Umuti wo gusomōra w’i Gileyadi wa muti uvura

I NKURU izwi cane yo mu gitabu co muri Bibiliya c’Itanguriro irigana ingene Yozefu yagurishijwe na benewabo ku badandaza b’Abishimayeli bariko baja mu Misiri. Uwo mugwi w’abadandaza wari uje uva i Gileyadi kandi ingamiya zabo zari zitwaye imiti yo gusomōra hamwe n’ibindi bidandazwa, babijanye mu Misiri. (Itanguriro 37:25) Iyo nkuru ngufi isa n’iyerekana ko umuti wo gusomōra w’i Gileyadi wakundwa cane mu Karere ka kera k’ibihugu vy’Abarabu, ukaba waremerwa cane kubera ubushobozi budasanzwe wari ufise bwo kuvura.

Ariko rero, mu kinjana ca gatandatu B.G.C., umuhanuzi Yeremiya yarabajije yuzuye umubabaro ati: “Mbeg’i Gileyadi ntihariy’umuti wo gusomōra?” (Yeremiya 8:22) Ni igiki none catumye Yeremiya abaza ico kibazo? Neza na neza uwo muti wo gusomōra ni iki? Hoba hariho umuti wo gusomōra uvura abantu muri iki gihe?

Umuti wo gusomōra mu bihe vya Bibiliya

Umuti wo gusomōra ni izina ry’urusangi ridondora ibirirarira bimota bikunze kuba bimeze nk’amavutavuta be n’uburembo, bikaba biva mu biterwa no mu duti vy’ubwoko butandukanye. Amavuta yo gusomōra, ano akaba akenshi yahora akoreshwa mu gutegura imibavu be n’ibindi bintu bimoga, yari mu gitigiri c’utuntu twizatwiza kandi tw’igiciro kinini two mu Karere ka kera k’ibihugu vy’Abarabu. Ayo mavuta yarashizwemwo mu vyabwirizwa gukoreshwa mu gutegura amavuta meranda yo kurobanuza be n’imibavu vyakoreshwa kw’Ihema ry’Imana, ari yo taberenakulo, inyuma gatoyi y’aho Abisirayeli baviriye mu Misiri. (Kuvayo 25:6; 35:8) Amavuta yo gusomōra ni kimwe mu bintu vyizavyiza umukimba wa mwamikazi w’i Sheba yazanira Umwami Salomo. (1 Abami 10:2, 10, NW) Esiteri yaramaze “amezi atandatu” asigwa “ibitāmirana,” ayo akaba yari amavuta yo gusomōra, kugira ngo ayagayage, imbere y’uko aseruka imbere ya Ahasuwerusi umwami w’Ubuperesi.​—Esiteri 1:1; 2:12.

Naho amavuta yo gusomōra yava mu mihingo itandukanye yo mu Karere k’ibihugu vy’Abarabu, umuti wo gusomōra w’i Gileyadi wowo wakomoka mu Gihugu c’Isezerano, Gileyadi ikaba yari intara iri mu buseruko bw’Uruzi Yorodani. Yakobo, umwe sekuruza w’imiryango, yabona ko umuti wo gusomōra ari kimwe mu ‘vyaba muri ico gihugu vyarusha ibindi kuba vyiza,’ akaba yarawurungitse mu Misiri bwa kaganuke. (Itanguriro 43:11) Umuhanuzi Ezekiyeli na we, uwo muti wo gusomōra yarawuvuze mu bidandazwa ab’i Buyuda n’abo muri Isirayeli bajabukana i Tiro. (Ezekiyeli 27:17) Umuti wo gusomōra wari uzwi cane kubera ubushobozi bwawo budasanzwe bwo kuvura. Ivyandikano vya kera biravuga akatari gake ubushobozi uwo muti ufise bwo kuvura no gutuma umubiri usubirana, na canecane mu bijanye no kuvura ibikomere.

Umuti wo gusomōra ihanga rirwaye

Ni kubera iki none Yeremiya yabajije ati: “Mbeg’i Gileyadi ntihariy’umuti wo gusomōra”? Kugira ngo tubitahure, turakeneye kwihweza ukuntu ihanga rya Isirayeli ryari ryifashe ico gihe. Imbere y’aho, umuhanuzi Yesaya yaradondoye mu buryo bukomeye ukuntu iryo hanga ryari riteye agahinda mu vy’impwemu, ati: “Uhereye mu bgoro bg’ikirenge ugashitsa ku mutwe nta hazima hariho, atar’inguma n’ibipfupfuri n’imishishagu, bitigeze gukandwa canke gupfukwa.” (Yesaya 1:6) Aho kubona ko riteye akagongwe ngo riheze rirondere umuti, iryo hanga ryabandanije gukora ivyo ryishakiye. Yeremiya nta kindi yari gukora mu gihe ciwe atari ukuvugana intimba ati: “Bāgaye ijambo ryanje Uhoraho; mbeg’ubgenge buri muri bo n’ubuki?” Iyo baba baragarutse kuri Yehova, yari kuba yabavuye. Yabajije ati: “Mbeg’i Gileyadi ntihariy’umuti wo gusomōra?” Emwe, ico ni ikibazo gituma umuntu azirikana!​—Yeremiya 8:9.

