Urugo rw’abadasangiye idini rwobamwo agahimbare

“Uzi gute ko utazokiza [uwo mwubakanye]?”​—1 KOR. 7:16.

WOBA USHOBORA GUTORA INYISHU?

Abemera bokora iki kugira ngo baremeshe amahoro mu ngo zigizwe n’abadasangiye idini?

Umukirisu yoshobora gute gufasha abo mu muryango wiwe batizera kugira ngo baze mu gusenga kw’ukuri?

Abandi bokora iki kugira ngo bafashe abo basangiye ukwemera baba mu ngo zigizwe n’abadasangiye idini?

1. Kwemera ubutumwa bw’Ubwami bishobora kugira ico bikoze gute ku muryango?

IGIHE kimwe Yezu yararungitse intumwa ziwe, azibwira ati: “Uko mugenda, mwamamaze, muti: ‘Ubwami bwo mw’ijuru buregereje.’” (Mat. 10:1, 7) Iyo nkuru nziza yotumye abayemera babigiranye ugukenguruka nyakuri bagira amahoro n’agahimbare. Ariko rero, Yezu yaragabishije intumwa ziwe yuko abantu benshi borwanije igikorwa cabo co kwamamaza Ubwami. (Mat. 10:16-23) Ukurwanywa kubabaje gushika canecane igihe abo mu muryango biyamirije ubutumwa bw’Ubwami.​—Soma Matayo 10:34-36.

2. Ni kubera iki abakirisu baba mu ngo zigizwe n’abadasangiye idini, bashobora kugira agahimbare?

² Ivyo vyoba bisobanura yuko abayoboke ba Kristu baba mu ngo zigizwe n’abadasangiye idini, badashobora kugira agahimbare? Ihibambewe! Naho kurwanywa n’abo mu muryango bishobora rimwe na rimwe kuba ibikaze, ivyo ntivyama ari ukwo biri. Vyongeye, kurwanywa n’abo mu muryango vyoshobora kutabandanya. Ahanini bivana n’ukuntu abemera bavyifatamwo igihe abo mu muryango babarwanije canke baberetse ko batanegwa inkuru nziza. N’ikindi kandi, Yehova arahezagira abaguma ari intahemuka kuri we, agatuma bagira umunezero naho baba bari mu bihe bitoroshe. Abemera barashobora gutuma bo ubwabo barushiriza kugira agahimbare (1) mu kwihatira kuremesha amahoro mu rugo no (2) mu kugerageza babikuye ku mutima gufasha abo mu muryango batemera ngo baze mu gusenga kw’ukuri.

NUREMESHE AMAHORO MU RUGO

3. Ni kubera iki umukirisu aba mu rugo rugizwe n’abadasangiye idini akwiye kuremesha amahoro?

³ Kugira ngo urubuto rw’ubugororotsi rwame ivyamwa mu muryango, birahambaye ko mu rugo haba harangwa amahoro. (Soma Yakobo 3:18.) N’igihe nyene umuryango w’umukirisu utaba urunga ubumwe mu gusenga gutyoroye, uwo mukirisu ategerezwa kugira akigoro gakomeye ko kuremesha amahoro mu rugo. Ivyo none yobigira ate?

4. Abakirisu boshobora gute kuguma bafise amahoro yo mu mutima?

⁴ Abakirisu bategerezwa kuguma bafise amahoro yo mu mutima. Ivyo bisaba ko dutura isengesho rivuye ku mutima, irishobora gutuma tugira “amahoro y’Imana” ata co yogereranywa. (Flp. 4:6, 7) Agahimbare n’amahoro biva ku kuguma twironsa ubumenyi bwerekeye Yehova no gushira mu ngiro ingingo ngenderwako zo mu Vyanditswe mu buzima bwacu. (Yes. 54:13) Kugira uruhara mu makoraniro y’ishengero no kugira umwete mu busuku bwo mu ndimiro na vyo nyene birahambaye nimba twipfuza kugira amahoro n’agahimbare. Abemera baba mu ngo zigizwe n’abadasangiye idini, usanga bashobora kugira uruhara ku rugero runaka mu bikorwa vya gikirisu. Nk’akarorero, rimbura ivyerekeye Enza,a uno akaba afise umunega amurwanya bimwe bikomeye. Aja mu gikorwa co guhindura abantu abigishwa ahejeje gukora udukorwa tw’i muhira. Enza avuga ati: “Yehova arampezagira cane mu gutuma bigenda neza igihe cose ngize akigoro ko kubwira abandi inkuru nziza.” Nta gukeka ko ivyiza nk’ivyo bituma agira amahoro n’agahimbare kandi akumva ko ashize akanyota.

