Turyohore ubuhanga bwacu mu busuku—Gutanguza ikiyago kugira wamamaze akaryo kizanye

Igituma bihambaye: Igihe turiko turamamaza inzu ku nzu, akenshi dusanga abantu benshi atari ho bari. Yamara, turashobora kuganira na bo turi muri bisi, turindiriye muganga, turi mu mwanya w’akaruhuko ku kazi canke kw’ishure be no mu bindi bihe. Yehova agomba ko umwumwe wese aronka akaryo ko kwumva ubutumwa bw’Ubwami. (1 Tim. 2:3, 4) Akenshi, kugira ngo twamamaze inkuru nziza, dutegerezwa kwibwiriza gutanguza ikiyago.

Uko twobigira:

Ntupfe uwo ubwiye. Uwo muntu yoba asa n’uwifata kigenzi kandi akaba afise umutima ukunze wo kuganira? Ukuntu ibintu vyifashe vyoba vyotuma vyoroha ko muyaga? Abamamaji bamwebamwe babanza kuraba uwo muntu mu maso bagaca bamumwenyurira. Uwo muntu na we abamwenyuriye, baca bagerageza gutanguza ikiyago.
Wumvise ubwoba, nuce utura isengesho rigufi mu gacerere.—Neh. 2:4; Ivyak. 4:29.
Nuhere ku kuvuga amajambo asanzwe, nko kumuramutsa. Yezu ntiyahereye ku kuvuga ivy’Ubwami igihe yaganira na wa Musamariyakazi. (Yoh. 4:7) Rimwe na rimwe ikiyago coshobora guhera mu gukeza umuntu, duti: “Abana bawe bari n’indero!” Kubaza ikibazo ni ubundi buryo bwo gutanguza ikiyago. Woshobora kumubaza uti: “Warumvirije amakuru ejo ku mugoroba?”
Ikiyago kimaze gutangura, nurondere akaryo ko kumubwira inkuru nziza, ariko ntuvyihutishe. Nureke ico kiyago kibe igisanzwe. Kumbure urashobora kuvuga amajambo atuma umuntu yipfuza kumenya vyinshi kandi agatuma abaza ikibazo. Nk’akarorero, niba ico kiyago gishingiye ku vyerekeye umuryango, woshobora kuvuga uti: “Hari impanuro nziza nabonye zijanye no kurera abana.” Niba muriko muganira ku kintu cavuzwe mu makuru, woshobora kuvuga uti: “Hari inkuru nziza mperuka gusoma yerekeye ibintu bigiye guhinduka.” Ntucike intege ico ikiyago kirangiye utarashinga intahe.
Niwitwaze udupapuro tw’inkuru nziza canke ibindi bisohokayandikiro woshobora guha uwagaragaje ugushimishwa.

Muri uku kwezi nugerageze iki kintu:

Buri ndwi nugerageze gutanguza n’imiburiburi ikiyago kimwe ufise intumbero yo gushinga intahe.