Inkuru y’ubuzima

Twari turindiriye ubwami ‘butari ubwo muri iyi si’

Nk’uko vyavuzwe na NIkolai Gutsulyak

Nari maze imisi n’amajoro 41 ndi mw’ibohero ryagararije. Nagiye numva ibisasu vya muzinga, nca ndakanguka. Abasoda n’ibiduga vy’intambara vyabo baritereye muri iryo bohero, baje gutera abanyororo. Mvugishije ukuri, ubuzima bwanje bwari mu kaga.

VYAGENZE gute ngo mbe ndi aho hantu? Reka ndabagire ku muriri. Ivyo vyashitse mu 1954. Ico gihe nari mfise imyaka 30. Cokimwe n’ibindi Vyabona vya Yehova benshi bariho mu gihe c’intwaro y’Abasoviyeti, narapfunzwe mporwa ko ntagira aho mpengamiye mu vya politike be n’uko nabwira abandi ivyerekeye Ubwami bw’Imana. Ivyabona twari dupfunzwe twari abagabo 46 be n’abagore 34. Twari dupfungiwe mw’ikambi rikorerwamwo ibikorwa vy’agahato ryari hafi y’igisagara ca Kengir muri Leta ya Kazakistani yo hagati. Muri iryo kambi twari dupfunganywe n’abandi banyororo ibihumbi n’ibihumbi.

Joseph Stalin, umukuru wa Leta Zunze Ubumwe z’Abasoviyeti yari yapfuye mu 1953. Abanyororo benshi bari bizigiye yuko intwaro nshasha y’i Mosuku yokwitayeho ibibazo vyabo bijanye n’ukuba bari bafashwe nabi cane. Umubabaro abo banyororo bari bafise wahavuye utuma muri iryo bohero bagarariza icese. Mu mishamirano yakurikiye, twebwe Ivyabona twategerezwa gusigurira abo bagarariji bari bashangashiwe be n’abasoda barinda iryo bohero impagararo yacu mu buryo butomoye. Kugira tugume tutagira aho duhengamiye, vyasaba ko twizera Imana.

Umugumuko utangura

Ku wa 16 Rusama ni ho umugumuko watangura muri iryo bohero. Haciye imisi ibiri, abanyororo barenga 3.200 baranse kuja ku bikorwa, bakaba basaba ko bofatwa neza kandi ko agateka k’abanyororo bapfungiwe ivya politike kokubahirizwa. Ibintu ntivyatevye gukomera. Abo bagarariji baciye batangura gusohora ku nguvu abarinda iryo kambi, ubukurikira batobora uruzitiro rwaryo, mu nyuma na ho babomora impome zatandukanya ivyumba vy’abagabo n’ivy’abagore, babihinduramwo utuzu babamwo ikivunga. Mu misi y’agahengwe yakurikiye, abanyororo bamwebamwe mbere bararongoye, imisa y’ubugeni ikaba yahagarikirwa n’abapatiri, na bo nyene bakaba bari bapfunzwe. Mu vyumba bitatu vyo muri iryo kambi aho ubwo bugarariji bwabereye, abanyororo hafi 14.000 baragumutse.

Abo banyororo bari bagararije barashinze komite y’ikambi yari ijejwe kuganira n’igisoda. Ariko rero budakeye na kabiri, abagize iyo komite baracanyemwo, maze iryo kambi rica ritwarwa n’abari bashigikiye cane ubwo bugarariji. Ibintu vyaciye birushiriza gukara. Abaja imbere abandi muri ubwo bugarariji barashinze urwego rujejwe umutekano, urwa gisirikare be n’urujejwe gutangaza amakuru ajanye n’ukuzigama ico bita ngo ni urutonde. Abo bakuru barakoresheje ivyuma biduza amajwi vyari bimanitse ku nkingi zari hirya no hino muri iryo kambi kugira ngo batangaze amajambo aturira, barondera gukorereza ako gatima k’ubugarariji. Abo banyororo bari bagararije barabuza abandi kwihungira, bagahana ababarwanya bakongera bakavuga ko uwo wese yohirahira ntiyemere ivyo bashaka, yokwishwe. Vyaravugavugwa ko hari abanyororo boba bari bamaze kwicwa.

Kubera yuko abo bagarariji babona ko bashobora guterwa, bariteguye ata gufyina kugira ngo baze birwanire. Kugira ngo abaja imbere abandi biyemeze neza yuko abanyororo benshi cane bobaye biteguriye kurwanira iryo kambi, bategetse ko umunyororo wese yironderera ikirwanisho. Kugira baronke ivyo birwanisho, abo banyororo baciye bafata ivyuma vyo ku madirisha maze babicuramwo imbugita be n’ibindi birwanisho. Barashoboye mbere no kuronka inkoho n’amabombe.

