Bibiliya irahindura ubuzima bw’abantu

Umukenyezi umwe yadandaza diyama mu buryo butemewe n’amategeko akongera akiba umukoresha wiwe, ni igiki camuvyuriye umutima wo guhinduka akaba umukozi w’inzirabugunge? Ni igiki cafashije umukenyezi umwe yari yaragerageje kwiyahura incuro zibiri zose, akagira ubuzima buri n’intumbero? Vyagenze gute ngo umuntu yari yariziziwe n’inzoga be n’ibiyayuramutwe aronke inkomezi zo kuvavanura n’ivyo bintu vyonona? Tega amatwi babikuyagire.

IBIMURANGA

IZINA: MARGARET DEBRUYN

IMYAKA: 45

IGIHUGU: BOTSWANA

IVYO YACIYEMWO: YAKORA URUDANDAZA RUTEMEWE N’AMATEGEKO AKONGERA AKIBA

KAHISE KANJE: Dawe yakomoka mu Budagi, mugabo yahavuye aba umwenegihugu wo mu Bumanuko bushira Uburengero bwa Afirika (ahitwa ubu Namibiya). Mawe yaturuka muri Botswana, mu muryango w’Abamangologa. Navukiye i Gobabis, muri Namibiya.

Mu myaka ya 1970, intwaro ya Afirika y’Epfo yarongereje ububasha yari ifise kuri Namibiya yongera iratuma amategeko ya ya ntwaro karyanishamiryango akurikizwa ata guca ku ruhande mu bisagara vyaho vyose no mu dusagara twaho twose. Kubera yuko abavyeyi banje bari bubakanye badasangiye ibara ry’urukoba, barajijuwe ko botandukana. Mawe yaciye asubira kuba i Ghansi muri Botswana, agenda atujanye na basazanje be na bene wacu.

Mu 1979, narimutse nja kuba i Lobatse, muri Botswana, maze mbana n’abavyeyi bandeze igihe gito magingo nariko ndarangiza amashure. Mu nyuma nararonse akazi ko kuba umunyabigega ahantu hamwe bakanikira imiduga. Nakuze nemera yuko Imana itaronsa abantu ivyo bakeneye, ko rero umuntu akwiye gukora ikintu ico ari co cose ashoboye, caba ciza canke kibi, kugira ngo yironse ivyo akeneye yongere abironse umuryango wiwe.

Kubera yuko nari mfise igiti gikomeye ku kazi, naca mboneraho akaryo ko kwiba umukoresha wanje ivyuma vy’imiduga vyo gusubiriza ibishaje. Igihe cose igariyamoshi yaba iciye mu gisagara mw’ijoro, jewe n’abo twakorana twaca tuyinjiramwo maze tukiba ivyo dushoboye gushikira vyose. Nahavuye kandi nja mu vyo kudandaza diyama, inzahabu be n’ubutare bw’umujumbu mu buryo butemewe n’amategeko. Naratanguye kunywa ibiyayuramutwe, ndaba inkazi cane kandi nari mfise abahungu benshi twakundana.

Amaherezo mu 1993, nahavuye mfatwa ndiko ndiba, baca baranyirukana ku kazi. Abahora bitwa ngo ni abagenzi banje baciye bampeba, batinya ko na bo nyene bohava bafatwa. Ico kintu bagize carambabaje cane, nca mfata ingingo yo kudasubira kwizigira umuntu n’umwe.

UKUNTU BIBILIYA YAHINDUYE UBUZIMA BWANJE: Mu 1994, narahuye na Tim be na Virginia, bano bakaba ari Ivyabona vya Yehova babiri basukura ari abamisiyonari. Baranyagishije bansanze aho nari nsigaye nkorera, baramfasha kwiga ivyerekeye Bibiliya mu gihe c’akaruhuko ka sasita. Mu nyuma, igihe numva ko nshobora kubizigira, narabemereye kuza i muhira kunyigisha.

Sinatevye kubona yuko kugira mpimbare Imana nategerezwa kugira amahinduka amwamwe mu kuntu nari mbayeho. Nk’akarorero, mu 1 Abakorinto 6:9, 10 haranyigishije yuko ‘ata basambanyi, canke ibisuma, canke abanyamunoho, canke imborerwa, canke abatukanyi, canke abanyazi bazotorana ubwami bw’Imana.’ Nagiye ndaheba imwimwe mu ngeso nahorana. Narahevye kwiba. Narahagaritse kwifatanya na za nkozi z’ikibi twari twarukanye. Ndabishobojwe na Yehova, naravavanuye na ba bahungu twakundana.