5. Ni ingorane iyihe ikunda gushikira abemera baba mu ngo zigizwe n’abadasangiye idini, kandi ni hehe bashobora gukura imfashanyo?

⁵ Turakeneye kugira akigoro gakomeye kugira ngo tugiranire imigenderanire irangwa amahoro n’abo mu muryango iwacu batemera. Ivyo vyoshobora kuba urugamba kubera ko vyoshika bakadusaba gukora ibintu biteye kubiri n’ingingo ngenderwako zo muri Bibiliya. Kwumira ku ngingo zigororotse vyoshobora kubabaza abantu bamwebamwe bo mu muryango batemera, mugabo impera n’imperuka iyo mpagararo iraremesha amahoro. Ariko ntiwumve, kudadaza igihe dusabwe gukora ikintu kidateye kubiri n’ingingo ngenderwako zo mu Vyanditswe, vyoshobora gutuma haba ibihari bidakenewe. (Soma Imigani 16:7.) Igihe turi mu ngorane, birahambaye ko turonderera impanuro zishingiye ku Vyanditswe mu bisohokayandikiro vya wa mugwi w’umushumba w’umwizigirwa kandi w’ubwenge no ku bakurambere.​—Imig. 11:14.

6, 7. (a) Ni kubera iki hari abarwanya abo mu miryango yabo batanguye kwigana n’Ivyabona vya Yehova? (b) Umutohoji wa Bibiliya canke uwemera akwiye kuvyifatamwo gute igihe abo mu muryango bamurwanije?

⁶ Kugira ngo turemeshe amahoro mu rugo, dutegerezwa kwizigira Yehova kandi tugatahura mu buryo bwimbitse inyiyumvo z’abo mu muryango wacu batemera. (Imig. 16:20) Mbere n’abatohoji ba Bibiliya bashasha barashobora kubigira. Abanega canke abakenyezi bamwebamwe batemera boshobora kutanka ko abo bubakanye biga Bibiliya. Boshobora mbere kwiyemerera ko ivyo vyoshobora kugirira akamaro umuryango. Ariko rero, abandi boshobora kubirwanya bivuye inyuma. Uwitwa Esther, ubu akaba ari Icabona, yiyemerera yuko yashavuye cane igihe umugabo wiwe yatangura kwigana Bibiliya n’Ivyabona vya Yehova. Avuga ati: “Narata ibitabu vyiwe canke nkabiturira.” Uwitwa Howard, uno akaba yabanje kwanka ko umukenyezi wiwe yiga Bibiliya, avuga ati: “Abanega benshi baratinya yuko abagore babo boba bariko barahendwa kugira ngo binjire mu kadumbi k’idini. Umunega yoshobora kutamenya ukuntu avyifatamwo muri ivyo bintu vyitwa ko biteye akaga maze akabirwanya yivuye inyuma.”

⁷ Umutohoji afise uwo bubakanye amurwanya arakwiye gufashwa kubona ko atari ngombwa ngo ahagarike kwiga Bibiliya. Akenshi azoshobora gutorera umuti ivyo bintu mu kuba umuntu yitonda no mu kugaragariza icubahiro uwo bubakanye atemera. (1 Pet. 3:15) Howard avuga ati: “Ndakenguruka cane kuba umukenyezi wanje yaguma atekanye ntagire uko ishavu rigize!” Uwo mukenyezi wiwe asigura ati: “Howard yashaka ko ndeka kwiga Bibiliya. Yavuze ko bariko barankoropa mu mutwe. Aho guharira na we, navuze ko ashobora kuba ariko aravuga ukuri, mugabo ndamubwira kandi yuko ntabona vy’ukuri ingene ivyo bishoboka. Naciye rero ndamusaba gusoma igitabu nariko ndiga. Yaragisomye mugabo ntiyashoboye guhakana ivyo cavuga. Ivyo vyaragize ikintu kinini bihinduye kuri we.” Dukwiye kwibuka yuko abantu batemera boshobora kwiyumvamwo ko bahebwe canke yuko urugo rwabo ruri mu kaga igihe abo bubakanye bagiye mu bikorwa vya gikirisu, mugabo kubasubiriza umutima mu nda mu buryo buranga urukundo birashobora kubafasha guturura.