Duhatirwa kuja muri ubwo bugarariji

Ico gihe, hari abanyororo babiri bo mu bagararije baje aho ndi. Umwe yari afise imbugita ihejeje gukarishwa. Yambwiye ati: “Tora iyi mbugita! Uzoyikenera mu kwikingira”. Narasenze Yehova mu gacerere ndamusaba ngo amfashe kutagira ubwoba. Nasubijeyo nti: “Jewe ndi umukirisu, ndi Icabona ca Yehova. Twe n’ibindi Vyabona dupfunzwe kubera yuko tutarwana n’abantu, ariko turwana n’impwemu zitaboneka z’ububasha. Ibirwanisho dukoresha mu kuzirwanya ni ukwizera kwacu be n’icizigiro dufise cerekeye Ubwami bw’Imana”.​—Abanyefeso 6:12.

Igitangaje, nagiye mbona uwo mugabo azunza umutwe asa n’uwerekana ko yatahuye. Ariko rero, uwo wundi bari kumwe yaciye ansunurira nka hariya, baca baragenda. Abo banyororo bari bagararije baza barava mu kazu kamwe baja mu kandi, bagerageza guhatira Ivyabona kuja muri ubwo bugarariji. Yamara abavukanyi n’abavukanyikazi twari kumwe bose baranse.

Mu nama imwe yagizwe n’abagize ya komite y’abanyororo bari bagararije, baravuze ibijanye n’impagararo y’Ivyabona vya Yehova yo kutagira aho bahengamiye. Bavuze bati: “Abo mu madini yose, baba abapentekote, abadivantisite, ababatisite, eka n’abandi bose, baradushigikiye. Ivyabona vya Yehova bonyene ni bo banse. None tubagenze gute?”. Hari uwavuze yuko bofata umwe muri twebwe bakamuterera mw’ifuru ibohero ryakoresha kugira ngo badutere ubwoba. Ariko hari uwahoze ari umusoda mukuru, uno akaba yarubahwa n’abandi banyororo, yafashe ijambo avuga ati: “Ivyo si vyo. Bose dukwiye kubashira mu kazu kamwe kari ku mpera y’ikambi amaja kw’irembo. Gutyo, abasoda nibadutera n’ibiduga vy’intambara vyabo, Ivyabona ni bo bazoca baherako. Kandi ntawuzotwagiriza ngo ni twe twabishe”. Abandi baciye bemera ico ciyumviro.

Dushirwa ku munwa w’icobo

Butaraca na kabiri ivyo bibaye, nya banyororo baranyuragiye mw’ikambi basemerera bati: “Vyabona vya Yehova, sohoke!”. Baciye badukoranya twese uko twari 80 badutwara mu kazu kamwe kari ku mpera y’iryo kambi. Barasambuye ibitanda bigerekeranye vyari muri ako kazu kugira ngo ico cumba kirushirize kwaguka, maze baca badutegeka kwinjira. Ako kazu ni ko badufungiyemwo kandi ntuze twari dusanzwe dupfunzwe!

Kugira ngo turabe ukuntu ako kazu kovamwo igice c’abavukanyi n’ic’abavukanyikazi, abavukanyikazi twari kumwe barafatanije amashuka maze tuba ari yo dukoresha mu kukagaburamwo kubiri, hamwe haba ah’abagabo ahandi haba ah’abagore. (Mu nyuma, hari umuvukanyi w’Umurusiya yacapuye ako kazu nk’uko ubibona kuri iyo shusho.) Turi muri utwo twumba twaga, twarakunda gusengera hamwe, tugasaba Yehova dushimitse ngo aturonse ubukerebutsi be n’“ubushobozi buhebuje”.​—2 Ab’i Korinto 4:7.

Muri ico gihe cose, twari ku munwa w’icobo turi hagati y’abo banyororo bari bagararije be n’ingabo z’Abasoviyeti. Nta n’umwe muri twebwe yari azi ico umwe wose muri iyo migwi ibiri wokoze. Umuvukanyi umwe w’intahemuka yari ahumuye yaduhanuye ati: “Ntimwirirwe murata umutwe. Yehova ntazoduheba”.

