Ikoraniro ryaranzwe n’ubumwe be n’imigambi yeza umutima

AMAKORANIRO agirwa buri mwaka y’ishirahamwe Watch Tower Bible and Tract Society of Pennsylvania yama atera umunezero. Ukwo nyene ni ko vyagenze ku bijanye n’ikoraniro rigira 127 ryabaye ku wa gatandatu igenekerezo rya 1 Gitugutu 2011! Abari batumiwe bo hirya no hino kw’isi bakoraniye mu Ngoro y’amateraniro y’Ivyabona vya Yehova i Jersey City, muri New Jersey muri Leta Zunze Ubumwe za Amerika.

Gerrit Lösch wo mu Nama Nyobozi yarahaye ikaze iryo sinzi ry’abantu bari bahimbawe. Yabwiye abaserukiye ibihugu nka 85 yuko binovora ubumwe budasanzwe bafitaniye n’abavukanyi bo kw’isi yose. Ubumwe nk’ubwo burashinga intahe nziza kandi buraninahaza Yehova. Nkako, ubumwe ni co kintu caguma kivugwa muri iryo koraniro.

RAPORO NZIZA YO MURI MEGIZIKE

Igice ca mbere c’iyo porogarama caratanze uburorero bwerekana ubumwe buri mu basavyi ba Yehova. Baltasar Perla yarabajije batatu mu bagize umuryango wa Beteli yo muri Megizike bagenziwe ku bijanye no gushira hamwe ibiro vy’ishami bitandatu vyo muri Amerika yo hagati n’ishami ryo muri Megizike. Kubera ukwo kubishira hamwe, umuryango wa Beteli wo muri Megizike wararushirije kugirwa n’abantu baturuka mu mico kama itadukanye be n’ibihugu bitandukanye. Ukwo guhurikira hamwe kw’abasangiye ukwemera bavuye mu bihugu bitandukanye kwatumye haba uguhanahana indemesho. Ni nk’aho Imana yafashe igihanaguzo amahero igahanagura imipaka y’ibihugu.

Ingorane imwe yahabaye kubera ukwo gushira hamwe ibiro vy’amashami bitandukanye yari iyo gufasha abamamaji kwiyumvamwo yuko batari kure y’ishirahamwe rya Yehova naho ivyo biro bitagikorera mu bihugu vyabo. Kugira ngo babibafashemwo, ishengero ryose rirafise umuhora wo kwizigirwa wo kuri Internet ricishako ubutumwa, ku buryo n’ayari mu turere twa kure ashobora guhanahana amakuru n’ibiro vy’ishami ata handi abicishije.

AMAKURU MASHASHA YO MU BUYAPANI

James Linton wo kw’ishami ryo mu Buyapani yarasiguye ukuntu abavukanyi bacu bashikiwe na ca kinyamugigima be na vya bisebuzi vyataziriwe tsunami vyatera muri ico gihugu muri Ntwarante 2011. Ivyabona benshi barabuze ababo bongera baratakaza ivyabo. Ivyabona baba mu karere katashikiwe n’ivyo vyago baratanze inyubakwa zirenga 3.100 be n’imiduga amajana ngo bikoreshwe. Abitanze, bifatanije na Komite y’ubwubatsi y’akarere, barakoze bataruhuka kugira basanure inzu z’abavukanyi. Abarenga 1.700 ni bo bitanze ngo bakorere aho bikenewe hose. Umugwi w’abitanze uva muri Leta Zunze Ubumwe za Amerika warafashije gusanura Ingoro z’Ubwami, abantu 575 akaba ari bo bitanze muri ico gikorwa.

Abashikiwe n’ivyo vyago baritwararitswe cane mu vy’impwemu no mu vy’inyiyumvo. Abakurambere barenga 400 barakoreye aho abavukanyi bari bakeneye kugenderwa cungere. Icari kiraje ishinga Inama Nyobozi cagaragaye igihe abacungezi ba zone babiri bari bavuye ku cicaro gikuru c’Ivyabona vya Yehova bagendera ako karere kashikiwe n’ivyago kugira ngo batange indemesho. Kuba Ivyabona bo kw’isi yose baramenye ibijanye n’abavukanyi babo vyarabaye isôko ry’uruhoza rukomeye.