NUBAFASHE KUZA MU GUSENGA KW’UKURI

8. Ni impanuro iyihe Paulo yahaye abakirisu bafise abo bubakanye batemera?

⁸ Intumwa Paulo ahanura abakirisu kudata abo bubakanye ngo ni uko gusa batemera.b (Soma 1 Abakorinto 7:12-16.) Mu gihe uwemera agumye yibuka yuko uwo bubakanye atemera yoshobora kuba umukirisu, birashobora kumufasha kuguma ahimbawe naho aba abana n’uwo badasangiye idini. Ariko rero, igihe agerageza kubwira inkuru nziza uwo bubakanye atemera, ategerezwa kwiyubara, nk’uko ibintu vyabaye bikurikira bivyerekana.

9. Igihe uriko urabwira ukuri kwo muri Bibiliya abo mu muryango batemera, utegerezwa kwiyubara ku biki?

⁹ Uwitwa Jason, mu kuzirikana ukuntu yavyakiriye igihe yamenya ukuri kwo muri Bibiliya, avuga ati: “Nashaka kukubwira abantu bose!” Igihe umutohoji wa Bibiliya atahuye ko ivyo yigishwa mu Vyanditswe ari ukuri, yoshobora guhimbarwa cane ku buryo ayaga ivyo bintu umwanya nka wose. Yoshobora kwitega ko abo mu muryango batemera Yehova baca ubwo nyene bakira ubutumwa bw’Ubwami, mugabo iyo nkuru nziza yoshobora kutakirwa neza. None igishika Jason yari afitiye ukuri mu ntango cagize ico gikoze gute ku mukenyezi wiwe? Uwo mukenyezi yigana ati: “Nararengewe.” Umugore umwe yemeye ukuri haciye imyaka 18 umunega wiwe akwemeye, avuga ati: “Jewe nashaka kuvyiga buhorobuhoro.” Nimba uriko urigana Bibiliya n’umutohoji yubakanye n’umuntu atipfuza kwifatanya na we mu gusenga kw’ukuri, ubona gute mugiye muragira udukino two kwimenyereza kugira ngo umwereke ukuntu yomusigurira ukuri abigiranye ubugenge? Musa yavuze ati: “Inyigisho yanje izotonyanga nk’imvura, ijambo ryanje riratemba nk’ikime.” (Gus. 32:2) Kubwira umuntu amajambo makeyi yerekeye ukuri mu buryo bubereye no mu gihe kibereye akenshi usanga bivamwo ivyiza kuruta kumucucagira amajambo.

10-12. (a) Ni impanuro iyihe intumwa Petero yahaye abakirisu bubakanye n’abantu batemera? (b) Umutohoji wa Bibiliya umwe yize gute gushira mu ngiro impanuro iri muri 1 Petero 3:1, 2?

¹⁰ Intumwa Petero yarahaye impanuro yahumetswe abakenyezi bakirisu baba mu ngo zigizwe n’abadasangiye idini. Yanditse ati: “Muyobokere abagabo banyu bwite, kugira ngo nimba hari abatagamburukira rya jambo, bagondozwe ata jambo rivuzwe, biciye ku ngeso z’abagore babo, kubera biboneye ingeso zanyu zitanduye ziri kumwe n’icubahiro kigera kure.” (1 Pet. 3:1, 2) Umukenyezi yoshobora kugondoza umunega wiwe akaza mu gusenga kw’ukuri mu kumuyobokera no mu kumugaragariza icubahiro kigera kure, naho yoba amufata nabi. Muri ubwo buryo nyene, umunega yemera akwiye kwigenza mu buryo bushimwa n’Imana kandi akaba serugo akunda abo mu rugo rwiwe naho umukenyezi wiwe atemera yoshobora kuba amurwanya.​—1 Pet. 3:7-9.

