Igice ca 6: Kurongora inyigisho za Bibiliya zitera imbere

Igihe umutohoji abajije ikibazo

¹ Inyigisho ya Bibiliya imaze gutangura nya gutangura, mu bisanzwe ni vyiza ko inyigisho zishingiye kuri Bibiliya zirimburwa kurya nyene zikurikirana aho kuza turasimbasimba tuva kuri iki cigwa tuja kuri kiriya. Ivyo birafasha umutohoji gushinga umushinge w’ubumenyi ntagakosa no gutera imbere mu vy’impwemu (Kol. 1:9, 10). Ariko rero, kenshi na kenshi umutohoji arabaza ibibazo ku bintu bitandukanye igihe muriko muriga. None dukwiye kuvyifatamwo gute ku bijanye n’ivyo bibazo?

² Nube umuntu azi kuraba ikibereye: Ibibazo bijanye n’ivyo muriko muriga birashobora mu bisanzwe guca vyishurwa ubwo nyene. Niba ikibazo kanaka kiza kwishurwa canke kizokwishurwa mu nyuma muri nya gitabu mwigamwo, vyoshobora kuba bihagije gusa ubimubwiye. Ariko rero, niba ikibazo abajije kitajanye n’ivyo muriko muriga canke niba gisaba ko ugira ubushakashatsi kugira ucishure neza, vyoba vyiza kukirimbura muhejeje kwiga canke mukakirimbura ikindi gihe. Abamamaji bamwebamwe babonye yuko kugira aho wanditse ico kibazo bituma nya mutohoji ahera amazinda yuko ikibazo ciwe wagifatanye uburemere kandi bikanatuma mutava ku vyo muriko mwiga ngo muje mu bindi.

³ Mu bitabu vy’ishimikiro dukoresha mu kwigisha, inyigisho nyinshi zo muri Bibiliya usanga zirimburwa mu ncamake gusa. Bite none hamwe umutohoji vyoba bimugora kwemera inyigisho yinaka canke akaguma yumiye ku nyigisho itari yo? Vyoba ngirakamaro murimbuye n’ayandi mayagwa aca irya n’ino mu buryo bunogangije ico Bibiliya ivuga kuri ico kibazo. Niba nya mutohoji atanyuzwe, nimukibikire ikindi gihe maze mubandanye kwiga nk’uko bisanzwe (Yoh. 16:12). Uko arushiriza kumenya vyinshi ku vyerekeye Bibiliya no gutera imbere mu vy’impwemu, yoshobora gushika aho atahura iyo nyigisho yo muri Bibiliya.

⁴ Nube uwifata ruto: Niba utazi neza inyishu y’ikibazo kanaka, uriyubara ntuhave utanga inyishu itari yo (2 Tim. 2:15; 1 Pet. 4:11). Musigurire yuko uzogira ubushakashatsi kuri ico kintu hanyuma ukazogaruka kumwishura. Woshobora mbere no guca ufatiraho akaryo ko kumwereka uburyo bwo kugira ubushakashatsi. Buhorobuhoro, nuze uramwereka ingene yokoresha ibikoresho bitandukanye vyo kugira ubushakashatsi bitangwa n’ishirahamwe rya Yehova. Abigenjeje gutyo, amaherezo azoshobora ubwiwe kwironkera inyishu y’ibibazo afise.—Ivyak. 17:11.

Bafashe basubire kubwirwa ubutumwa

¹ Iyo turiko turamamaza inkuru nziza, turakunda guhura n’abantu bataba mu cibare dukoreramwo canke abantu bavuga urundi rurimi, ushizemwo n’ururimi rw’ibimenyetso. Abandi tugirana ibiyago vyiza bishingiye kuri Bibiliya boshobora kwimuka bakava mu cibare cacu. Twoshobora gute gutunganya ivy’uko abantu nk’abo basubira kubwirwa ubutumwa? Twobigira mu gukoresha ka gakaratasi ko kwuzuza kavuga ngo Turabinginze muringanize ivy’uko umwamamaji abishoboye agendera uyu muntu (S-70).

² Abantu usanga akenshi barushiriza gutega yompi inkuru nziza iyo ishikirijwe mu rurimi rwabo kavukire (Ivyak. 22:1, 2). Ku bw’ivyo rero, iyo mu bisanzwe duhuye n’umuntu avuga urundi rurimi, dukwiye kwuzuza ako gakaratasi naho nyene atoba yerekanye yuko yashimye ubutumwa bw’Ubwami. Ariko rero, aho usanga hari abantu benshi cane bavuga urundi rurimi bama babwiwe ubutumwa mu rurimi rwabo kavukire, hari aho bitoba bikenewe ko twuzuza ako gakaratasi, kiretse igihe hari uwashimishijwe.

³ Ukwuzuza ako gakaratasi: Ubigiranye ubugenge, nugerageze kumenya izina ry’uwo muntu, aderese yiwe be n’inomero ziwe za telefone. Niwerekane ukuntu uwo muntu yavyakiriye (niba yashimishijwe cane canke bigereranye), igihe ashobora kubonekerako, igisohokayandikiro wamuhaye canke yasavye, be n’ururimi atahura neza. Umaze kwuzuza ako gakaratasi, nuce ugaha umunyamabanga w’ishengero udatebaganye, na we akazoca akarungikira ishengero canke umugwi ukorera muri ako karere.

⁴ Ukurungika ako gakaratasi: Niba umunyamabanga atazi ishengero canke umugwi akwiye kurungikira ako gakaratasi canke adafise aderese y’iryo shengero canke y’uwo mugwi, yoshobora guterefona Ibiro bijejwe ivyibare ku biro vy’ishami kugira aronke amakuru akenewe. Ntibigikenewe ko umucungezi w’igisagara abanza kubimenyeshwa mu gihe co kurungika ako gakaratasi.

⁵ Igihe cose ishengero canke umugwi uronse ako gakaratasi kujujwe, hakwiye gutunganywa ivy’uko uwo muntu agenderwa bidatevye. Uko turangurana ubwira uruhara rutwega, turashobora kwizigira tudakeka ko Yehova azokwugurura imitima y’ “abari mu mero nziza y’umutima ituma baronka ubuzima budahera”.—Ivyak. 13:48, NW.