Ingene twofasha mu vyo kuronsa abandi ivyo bakeneye

UWITWA François, akaba ari umukurambere mu gihugu kimwe kikiri mu nzira y’amajambere, yigana ati: “Haradutse ubukozi bw’ikibi inyuma gato y’aho habereye amatora yiyamirijwe, maze biba ngombwa ko Ivyabona vya Yehova ibihumbi bata izabo bagahunga. Ibifungurwa n’imiti vyarakeshe, ivyari bisigaye na vyo bikaba vyari bizimvye cane. Amabanki yarugaye, bene za mashini zisohora amahera na zo zisigara zigaragara canke zidakora.”

Abavukanyi bo ku biro vy’ishami baciye batangura guha amahera n’ibindi bintu vya nkenerwa vyihutirwa Ivyabona bari bataye izabo bari begeranirijwe ku Ngoro z’Ubwami zo hirya no hino muri ico gihugu. Imigwi yari ishamiranye yarazibiye amabarabara, mugabo kubera ko izo mpande zompi zari zizi ko Ivyabona baguma ata ho bahengamiye na gato mu vya politike, imiduga y’ishami akenshi barayireka ikarengana.

François avuga ati: “Igihe twari tugiye ku Ngoro y’Ubwami imwe, abantu bari binyegeje bararashe umuduga wacu. Ariko rero, amasoro yaduciye hagati. Igihe twabona umusoda aza iyo turi yiruka afise ikirwanisho mu minwe, twaciye dusubiza inyuma umuduga, turakata, duca dusubira kw’ishami twihuta. Twarakengurukiye Yehova kuba tutahasize ubuzima. Ku musi ukurikira, abavukanyi 130 bari muri iyo Ngoro y’Ubwami barashitse ahantu hari umutekano. Bamwe muri bo baraje ku biro vy’ishami, aho twabaronkeje ivyo bari bakeneye mu vy’impwemu no mu vy’umubiri gushika ayo magume arangiye.”

François avuga ati: “Mu nyuma, ibiro vy’ishami vyararonse amakete menshi birungikiwe n’abavukanyi bo hirya no hino muri ico gihugu baserura ko bakenguruka cane. Kwibonera ukuntu abavukanyi babo bo mu yindi mihingo bari babafashije, vyatumye barushiriza kwizigira Yehova.”

Igihe hateye ivyago vy’ivyaduka be n’ibitejwe n’abantu, ntitubwira bene wacu na bashiki bacu bari n’ivyo bakeneye ngo ‘bagume basusurutse kandi barya neza.’ (Yak. 2:15, 16) Ahubwo, turarondera kubaronsa ivyo bakeneye mu vy’umubiri. Muri ubwo buryo nyene, aho abigishwa bamariye kuburirwa ku bijanye n’ikigoyi cagira gitere mu kinjana ca mbere, “umwe wese nk’uko ashoboye, [bariyemeje] kurungika imfashanyo yo gutabara abavukanyi baba i Yudaya.”—Ivyak. 11:28-30.

Twebwe abasavyi ba Yehova, turashashaye gufasha abantu bari n’ivyo bakeneye mu buryo bw’umubiri. Ariko rero, abantu barakeneye n’ivy’impwemu. (Mat. 5:3) Kugira ngo Yezu abafashe kumenya ko bakeneye ico kintu maze bagire ico bakoze kugira bacironse, yarashinze abayoboke biwe igikorwa co guhindura abantu abigishwa. (Mat. 28:19, 20) Umwe wese muri twebwe arakoresha umwanya wiwe mwinshi, inguvu ziwe nyinshi be n’ivyo atunze kugira ngo arangure ico gikorwa. Uko tugize ishirahamwe, turakoresha amwe mu mahera y’intererano turonka kugira ngo dufashe mu buryo bw’umubiri, mugabo izo ntererano zikoreshwa ahanini mu guteza imbere ivyungura Ubwami no mu gukwiragiza inkuru nziza. Gutyo tuba twerekanye ko dukunda Imana na bagenzi bacu.—Mat. 22:37-39.

