Ubu Woba Wugururiwe Urugi rwo Gukora Ubutsimvyi?

TURONDERA GUSHIKIRA ABATSIMVYI B’INTAHOREREZA 4 000!

¹ Icanditswe cacu c’umwaka w’1999 kiratwibutsa yuko tukiri mu ‘musi wo gukirizako’ wa Yehova. (2 Kor. 6:2) Mugabo umusi wo gukirizako wiwe vuba ugiye kurangira. Maze “umusi w’amateka” wiwe uzoca utangura. (2 Pet. 2:9) Mu gihe Yehova abandanya guha zina muntu wese akaryo ko kuronka ubukiriro, ese ingene vyeza umutima kubona abantu baguma biyongera bavyakiriza yompi!

² Abasavyi ba Yehova barahagurukiye ingorane yo gushikira abovyakira imbere y’uko harengerana. Ku bamamaji b’Ubwami batari bake ivyo vyarimwo kwinjira mu murimo w’ubutsimvyi. Ubu woba wugururiwe urugi rwo gukora ubutsimvyi? Ni kuki tubibajije?

³ Abaseruye Ugukenguruka: Nk’uko vyatangajwe mu Gikorwa Dukorera Ubwami co muri Nzero 1999, amasaha asabwa abatsimvyi b’intahorereza n’ayasabwa ab’ugufasha yarageruwe. Kugira ngo abatsimvyi b’intahorereza bashitse amasaha basigaye basabwa, bikenerwa yuko ku kwezi bamara mu gikenurwa amasaha 70, yose hamwe akaba ari amasaha 840 ku mwaka w’umurimo. Abatsimvyi b’ugufasha ku kwezi bazoza baramara amasaha 50 mu murimo. Ehe raba makeyi mu majambo yo guserura ugukenguruka twaronse bivuye kuri ayo mahinduka:

“Ese ukuntu ari ingabirano y’akaroruhore ivuye kuri Data wa twese wo mw’ijuru!”

“Umuntu ntiyoronka amajambo ashobora guserura akamwemwe, urukundo n’ugukura ubwatsi kubera iyo ntunganyo!”

“Bizotuma tworoherwa cane gushitsa urutonde twishingiye!”

“Ico dusaba mw’isengesho ni uko ubu abandi benshi bokwinjira mu gikenurwa c’igihe cose maze bakinovora imihezagiro iva ku gukorera Yehova mu buryo bwagutse.”

⁴ Uko twegereza agaheta k’umusi wo gukirizako w’Imana, biragaragara yuko Yehova yipfuza ko abasavyi biwe baterera mw’ijwi bamushemeza mu gusozera kandi mu buryo bukomeye. Ubukomezi bw’ubwo butumwa burongererezwa (1) n’iyongerekana ridahengeshanya ry’igitigiri c’abamamaji b’Ubwami (2) n’ukuntu umwe wese arondera kwongereza ico ashoboye gukora mu kwamamaza Ubwami. Yehova, we ‘akuza,’ yaratumye biroranirwa muri ubwo buryo bwompi mu guhezagira umutima ukunze w’abemeye ubukiriro bose.—1 Kor. 3:6, 7; Zab. 110:3.

⁵ Ntitubupfishe Ubusa: Ku vyerekeye umusi wo gukirizako wa Yehova ni ho Paulo yahimirije Abakirisu bagenziwe ati: “Ko dukorana na [we] [Yehova], turabinginga, ntimuhērwe ubuntu bg’Imana gupfa ubusa.” ‘Ntituzobupfisha ubusa’ nimba tubona ko iki ari ‘igihe co gukirizwamwo’ kugira ngo dukore ku bw’ubukiriro bw’abandi igihe akaryo kose kabonetse. (2 Kor. 6:1, 2) Muri iki gihe, amajambo ya Paulo arihutirwa kuruta. Abakirisu bagaragariza Yehova urukundo ruvuye ku mutima babona ko ari agateka kugira uruhara mu buryo bwuzuye uko bishoboka mu gikenurwa yabashinze. Ubu woba ushobora kugira uruhara mu buryo buzuye kuruta mu gikenurwa uri umutsimvyi w’intahorereza?

