Ni ukuri canke ni ikinyoma?​—Ukuri ku vyerekeye Yezu

UVYIBAZAKO IKI? IVYIYUMVIRO BIKURIKIRA VYOBA ARI UKURI CANKE IBINYOMA?

Yezu yavutse ku wa 25 Kigarama.

Hari abagabo batatu b’abanyabwenge bagendeye Yezu igihe yavuka.

Yezu yarivukana.

Yezu yari Imana yiyambitse umubiri w’umuntu.

Yezu ntiyari umuntu mwiza vyonyene.

BENSHI bokwishura yuko ivyo vyiyumviro vyose ari ivy’ukuri. Hari abandi boshobora kuvuga yuko bigoye ko umuntu yobimenya ata mazinda canke mbere ko bitanashoboka. Kumbure biyumvira yuko mu gihe umuntu yizera Yezu, inyishu y’ivyo bibazo itaba vy’ukuri ihambaye.

Ariko rero, Bibiliya si ko ivuga. Ituremesha kugira “ubumenyi butagira amakosa bwerekeye Umukama wacu Yezu Kristu.” (2 Petero 1:8) Ubwo bumenyi turabwironsa mu gusuzuma za Njili. Zirahishura ukuri ku vyerekeye Yezu, zikadushoboza gutandukanya ukuri n’ikinyoma. Reka rero twihweze ico izo Njili zivuga ku bijanye n’izo nyigisho zavuzwe aho haruguru.

INYIGISHO: Yezu yavutse ku wa 25 Kigarama.

UKURI AHO KURI: NI IKINYOMA.

Nta na hamwe Bibiliya ivuga idomako ukwezi canke umusi Yezu yavukiyeko. None igenekerezo rya 25 Kigarama ryazananye he? Nk’uko igitabu kimwe c’inkoranyabumenyi (The Encyclopædia Britannica) kibivuga, bamwebamwe mu biyita abakirisu “bashimye ko iryo genekerezo rihurirana n’umusi mukuru wa gipagani w’Abaroma wahimbaza . . . intango y’urushana mu misi usanga izuba riteba kuboneka, ico gihe imisi ikaba ica itangura kuba miremire, n’izuba rigatangura kuduga hejuru rwose mu kirere.” Ico gitabu nyene kivuga yuko imigenzo myinshi ijanye na Noweli yakomotse ku “migirwa ya gipagani ijanye n’uburimyi be n’izuba yagirwa urushana rugeze hagati.”

Yezu yoba yoshigikira yuko abantu bahimbaza ivuka ryiwe ku wa 25 Kigarama? Rimbura iki kintu: Umusi Yezu yavukiyeko ntuzwi. Nta na hamwe Ivyanditswe bidusaba guhimbaza iryo vuka, eka nta n’ikimenyamenya na kimwe cerekana ko abakirisu bo mu ntango barihimbaza. Ahubwo riho, Bibiliya iratubwira umusi nyezina Yezu yapfiriyeko, kandi Yezu yategetse abayoboke biwe guhimbaza uwo musi.a (Luka 22:19) Biribonekeza neza ko Yezu yashimye ko ivuka ryiwe ritaba ari ryo ryitwararikwa cane, ariko ko hokwitwararikwa agaciro k’urupfu rwiwe rwo kwitangako inkuka.​—Matayo 20:28.

INYIGISHO: Hari abagabo batatu b’abanyabwenge (canke abami batatu nk’uko bivugwa na bamwebamwe) bagendeye Yezu igihe yavuka.

UKURI AHO KURI: NI IKINYOMA.

Woba kumbure umaze kubona amashusho canke ibishushanyo vyerekana ivuka ry’akana Yezu karyamye mu bwato bw’ibitungwa gakikijwe n’abagabo batatu b’abanyabwenge bitwaje utuganuke. Ariko rero, ivyo bintu bashushanya vyerekana ibintu bitabayeho, ntivyerekana ibintu vy’ukuri.