INTSINZI MU VY’AMATEGEKO

Abari ng’aho barumvirije bitonze igihe Stephen Hardy wo kw’ishami ryo mu Bwongereza yashikiriza ikiganiro cerekeye intsinzi mu vy’amategeko duheruka gutahukana. Nk’akarorero, Leta y’Ubufaransa yasaba ishirahamwe dukoresha muri ico gihugu ikori ry’amadolari imiliyoni 82 (ni ukuvuga nk’amarundi 114.800.000.000). Ico kibazo catorewe inyishu igihe ya Sentare y’Abanyaburaya ijejwe kwubahiriza agateka ka zina muntu yaducira rwiza, ikavuga yuko leta y’Ubufaransa yarenze ku Ngingo ya 9 iri muri ya Masezerano y’Abanyaburaya ajanye no kwubahiriza agateka ka zina muntu, ayo na yo akaba akingira umwidegemvyo mu vy’idini. Ibiri muri iyo ngingo vyerekana yuko urwo rubanza rutari rwerekeye amahera, kuko havuga hati: “Kwanka kwemera ishirahamwe rinaka ry’idini, gutuma rikurwaho, gukoresha amajambo atyoza idini kanaka, ivyo vyose ni uburorero bwerekana yuko uburenganzira bwemezwa n’Ingingo ya 9 yo muri ayo masezerano buhonyangwa.”

Iyo Sentare kandi yaraduciriye rwiza mu rubanza rwerekeye Armeniya. Kuva mu 1965, iyo Sentare yemera ko ya Masezerano y’Abanyaburaya adakingira abantu banka gukora ibikorwa vya gisirikare babwirizwa gukora. Inama Nkuru, ni ukuvuga urwego rukuru rw’iyo Sentare, yafashe ingingo yuko “kwanka gukora ibikorwa vya gisirikare, umuntu abitumwe n’uko hari ikintu kibimubuza gikomeye kandi adashobora kwirengagiza,” akwiye gukingirwa na ya Masezerano y’Abanyaburaya. Iyo ngingo itegeka Armeniya n’ibihugu nka Azerbayijani na Tirkiya kwemera ubwo burenganzira.

IBIKORWA VY’UBWUBATSI

Guy Pierce wo mu Nama Nyobozi ni we yakurikiye, maze aremera icese yuko abari aho bose bari bashashaye kumenya ukuntu ibikorwa vyacu vy’ubwubatsi biriko biragenda muri Leta ya New York. Yaciye abamenyesha ko bagira barabe ividewo yerekana ibiriko birakorwa i Wallkill, i Patterson, no mu bibanza duherutse kuronka i Warwick n’i Tuxedo, muri New York. I Wallkill, inyubakwa nshasha y’uburaro itegekanijwe kuzoba yarangiye kwubakwa mu 2014, ikazoba irimwo ibindi vyumba birenga 300.

Turafise umugambi wo kwubaka mu kibanza c’amahegitari 100 i Warwick. Umuvukanyi Pierce yavuze ati: “Naho tutaramenya neza ivyo Yehova agomba ku bijanye na Warwick, turabandanya gutegura ivyo kwubaka muri ico kibanza, dufise intumbero yo kwimurirayo icicaro gikuru c’Ivyabona vya Yehova.” Turiko kandi turategekanya kuzokoresha ikibanza c’amahegitari 20 giherereye ku bilometero 10 mu buraruko bwa Warwick kugira ngo kizoshikiremwo amamashini n’ibikoresho vyo kwubaka. Umuvukanyi Pierce yavuze ati: “Nitwamara kuronka uburenganzira bwo kwubaka, twizigiye kurangiza ivyo bikorwa vyose vy’ubwubatsi mu myaka ine. Hanyuma amazu yacu ari i Brooklyn azoca agurishwa.”

Umuvukanyi Pierce yabajije ati: “Inama Nyobozi yoba yarahinduye ivyiyumviro ku bijanye n’uko ya makuba akomeye yegereje?” Yishuye ati: “Habe namba. Ayo makuba akomeye niyahagarika imigambi yacu, kizoba ari ikintu ciza igitangaza, emwe ciza igitangaza!”

URABA MASO KURI YA NTAMBWE IROHA

Ubukurikira, Stephen Lett, na we nyene akaba ari mu bagize Inama Nyobozi, yaraciye irya n’ino 1 Petero 5:8 ahagira hati: “Muzigame ubwenge bwanyu, mube maso. Umwansi wanyu Shetani agendagenda nk’intambwe iroha, arondera uwo arotsa.” Umuvukanyi Lett yavuze ko ibintu bitari bike biranga intambwe bituma ikigereranyo Petero yatanze kidondora neza ukuntu Shetani ameze.

