminuje gisumba vyose kubera ko ari we Muremyi. Uwo mwana w’impwemu w’Imana w’umugarariji, mu nyuma yarasutse abantu mu vy’ugusaba Imana ibiruta ivyo yari yarabahaye. (Itanguriro 3:1-6; gereranya na Yesaya 14:12-14.) Ni co gituma ivyo Yehova yatunganije kugira abantu binovore ubuzima n’ubuhirwe vyabonetse nk’ibitari ku rugero rukwiriye. Uwo mugarariji w’impwemu, uwugenekerezwa mu Vyahishuriwe 20:2 ko ari we ‘Murwanizi na Satani,’ yacitse umubisha aremesha ugusumbana kw’abantu.

Ibintu Vyoba Bizoteba Bigahinduka?

Mw’ijambo rimwe, inyishu ni egome!

Mugabo ni nde ashobora kuzana ayo mahinduka abantu bipfuza? Abatware b’abantu, tukaba tudakeka ko bamwe babigira ata buryarya, baramaze ibinjana n’ibindi bita ku rutare ngo babishikeko. Ntibaroraniwe bikwiye, bituma abantu benshi bashika ku kuvuga yuko bitumvikana kwitega ko ingorane z’ugusumbana kw’abantu zoteba zigatorerwa umuti. Ariko rero uko Imana ibona ibintu kuranditse muri Yesaya 55:10, 11. Havuga hati: “Nk’ukw imvura na shelegi bigwa bivuye mw ijuru, ntibisubireyo, ariko bigatosa isi, bigatuma imeza, ikēra, igaha umubivyi imbuto, n’ūrya ikamuha ivyo kurya; uko ni kw ijambo ryanje riva mu kanwa kanje rizomera: ntirizogaruka ubusa, ariko rizoshitsa ivyo ngomba, rizosozera ico naritumye.”

Ese ingene bihumuriza kumenya yuko Yehova Imana yavumereye ko azorangura umugambi wiwe wo mu ntango wo guha abantu bose uburyo bungana bwo kubaho no guhirwa! Kubera yuko ari Imana ivuga ukuri, yarishinze kurangura ivyo yasezeranye. Igishimishije ni uko ifise ishaka n’ubushobozi bwo kubikora. None ivyo izobirangura gute?

Inyishu tuyikesha Ubwami Yezu Kirisitu yigishije abayoboke biwe bose gusaba, bati: “Data wa twese wo mw ijuru, . . . ubgami bgawe buze, ivyo ugomba bibe mw isi nk’uko biba mw ijuru.” (Matayo 6:9, 10) Ni vyo, Ubwami bw’Imana ni bwo buryo Yehova azokoresha mu “[gu]komvomvor[a] ubgami bgose [buriho ubu], yamara bgo buzohangama gushitsa ibihe vyose.”—Daniyeli 2:44.

Ku ngoma y’Ubwami bwo mw’ijuru, hazoza ikibano gishasha c’abantu. Kuri ivyo intumwa Yohani yanditse mu gitabu ca nyuma ca Bibiliya ari co Ivyahishuriwe Yohana, ati: “Mbona ijuru risha n’isi nsha: kukw ijuru rya mbere n’isi ya mbere vyari vyagiye.” (Ivyahishuriwe 21:1) Ibintu bizoba vyagiye bizoba ari ibintu vyose bibi bituma abantu basumbana—ni ukuvuga ubukene, indwara, ubujuju, ukuvangura, be n’ayandi magorwa asinzikaje abantu.a

Ivyabona vya Yehova baramaze ikinjana kirenga berekeza ubwenge bw’abantu kuri ubwo Bwami. (Matayo 24:14) Biciye ku bisohokayandikiro be no ku gusahiriza umuntu wese ukwiwe, barihatiye gufasha abantu kumenya umugambi w’Imana nk’uko wanditse muri Bibiliya. Ariko rero igikorwa co kwigisha barangurira kw’isi yose, nticahaye gusa abantu icizigiro co kuzobaho bangana kandi bafise ubuhirwe muri kazoza, ariko kandi carazanye ivyiza muri iki gihe mu guhagarika ikiza c’ubusumbane bw’abantu. Reka turabe ukuntu vyashobotse.

[Utujambo tw’epfo]

[Iciyumviro ku rup. 5]

Imana yari yashatse ko abantu bose baronka uburyo bungana bwo kubaho no guhirwa