Isi ya kino gihe yuzuye “inguma n’ibipfupfuri n’imishishagu” mu buryo bwinshi. Abantu bararembejwe n’ubukene, akarenganyo, ubwikunzi be n’ukutagira ubuntu, ivyo vyose bikaba bitumwa n’uko ugukunda Imana na mugenzi wacu kwakanye. (Matayo 24:12; 2 Timoteyo 3:1-5) Abenshi usanga bumva bakumiriwe kubera ibara ryabo ry’urukoba, ubwoko bwabo canke imyaka yabo. Nuce wongerako n’inzara, indwara, intambara be n’urupfu biza bisongera isibe ku mubabaro bifitiye. Nka kurya kwa Yeremiya, abantu benshi bizera Imana ata buryarya baribaza nimba ‘i Gileyadi ata muti wo gusomōra’ uriyo wopfuka inguma abababaye bafise ku mutima no mu bijanye n’ivy’Imana.

Inkuru nziza ivura

Mu gihe ca Yezu, abantu bicisha bugufi baribaza ico kibazo nyene. Ariko ico kibazo nticagumye ata nyishu gifise. Igihe Yezu yari mw’isinagogi y’i Nazareti mu ntango z’umwaka wa 30 G.C., yarasomye mu muzingo wa Yesaya ati: “Uhoraho yandobanuje amavuta ngo mbgire abaciye bugufi ubutumwa bgiza; yantumye gutubika imitima imenetse.” (Yesaya 61:1) Yezu yaciye yiyerekezako ayo majambo, arerekana ko ari we Mesiya yari yashinzwe igikorwa co kumenyekanisha ubutumwa buhumuriza.​—Luka 4:16-21.

Mu gihe cose ubusuku bwiwe bwamaze, Yezu yaramamaje n’umwete inkuru nziza y’Ubwami bw’Imana. (Matayo 4:17) Muri ya Nsiguro yo ku Musozi, yarasezeraniye abamerewe nabi yuko ivyabo vyohindutse, ati: “Murahiriwe mwebwe murira ubu, kuko muzotwenga.” (Luka 6:21) Mu kumenyekanisha ukuza kw’Ubwami bw’Imana, ubwo bukaba ari ubutumwa butanga icizigiro, Yezu ‘yaratubitse imitima imenetse.’

No muri iki gihe cacu, “inkuru nziza y’ubwami” iracahumuriza nka kumwe kwo mu gihe ca Yezu. (Matayo 6:10; 9:35) Raba nk’akarorero ivyashikiye Roger na Liliane. Muri Nzero 1961, igihe bamenya ari bwo mbere umuhango Imana itanga w’ubuzima budahera, vyababereye nk’umuti usomōra, ubahorosha. Liliane yigana ati: “Naratamvye ndatarika ndi mu gikoni, nzirikanye ivyo nariko ndiga. Umunezero nari mfise warengako.” Roger na we, ico gihe akaba yari amaze imyaka cumi amugaye igice kimwe c’umubiri, yongerako ati: “Narironkeye umunezero mwinshi, umunezero wo kubaho, ndabikesheje icizigiro ciza igitanganza, ari co cizigiro c’izuka be n’iherezo ry’imibabaro yose n’indwara zose.”​—Ivyahishuwe 21:4.

Mu 1970, barababajwe cane no kubura agahungu kabo k’imyaka 11. Ariko ntibarengewe n’umwiheburo. Bariboneye yuko Yehova “akiza abafise imitima imenetse, a[ga]pfuka inguma zabo.” (Zaburi 147:3) Icizigiro bari bafise carabahojeje. Ubu baramaze imyaka hafi 50 bumva bafise amahoro n’agahimbare, bivuye ku nkuru nziza y’Ubwami bw’Imana bugiye kuza.

Ukuvurwa tukirindiriye

None muri iki gihe i Gileyadi hoba hariyo “umuti wo gusomōra”? Egome, muri iki gihe haracariho umuti wo gusomōra wo mu buryo bw’impwemu. Impumurizo be n’icizigiro biva ku nkuru nziza y’Ubwami birashoboye gutubika imitima imenetse. Weho ntiwoshima kwironkera ukwo kuvurwa? Ico ukeneye gukora si ikindi, ni ukwugurura cane umutima wawe ukakira ubutumwa buhumuriza bwo mw’Ijambo ry’Imana, maze ukabureka bugashwara ubuzima bwawe. Abantu amamiliyoni baramaze kubigira.

Ukuvurwa turonka biciye kuri uwo muti wo gusomōra ni imponjo gusa y’ukuruhurirwa tukirindiriye kuzoza ari agaheta. Igihe kiriko kiregereza cane c’uko Yehova Imana ‘akiza amahanga,’ abantu bagashobora kuzobaho ibihe bidahera. Ico gihe, “uwaho ntazovuga, ati Ndarwaye.” Emwe, i Gileyadi haracariyo “umuti wo gusomōra”!​—Ivyahishuwe 22:2; Yesaya 33:24.

[Ifoto ku rup. 23]

Ububasha inkuru nziza y’Ubwami bw’Imana ifise bwo kuvura burabandanya kugabanya umubabaro w’abafise imitima imenetse muri iki gihe