Ego ni ko hari abantu baje bava mu Buseruko bunamiye Yezu akiri umwana. Ariko rero, abo bashitsi mu vy’ukuri bari abaragurira ku nyenyeri. (Matayo 2:1) Boba none basanze Yezu aryamye mu bwato bw’ibitungwa? Haba namba, bamugendeye ari mu nzu. Biboneka ko bashitse haciye amezi nk’angahe Yezu yaravutse.​—Matayo 2:9-11.

Ku bijanye n’igitigiri c’abo bashitsi, mbega boba bari 2, 3, canke 30? Bibiliya nta co ibivugako. Ivy’uko bari batatu nk’uko bikunze kuvugwa, bishobora kuba vyafatiwe kuri bwa bwoko butatu bw’utuganuke bashikana.b (Matayo 2:11) Hari n’abavuze yuko ngo umwe wese muri abo banyabwenge yoba aserukira abafise ibara ry’urukoba kanaka. Ariko ico ciyumviro nta ho tugisanga mu Vyanditswe. Ahubwo riho, nk’uko igitabu kimwe kigira ico kivuze ku Njili kivyerekana, ico kinyoma cazanywe n’“umutohozakahise wo mu kinjana c’umunani yiyumvira agaheba agakavya.”

INYIGISHO: Yezu yarivukana.

UKURI AHO KURI: NI IKINYOMA.

Kuba Yezu yari afise abo bavukana ni ikintu cigaragaza muri za Njili. Injili ya Luka ivuga ko Yezu yari “imfura” ya Mariya, bikaba vyerekana yuko Mariya yahavuye avyara abandi bana.c (Luka 2:7) Injili ya Mariko ivuga yuko abantu bamwebamwe bo mu gisagara ca Nazareti bafata Yezu cokimwe n’abo bavukana, bakamubona nk’umuntu asanzwe. Babajije bati: “Mbega si . . . mwene nyina wa Yakobo na Yose na Yuda na Simoni? Bashiki biwe na bo ntibari hano i wacu?”​—Mariko 6:3, Bibiliya Yera; Matayo 12:46; Yohani 7:5.

Naho Injili zivuga iki, abanyatewolojiya benshi babandanya bavuga yuko Yezu yivukana. Hari abavuga yuko abo bene wabo na bashikiwe wumva, mu vy’ukuri bari abavyara ba Yezu, bene nyinabo canke bene sewabo.d Hari n’abandi bivugira yuko ngo abo bene wabo na bashikiwe ari abana b’abazanano Mariya yari yaravyaye. Ariko rero, zirikana kuri iki kintu: Iyaba Mariya yari yavyaye Yezu ari umwe, ubwo abo Banyanazareti bari kuvuga ivyo bavuze? Ahubwo riho, bamwe muri bo bashobora kuba bari bariboneye Mariya yibungenze abo bana. Ubwabo bari bazi neza ko Yezu yari umwe mu bana benshi Mariya yavyaye.

INYIGISHO: Yezu yari Imana yiyambitse umubiri w’umuntu.

UKURI AHO KURI: NI IKINYOMA.

Iciyumviro c’uko Imana yaje kw’isi ikabaho ari umuntu yitwa Yezu, kino kikaba ari co inyigisho y’Ubutatu ishingiyeko, kiramaze igihe kirekire, mugabo nticatanguye mu gihe ca Yezu. Ahubwo riho, igitabu kimwe c’inkoranyabumenyi (The Encyclopædia Britannica) kigira giti: “Ryaba ijambo Ubutatu canke inyigisho nyezina y’Ubutatu nta na kimwe kiboneka mw’Isezerano rishasha . . . Iyo nyigisho yagiye iratsimbatazwa mu binjana n’ibindi kandi habanje kuba impari nyinshi.”

