Turyohore ubuhanga bwacu mu busuku—Ingene twovyifatamwo ku majambo yohava ahagarika ikiyago

Igituma bihambaye: Dufate ko uzi yuko hari icago c’icaduka cimirije. Abantu bazopfa nibatahungira ahatagira inkomanzi. Uragiye ku mubanyi kugira umuburire, ariko aciye aguciramwo, akavuga ko afatiriwe. Nta gukeka ko utoca wihutira kureka kumuburira! Abantu benshi bo mu cibare baratwirukana, kubera ko batazi agaciro ndokorabuzima k’ubutumwa bwacu. Hari igihe tuba tubagendeye mu gihe bafise imyitwarariko myinshi. (Mat. 24:37-39) Canke boshobora kuba batwiyumvira nabi kubera amakuru atari yo bumvise ku bitwerekeye. (Mat. 11:18, 19) Hari aho boba babona ko tudatandukanye n’ayandi madini yama ivyamwa bibi. (2 Pet. 2:1, 2) Igihe mu ntango umunyamuhana adashimishijwe, ntidukwiye guca dutana n’akabando.

Uko twobigira:

Imbere y’uko uja kwamamaza inzu ku nzu, nufate akanya gatoya wiyumvire amajambo yohava ahagarika ikiyago ushobora kubwirwa maze wiyumvire ingene wovyifatamwo.
Niba umunyamuhana avuze ikintu co guhagarika ikiyago, ubigiranye ukwengenga nugerageze kubandanya ico kiyago. Kumbure ivyo wobigira mu kumukeza. Nk’akarorero, avuze ko yifitiye idini ryiwe, woshobora kumwishura uti: “Nari nizigiye guhura n’umuntu nka we ashimishwa n’ibintu vy’Imana.” Rimwe na rimwe gutahura ukuntu umunyamuhana yiyumva canke ukuntu ivyiwe vyifashe bizogufasha kubandanya kumubwira inkuru nziza. Nk’akarorero, niba avuze ko afatiriwe, urashobora kuvuga uti: “Ndabitahura. Ariko imbere y’uko ngenda, nagomba ndaguhe iki kintu.” Ubundi buryo ni ukubaza ikibazo mu gihe umunyamuhana avuze ko atavyo ashaka. Woshobora kuvuga uti: “Woba ushaka kuvuga ko udashimishwa na Bibiliya, canke ni idini muri rusangi itagushimisha?”
Nukoreshe ubukerebutsi. Niwibuke ko Yehova adahata abantu ngo bumvirize. (Gus. 30:19) Umwe wese akwiye kwikorera umutwaro wiwe bwite w’ibintu azobazwa bijanye n’ivy’impwemu. (Gal. 6:5) Igihe umunyamuhana yumiye ku vyiyumviro vyiwe, vyoba vyiza duciye twigira. Twerekanye ko twubahiriza inyiyumvo ziwe, twoshobora kuba duciriye inzira uwundi mwamamaji, akazomubwira inkuru nziza muri kazoza.—1 Pet. 3:15.

Muri uku kwezi nugerageze iki kintu:

Igihe ubwiwe amajambo yohava ahagarika ikiyago, umaze gutandukana n’umunyamuhana, nuganire n’uwo mwakoranye ingene mwari kuvyifatamwo mu buryo bwiza kuruta.