Woba waracumuye ku mpwemu nyeranda?

“Hariho igicumuro kizana urupfu koko”.​—1 YOHANA 5:16, NW.

1, 2. Tumenya gute ko gucumura ku mpwemu nyeranda y’Imana bishoboka?

“NAGUMA niyumvira yuko nacumuye ku mpwemu nyeranda”. Ukwo ni ko umugore umwe wo mu Budagi yanditse, naho yariko arakorera Imana. Umukirisu yoba koko ashobora gucumura ku mpwemu nyeranda y’Imana, ari yo nguvu ikora yayo?

² Ego cane, gucumura ku mpwemu nyeranda ya Yehova birashoboka. Yezu Kristu yavuze ati: “Icaha cose n’ukurogota, abantu bazobiharirwa; ariko kurogota [ku m]pwemu n’icaha kitazoharirwa” (Matayo 12:31). Duhabwa iyi mburizi igira iti: “Namba dukora ivyaha ibigirankana, kandi tumaze guhabga kumenya ivy’ukuri, ntihaba hagisigaye ikimazi c’ivyaha, ariko haba hasigaye kwitegana ubgoba gucirwakw iteka” (Abaheburayo 10:26, 27). Intumwa Yohani na we yanditse ati: “Hariho igicumuro kizana urupfu koko” (1 Yohana 5:16, NW). Ariko none uwacumuye bimwe bikomeye, yoba ari we yimenyera niba yakoze canke atakoze “igicumuro kizana urupfu koko”?

Ukwigaya kuratuma umuntu aharirwa

3. Igihe dutuntujwe n’icaha twakoze, biba bishoboka rwose ko twakoze iki?

³ Yehova ni we Mucamanza wa nyuma w’abacumuzi. Nkako, umwe wese muri twebwe ategerezwa kuzobazwa na we ivyo yakoze, kuko we yama akora ibigororotse (Itanguriro 18:25; Abaroma 14:12). Yehova ni we amenya niba twakoze canke tutakoze icaha kidaharirwa, kandi ni we ashobora kudukurako impwemu yiwe (Zaburi 51:11). Ariko igihe dutuntujwe cane n’icaha twakoze, biba bishoboka rwose ko tuba twigaye vy’ukuri. None ukwigaya nyakuri ni iki?

4. (a) Wosigura gute ukwigaya? (b) Wewe ubona ari igiki kiremesha cane mu majambo dusanga muri Zaburi 103:10-14?

⁴ Kwigaya bisobanura guhindura inyifato yacu ku bijanye n’ikibi tuba twarakoze canke ico twoba tugabirije gukora. Bisobanura ko twumva dutuntujwe n’ingendo yo gukora icaha canke twicuza, maze tukavavanura na yo. Niba twarakoze icaha gikomeye ariko tukaba twarateye intambwe zikenewe kugira twerekane ko twigaye vy’ukuri, turashobora guhumurizwa n’aya majambo umwanditsi wa Zaburi yanditse, agira ati: “[Yehova] ntiyatugiriye ibihwanye n’ivyaha vyacu, ntiyadushubirije mu nkōko ibihwanye n’ibigabitanyo vyacu. Nk’ukw ijuru ryitanguye isi, ni kw ikigongwe agirira abamwubaha kingana. Nk’ukw i burasirazuba hitanguye i burengerazuba, uko ni ko yashize kure ibicumuro vyacu. Nk’uko se w’abana abagirira akagongwe, ni k’Uhoraho akagirira abamwubaha. Kukw azi iremwa ryacu, yibuka ko tur’umukungugu”.​—Zaburi 103:10-14.

5, 6. Tanga iciyumviro nyamukuru kiri muri 1 Yohana 3:19-22, wongere uvuge ico ayo majambo iyo ntumwa yavuze asobanura.

⁵ Amajambo intumwa Yohani yavuze na yo nyene arahumuriza. Agira ati: “Ico ni co kizotumenyesha ko tur’ab’ukuri, kandi tuzoshitsa umutima mu nda imbere yayo, mu vy’imitima yacu idutsindisha vyose, kukw Imana iruta imitima yacu, kand’izi vyose. Abo nkunda, imitima yacu iy’itadutsindishije, turashira ubgoba imbere y’Imana; kand’ico dusaba cose tugihabga na yo, kuko twitondera ivyagezwe vyayo, tugakora ibishimwa imbere yayo”.​—1 Yohana 3:19-22.