Abashigikira igikorwa Ivyabona vya Yehova barangurira kw’isi yose barashobora guhera amazinda yuko intererano batanga zikoreshwa mu buryo bubereye kandi bw’ingirakamaro. Woba ushobora gufasha mu bijanye no gutabara abavukanyi bawe bari n’ivyo bakeneye? Woba wipfuza gushigikira igikorwa co guhindura abantu abigishwa? Nimba ari ukwo biri, “ntureke kugirira iciza abagikwiriye kandi ukuboko kwawe kuri n’ububasha bwo kugikora.”—Imig. 3:27.

UKUNTU BAMWEBAMWE BAHITAMWO GUTANGA INTERERANO KU BW’IGIKORWA KIRANGURIRWA KW’ISI YOSE

Nk’uko vyari mu gihe c’intumwa Paulo, abantu benshi muri iki gihe ‘barashira ikintu ku ruhande’ canke amahera, bakabika igitigiri kinaka c’amahera bazoshira mu dusandugu tw’intererano twanditseko ngo “Igikorwa kirangurirwa kw’isi yose.” (1 Kor. 16:2) Ku kwezi ku kwezi, amashengero ararungika ayo mahera ku biro vy’Ivyabona vya Yehova bikorera mu gihugu akukira. Urashobora kandi kurungika intererano z’amahera ata handi ziriwe ziraca ku rwego rwemewe n’amategeko rukoreshwa n’Ivyabona vya Yehova mu gihugu ubamwo. Kugira ngo umenye izina ry’urwego nyamukuru rwemewe n’amategeko rukoreshwa n’Ivyabona vya Yehova mu gihugu ubamwo, turagusavye ubaze ibiro vy’ishami bikorera mu gihugu ubamwo. Aderese y’ibiro vy’ishami woshobora kuyisanga ku muhora wo kuri Internet www.pr418.com. Intererano ushobora kurungika ata handi ziriwe ziraca ni izi:

INTERERANO
- Ni intererano z’amahera abona, ibintu vyo mu mabuye y’agaciro canke ikindi kintu c’agaciro umuntu atunze.
- Nuzirungikane ikete ryerekana ko ayo mahera canke ivyo bintu ari intererano.
INDINGANIZO Y’IVYO GUTANGA AMAHERA YOSHOBORA GUSUBIZWA
- Ni amahera yoshobora gusubizwa nyene kuyatanga mu gihe ayakeneye.
- Nuyarungikane ikete ryerekana ko iyo ntererano ishobora gusubizwa.
KURINGANIZA IVYO GUTANGA UMUNTU AVYISHAKIYE

Uretse ingabirano z’amahera be n’ibintu vy’agaciro umuntu atunze, hariho ubundi buryo bwo gutanga intererano zo guteza imbere umurimo w’Ubwami urangurirwa kw’isi yose. Ubwo buryo buravugwa muri ivyo bikurikira. Uburyo wipfuza gukoresha bwaba ari ubuhe, turagusavye ubanze ubaze ibiro vy’ishami bikorera mu gihugu ubamwo kugira ngo umenye ububoneka muri ico gihugu. Kubera ko ibisabwa n’amategeko be n’amategeko agenga ivy’amatagisi usanga bitandukanye, birahambaye ko ubaza abatanga impanuro mu vy’amatagisi no mu vy’amategeko babishoboye imbere y’uko uhitamwo uburyo bwiza kuruta bwo gutanga intererano.

Soransi: Ni intererano zitangwa mu kwerekana mu buryo butomoye ko urwego runaka rukoreshwa n’Ivyabona vya Yehova ari rwo rwakira amahera ya soransi y’ubuzima bw’umuntu canke imbitso y’amahera umuntu azokwikorako mu gihe akukurutse.

Amakonte yo muri banki: Amakonte yo muri banki, impapuro zemeza amahera yabikishijwe muri banki, canke amakonte y’umuntu yakukurutse, birabikishirizwa urwego runaka rukoreshwa n’Ivyabona vya Yehova canke bigashingwa yuko bizohabwa urwo rwego nyenevyo niyapfa, hisunzwe ibisabwa n’ibanki y’aho umuntu aba.