Abavukanyikazi bakundwa twari kumwe, baba abato canke abakuze, baragaragaje ukwihangana kudasanzwe. Umwe muri bo yari afise nk’imyaka 80 kandi yari akeneye kwitwararikwa cane. Hari abandi bari barwaye kandi bari bakeneye kuvurwa. Muri ico gihe cose, imiryango y’ako kazu twabamwo yategerezwa kuguma yuguruwe kugira ngo nya banyororo bari bagararije bashobore kuguma badushinze ijisho. Mw’ijoro, abanyororo bitwaje ibirwanisho barinjira muri ako kazu twarimwo. Rimwe na rimwe twarumva bavuga ngo “Ehe bwa Bwami bw’Imana burasinziriye”. Ku murango na ho, igihe baba batwemereye kuja aho twafungurira, twaguma turi hamwe maze tugasenga Yehova tumusaba ko yodukingira abantu b’inkazi.

Muri ako kazu twarimwo, twaragerageza gushigikirana mu vy’impwemu. Nk’akarorero, akenshi haraba umuvukanyi atwiganira inkuru yinaka yo muri Bibiliya, akayivuga n’ijwi ryumvikana ku buryo twese tuyumva. Ahejeje kuyigana, yaca ayihuza n’uko ivyacu vyifashe. Umuvukanyi umwe akuze yakunda canecane kuvuga inkuru yerekeye Gideyoni n’ingabo ziwe. Yatwibukije ati: “Mw’izina rya Yehova, abagabo 300 bafise ibicurarangisho bararwanije abasoda 135.000 bitwaje ibirwanisho. Bose uko bari 300 basubiye inyuma badora” (Abacamanza 7:16, 22; 8:10). Iyo nkuru be n’izindi zivugwa muri Bibiliya zaradukomeje mu buryo bw’impwemu. Naho nari maze igihe gito mbaye Icabona, kwibonera ukwizera gukomeye kw’abavukanyi n’abavukanyikazi bari bazi utuntu n’utundi kundusha, vyarankomeje. Nariboneye ko Yehova yari kumwe natwe vy’ukuri.

Intambara itangura

Uko amayinga yagenda arahaca, ni ko muri iryo kambi imishamirano yarushiriza gukomera. Ibiganiro vyo kwumvikana vyaba hagati y’abo banyororo bari bagararije be n’abategetsi vyaguma ari urutavanako. Abaja imbere abandi muri ubwo bugarariji baguma basaba ko ubutegetsi bw’i Mosuku bworungika uwobuserukira kugira ngo abonane na bo. Abategetsi na bo basaba ko abo banyororo bari bagararije bahagarika iyo migumuko, bagashira hasi ibirwanisho, maze bagasubira ku bikorwa. Iyo migwi yompi yagumye inana. Muri ico gihe, iryo kambi ryarakikujwe n’inteko za gisirikare zari ziteguriye kuritera ifirimbi iramutse ivuze. Na nya bagarariji bari bameze magabo biteguriye kurwana, bakaba bari bamaze kuzibira amayira no kurunda ibirwanisho. Umuntu wese yari yiteze ko urugamba rwa nyuma hagati y’igisirikare n’abanyororo rushobora kwaduka umwanya uwo ari wo wose.

Ku wa 26 Ruheshi twarakanguwe n’urwamo rwinshi rw’amasasu ya vya muzinga. Ibiduga vy’intambara vyarasambuye uruzitiro maze birinjira mw’ikambi. Vyakurikiwe n’igitero c’abasoda isinzi barasisha inkoho. Ba banyororo, abagabo n’abagore, baciye bagenda bagana ivyo biduga vy’intambara vyariko vyinjira, biha akamo ngo “Hurrah!”, bongera batera ibibuye, ibibombe bakoreye muri iryo bohero eka n’ikindi kintu ico ari cose bahambije. Haciye haba intambara ikomeye, kandi twebwe Ivyabona twasanze turi hagati y’iyo migwi iriko itana mu mitwe. None Yehova yari kwishura gute amasengesho twamutura tumusaba ngo adufashe?

Twagiye tubona abasoda biterera muri ka kazu twarimwo. Bavuze n’ijwi rirenga bati: “Yemwe beranda, sohoka ningoga na ningoga, muje inyuma y’uruzitiro!”. Umusoda yari arongoye ico gitero yategetse abasoda ngo ntibaturase, ariko bagumane natwe bongere badukingire. Igihe intambara yariko irabica bigacika, twaciye tuja gutuna mu kiyaya cari inyuma y’iryo kambi. Twamaze amasaha ane twumva muri iryo kambi ibibombe bituragurika, amasasu yasana, imiborogo ari imiborogo, iminiho na yo ari yose, maze haciye akanya tuza twumva vyose ngo cwe! Mu bucagucagu, twabonye abasoda basehagura imivyimba bayikura mw’ikambi. Twarumvise yuko abantu amajana n’amajana bari bakomeretse, abandi na bo barahasiga ubuzima.