⁶ ‘Tumenya ko turi ab’ukuri’ biciye ku kugaragaza urukundo rwa kivukanyi no kutamogorera gukora icaha (Zaburi 119:11). Mu gihe twokwumva twiyagirije kubera imvo zinaka, biraba vyiza twibutse ko “Imana iruta imitima yacu, kand’izi vyose”. Yehova aratugirira ikigongwe kubera ko azi neza “igishika [cacu] ca kivukanyi kitagira ubwiyorobetsi”, intambara turwana mu kurwanya igicumuro be n’utwigoro tugira kugira ngo dukore ivyo agomba (1 Petero 1:22, NW). Imitima yacu ‘ntizodutsindisha’ nitwizigira Yehova, tukagaragaza urukundo rwa kivukanyi tukongera tukaba abatagirwa no kumogorera icaha n’ibigirankana. ‘Tuzoshira ubwoba imbere y’Imana’ mw’isengesho, kandi izotwishura kubera yuko twitondera amabwirizwa yayo.

Baracumuye ku mpwemu

7. Ni igiki gifasha kumenya niba umuntu yoharirwa icaha canke atogiharirwa?

⁷ Ni ivyaha ibihe bidaharirwa? Kugira ngo twishure ico kibazo, nimuze turimbure uburorero bumwebumwe bwo muri Bibiliya. Kurimbura ubwo burorero birakwiye kuduhumuriza niba twarigaye, ariko tukaba tugituntuzwa cane n’amakosa akomeye twakoze. Turaza kubona ko igihambaye cane atari ubwoko bw’icaha umuntu yakoze, ahubwo ko imvo yatumye agikora, agatima yari afise be n’urugero yashikanyeko mu kubikora n’ibigirankana, ari vyo bifasha kumenya niba yogiharirwa canke atogiharirwa.

8. Indongozi zimwezimwe z’idini ry’Abayuda zo mu kinjana ca mbere zacumuye gute ku mpwemu nyeranda?

⁸ Indongozi z’idini ry’Abayuda zo mu kinjana ca mbere zarwanya Yezu Kristu n’ububisha n’akantu, zariko ziracumura ku mpwemu nyeranda. Zariboneye ingene impwemu y’Imana ikorera muri Yezu igihe yakora ibitangaro vyatera iteka Yehova. Yamara, abo bansi ba Kristu bavuze ko ubwo bubasha abukura kuri Shetani Mubesheranyi. Nk’uko Yezu yabivuze, abarogose gutyo ku mpwemu nyeranda y’Imana, ku bwa ngingo bariko barakora igicumuro kitohariwe ‘muri ico gihe no mu gihe coje’.​—Matayo 12:22-32.

9. Ukurogota ni iki, kandi Yezu yabivuzeko iki?

⁹ Ukurogota ni ugukoresha imvugo yo gucokora, gusiga iceyi umuntu canke gutukana. Kubera ko impwemu nyeranda ikomoka ku Mana, gutyoza impwemu yayo nta ho bitaniye no gutyoza Yehova ubwiwe. Umuntu w’intigaya yama akoresha mwene iyo mvugo ntashobora guharirwa. Icatumye Yezu avuga ivyerekeye mwene ico caha, cerekana yuko yariko yerekeza ku barwanya n’ibigirankana ibikorwa vy’impwemu nyeranda y’Imana. Kubera yuko Abafarizayo babona ingene impwemu ya Yehova yariko ikorera muri Yezu yamara ubwo bubasha bakabwitirira Shetani, bararogose ku mpwemu, baba bayicumuyeko. Ni co gituma Yezu yavuze ati: “Umuntu wese azorogota [ku m]pwemu [nyeranda] nta ho azoharirwa, kand’azoba akoze icaha c’ibihe bidashira”.​—Mariko 3:20-29.