IVYIZA NAHAKUYE: Bivuye ku twigoro twinshi nagize, narize gucungera ishavu ryanje be n’ukudakankamira abana banje igihe haba hari ikitagenda neza. (Abanyefeso 4:31) Ndagerageza kuvuga mu buryo buranga amahoro. Ubwo buryo bwo guserura akari ku mutima butuma dushika ku vyo tuba twipfuza kandi bugatuma uko tugize umuryango turushiriza gufatana mu nda.

Abahoze ari abagenzi banje, ndetse n’ababanyi banje, barabonye ko bashobora kunyizigira. Narabaye umukozi w’inzirabugunge kandi w’umwizigirwa ashobora kwitwararika neza ibikoresho be n’amahera vyo ku kazi. Ku bw’ivyo, ndashoboye kwitunga magingo umwanya munini ndawumara mfasha abandi kwiga ibijanye na Bibiliya. Ndemeranya n’umutima wanje wose n’aya majambo yo mu Migani 10:22 agira ati: “Umugisha w’Uhoraho uratungisha, kandi nta mubabaro awuvangamwo.”

IBIMURANGA

IZINA: GLORIA ELIZARRARÁS DE CHOPERENA

IMYAKA: 37

IGIHUGU: MEGIZIKE

IVYO YACIYEMWO: YARAGERAGEJE KWIYAHURA

KAHISE KANJE: Nakuriye mu karere gatunze cane kitwa Naucalpan, muri Leta ya Megizike. Kuva nkiri muto, nari umuntu agarariza cane kandi narakunda kuja mu misi mikuru. Natanguye kunywa itabi mfise imyaka 12, ntangura kunywa inzoga mfise 14, ntangura kunywa ibiyayuramutwe na vyo mfise 16. Haheze imyaka mikeyi, naromotse ndava i muhira. Benshi mu bagenzi banje baturuka mu miryango ivyayo bitifashe neza na gato, bakaba barakorewe amabi ku mubiri canke baraturubitswe. Nabona ko ata cizigiro na gito kiriho mu buzima ku buryo nagerageje kwiyahura incuro zibiri zose.

Igihe nari mfise imyaka 19, naratanguye gukora ivyo kuza ndafatwa amafoto nambaye impuzu zigezweho kugira ngo ano akoreshwe mu bijanye no kuzirata. Ivyo vyatumye menyana n’abantu bakomeye mu vya politike no mu vyo kwisamaza. Nahavuye nubaka urwanje ndaronka n’abana, ariko ni jewe nafata ingingo zose mu muryango. Vyongeye, narabandanije kunywa itabi n’inzoga nyinshi, kandi nagumye mfise ubuzima bwo gucurumba muri twinshi. Ibiyago vyanje vyari vyuzuyemwo imvugo ziteye isoni kandi narakunda kuvuga ibitebu vy’ibishegu. Nari inkomwahato cane.

Benshi mu bo nahitamwo ngo bambere abagenzi bari babayeho nkanje. Kuri bo naboneka nk’aho ata co mbuze. Ariko naguma numva ko ubuzima bwanje ata co bumaze, ko ata ntumbero bufise.

UKUNTU BIBILIYA YAHINDUYE UBUZIMA BWANJE: Natanguye kwigana Bibiliya n’Ivyabona vya Yehova mu 1998. Bibiliya yaranyigishije yuko ubuzima bufise intumbero. Narize yuko Yehova Imana afise umugambi wo gutuma isi isubira kuba Iparadizo, yuko azozura abapfuye be n’uko nshobora kwungukira kuri ivyo bintu vyo muri kazoza.

Narize kandi yuko kugamburukira Imana ari bwo buryo bwo kwerekana ko uyikunda. (1 Yohani 5:3) Ivyo vyabanje kuba urugamba kubera yuko ntari bwigere nemera ubuyobozi mpawe n’umuntu n’umwe. Ariko rero, nahavuye nemera yuko ntari gushobora kubandanya niyobora mu buzima. (Yeremiya 10:23) Narasenze Yehova ndamusaba ngo anyobore. Naramusavye ko yomfasha guhuza ubuzima bwanje n’ingingo mfatirwako ziwe be no kwigisha abana banje kugira ntibazokwigenze nk’uko nari narigenjeje.

