Ivyogufasha kugumana umunezero mu busaza

1-2. Yehova abona gute abasavyi biwe bageze mu zabukuru? (Zaburi 92:​12-14; raba n’ifoto.)

MU BIHUGU bimwebimwe abantu babona ko gusaza ari iteka. Mu bindi na ho baragira uko bashoboye kwose ngo ntibaboneke ko bashaje. Nk’akarorero, hari bamwebamwe iyo babonye uruvi baca barurandura. Ariko naho bokora iki, ubusaza nta ho bobuhungira.

² None Umuvyeyi wacu wo mw’ijuru abona gute abasavyi biwe bageze mu zabukuru? (Imig. 16:31) Abagereranya n’ibiti bisagamvye. (Soma Zaburi 92:​12-14.) Kubera iki none ico kigereranyo kibereye? Ibiti bifise amababi menshi n’amashurwe meza, akenshi usanga biba bimaze imyaka myinshi. Kimwe muri mwene ivyo biti bidasanzwe, ni igiti co mu Buyapani gifise amashurwe menshi ateye igomwe (Cérisier du Japon). Bimwebimwe muri ivyo biti bibereye ijisho usanga bimaze imyaka irenga igihumbi. Cokimwe n’ivyo biti bimaze imyaka myinshi, abasavyi ba Yehova benshi bitereye mu myaka barateye igomwe, na canecane mu maso y’Imana. Yehova ntaraba imvi, ahubwo araba umuntu. Arashima kamere nziza abageze mu zabukuru bafise, nk’ukwihangana n’ukudahemuka. Arashima n’ibikorwa bamaze imyaka myinshi bamukorera.

3. Tanga akarorero k’ingene Yehova yakoresheje abageze mu zabukuru mu gushitsa ivyo agomba.

³ Umuntu naho yoba yitereye mu myaka, ntibica bigabanya agaciro afise kuri Yehova.a Washima, Yehova arakunda gukoresha abageze mu zabukuru kugira ashitse ivyo agomba. Nk’akarorero, Sara yari ashaje igihe Yehova yamubwira ko yobaye nyina w’ihanga rikomeye, akaba na inakuruza wa Mesiya. (Ita. 17:​15-19) Musa yari yitereye mu myaka igihe Yehova yamutuma gukura Abisirayeli mu Misiri. (Kuv. 7:​6, 7) Intumwa Yohani na we, yari ageze mu zabukuru igihe Yehova yamukoresha mu kwandika ibitabu bitanu vyo muri Bibiliya.

4. Twisunze Imigani 15:​15, ni igiki cofasha abageze mu zabukuru kwihanganira ingorane barimwo? (Raba n’ifoto.)

⁴ Abageze mu zabukuru baragira ingorane nyinshi zizanana n’ubusaza. Ni co gituma umwitsa umwe uvuga ko «gusaza ari ugusahurwa.» Naho ari ukwo, umunezerob urashobora gufasha abageze mu zabukuru kwihanganira ingorane barimwo. (Soma Imigani 15:15.) Muri iki kiganiro, turaza kubona ivyo abageze mu zabukuru bokora kugira bagumane umunezero. Turaza no kubona ingene abagize ishengero bofasha abavukanyi na bashiki bacu bitereye mu myaka. Reka tubanze turabe igituma bitoroshe kugumana umunezero igihe dutanguye gusaza.

UBUSAZA BURANYAGA UMUNEZERO

5. Ni ibiki bishobora gutuma abageze mu zabukuru bamwebamwe bacika intege?

⁵ Ni ibiki bishobora gutuma ucika intege? Kumbure ni kubera ko utagishobora gukora ivyo wahora ukora. Urashobora kwibuka igihe wari ukiritera ukarisama, ukumva urababaye. (Umus. 7:10) Nk’akarorero, mushiki wacu umwe yitwa Ruby avuga ati: «Kwambara impuzu vyonyene birangora kubera ko namana ububabare n’imisonga kandi singishobora kugendagenda nka kera. Ibintu vyahora ari ibisanzwe nko kuduza ukuguru kugira ngo nambare amashesheti, bisigaye bigoye cane. Intoke zanje zarakongatajwe na rumatizime, ivyo bigatuma bitanyorohera gukora mbere n’udukorwa dutoduto.» Uwitwa Harold yahoze akorera kuri Beteli na we avuga ati: «Rimwe na rimwe birambabaza cane kubona ntagishobora gukora ivyo nahora nkora kera. Nkiri muto nari mbangutse cane. Narakunda gukina cane urukino rw’umupira w’amaboko rwitwa baseball. Ico gihe, abantu bakunda kuvuga bati: ‘Pasira agapira Harold kuko atigera ahusha.’ None ubu, aho ngeze sinibaza ko noba ngishobora no kugatera.»

