Ubwiza bw’ibiremwa vya Yehova

‘Uhoraho we, erega ibikorwa vyawe ni ivy’uburyo bwinshi!’

TWABA tuba hagati mu gihugu canke mu gisagara, hejuru mu misozi canke epfo hafi y’ikiyaga, dukikijwe n’ubwiza buteye akoba bw’ivyaremwe. Birabereye kubona ikirangamisi c’Ivyabona vya Yehova co mu 2004 (Calendrier des Témoins de Jéhovah 2004) gitanga ishusho yo muri rusangi y’ibikorwa vy’akumiza vya Yehova Imana.

Abantu bakenguruka bamye nantaryo bitwararika ibikorwa Imana yakoze. Nk’akarorero, rimbura ivya Salomo, uwari afise ubwenge “bgāruta ubg’abanyabgenge bose b’i burasirazuba”. Bibiliya ivuga iti: “Yar’azi kudondora ivy’ibiti, uhereye kw isederi y’i Lebanoni ugashitsa kuri ezobu imera ku mazu; yar’azi no kudondora ivy’ibikōko n’ibisīga n’ivyikwega hasi n’amafi” (1 Abami 4:30, 33). Se wa Salomo, ni ukuvuga wa Mwami Dawidi, kenshi yarazirikana ku bikorwa vy’akaroruhore Imana yahinguranye ubuhinga. Yaravyuriwe umutima wo kwikugura abwira Umuremyi wiwe ati: “Uhoraho we, ereg’ibikorwa vyawe n’ivy’uburyo bginshi! Vyose wabikoresheje ubgenge: isi yuzuye ubutunzi bgawe”.—Zaburi 104:24a.

Vyoba vyiza natwe twihweje ivyaremwe kandi tukabizirikanako. Nk’akarorero, twoshobora ‘kwunamura amaso yacu hejuru’, maze tukibaza duti: ‘Ni nde yaremye ivyo bintu?’. Emwe, nta wundi atari Yehova Imana, umwe afise ‘ububasha bw’ubushobozi’ kandi w’‘inkomezi nyinshi’!—Yesaya 40:26.

Kuzirikana ku bikorwa vy’irema vya Yehova bikwiye kugira ico bikoze gute kuri twebwe? Birakwiye kugira ico bikoze kuri twebwe n’imiburiburi mu buryo butatu. Birashobora (1) kutwibutsa guha agaciro ubuzima bwacu, (2) gutuma dufasha abandi ngo bagire ico bigiye ku vyaremwe, (3) no kutuvyurira umutima wo kurushiriza kumenya no gukengurukira Umuremyi wacu bimwe bishitse.

Ubuzima bwacu twebwe abantu, uburuta kure n’iyo ubw’“ibikōko bitagira ubgenge”, butuma twitegereza ibitangaza vy’irema kandi tukabiha agaciro (2 Petero 2:12). Amaso yacu arashobora kubona intara ziteye igomwe zidukikije. Amatwi yacu arashobora kwumva uturirimbo tw’inyoni turyoheye ugutwi. Vyongeye, kuba dushobora kumenya igihe be n’ahantu, biratuma turonka ivyo twibukirako biheza bikaba ibintu twibukana akanyamuneza. Naho ubuzima dufise ubu atari ubutunganye, nta nkeka kubaho biri n’ico bimaze!

Abavyeyi barashobora kuryoherwa n’ukuntu abana babo basanzwe baryoherwa n’ivyaremwe. Urazi ukuntu abana baryoherwa no gutoragura ibiruka vy’udukoko two mu mazi ku nkengera y’ikiyaga, gukuyakuya udukoko dutungiwe i muhira, canke kwurira ibiti! Abavyeyi boshima gufasha abana babo kubona isano riri hagati y’ivyaremwe n’Umuremyi wavyo. Akoba n’icubahiro abana batsimbatariza ivyo Yehova yaremye birashobora kubagumamwo mu buzima bwabo bwose.—Zaburi 111:2, 10.

Twoba turi abantu babona hafi cane hamwe twotamarira ivyaremwe ariko tukananirwa kwemera icese ko hariho Umuremyi. Ubuhanuzi bwa Yesaya buradufasha kuzirikana kuri ico ciyumviro nyene igihe buvuga buti: “Ntiwaribgabimenye? Nturavyumva? Uhoraho n’Imana ihoraho, Umuremyi w’impera z’isi; ntadendebukirwa, nta ho aruha; ubgenge bgiwe ntibuserangurika”.—Yesaya 40:28.

Ni vyo, ibikorwa vya Yehova biratanga ikimenyamenya c’ubukerebutsi bwiwe budaserangurika n’ububasha bwiwe ntarutwa be n’urukundo rugera ibwina adukunda. Iyo tubonye ubwiza bw’ibintu bidukikije tukongera tugategera kamere z’uwabikoze vyose, nimuze tuvyurirwe umutima wo gusubiramwo amajambo ya Dawidi avuga ngo: “Nta gihwanye nawe . . . , Mwami; kandi nta bikorwa biriho bihwanye n’ivyawe”.—Zaburi 86:8.

Turashobora guhera amazinda yuko abantu bagamburuka bazobandanya kujorezwa n’ibikorwa vy’irema vya Yehova. Mu bihe bidahera, tuzokwama dufise uturyo tudahera two kwiga ibintu vyinshi ku vyerekeye Yehova (Umusiguzi 3:11). Kandi uko tuzorushiriza kumenya vyinshi ku vyerekeye Umuremyi wacu, ni ko tuzorushiriza kumukunda.

[Akajambo k’epfo]

[Uruzitiro ku rup. 9]

Barashemeza Umuremyi

Abahinga benshi bakenguruka, barabona ikimenyamenya c’uko ibiriho vyaremwe n’Imana. Ng’ubu uburorero bukeyi:

“Siyansi yanje igira ico ivuze ikongera ikandonsa umunezero iyo bishitse nkubura ikintu gishasha maze nkibwira nti: ‘Ukwo ni ko Imana yagikoze’. Intumbero yanje ni iyo gutahura agace na gatoyi cane k’umugambi w’Imana”.—Henry Schaefer, umwigisha w’icigwa citwa shimi.

“Ku bijanye n’icatumye ikirere kibaho, turavye ubwaguke bwaco, umusomyi ubwiwe ni we agira iciyumviro ashitseko, mugabo ntidushobora gutahura neza icabitumye mu gihe tuyigijeyo [ni ukuvuga Imana]”.—Edward Milne, umuhinga mu vy’ikirere w’Umwongereza.

“Turazi yuko ibiriho bishobora gusigurwa n’ibiharuro bihanitse kuruta ibindi kubera ko Imana ari yo yabiremye [ibiriho]”.—Alexander Polyakov, umuhinga mu vy’ibiharuro w’Umurusiya.

“Mu vyigwa tugira ku bijanye n’ibintu bisanzwe biriho, tuba turiko turarimbura ivyiyumviro vy’Umuremyi, tumenya neza ivyiyumviro vyiwe, kandi turiko turasigura urutonde rw’ibintu yashizeho, atari ivyo twebwe twashizeho”.—Louis Agassiz, umuhinga mu vy’ibinyabuzima w’Umunyamerika.

[Ifoto ku rup. 8, 9]

GIbinyoni vyitwa “manchots papou” vyo muri péninsule Antarctique

[Ifoto ku rup. 9]

Ishamba ryitwa Grand Teton ry’i Wyoming muri Leta Zunze Ubumwe za Amerika

[Credit line]

Jack Hoehn/Index Stock Photography