Vyarangoye cane kugira amahinduka yari akenewe, mugabo naratanguye gushira mu ngiro impanuro dusanga mu Banyefeso 4:22-24, iyigira iti: “Mukwiye kwambura kamere ya kera ihura n’ingeso zanyu za kera . . . mukambara kamere nshasha yaremwe hisunzwe ukugomba kw’Imana mu bugororotsi bw’ukuri no mu kudahemuka kw’ukuri.” Kuri jewe, kwambara kamere nshasha vyasobanura guheba ingeso zihumanya nko kunywa itabi, kandi nategerezwa kwiga imvugo nshasha itarimwo amajambo ateye isoni. Vyansavye hafi imyaka itatu kugira ngo ngire amahinduka akenewe mbone kubatizwa, mbe Icabona ca Yehova.

Vyongeye, naratanguye gufatana uburemere ibanga njejwe ryo kuba inarugo na inabibondo. Naratanguye gushira mu ngiro impanuro yo muri 1 Petero 3:1, 2, igira iti: “Namwe bagore, . . . muyobokere abagabo banyu bwite, kugira ngo, nimba hari abatagamburukira rya jambo, bagondozwe ata jambo rivuzwe, biciye ku ngeso z’abagore babo, kubera biboneye ingeso zanyu zitanduye ziri kumwe n’icubahiro kigera kure.”

IVYIZA NAHAKUYE: Ndakengurukira cane Yehova kubera yuko ubu ntahura ko ubuzima bufise intumbero. Ndumva ndi umuntu ameze neza kuruta, kandi ndashoboye kurera abana banje mu buryo bwiza. Rimwe na rimwe, umutima uranyagiriza kubera ibikorwa nakoze muri kahise, mugabo Yehova arazi umutima wanje. (1 Yohani 3:19, 20) Ata gukeka, kubaho nisunga ingingo mfatirwako zo muri Bibiliya vyarankingiye akaga kandi vyaratumye ngira amahoro mu mutima.

IBIMURANGA

IZINA: JAILSON CORREA DE OLIVEIRA

IMYAKA: 33

IGIHUGU: BEREZILE

IVYO YACIYEMWO: YARI YARIZIZIWE N’INZOGA BE N’IBIYAYURAMUTWE

KAHISE KANJE: Navukiye i Bagé, agasagara ko muri Berezile kabamwo nk’abantu 100.000, kakaba kari hafi y’urubibe Berezile ihana na Uruguay. Uburimyi n’ubworozi bw’inka ni vyo vyari ibikorwa nyamukuru vyo muri ako karere. Nakuriye mu ntara ikenye aho imigwi y’inkozi z’ikibi yari yarakwiragije ivy’ubukazi, kandi akaborerwe n’ukwizizirwa n’ibiyayuramutwe vyari bimenyerewe mu bakiri bato.

Maze guheba ishure, naratanguye kunywa inzoga nyinshi, kunywa urumogi rwitwa marijuana be n’ukwumviriza imiziki yo mu bwoko bwa rock yitwa heavy-metal. Sinemera Imana. Nabona yuko imibabaro be n’imidurumbanyo yose iba mw’isi cari ikimenyamenya c’uko Imana itabaho.

Navuza igitari kandi nkandika indirimbo, akenshi ivyiyumviro nkaba nabikura mu gitabu co muri Bibiliya c’Ivyahishuwe. Umugwi wanje w’abaririmvyi ntiwererwa nk’uko nari ndavyiteze, kikaba ari co gituma naciye ntangura kwizizirwa cane n’ibiyayuramutwe bikaze. Kwumva ko nopfa nishwe n’ukunywa ibiyayuramutwe vyinshi, ntaco vyari bintwaye. Benshi mu baririmvyi nakunda rwose, ico ni co cabahitanye.

Amahera yo kugura ibiyayuramutwe nayagurana nyokuru, ari na we yari yarandeze. Ambajije ico nakoresha ayo mahera naca ndamubesha. Mu kwunyura ibintu, naragiye mu vy’ubupfumu. Narakunda cane ubwoko bwa maji bujanye n’ivy’uburozi, nibaza yuko bwotumye nshobora kwandika imiziki myiza kuruta.