6. (a) Ni ibindi bintu ibihe vyoshobora gutuma abageze mu zabukuru bacika intege? (b) Ni igiki cofasha abageze mu zabukuru kumenya nimba bobandanya canke bohagarika gutwara ingendeshwa zabo? (Raba ikiganiro kiri muri uyu Munara kivuga ngo «Noba nkwiye guhagarika gutwara ingendeshwa yanje?»)

⁶ Urashobora gucika intege kubera ko ubu usigaye ukenera ko abandi bagufasha gukora ivyo wahora wikorera. Birarushiriza mbere kuguca intege igihe bibaye ngombwa ko haronderwa uwama akwitwararika canke bikaba ngombwa ko uja kubana n’umwana wawe. Canke na ho ushobora kuba ucitse intege kubera ko amagara yawe atifashe neza canke kubera ko utakibona neza, ku buryo bitagikunda ko utwara ingendeshwa yawe canke ngo wijane ahantu wenyene. Emwe, ivyo bintu birababaza cane. Ariko rero kwibuka iki kintu vyogufasha: kuba ushoboye kwikorera vyose, kwibana canke gutwara ingendeshwa yawe, si vyo bituma uba uw’agaciro kuri Yehova no ku bandi. Turashobora guhera amazinda ko Yehova atahura ukuntu tumerewe. Igihambaye kuri we ni ukuntu tumeze imbere, ni ukuvuga urukundo tumukunda be n’urwo dukunda abavukanyi bacu.—1 Sam. 16:7.

7. Ni igiki cofasha abababazwa n’uko iherezo ry’ivy’iyi si rishobora gushika batakiriho?

⁷ Ushobora kuba ubabajwe n’uko iherezo ry’ivy’iyi si rishobora gushika utakiriho. None nimba ari ko bimeze, ni igiki cogufasha? Niwibuke ko Yehova arindiriye yihanganye gukuraho iyi si mbi. (Yes. 30:18) None ni kubera iki yihanganye? Kubera ko bituma abantu amamiliyoni baronka akaryo ko kumumenya no kumukorera. (2 Pet. 3:9) Igihe rero wumva ucitse intege, niwibuke ko hari abantu benshi bashobora kwungukira kuri ukwo kwihangana kwa Yehova imbere y’uko iherezo riza. Hari aho mbere bamwe muri bo boba ari abo mu muryango wawe.

8. Ni ibiki bikunze gushikira abitereye mu myaka igihe barwaye canke bafise ububabare?

⁸ Twese abato n’abakuze, igihe turwaye canke dufise ububabare birashika tukavuga canke tugakora ibintu tutipfuza. (Umus. 7:7; Yak. 3:2) Nk’akarorero, igihe wa mugabo w’umwizigirwa Yobu yari mu mibabaro, yari asigaye ‘avuga atabanje kwiyumvira.’ (Yobu 6:​1-3) Ni co gituma n’abageze mu zabukuru, igihe barwaye canke bari ku miti, boshobora kuvuga canke gukora ibintu batovuze canke batokoze bamerewe neza. Ariko ntiwumve, nta n’umwe akwiye kuvuga amajambo mabi canke ngo abe umuntu agorana, yitwaje imyaka canke amagara make. Bishitse na ho tukamenya ko twabwiye umuntu amajambo ababaza, turakwiye kumusaba imbabazi.—Mat. 5:​23, 24.

IVYOGUFASHA KUGUMANA UMUNEZERO

9. Kubera iki dukwiye kwemera gufashwa n’abandi? (Raba n’amafoto.)

⁹ Niwemere abandi bagufashe. (Gal. 6:2) Mu ntango vyoshobora kukugora. Mushiki wacu umwe yitwa Gretl avuga ati: «Hari igihe bingora kwemera ko abandi bamfasha kubera ko mba numva umengo ndiko ndagorana. Vyaramfashe igihe kugira mpindure ivyiyumviro maze nemere ko nkeneye gufashwa.» Iyo wemeye ko abandi bagufasha, uba utumye bahimbarwa kubera ko baba baronse akaryo ko gutanga. (Ivyak. 20:35) Na wewe uzohimbarwa niwibonera ingene abandi bagukunda n’ingene bakwitwararika.