¹¹ Hariho uturorero twinshi two muri iki gihe twerekana akamaro ko gushira mu ngiro iyo mpanuro ya Petero. Rimbura ivyashikiye Selma. Igihe yatangura kwigana Bibiliya n’Ivyabona vya Yehova, umunega wiwe Steve ntivyamuguye neza. Uno yiyemerera ati: “Narashavuye, ndapfuha nongera ndabura amahoro.” Selma avuga ati: “Mbere n’igihe ntari bwamenye ukuri, kubana na Steve vyari bimeze nko kugendagenda ku bikono vy’amagi. Yari umuntu ashavura n’ingoga. Igihe natangura kwiga Bibiliya, iyo kamere yiwe yarunyutse.” Ni igiki none cafashije?

¹² Selma aribuka icigwa yigiye ku Cabona yamwigisha. Avuga ati: “Umusi umwe, sinashaka kwiga Bibiliya. Steve yari yaraye ankubise igihe nariko ndagerageza kumwemeza iciyumviro kinaka, nkaba rero nari mbabaye. Aho mariye kubwira uwo muvukanyikazi ivyari vyabaye be n’ingene niyumva, yaransavye ngo nsome 1 Abakorinto 13:4-7. Igihe nariko ndahasoma, naratanguye kwiyumvira nti: ‘Nta kintu na kimwe muri ibi bintu biranga urukundo Steve arigera ankorera.’ Mugabo nya muvukanyikazi yatumye mbona ibintu mu bundi buryo mu kumbaza ati: ‘Muri ivyo bikorwa biranga urukundo, ni bingahe umaze gukorera umunega wawe?’ Namwishuye nti: ‘Nta na kimwe, kuko bigoye cane kubana na we.’ Uwo muvukanyikazi yavuganye ubugwaneza ati: ‘Selma, ni nde ariko arondera kuba umukirisu ng’aha? Ni wewe canke ni Steve?’ Maze gutahura ko nkeneye guhindura ivyiyumviro vyanje, narasenze Yehova ndamusaba ngo amfashe kurushiriza gukunda Steve. Buhorobuhoro, ibintu vyaratanguye guhinduka.” Haciye imyaka 17, Steve yaremeye ukuri.

INGENE ABANDI BOFASHA

13, 14. Abandi bantu bo mw’ishengero bashobora gute gufasha ababa mu ngo zigizwe n’abadasangiye idini?

¹³ Cokimwe n’amama y’imvura agwa buhorobuhoro akabombeka ivu maze agafasha ibiterwa gukura, abantu benshi bo mw’ishengero barashobora gufasha abakirisu baba mu ngo zigizwe n’abadasangiye idini kugira ngo baronke agahimbare. Uwitwa Elvina wo muri Brezile avuga ati: “Urukundo rw’abavukanyi n’abavukanyikazi banje ni rwo rwamfashije kuguma nshikamye mu kuri.”

¹⁴ Ubuntu n’ubwitwararitsi bigaragazwa n’abandi bantu bo mw’ishengero, birashobora gukora ku mutima uwutemera. Umunega umwe wo muri Nijeriya yemeye ukuri haciye imyaka 13 umukenyezi wiwe akwemeye, avuga ati: “Igihe nari ku rugendo ndi kumwe n’Icabona, umuduga wiwe warapfuye. Yararondeye Ivyabona bagenziwe bo mu kigwati cari hafi y’aho, maze baraduha indaro muri iryo joro. Batwitwararitse nk’aho twari tuzinanye kuva mu bwana. Naciye nibonera urukundo rw’abakirisu umukenyezi wanje yaguma avuga.” Mu Bwongereza, umukenyezi umwe yemeye ukuri haciye imyaka 18 umunega wiwe akwemeye, yigana ati: “Ivyabona baradutumira twempi ngo dusangire akajumbu. Nama numva nisanze.”c Umunega umwe wo muri ico gihugu nyene yahavuye aba Icabona, avuga ati: “Abavukanyi na bashiki bacu baraza kuturamutsa, canke bakadutumira iwabo, kandi nasanze ari abantu bitwararikana. Ivyo vyarigaragaje canecane igihe nari mu bitaro maze benshi bakaza kunsuhuza.” Woba ushobora kurondera uturyo two kwitwararika gutyo nyene abantu batemera baba mu miryango irimwo abakirisu?