⁶ Ni Intumbero Itegereka: Muri Afirika yo mu Buseruko, gushika ku wa 1 Nyakanga twiyemeje kuzobona hiyandikishije abatsimvyi b’intahorereza 4 000. Turizeye ko iyo ari intumbero itegereka kandi dushobora gushikako. Ni kuki ata makenga tubifitiye? Muri Ntwarante 1997 abavukanyi n’abavukanyikazi 3 645 barakoze ubutsimvyi bwo gufasha, mu kwa Ndamukiza 1998 na ho ababukoze bababa 3 900. Benshi muri bo batanze raporo y’amasaha 60—hakaba habuze amasaha 10 gusa ngo bashikire amasaha asigaye asabwa abatsimvyi b’intahorereza! Naho nyene 700 gusa mu bakoze ubutsimvyi bwo gufasha bokwinjira mu butsimvyi bw’intahorereza imbere y’umwisho w’uyu mwaka w’umurimo, twotangura ukwa Nyakanga dufise abatsimvyi b’intahorereza 4 000 canke barenga!

⁷ Urutonde Rurakenewe: Mbega kumara amasaha 70 ku kwezi mu murimo wo mu ndimiro coba kikiri ikintu utoshikako? Kumbure ubizirikanye mu buryo bw’amasaha 17 ku ndwi bizofasha. Ukoresheje urutonde rwo kurabirako ruri ku rupapuro rukurikira, gerageza kwishingira urutonde rw’ubutsimvyi bw’intahorereza ruzohuza n’uko ivyawe bwite vyifashe. Mu kurushinga, nuyage n’abatsimvyi b’inararibonye kugira ngo baguhe impanuro n’ivyiyumviro vy’ukuntu babangikanya ku burimbane umurimo w’ubutsimvyi n’amabanga yo mu rugo. Baza umucungezi w’umuzunguruko wanyu ukuntu abatsimvyi bo muri uwo muzunguruko bashinga urutonde rw’umurimo barangura uko indwi itashe. Nuce uhanga amaso Yehova ngo ahezagire imigambi yawe yo gukora ubutsimvyi.—Imig. 16:3.

⁸ Nimubigire Umugambi w’Umuryango: Mwoba mwararimbuye ivyo kugira ugukora ubutsimvyi umugambi w’umuryango? Murashobora kwicara muri umuryango maze mugahanahana ivyiyumviro ku kuntu, mubitegekanije neza kandi mugasenyera ku mugozi umwe, umwe canke babiri mu muryango bashobora gukora ubutsimvyi. Birumvikana ko bamwe barimbuye batibesha uko ivyabo vyifashe bazosanga bidashoboka ko baca bakora ubwo nyene ubutsimvyi bw’intahorereza. Nimba ari ukwo, ubutsimvyi nubugire intumbero yo muri kazoza. Mugabo nutangure gushinga imigambi yo kugira ico ukoze kugira ngo uzotangure ubutsimvyi kw’igenekerezo rizwi neza. Kumbure urashobora kuza urakora ubutsimvyi bwo gufasha nka kangahe mu mwaka kugira ngo buhorobuhoro ushikire umurimo w’ubutsimvyi bw’intahorereza.

⁹ Abatsimvyi b’intahorereza barenga 3 300 ubu dufise mu karere ka Afirika y’Ubuseruko ivyabo ntivyifashe kumwe. Bose ntibafise amagara meza, kandi benshi bafise amabanga yo mu ngo n’ayo mu vy’amahera bategerezwa kurangura. Abatsimvyi benshi bararenza imyaka 50 y’amavuka, kandi bamwe muri bo bakaba barenza imyaka 65. Bamwebamwe ntibarubaka, abatari bake na bo bakaba bafise imyaka 20 y’amavuka canke batarayishikana. Nk’ica kane c’abatsimvyi bose ni abavukanyi, benshi muri bo bakaba bafise amabanga mu ngo no mu mashengero. Bose ‘baracungura umwanya’ kugira bakore ubutsimvyi, ivyo mu bihe vyinshi bikaba bisaba kugira ubuzima bworoheje yamara bumara akanyota.—Kol. 4:5, NW.

