INGENE WOTSINDA URWANKO

4 | Nureke Imana Igufashe Gutsinda Urwanko

Bibiliya ivuga iti:

“Icamwa c’impwemu ni urukundo, akanyamuneza, amahoro, ukwiyumanganya, ubuntu, ukumera neza, ukwizera, ubwitonzi, ukwigumya.”—ABAGALATIYA 5:22, 23.

Ico bisobanura:

Imana irashobora kugufasha gutsinda urwanko. Impwemu nyeranda y’Imana irashobora kudufasha kugira kamere tutokwigera turonka ku bw’inkomezi zacu. Aho kugerageza rero gutsinda urwanko twishimikije inkomezi zacu bwite, turakwiye kwemera gufashwa n’Imana. Tubigenjeje gutyo, birashobora kutugendera nk’uko vyagendeye intumwa Paulo, uwavuze ati: “Muri vyose, ndonka inkomezi ndabikesheje umwe ampa ububasha.” (Abafilipi 4:13) N’ikindi kandi, tuzoshobora kuvuga duti: “Ugutabarwa kwanje kuva kuri Yehova.”—Zaburi 121:2.

Ivyo wokora:

“Yehova yaratumye mpeba gukara, mpinduka umunyamahoro.”—WALDO

Nusenge Yehova ata buryarya, umusaba ngo aguhe impwemu yiwe nyeranda. (Luka 11:13) Numusabe agufashe gutsimbataza kamere zishimwa n’Imana. Niwige ivyo Bibiliya ivuga ku bijanye na kamere zifasha gutsinda urwanko, nk’urukundo, amahoro, ukwihangana, n’ukwigumya. Nurondere uturyo two gutsimbataza izo kamere mu buzima bwawe. Vyongeye, niwifatanye n’abihatira gutsimbataza izo kamere. Abantu nk’abo barashobora ‘kukuvyurira umutima wo gukundana no gukora ibikorwa vyiza.’—Abaheburayo 10:24.

Inkuru y’ivyabaye—WALDO

Yaratsinze urwanko rukaze

Waldo yaraciye mu buzima bubi ku buryo vyatumye agira urwanko rwinshi. Avuga ati: “Nama ndiko ndarwana mu mabarabara n’abadandaza b’ibiyayuramutwe . . . Igihe kimwe, hari akagwi k’inkozi z’ikibi katurwanya kahaye ingero umwicanyi umwe karuhariwe ngo anyice. Narashoboye guhunga mugabo yari yancumise imbugita.”

Waldo ntiyaryohewe igihe umugore wiwe yatangura kwiga Bibiliya n’Ivyabona vya Yehova. Avuga ati: “Naranka Ivyabona vya Yehova, kandi narabatutse incuro zitari nke. Ariko baguma batekanye.”

Amaherezo, Waldo na we nyene yaratanguye kwiga Bibiliya. Avuga ati: “Vyarangora gushira mu ngiro ivyo nariko ndiga. Nabona ko bitokwigeze bishoboka ko mpeba kuba umuntu akara cane.” Ariko rero, hari ikintu yize muri Bibiliya catumye ahindura ivyiyumviro.

Waldo avuga ati: “Umusi umwe, umuvukanyi yanyigisha Bibiliya yitwa Alejandro yaransavye gusoma Abagalatiya 5:22, 23. . . . Alejandro yaransiguriye yuko gutsimbataza izo kamere bitava ku nkomezi zanje bwite ariko ko biva ku mpwemu nyeranda y’Imana. Ukwo kuri kwaratumye mpindura rwose ukuntu nabona ibintu!”

Waldo afashijwe n’Imana yarashoboye kwikuramwo urwanko. Avuga ati: “Incuti n’abagenzi nahorana ntibatahura ingene nahindutse ukuraho.” Yongerako ati: “Yehova yaratumye mpeba gukara, mpinduka umunyamahoro.”