Hoba hariho idini wokwizigira?

Nimba hari idini ryakuvunye umutima, hari aho vyokugora kwizigira idini na rimwe. Ariko ico womenya co ni uko hariho idini ushobora kwizigira. Igihe Yezu yari kw’isi, yaratororokanije abayoboke b’abizigirwa, arabigisha kubaho bisunga ivyo Imana isaba. N’ubu haracariho abayoboke nyakuri ba Kristu bihatira kubaho rukirisu. None wobamenya gute?

Umwe Estelle yavugwa mu kiganiro kimwe c’imbere y’iki, avuga ati: “Nahavuye ntangura kumenya ivyo Bibiliya yigisha igihe natangura kwiga Bibiliya n’Ivyabona vya Yehova. Sinatevye gutahura ibivugwa muri Yohani 8:32, ahagira hati: ‘Muzomenya ukuri, kandi ukuri kuzobagira abidegemvya.’ ”

N’umwe Ray twavuga, agira ati: “Kwiga Bibiliya n’Ivyabona vya Yehova vyaratumye menya ko Imana atari yo yobazwa imibabaro ishikira abantu. Narahimbawe cane igihe natahura ko hari imvo zumvikana zatumye Imana ireka ubukozi bw’ikibi bukabandanya gushika ubu kandi ko isezerana kuzobukuraho vuba.”

Birumvikana yuko bitoroshe gukora ibibereye mw’isi aho usanga abantu benshi bitaho buhoro ivyo kwigenza neza. Ariko birashoboka. Hari abantu benshi bipfuza uwobafasha gutahura ivyo Bibiliya yigisha no kubishira mu ngiro. Ni co gituma Ivyabona vya Yehova bafasha abantu amamiliyoni bo hirya no hino kw’isi kwiga Bibiliya babasanze ku mihana yabo kandi ku buntu. Buri ndwi, abantu ibihumbi bariga ivyo Bibiliya yigisha. Ivyo bituma biyegereza Umuremyi wabo kandi bakarushiriza guhimbarwa mu buzima.a

Niwasubira kubonana n’Ivyabona vya Yehova, ubona gute ubabajije igituma bizigira idini barimwo? Nusuzume ivyo bigisha be n’ukuntu bigenza, uheze wirabire nimba hariho idini ushobora kwizigira.