Porogarama Nshasha y’Iteraniro ry’Umuzunguruko

Ni ivyiza ngirakimazi ibihe ukura ku kugendana na Yehova muri iki gihe? Ushobora gute kurwanya inyosha yo kureka ibintu wiruka inyuma bitari ivya gitewokarasi bigatwara ca kibanza ca mbere mu buzima bwawe kigenewe ivyungura Ubwami? (Mat. 6:33) Woba usanga bigoye gutandukanya iciza n’ikibi mw’isi ituma ikibi kiboneka ko ari co ciza? (Heb. 5:14) Ivyo bintu bizoshikirizwa kw’iteraniro ry’umuzunguruko ritaziriwe ngo “Nuronke Ivyiza Ubu mu Kugendera mu Nzira z’Imana” rizotangura mu kwa Nyakanga 1999.—Zab. 128:1.

Ikintu gishasha kizoba ku wa Gatandatu muri iryo teraniro ry’umuzunguruko ni ishikirizwa ry’icitegererezo c’Ikoraniro ry’Umurimo. Umucungezi wanyu w’umuzunguruko azomenyesha amashengero ibitegekanijwe kugira ngo bose bashobore kuza biteguriye kwinovora iyo porogarama mu buryo bwuzuye.

Igihimba gifise umutwe uvuga ngo “Batsimvyi—Nimwiyubare Rwose ku Kuntu Mugenda” kizotwereka ukuntu twogaragaza ubukerebutsi n’ugukora ibitegereka kugira ngo ducungure umwanya ku bw’igikenurwa c’ubutsimvyi. (Ef. 5:15-17) Ikiganiro kivuga ngo “Niwirinde Inzira Zisa Gusa n’Iziboneka ko Ari Nziza” kizotwigisha ukuntu umuntu yomenya neza ivyemerwa n’Imana mu mice yose y’ubuzima. Insiguro igira iti: “Ukuntu Ubuhanuzi Bwarangutse Bugira Ico Bukoze Kuri Twebwe” izodufasha kwuzuza imizirikanyi yacu be n’imitima yacu ugukunda Ijambo ry’Imana. Insiguro y’icese ivuga ngo “Ese Ukuntu Inzira z’Imana Zizana Ivyiza!” izoshimika ku vyiza umuntu akura ku kuguma ahuza n’ivyo Yehova asaba bigororotse muri iki gihe.

Woba wipfuza kwerekana ku mugaragaro yuko ushaka kugendera mu nzira z’Imana uri umukozi yayiyeguriye, ubicishije kw’ibatisimu yo mu mazi? Nubibwire rero umucungezi muhagarikizi kugira ngo ibikenewe bishobore gutunganywa.

Niwiyemeze kudacikwa n’iri teraniro ry’umuzunguruko rije hageze. Uraba ari ho uri muri iyo porogarama yose y’imisi ibiri, kubera yuko “hahirwa uwubaha Uhoraho wese, akagendera mu nzira ziwe.”—Zab. 128:1.