¹⁰ Woba Ukeneye Kworosha Ibintu? Kworosha ubuzima bwawe bishobora kuba urupfunguzo rukwugururira urugi rwo gukora ubutsimvyi. Ubuzima bwawe bwoba bumeze nk’uruzu amahanga rufise ivyumba be n’ibikoresho bidakenewe, bikaba bisaba umwanya munini, amahera menshi n’ibikorwa vyinshi kugira ngo bibungabungwe? Niba ari ukwo, kugira ivyo uhinduye ukagira ubuzima bubayabaye kuruta birashobora gutuma ukora ubutsimvyi. Woba ushobora kugabanya umwanya umara mu kazi k’umubiri? Woba ushobora gucungura umwanya umara mu bikorwa bidakenewe canke ukarushiriza kugaragaza uburimbane mu vy’umwanya umara wiruhura?

¹¹ Muri 1 Timoteyo 6:8, Bibiliya idukebura iti: “Iyo dufise ivyo turya n’ivyo twambaye biba bitubūmvye.” Kubumbwa na dukeyi ni ikintu ngirakamaro cotuma dukora uko dushoboye kwose mu murimo wa Yehova, kandi bigatuma tworoherwa gushira imbere ibitwungura mu vy’impwemu. (Mat. 6:22, 33) Ku rupapuro rw’104 rw’igitabu Annuaire 1998, muri raporo ivuga ivy’Ubuyapani, hari ivyiyumviro nka bingahe bitangwa ku gituma hari agatima keza ko gukora ubutsimvyi muri ico gihugu. Rimbura kimwe: “Ni ivy’ukuri yuko muri rusangi amazu y’Abayapani usanga abayabaye, gutyo bigasaba umwanya muto wo kuyabungabunga, kandi kenshi nk’uko biri mu mico yabo ntibaremereza ubuzima.” Ico none si co ciyumviro nyamukuru kiri muri 1 Timoteyo 6:8?

¹² Hirya no hino kw’isi, abasavyi b’Imana baguma barushiriza kwamamaza inkuru nziza imbere y’uko umusi wo gukirizako wa Yehova urangira. Birashimishije kubona mu mwaka uheze abantu hafi y’700 000 baragize uruhara mu mero yinaka y’umurimo w’ubutsimvyi ku kwezi ku kwezi. Woba ushobora kugira ivyo uhinduye mu buzima bwawe kugira ngo wifatanye na bo? Turaguteye akamo ngo wihweze witonze kandi mw’isengesho uko ivyawe vyifashe, mu gihe wishura iki kibazo kibaza giti: “Ubu woba wugururiwe urugi rwo gukora ubutsimvyi?”

[Igicapo ku rup. 4]

(Ushaka igisoma cose, raba ico gitabu)

Intonde z’Ubutsimvyi bw’Intahorereza zo Kurabirako

Igikenewe: Amasaha 17 ku ndwi

Umusi Umwe wo Hagati mu Ndwi na Wikendi

Umusi Amasaha

Ku wa Gatanu 8

Ku wa Gatandatu 6

Ku w’Iyinga 3

Amasaha Yose Hamwe: 17

Imisi Ibiri yo Hagati mu Ndwi n’Uwa Gatandatu

Umusi Amasaha

Ku wa Kabiri 7

Ku wa Kane 7

Ku wa Gatandatu 3

Amasaha Yose Hamwe: 17

Imisi Itatu yo Hagati mu Ndwi n’uw’Iyinga

Umusi Amasaha

Ku wa Mbere 5

Ku wa Gatatu 5

Ku wa Gatanu 5

Ku w’Iyinga 2

Amasaha Yose Hamwe: 17

Imigoroba Ibiri na Wikendi

Umusi Amasaha

Ku wa Mbere 3

Ku wa Gatatu 3

Ku wa Gatandatu 8

Ku w’Iyinga 3

Amasaha Yose Hamwe: 17

Niwishirireho Urutonde rw’Ubutsimvyi bw’Intahorereza Rwawe Bwite

Umusi Amasaha

Ku wa Mbere

Ku wa Kabiri

Ku wa Gatatu

Ku wa Kane

Ku wa Gatanu

Ku wa Gatandatu

Ku w’Iyinga

Amasaha Yose Hamwe: 17