Turyohore ubuhanga bwacu mu busuku—Ukuntu twovyifatamwo umunyamuhana ashavuye

Igituma bihambaye: Abantu benshi duhura mu busuku usanga bagaragaza urupfasoni. Ariko rero, Yezu yavuze ko abantu bamwebamwe bazotwanka. (Yoh. 17:14) Ntibikwiye kudutangaza rero igihe uwo dusanze ku muhana adushavuriye. Igihe ivyo bishitse, twipfuza kuvyifatamwo mu buryo buhimbara uwo duserukira, ari we Yehova. (Rom. 12:17-21; 1 Pet. 3:15) Kuvyifatamwo gutyo birashobora gutuma ibintu bitunyuka. Ivyo birashobora gutuma ikindi gihe uwo munyamuhana canke uwundi muntu wese atwihweza azokwumviriza Ivyabona vya Yehova nibamugendera.—2 Kor. 6:3.

Uko twobigira:

Nugume utekanye kandi umuvugisha neza. Aho uzoba usutsemwo mabisi. Ntubabazwe n’ukuntu uwo usanze ku muhana avyifashemwo. (Umus. 7:9) Ashobora kuba ashavujwe n’ingorane afise canke ashavujwe no kuba umugendeye ku gihe kitabereye. N’igihe nyene ashavujwe n’ubutumwa twamamaza, akenshi ivyo biba bitumwe n’uko yazimijwe.—2 Kor. 4:4.
Niwishurane ubwitonzi n’ubuntu. (Imig. 15:1) Woba wamukomye aryamye canke wamuciriyemwo ari mu bindi bikorwa? Naho tutamusaba ngo adutunge kuba tuje kumubwira inkuru nziza, turamusaba twicishije bugufi ngo adutunge kuba tumugendeye mu gihe kitabereye. Yoba ashavujwe n’inkuru itari yo yumvise ku bitwerekeye? Nimba ari ukwo biri, woshobora kuvuga uti: “Ndatahura igituma ivyo vyakubabaje. Ariko rero, ivyo wumvise ku bitwerekeye si vyo. Wonkundira nkagusigurira?” Hoba hari ico adashima mu vyo twemera, nk’ibijanye n’ugucibwa canke guterwa amaraso? Woshobora kuvuga uti: “Ndagutahura. Hari n’abandi bavuze gutyo. Wonkundira nkakwereka muri Bibiliya igituma twemera ico kintu?”
Nimba uwo muntu yashavuye cane, vyoba vyiza uciye wigira utarinze kugerageza kwishura. Nimba avuze ko atipfuza yuko Ivyabona vya Yehova bosubira kumugendera, woshobora kumusubiriza umutima mu nda yuko icipfuzo ciwe kizokwubahirizwa.

Muri uku kwezi nugerageze iki kintu:

Nimugire udukino two kwimenyereza mu gusenga kwo mu muryango.
Umaze gutandukana n’umunyamuhana yashavuye, nuganire n’uwo mwakoranye ingene mwari kuvyifatamwo mu buryo bwiza kuruta.