10. Ni kubera iki Yezu yise Yuda “umwana wo gupfa rubi”?

¹⁰ Rimbura kandi ivyerekeye Yuda Isikariyoti. Yari indyarya, akaza arasotora ku mupfuko w’amahera yari ajejwe (Yohana 12:5, 6). Mu nyuma Yuda yaragiye ku bategetsi b’Abayuda araheza atunganya ivyo kugurisha Yezu intete 30 z’ifeza. Vy’ukuri, Yuda amaze kumugurisha, yaradogombwe, ariko ntiyigera yigaya ico caha yakoze n’ibigirankana. Ku bw’ivyo rero, Yuda ntabereye izuka. Ni co gituma Yezu yamwise “umwana wo gupfa rubi”.​—Yohana 17:12; Matayo 26:14-16.

Ntibacumuye ku mpwemu

11-13. Umwami Dawidi yacumuye gute ku bijanye n’icaha yakoranye na Batisheba, kandi ni impumurizo iyihe dushobora gukura ku kuntu Imana yagumye ibabona?

¹¹ Rimwe na rimwe, abakirisu batuye ivyaha bikomeye bakoze maze bakaba barafashijwe mu buryo bw’impwemu n’abakurambere bo mw’ishengero, boshobora kuba bagihagaritswe umutima n’ukuba bararenze ku mategeko y’Imana (Yakobo 5:14). Niba na twebwe duhagaritswe umutima muri ubwo buryo, birashoboka rwose yuko tuza kwungukira ku kwihweza ico Ivyanditswe bivuga ku bijanye n’abahariwe ivyaha vyabo.

¹² Umwami Dawidi yaracumuye bimwe bikomeye ku bijanye n’icaha yakoranye na Batisheba, muka Uriya. Dawidi amaze kubona uwo mugore yasa n’irirenga yariko ariyoga, igihe yaraba hasi ari hejuru ku ngoro yiwe hafi y’aho, aca amutumako ku kirimba ciwe maze aryamana na we. Mu nyuma amenyeshejwe ko uwo mugore yibungenze, yarateguye umugambi w’uko umugabo wiwe Uriya aza kurarana na we kugira ngo apfukapfuke ico caha c’ukurenga ibigo. Aho uwo mugambi mubi upfiriye, uwo mwami yaciye atunganya ivy’uko Uriya yicirwa ku rugamba. Hanyuma, Batisheba yaracuwe na Dawidi maze amuvyarira umwana, uno akaba yahavuye apfa.​—2 Samweli 11:1-27.

¹³  Yehova yaratunganije ico kibazo ca Dawidi na Batisheba. Imana yarahariye Dawidi, bikaba biboneka ko hari ivyo yisunze, nk’ukwigaya kwa Dawidi be n’isezerano ry’Ubwami yari yaragiriraniye na we (2 Samweli 7:11-16; 12:7-14). Biboneka ko Batisheba yagaragaje ukwigaya kubera ko yatewe agateka ko kuvyara Umwami Salomo no kuba inakuruza wa Yezu Kristu (Matayo 1:1, 6, 16). Niba twaracumuye, vyoba vyiza twibutse yuko Yehova atibagira ko twagaragaje ukwigaya.

14. Urugero Imana ishikanako mu guharira rwigaragariza gute ku vyashikiye Umwami Manase?

¹⁴ Urugero Yehova ashikanako mu guharira rurigaragariza kandi ku vyashikiye Umwami Manase w’Ubuyuda. Yarakoze ivyo Yehova yabona ko ari bibi. Manase yarubakiye Bayali ibicaniro, arasenga “ingabo zose zo kw ijuru” yongera mbere arubaka ibicaniro vy’imana z’ikinyoma mu ntangaro z’urusengero. Yaratanze abana biwe kw’ibimazi aboshereje mu muriro, araremesha ubupfumu kandi atuma abantu b’i Buyuda n’ab’i Yeruzalemu “bakora nabi gusumvya amahanga Uhoraho yageshereje imbere y’Abisirayeli”. Imburizi zatangwa n’abahanuzi b’Imana ntizumviwe. Umwami wa Ashuri yahavuye atwara Manase mu bunyagano. Igihe Manase yari mu bunyagano, yarigaye kandi aguma asenga Imana yicishije bugufi, na yo ikaba yaramuhariye iranamusubiza ku ngoma i Yeruzalemu, aho yaciye ateza imbere ugusenga kw’ukuri.​—2 Ngoma 33:2-17.