Kubera yuko intambwe zikomeye kandi zinyaruka kurusha abantu, ntidukwiye kugerageza kurwanya Shetani canke kumusiga dukoresheje inkomezi zacu bwite. Turakeneye gufashwa na Yehova. (Yes. 40:31) Kubera yuko intambwe ihiga mu buryo butibonekeje, dutegerezwa kwirinda umwiza wo mu buryo bw’impwemu, uwo Shetani arondereramwo ico acakira. Nka kurya nyene intambwe yica impongo idashobora kwirwanira canke akana k’imparage kaba kariko karisinzirirako, ni ko na Shetani ari ruburakigongwe kandi yipfuza kutwica. Kandi intambwe imaze guhaga, akenshi ivyo iba yafashe usanga bidasubira kumenyekana, nka kurya nyene “ivya nyuma” vy’abo Shetani aba yafashe mu buryo bw’impwemu “biba vyunyutse kuri bo kuruta ivya mbere.” (2 Pet. 2:20) Turakeneye rero kurwanya Shetani no kwumira ku ngingo ngenderwako zo muri Bibiliya twamenye.​—1 Pet. 5:9.

NUKENGURUKE IKIBANZA UFISE MU NZU YA YEHOVA

Umushikirizansiguro yakurikiye, ari we Samuel Herd wo mu Nama Nyobozi, yavuze ati: “Twese turafise ikibanza mu nzu ya Yehova.” Abakirisu bose barafise ikibanza mu “nzu” y’Imana, ari rwo rusengero rwayo rwo mu buryo bw’impwemu, ikaba ari intunganyo yo kumusenga bishimikije inkuka y’incungu ya Yezu. Ni ikibanza dukwiye guha agaciro tukakibona ko ari agateka kadasanzwe. Cokimwe na Dawidi, twipfuza “kwibera mu nzu ya Yehova imisi yose y’ubuzima bwa[cu].”​—Zab. 27:4.

Umuvukanyi Herd yarerekeje kuri Zaburi 92:12-14 maze abaza ati: “Yehova adufasha gute gusagamba?” Yishuye ati: “Mw’iparadizo yo mu buryo bw’impwemu, Imana iratuma dususuruka, ikadukingira kandi ikaduha amazi apfutse yerekeye ukuri.” Umuvukanyi Herd yahimirije abari aho ati: “Nimuze tuyikengurukire ku bw’ico kintu. Nimuze duhimbarwe no kuguma mu nzu ya Yehova, atari igihe gito gusa mugabo ibihe bidahera.”

ABAKIRISU BARUBAHA IJAMBO RY’IMANA

David Splane, na we nyene akaba ari uwo mu Nama Nyobozi, yarasiguye mu nsiguro ikurikira yuko abakirisu b’ukuri bamye bubaha Ijambo ry’Imana. Mu kinjana ca mbere, bararyisunze kugira ngo batorere umuti ca kibazo kijanye no kugenyerwa. (Ivyak. 15:16, 17) Mugabo abakirisu bamwebamwe bo mu kinjana ca kabiri bari barigishijwe filozofiya y’Abagiriki, baratanguye gushira imbere ivyo kurondera gushira akanyota mu vy’ubwenge aho gushira imbere Ivyanditswe. Mu nyuma, abandi barafashe inyigisho za Bibiliya bazisubiriza ivyiyumviro vy’abitwa ngo ni Abakuru ba Ekleziya n’Abami b’abami b’Abaroma, bituma hajamwo inyigisho nyinshi z’ikinyoma.

Umuvukanyi Splane yarasiguye yuko Yezu yerekanye mu kigereranyo kimwe ko kw’isi hobandanije kuba abakirisu b’ukuri barobanuwe kugira baburanire ukuri. (Mat. 13:24-30) Ntidushobora kwemeza abo ari bo. Ariko rero, uko ibinjana vyagiye birarengana, benshi bariyamirije inyigisho n’imigenzo bidashingiye ku Vyanditswe. Bamwebamwe muri abo, ni Musenyeri mukuru Agobar w’i Lyon yabayeho mu kinjana ca 9, Peter w’i Bruys, Henry w’i Lausanne na Valdès (canke Waldo) yabayeho mu kinjana ca 12, John Wycliffe yabayeho mu kinjana ca 14, William Tyndale yabayeho mu kinjana ca 16 na Henry Grew be na George Storrs babayeho mu kinjana ca 19. Ivyabona vya Yehova muri iki gihe barabandanya gushigikira ingingo mfatirwako zo mu Vyanditswe kandi baremera ko Bibiliya ari yo shimikiro ry’ukuri. Ni co gituma Inama Nyobozi yahisemwo amajambo yo muri Yohani 17:17 avuga ngo “Ijambo ryawe ni ukuri,” kugira ngo abe icanditswe cacu c’umwaka wa 2012.