Mu vy’ukuri amadini arambika ibara Yezu igihe yigisha yuko yari Imana yiyambitse umubiri w’inyama.e Uti gute? Rimbura aka karorero. Hari abakozi basavye ikintu umukoresha wabo, ariko uno agaca avuga yuko adafise ububasha bwo kubaronsa ico kintu bamusavye. Nimba ivyo uwo mukoresha avuze ari ukuri, aba agaragaje ubukerebutsi mu kwerekana ko atahura aho ageza. Nimba na ho ivyo avuze atari ukuri, akaba yari ashoboye kubaronsa ico bamusavye, agashima gusa kutakibaronsa, aba yabaye umubeshi.

None Yezu yishuye gute igihe babiri mu bigishwa biwe berekana ko bipfuza ibibanza vy’icubahiro? Yababwiye ati: “Ivy’ukwo kwicara iburyo bwanje n’ibubamfu bwanje si ivyanje ngo ndabitange, ahubwo ni ivy’abo Data yabiteguriye.” (Matayo 20:23) Iyaba Yezu yari Imana vy’ukuri, ubwo none ico nticari kuba ari ikinyoma? Ahubwo riho, mu kugaragaza ko yubaha cane ubukuru bw’Umwe amurusha ububasha, Yezu yaratanze akarorero keza cane mu vyo kwifata ruto, aba yerekanye ko atangana n’Imana.

INYIGISHO: Yezu ntiyari umuntu mwiza vyonyene.

UKURI AHO KURI: NI UKURI.

Yezu yaravuze atomora yuko atari umuntu mwiza vyonyene. Yavuze ati: “Ndi Umwana w’Imana.” (Yohani 10:36) Ego ni ko, uwo ari we wese yari gushobora kuvuga ko ari Umwana w’Imana. Mugabo nimba ivyo Yezu yavuze bitari vyo, vyari gutuma aba umuntu ameze gute? Vy’ukuri, ntivyari gutuma aba umuntu mwiza, ahubwo vyari gutuma aba umuhumvyi akomeye!

Intahe yo kwizigirwa kuruta izindi zose ni iyashinzwe n’Imana ubwayo. Yaravuze incuro zibiri ku bijanye na Yezu, iti: “Uyu ni Umwana wanje.” (Matayo 3:17; 17:5) Niwibaze gato: Ivyanditswe vyerekana incuro nkeyi gusa aho ijwi ry’Imana ryumvikanye kw’isi; yamara incuro zibiri muri izo, Imana yaremeje yuko Yezu ari Umwana wayo! Ico ni ikimenyamenya kiruta vyose cemeza yuko Yezu yari ico yavuze ko ari.

Iki kiganiro coba cashize ahabona ibintu vy’ukuri vyerekeye Yezu woba utari bwamenye? Nimba ari ukwo biri, ubona gute urushirije gusuzuma za Njili zahumetswe? Ico cigwa coshobora kuguhimbara kikongera kikagira ico kikwunguye. Kanatsinda, Yezu ubwiwe yavuze yuko kwiga ukuri kumwerekeye n’ukwerekeye Se bisobanura “ubuzima budahera.”​—Yohani 17:3.

[Utujambo tw’epfo]

[Uruzitiro ku rup. 14]

Ibindi bintu vy’ukuri vyoshobora kugutangaza

Yezu yari umuntu ameze gute? Yoba yari umuntu abaho yibabaza cane, atagira igishika kandi yinuba abandi ku buryo atashobora kwifatanya n’abantu basanzwe? Hari abovuga ko ari ukwo yari ameze. Kumbure ni co gituma batangazwa no kumenya ko Yezu . . .

• yateramana n’abandi bakanezeranwa.​—Yohani 2:1-11.

• yakeza abandi.​—Mariko 14:6-9.

• yaryoherwa ari kumwe n’abana.​—Mariko 10:13, 14.

• yarize ku mugaragaro.​—Yohani 11:35.

• yumvira abandi impuhwe.​—Mariko 1:40, 41.