15. Ni ikintu ikihe cabaye mu buzima bw’intumwa Petero cerekana ko Yehova aharira “rwose”?

¹⁵ Haciye ibinjana n’ibindi, intumwa Petero yaracumuye bimwe bibabaje mu kwihakana Yezu (Mariko 14:30, 66-72). Ariko rero, Yehova yarahariye Petero “rwose” (Yesaya 55:7, NW). Uti kubera iki? Kubera yuko Petero yigaye vy’ukuri (Luka 22:62). Haciye imisi 50 ku musi wa Pentekoti, Petero yaratewe agateka ko gushingira intahe Yezu ashize amanga, ico kikaba cari ikimenyamenya kigaragara cerekana ko Imana yari yaramuhariye (Ivyakozwe n’intumwa 2:14-36). Hoba hari imvo n’imwe yotuma tubona ko Imana itoharira rwose abakirisu bigaye vy’ukuri muri iki gihe? Umwanditsi wa Zaburi yaririmvye ati: “Uhoraho, wokwama wibuka ibigabitanyo, Bgirukiro, ni nde yohava akazohagarara adatsinzwe? Ariko guharirwa kubonerwa kuri wewe”.​—Zaburi 130:3, 4.

Icodufasha kudahagarika umutima twibaza ngo twoba twaracumuye ku mpwemu nyeranda

16. Imana yisunga iki mu kuduharira?

¹⁶ Ubwo burorero duhejeje kwihweza burakwiye kudufasha kudahagarika umutima twibaza ngo twoba twaracumuye ku mpwemu nyeranda. Burerekana ko Yehova aharira koko abakoze ivyaha bakigaya. Isengesho dutura Imana tubigiranye ubwira ni co kintu gihambaye kuruta ibindi vyose. Niba twaracumuye, turashobora gutakamba dusaba guharirwa twishimikije inkuka y’incungu ya Yezu, ikigongwe Yehova atanga, ukuba twararazwe agasembwa be n’umurimo twamuranguriye turi intahemuka. Kubera ko tuzi yuko Yehova atugirira ubuntu tutabereye, turashobora kurondera guharirwa twizigiye ko na we azoduharira.​—Abanyefeso 1:7.

17. Dukwiye gukora iki mu gihe twoba twacumuye kandi tukaba dukeneye gufashwa mu buryo bw’impwemu?

¹⁷ Tuvuge iki mu gihe twoba twaracumuye mugabo tukaba tudashobora gusenga kubera yuko icaha twakoze catumye turwara mu vy’impwemu? Ku bijanye n’ivyo, umwigishwa Yakobo yanditse ati: “[Mwene uwo muntu] n’atumekw abashingantahe b’ishengero, baze kumusengera, bamusīge amavuta ya elayo mw izina ry’Umwami wacu. Kand’ugusenga gufatanije n’ukwizera kuzokiza umurwayi, Umwami azomuvyura: kand’asanzwe yarakoze ivyaha azobiharirwa”.​—Yakobo 5:14, 15.

18. Naho nyene umuntu yakoze icaha yoba yirukanywe mw’ishengero, ni kubera iki ivyo bidasobanura yuko aba yakoze icaha kidaharirwa?

¹⁸ Naho vyoshika uwacumuye ntiyigaye maze akirukanwa mw’ishengero, ntibisobanura yuko aba yakoze igicumuro adashobora guharirwa. Ku bijanye n’umukirisu umwe yasizwe w’i Korinto yari yaracumuye maze akirukanwa mw’ishengero, Paulo yanditse ati: “Ico gihano abenshi bāmuhannye, kiramaze k’ūmeze artyo, none ni co gituma mukwiye cane-cane kumuharira, no kumwirura, ng’ūmeze artyo ntarengerwe n’umubabaro usāgutse” (2 Ab’i Korinto 2:6-8; 1 Ab’i Korinto 5:1-5). Ariko rero, kugira ngo abahuvye basubirane mu buryo bw’impwemu, barakeneye kwemera imfashanyo zo mu buryo bw’impwemu zishingiye kuri Bibiliya zitangwa n’abakurambere bakirisu kandi bakagaragaza ko bigaye vy’ukuri. Bategerezwa ‘kwama imbuto zikwiranye n’ukwigaya’.​—Luka 3:8.