Umutahe umuntu afise ahantu be n’ivyete bitanga uburenganzira bwo kwakira amahera aho ayafise: Ivyo na vyo nyene vyoshobora guhabwa urwego runaka rukoreshwa n’Ivyabona vya Yehova bwa ngabirano canke akaba ari rwo ruhabwa kuganza ibisigi vy’uwapfuye.

Itongo canke inzu: Itongo canke inzu bishobora kugurishwa birahabwa urwego runaka rukoreshwa n’Ivyabona vya Yehova, haba mu kubirugabira canke, mu gihe ari aho umuntu aba, nyene kubitanga agashobora gusigirwa aho aba arabaye, akabandanya kuhaba igihe cose asigaje kubaho.

Kuza uraronka amahera ku yo uba waratanzeko ingabirano: Amahera canke inzandiko zemeza ko umuntu ayafise ahantu zirahabwa urwego runaka rukoreshwa n’Ivyabona vya Yehova, biciye ku ndinganizo aho nyene gutanga, canke umuntu yagenywe na we, aronka amahera kanaka ku mwaka ku mwaka amufasha kubaho. Ku mwaka biba vyemejwe ko nyene gutanga ayo mahera agengwa n’iyo ndinganizo, aragabanirizwa amatagisi yahora ayatangako.

Ivyete vy’iragi be n’imbitso: Itongo canke amahera birashobora kuragwa urwego runaka rukoreshwa n’Ivyabona vya Yehova biciye ku cete c’iragi canditswe mu buryo bwemewe n’amategeko, canke mu kwerekana mu buryo butomoye yuko urwo rwego ari rwo rugabiwe icete cemeza imbitso umuntu afise ahantu. Iyo ndinganizo irashobora gutuma umuntu akurwako amatagisi amwamwe.

Imvugo ngo “kuringaniza ivyo gutanga umuntu avyishakiye” yerekana ko nyene gutanga abanza kubitegekanya. Mu ntumbero yo gusahiriza abantu bipfuza guteza imbere igikorwa Ivyabona vya Yehova barangurira kw’isi yose biciye ku buryo bunaka bwo gutanga intererano, harateguwe agatabu mu congereza be no mu gisupanyoli kerekeye ugutanga kujanye no gushigikira umurimo w’Ubwami urangurirwa kw’isi yose (Charitable Planning to Benefit Kingdom Service Worldwide). Ako gatabu kanditswe kugira ngo gatange amakuru ajanye n’uburyo butandukanye ingabirano zishobora gutangwa, ubu canke mu nyuma, biciye ku kubiraga ishirahamwe. Amakuru ari muri ako gatabu yoshobora kuba adahuye neza n’ukuntu ivyawe vyifashe kubera amategeko agenga amatagisi canke ayandi mategeko yo mu gihugu ubamwo. Ku bw’ivyo, umaze gusoma ako gatabu ukwiye kubiganira n’abaguha impanuro mu vy’amategeko canke mu vy’amatagisi. Mu gukoresha ubwo buryo bwo gutanga intererano, benshi barashoboye gushigikira ibikorwa Ivyabona vya Yehova barangurira kw’isi yose bijanye n’ivy’idini be n’ivy’ugufasha abari mu ngorane, muri ico gihe nyene bararushiriza kuhungukira rwose mu bijanye no kuriha amatagisi. Nimba ako gatabu kaboneka mu gihugu ubamwo, urashobora kukaronka mu kugasaba umunyamabanga w’ishengero urimwo.

Nimba ushaka kumenya ayandi makuru kuri ivyo, wobiganira n’ibiro biraba ivy’ukuringaniza ibijanye no gutanga umuntu avyishakiye, mu kwandika ikete ukoresheje iyo aderese ishizwe aho hepfo canke mu guterefona ibiro vy’ishami bikorera mu gihugu canyu ukoresheje izo nomero zerekanywe.

Ivyabona vya Yehova

B.P. 2150 Bujumbura

Telefone: (257) 22241110