Amasaha amaze kwiterera, hari umukuru w’ingabo nari nzi yaje aho twari turi. Yatubajije n’ubwishime n’akantu ati: “None ga Nikolai, ni nde yabakijije? Ni twebwe canke ni Yehova?”. Twaramukengurukiye bivuye ku mutima kubona tutahasize ubuzima, maze twongerako duti: “Turemera yuko Imana yacu mushoboravyose Yehova yatumye mushobora kudukingira nk’uko yatumye n’abandi bashobora kurokora abasavyi bayo bo mu bihe vya Bibiliya”.​—Ezira 1:1, 2.

Uwo mukuru w’ingabo yaradusiguriye kandi ukuntu abasoda batumenye bongera baramenya n’aho twari turi. Yavuze yuko igihe kimwe muri vya biganiro vyaza biragirwa hagati y’igisirikare n’abanyororo bari bagararije, igisirikare cigeze kubagiriza yuko bica abanyororo batabashigikira. Mu kwiregura, nya banyororo bari bagararije bavuze yuko Ivyabona vya Yehova batagiye muri ubwo bugarariji ariko ko batishwe. Ahubwo ko mu guhana ivyo Vyabona, babapfungiye mu kazu kamwe bose. Abakuru b’ingabo ivyo baravyibuka.

Twagumye twumiye ku Bwami

Umwanditsi umwe w’Umurusiya azwi cane yitwa Aleksandr Solzhenitsyn, mu gitabu ciwe (The Gulag Archipelago) aravuga ivy’ubwo bugarariji bwabereye mw’ibohero twari dupfungiwemwo. Ku bijanye n’ubwo bugarariji, yandika ko bwatanguye kubera yuko, nk’uko abivuga, twese abanyororo “twashaka umwidegemvyo, kandi ni ko, . . . mugabo none ni nde yowuduhaye?”. Ivyabona vya Yehova twari muri iryo bohero, na twebwe nyene twaripfuza kuronka umwidegemvyo. Ariko rero, ntiwari umwidegemvyo wo kubohorwa gusa, ariko kandi wari umwidegemvyo utangwa n’Ubwami bw’Imana bwonyene. Igihe twari mw’ibohero, twaratahura yuko dukeneye inkomezi zitangwa n’Imana kugira ngo tugume twumiye ku Bwami bwayo. Kandi Yehova yaraturonkeje ikintu cose twari dukeneye. Yaraduhaye intsinzi tutiriwe turakoresha imbugita canke amagerenade.​—2 Ab’i Korinto 10:3.

Yezu Kristu yabwiye Pilato ati: “Ubgami bganje s’ubgo mur’iyi si; iyaba ubgami bganje bgar’ubgo mur’iyi si, abagendanyi banje baba bārwanye” (Yohana 18:36). Ku bw’ivyo, twebwe abayoboke ba Kristu ntitwagize uruhara mu matati y’ivya politike. Twarahimbawe n’uko mu gihe c’ubwo bugarariji be n’inyuma yabwo, abandi biboneye yuko tutahemukiye Ubwami bw’Imana. Ku bijanye n’ukuntu twigenjeje muri ico gihe, Solzhenitsyn yanditse ati: “Ivyabona vya Yehova babona ko ata cobabuza gukurikiza amategeko yabo ata guca ku ruhande kandi baranse kwubaka inzitiro canke kuja kw’irondo”.

Ubu haraciye imyaka irenga 50 ivyo bintu bigoye cane bibaye. Ariko rero, akenshi ndakenguruka iyo nibutse ivyo bihe kubera ko nahakuye ivyigwa ntazokwigera nibagira, nko kurindira Yehova be no kwizigira bimwe bishitse ukuboko kwiwe kw’inkomezi. Mu vy’ukuri, cokimwe n’ibindi Vyabona benshi bakundwa babayeho mu cahoze ari Leta Zunze Ubumwe z’Abasoviyeti, nariboneye yuko Yehova aha koko umwidegemvyo abarindiriye Ubwami ‘butari ubwo muri iyi si’, akabakingira, akanabarokora.

[Amafoto ku rup. 8, 9]

Iri ni rya kambi ry’i Kazakistani ryakorerwamwo ibikorwa vy’agahato twari dupfungiwemwo

[Ifoto ku rup. 10]

Iyi ni ya shusho yerekana ka kazu Ivyabona twari dupfungiwemwo, igice carimwo abagore

[Ifoto ku rup. 11]

Aha twari kumwe n’abavukanyi tumaze kuva mw’ibohero