UKUNTU BIBILIYA YAHINDUYE UBUZIMA BWANJE: Maze gutangura kwiga Bibiliya no kwitaba amakoraniro y’Ivyabona vya Yehova, ukuntu nabona ibintu kwaratanguye guhinduka. Nagiye ndatsimbataza buhorobuhoro icipfuzo co kubaho no guhimbarwa. Bitumwe n’ukwo kuntu nari nsigaye mbona ibintu, narafashe ingingo yo kumwa imishatsi yanje miremire. Nari narayiteretse bwa kimenyetso c’uko nari narashishwe be n’uko nari umugarariji. Nahavuye ntahura yuko nimba nashaka kwemerwa n’Imana, nategerezwa guheba kunywa inzoga nyinshi, kunywa ibiyayuramutwe, nkahagarika no kunywa itabi. Narabonye kandi ko vyari bikenewe ko mpindura ubwoko bw’imiziki nakunda.

Igihe nitaba amakoraniro y’Ivyabona vya Yehova ari bwo bwa mbere, narabonye Icanditswe cari kimanitse ku ruhome. Cari ico mu Migani 3:5, 6, kikaba cavuga giti: “Wizigize Uhoraho umutima wawe wose, kandi ntiwishimikize ubgenge bg’iwawe: umumenye mu ngendo zawe zose, na we azogorora inzira zawe.” Kuzirikana kuri ico canditswe vyarankuye amazinda yuko Yehova yomfashije gusubira gutunganya neza ubuzima bwanje, ndamutse ndabimukundiye.

Ariko ntiwumve, guhindura uburyo bwo kubaho nari naratsimbataje cane hamwe no guheba utumenyero twarimwo ivyo gukoresha ibiyayuramutwe, vyari amananiza kuri jewe nka kurya nyene kwica ukuboko vyombereye amananiza. (Matayo 18:8, 9) Sinashobora kugira ayo mahinduka intambwe ku yindi. Ku binyerekeye nari nzi yuko ivyo ata co vyofashije. Ni co gituma naciye mpebera icarimwe iyo migenzo mibi. Naririnze kandi ibibanza vyose be n’abantu bose bari gushobora gutuma nsubira mu ngeso zanje za kera kandi zonona.

Narize kwishimira ivyo naba nashitseko ku musi ku musi, nkaza ndirinda kwiyumvira cane ibihe bica intege vyaba vyanshikiye. Narumva yuko kobaye ari agateka kuba umuntu adahumanye mu vy’umubiri no mu vy’inyifato runtu, ivyo bikaba vyotumye ngira impagararo nziza imbere ya Yehova. Narasenze nsaba ko Yehova yomfasha kutaza ndibuka ingeso zanje za kera ahubwo ko nohanga amaso ibiri imbere, kandi yaramfashije kubigira. Rimwe na rimwe vyarashika nkasubira mu ngeso za kera. Mugabo naguma nsaba nshimitse ko uwanyigisha yongirira inyigisho yanje ya Bibiliya naho nyene rimwe na rimwe naba navyutse ndwaye indarane.

Kwiga ukuri kwo muri Bibiliya kwerekeye Imana, ni ukuvuga kumenya ko itwitwararika umwumwe wese ukwiwe, ko izosangangura idini ry’ikinyoma be n’uko iriko irashigikira igikorwa co kwamamaza kiriko kirarangurwa kw’isi yose, vyaratomotse neza kuri jewe. (Matayo 7:21-23; 24:14; 1 Petero 5:6, 7) Ivyo bintu vy’ukuri nari nize vyarahuza neza. Amaherezo narafashe ingingo yo kwegurira Imana ubuzima bwanje. Naripfuza kwerekana ko ndayikengurukira ku vyiza vyose yari yarankoreye.

IVYIZA NAHAKUYE: Ubu ndumva ko ubuzima bwanje bufise intumbero be n’uko buri n’ico buvuze. (Umusiguzi 12:13) Vyongeye, aho kuza ndanyaga umuryango wanje, narashoboye kugira ico ndawuterereye. Narabwiye nyokuru ibintu vyiza nize muri Bibiliya, kandi ubu yariyeguriye Yehova. Abandi bantu batari bake bo mu muryango wanje be n’umwe mu bari muri wa mugwi wanje w’abaririmvyi na bo nyene barabigize.

Ubu ndubatse, kandi jewe n’umukenyezi wanje umwanya munini tuwumara turiko turafasha abandi kwiga ibijanye na Bibiliya. Ndabona ko nahezagiwe cane kubera nize ‘kwizigiza Uhoraho umutima wanje wose.’

[Iciyumviro ku rup. 29]

“Nagiye ndatsimbataza buhorobuhoro icipfuzo co kubaho no guhimbarwa”