AMAHINDUKA ATEYE AKAMWEMWE MU VYO KUMENYEREZWA NO MU GIKORWA

Itangazo ryashikirijwe na Anthony Morris wo mu Nama Nyobozi ryarerekanye muri make amahinduka yagizwe ku bijanye n’abamisiyonari be n’abatsimvyi badasanzwe. Muri Nyakanga 2012, mu bihugu bimwebimwe hazotangwa ivyigwa vyerekeye rya Shure ry’ivya Bibiliya ry’abakirisu bubakanye. Intumbero y’Ishure rya Gileyadi yarahindutse. Kuva mu kwezi kwa Gitugutu kw’umwaka uheze, abo bose bamenyerezwa mw’Ishure rya Gileyadi bazoba bari basanzwe bari mu muce munaka w’umurimo udasanzwe w’igihe cose, ni ukuvuga ari abamisiyonari batari bwitabe Ishure rya Gileyadi, abatsimvyi badasanzwe, abacungezi b’ingenzi canke Abanyabeteli. Abazosohoka iryo Shure bazokoreshwa mu gukomeza no mu gushikamisha abasavyi b’Imana haba ku biro vy’amashami, mu gikorwa co kugendera amashengero, canke mu turere tubamwo abantu benshi aho bashobora kuremesha amashengero mu gikorwa co kwamamaza.

Abandi batsimvyi badasanzwe bazorungikwa gukorera mu turere twa kure cane kandi turi ukwa twonyene tutaribwakorerwemwo. Kuva kw’igenekerezo rya 1 Nzero 2012, bamwebamwe mu basohotse Ishure ry’ivya Bibiliya ry’abavukanyi batubatse n’Ishuri ry’ivya Bibiliya ry’abakirisu bubakanye, babwirizwa kuba abatsimvyi badasanzwe b’igihe gito maze bagakoreshwa mu gutanguza no mu kwagura igikorwa mu turere twa kure cane. Babwirizwa kugenwa kuba abatsimvyi badasanzwe umwaka umwe ukwiye gushika ku myaka itatu. Abo bizoboneka ko bakora neza boshobora kubandanya ico gikorwa.

Ikoraniro ryagizwe mu mwaka wa 2011 cari ikiringo giteye umunezero. Turiteze ko Yehova azohezagira intunganyo nshasha zo kwongereza igikorwa cacu co kwamamaza akongera agakomeza ubumwe bw’abavukanyi, ivyo vyose bikaba kugira aninahazwe yongere ashemezwe.

[Uruzitiro/Amafoto ku rup. 18, 19]

BARARUSHIRIJE KUBAMENYA

Iyo porogarama yarimwo n’ikiganiro co kubaza ibibazo batanu mu bapfakazi icenda basigwa n’abavukanyi bahora mu bagize Inama Nyobozi. Bashiki bacu Marina Sydlik, Edith Suiter, Melita Jaracz, Melba Barry na Sydney Barber bariganye ingene bamenye ukuri n’ingene batanguye gukora umurimo w’igihe cose. Umwe wese yarabwiye abari aho ibintu vy’agaciro yibuka ku mugabo wiwe, ivyiyumviro bimwerekeye be n’imihezagiro baronkeye hamwe. Ivyo biganiro vyo kubaza ibibazo biheze, abari ng’aho basozereye mu buryo bukora ku mutima mu kuririmba ururirimbo inomero 86 rugira ruti: “Abagore b’abizigirwa, bashiki bacu bakirisu.”

[Amafoto]

(Hejuru) Daniel Sydlik n’umukenyezi wiwe Marina; Grant Suiter n’umukenyezi wiwe Edith; Theodore Jaracz n’umukenyezi wiwe Melita

(Hepfo) Lloyd Barry n’umukenyezi wiwe Melba; Carey Barber n’umukenyezi wiwe Sydney

[Ikarara ku rup. 16]

(Ushaka igisomwa cose, raba ico gitabu)

Amashami atandatu yarashizwe hamwe ahagarikirwa n’ishami rya Megizike

MEGIZIKE

GWATEMALA

HONDURAS

SALVADOR

NIKARAGWA

KOSTA RIKA

PANAMA

[Ifoto ku rup. 17]

Ishusho y’inyubakwa yiyumvirwa kuzoba Icicaro gikuru c’Ivyabona vya Yehova i Warwick, muri New York