Niwitegurire Icibutso n’umutima unezerewe
1. Mu kiringo c’Icibutso tuzoronka akaryo akahe kadasanzwe?
1 Icibutso, ikizoba ku wa kabiri 26 Ntwarante, kizoturonsa akaryo kadasanzwe ko kunezerererwa ivyo Imana yadukoreye kugira ngo turonke ubukiriro. (Yes. 61:10) Mbere n’imbere y’uko Icibutso kigera, kuba dufise agatima k’umunezero bizodufasha kwitegura neza. Uti gute?
2. Ni igiki gituma twitegurira ihimbazwa ry’Icibutso?
2 Kwitegurira ihimbazwa: Imfungurwa z’Umukama zo ku mugoroba ni ihimbazwa rikomeye ariko ritagizwe n’ibintu vyinshi. Naho ari ukwo, bisaba kwitegura hakiri kare kugira ngo ibintu bihambaye ntivyibagirwe. (Imig. 21:5) Harakwiye gucagurwa isaha be n’ikibanza kibereye. Ibimenyetso bibereye bikwiye kuronderwa. Ikibanza kiberamwo iryo koraniro gikwiye gusukurwa no gutegurwa neza. Umushikirizansiguro yatowe akwiye kwitegura neza, kandi abatembereza ibimenyetso be n’abakira abantu bakwiye kuba barahawe ubuyobozi butomoye. Nta gukeka ko vyinshi muri ivyo bintu bimaze gukorwa. Kuba dukenguruka incungu birakwiye gutuma twitegura neza ku bw’ico kiringo ceranda.—1 Pet. 1:8, 9.
3. Twotegura gute umutima wacu ku bw’Imfungurwa z’Umukama zo ku mugoroba?
3 Gutegura umutima: Birahambaye kandi ko dutegura umutima wacu kugira dutahure bimwe bigera kure insobanuro y’Icibutso. (Ezr. 7:10) Ku bw’ivyo, turakwiye gutegekanya umwanya wo kurimbura vya Vyanditswe bijanye n’Icibutso maze umwe wese ukwiwe akazirikana ku vyashikiye Yezu mu misi ya nyuma y’ubuzima bwiwe bwo kw’isi. Kuzirikana ku gatima Yezu yagaragaje ko kwitanga bizodusunikira kumwigana.—Gal. 2:20.
4. Ni iciza ikihe kiva ku ncungu gituma ugira umunezero udasanzwe?
4 Urupfu rwa Kristu ruremeza ubusegaba bwa Yehova. Rutuma tubohorwa tukava mu caha no mu rupfu. (1 Yoh. 2:2) Ruratuma bishoboka ko tugiranira ubucuti burangwa amahoro n’Imana kandi ruratuma bishoboka ko turonka ubuzima budahera. (Kol. 1:21, 22) Ruradufasha kandi gukomeza umwiyemezo dufise wo kubaho twisunga ukwiyegurira Yehova kwacu kandi tukaguma turi abigishwa ba Kristu bashikamye. (Mat. 16:24) Ese umunezero wawe woguma wongerekana uko witegurira Icibutso cimirije be n’igihe uzoba ucitavye!