15, 16. Ni ibiki vyofasha uwemera kuguma afise agahimbare igihe abandi bantu bo mu muryango bagumye ari abatemera?

¹⁵ Ariko ntiwumve, abantu batemera bubakanye n’abemera, abana n’abavyeyi batemera canke izindi ncuti zitemera, si bose baza mu gusenga kw’ukuri, naho uwemera aba amaze imyaka ari umwizigirwa yongera ababwira inkuru nziza abigiranye ubugenge. Bamwebamwe usanga babandanya kutanegwa ukuri canke bakaguma barwanya uwemera. (Mat. 10:35-37) Ariko rero, igihe abakirisu bagaragaje kamere zishimwa n’Imana, ivyo birashobora kugira ikintu ciza cane bikoze. Umunega umwe yigeze kuba atemera avuga ati: “Igihe umwe mu bubakanye yemera atanguye kureka izo kamere nziza zikigaragaza, ntaba azi ibiriko biraba mu muzirikanyi no mu mutima vy’uwo atemera. Ku bw’ivyo, ntiwigere uheba uwo muntu mwubakanye atemera.”

¹⁶ N’igihe nyene uwo mu muryango agumye ari uwutemera, birashoboka ko uwemera agira agahimbare. Mushiki wacu umwe, naho amaze imyaka 21 agira akigoro ko kubwira umunega wiwe ubutumwa bw’Ubwami, uno akaba yaranse kubwakira, avuga ati: “Ndashobora kuguma mfise umunezero mu kwihatira guhimbara Yehova, mu kuguma ndi intahemuka kuri we no mu gukora uko nshoboye kwose kugira ngo ndushirize gukomera mu vy’impwemu. Kwitwararika cane ibikorwa bijanye n’ivy’impwemu, ni ukuvuga kwiyigisha, kwitaba amakoraniro, kuja mu busuku bwo mu ndimiro no gufasha abandi mw’ishengero, biratuma ndushiriza kwiyegereza Yehova bikongera bikazigama umutima wanje.”​—Imig. 4:23.

NTUTANE N’AKABANDO!

17, 18. Umukirisu ashobora gute kugumana icizigiro naho yoba aba mu rugo rugizwe n’abadasangiye idini?

¹⁷ Nimba uri umukirisu w’umwizigirwa aba mu rugo rugizwe n’abadasangiye idini, ntutane n’akabando. Uribuka yuko “Yehova atazota abantu biwe, kubera izina ryiwe rihambaye.” (1 Sam. 12:22) Azobana nawe niwumira kuri we. (Soma 2 Ngoma 15:2.) Ku bw’ivyo, “nusoserwe na Yehova.” Ego cane, “nuragize Yehova inzira yawe, kandi umwizigire.” (Zab. 37:4, 5) ‘Nushishikare gusenga’ kandi wemere ko uwo Data wa twese munyarukundo wo mw’ijuru ashobora kugufasha kwihanganira ingorane izo ari zo zose.​—Rom. 12:12.

¹⁸ Niwinginge Yehova umusaba impwemu nyeranda yiwe kugira ngo igufashe kuremesha amahoro i muhira. (Heb. 12:14) Vyemere, urashobora gutuma mu rugo harangwa amahoro yoshobora kuzotuma abo mu muryango batemera bakorwa ku mutima. Uzogira agahimbare n’amahoro yo mu mutima no mu muzirikanyi uko “[ukora] vyose ku bw’ubuninahazwa bw’Imana.” (1 Kor. 10:31) Uzohimbarwa cane no kumenya ko abo musangiye ukwemera bo mw’ishengero rya gikirisu bazogushigikira mu buryo buranga urukundo niwihatira kubigenza gutyo!

[Utujambo tw’epfo]

[Ifoto ku rup. 28]

Nurondere igihe kibereye co gusigura ivyo wemera

[Ifoto ku rup. 29]

Niwitwararike abantu batemera bubakanye n’abemera