19. Ni ibiki bishobora kudufasha kuguma turi “[a]bafise amagara meza mu kwizera”?

¹⁹ Ni ibiki bishobora gutuma umuntu yiyumvira ko yacumuye ku mpwemu nyeranda? Yoshobora kubitumwa n’ukwiyagiriza birenze canke ukuba afise amagara make. Muri ico gihe, isengesho be no kuruhuka kuruta ukwo yahora, vyoshobora gufasha. Turakwiye canecane kutareka ngo Shetani aduce intege ku buryo twohava tureka gukorera Imana. Kubera ko Yehova adahimbarwa n’uko umunyakibi apfa, nta gukeka ko atanahimbarwa igihe hagize n’umwe mu basavyi biwe atakaza. Ku bw’ivyo, nimba duhagaritswe umutima n’uko ngo twoba twaracumuye ku mpwemu nyeranda, turakwiye kubandanya twigaburira Ijambo ry’Imana, ushizemwo n’imirongo yo mu mazaburi iremesha cane. Turakeneye kuguma twitaba amakoraniro y’ishengero tukongera tukagira uruhara mu gikorwa co kwamamaza Ubwami. Ivyo bizodufasha kuba “[a]bafise amagara meza mu kwizera” (NW) maze bitume tudahagarika umutima twibaza ngo twoba twarakoze icaha kidaharirwa.​—Tito 2:2.

20. Ni ibibazo ibihe vyofasha umuntu kubona ko atacumuye ku mpwemu nyeranda?

²⁰ Aboba bahagaritswe umutima n’uko ngo boba baracumuye ku mpwemu nyeranda, boshobora kwibaza bati: ‘Noba nararogose ku mpwemu nyeranda? Kuva nigaye icaha nakoze, noba maze guhindura inyifato yanje nisunze ukwo kwigaya kwanje? Noba nizigira ko Imana yampariye? Noba ndi umuhuni w’intigaya yateye akagere umuco wo mu buryo bw’impwemu?’. Birashoboka rwose ko abantu nk’abo botahura yuko batarogose ku mpwemu nyeranda y’Imana, canke ko batacitse abahuni. Barigaye kandi baguma bizera ko Yehova aharira. Rero, ntibacumuye ku mpwemu nyeranda ya Yehova.

21. Ikiganiro gikurikira kiza kurimbura ibibazo ibihe?

²¹ Ese ukuntu ari umuhezagiro kwizigira tudakeka ko tutacumuye ku mpwemu nyeranda! Ariko ku bijanye n’ivyo, hariho ibibazo birimburwa mu kiganiro gikurikira. Nk’akarorero, hari aho twoba twibaza duti: ‘Noba vy’ukuri ndiko ndayoborwa n’impwemu nyeranda y’Imana? Ivyamwa vyayo vyoba vyigaragaza mu buzima bwanje?’.

Wokwishura iki?

• Ni kubera iki dushobora kuvuga ko gucumura ku mpwemu nyeranda bishoboka?

• Kwigaya bisobanura iki?

• Ni bande bacumuye ku mpwemu nyeranda igihe Yezu yari ngaha kw’isi?

• Dushobora gute gutsinda uguhagarika umutima twibaza ngo twoba twarakoze icaha kidaharirwa?

[Ifoto ku rup. 17]

Abavuze ko ibitangaro Yezu yakoze yabikoreshwa n’ububasha bwa Shetani, baracumuye ku mpwemu nyeranda y’Imana

[Ifoto ku rup. 18]

Naho Petero yihakanye Yezu, ntiyakoze icaha kidaharirwa