10. Kubera iki ukwiye kwibuka gushima? (Raba n’amafoto.)

¹⁰ Nube umuntu ashima. (Kol. 3:15; 1 Tes. 5:18) Igihe abandi badukoreye ikintu ciza turabishima, ariko hari aho twibagira kubibabwira. Igihe tubamwenyuriye canke tukababwira ngo urakoze, tuba tuberetse ko dushima ivyo badukoreye kandi ko ari ab’agaciro. Mushiki wacu umwe yitwa Leah, akaba ajejwe kwitwararika abageze mu zabukuru muri Beteli, avuga ati: «Umwe mu badada nitwararika arakunda kunyandikira udukete two gushima. Naho ata vyinshi yandika, turandyohera cane. Ndakunda gusoma ivyo aba yanyandikiye, kandi birampimbara kumenya ko akenguruka ivyo ndamukorera.»

11. Ni ibiki wokora kugira ngo ufashe abandi? (Raba n’amafoto.)

¹¹ Niwihatire gufasha abandi. Igihe dushize umutima ku gufasha abandi bituma tutarazwa ishinga cane n’ingorane zacu. Hari umugani umwe wo muri Afrika ugereranya abageze mu zabukuru n’ububiko bw’ibitabu vyuzuyemwo ubukerebutsi bwinshi. Mugabo ivyo bitabu bidakoreshejwe nta co vyomarira abantu. Rero ko mwebwe mugeze mu zabukuru mufise iryo tunga, nimwibwirize muriheko abakiri bato. Nimubabaze ibibazo mwongere mubatege yompi. Nimubabwire ingene kubaho bisunga ingingo ngenderwako za Yehova vyama ari vyiza kandi bizotuma bahimbarwa. Nta nkeka ko na wewe uzohimbarwa niwaremesha abagenzi bawe bakiri bato.—Zab. 71:18.

12. Twisunze Yesaya 46:​4, ni ibiki Yehova asezeranira abageze mu zabukuru? (Raba n’amafoto.)

¹² Nusabe Yehova agukomeze. Naho ushobora kuruha canke ugacika intege, Yehova wewe «ntaruha canke ngo arambirwe.» (Yes. 40:28) None izo nguvu zidahera azikoresha gute? Arazikoresha mu gukomeza abasavyi biwe b’abizigirwa bageze mu zabukuru. (Yes. 40:​29-31) Mbere asezerana kubafasha. (Soma Yesaya 46:4.) Vyongeye, Yehova yama ashitsa ivyo asezerana. (Yos. 23:14; Yes. 55:​10, 11) Rero niwasenga usaba Yehova ngo agukomeze, uzokwibonera ingene agukunda n’ingene agushigikira, bitume ugira umunezero.

13. Twisunze 2 Abakorinto 4:​16-18, ni ibiki dukwiye kwibuka? (Raba n’amafoto.)

¹³ Niwibuke ko ingorane urimwo zitazokwamaho. Iyo twibutse ko ingorane turimwo zitazokwamaho, bica bitworohera kuzihanganira. Bibiliya na yo idusezeranira ko vuba indwara n’ubusaza bizovaho. (Yobu 33:25; Yes. 33:24) Kwibuka rero ko imbere ari heza birashobora gutuma ugumana umunezero. (Soma 2 Abakorinto 4:​16-18.) None abandi bofasha gute?

INGENE ABANDI BOFASHA

14. Kubera iki bihambaye guterefona abageze mu zabukuru canke kuja kubaraba?

¹⁴ Niwame uterefona abageze mu zabukuru canke uje kubaraba. (Heb. 13:16) Abageze mu zabukuru barashobora kwumva umengo ni inyakamwe. Umuvukanyi umwe atakiva muhira avuga ati: «Kuva mu gitondo gushika ku mugoroba, mba ndi mu nzu kandi birandambira. Hari igihe numva umengo ndi igikoko bugaraniye ahantu. Biranshavuza kandi bikantera amaganya.» Igihe tugiye kuraba abageze mu zabukuru, tuba tuberetse ko ari ab’agaciro kuri twebwe kandi ko tubakunda. Kumbure twese turibuka igihe twagira icipfuzo co guterefona canke kuja kuraba uwugeze mu zabukuru, mugabo ntitubikore. None ko twese tuguma twiruka n’ubuzima, twokora iki kugira «[turabe] neza ibihambaye kuruta ibindi ivyo ari vyo», harimwo no kugendera abageze mu zabukuru? (Flp. 1:10) Twoshobora nko kuza turandika ku kirangamisi akantu katwibutsa kwandikira canke guterefona abageze mu zabukuru turi kumwe mw’ishengero. Twoshobora no kugira urutonde rw’umusi twoja kubaraba, ntikibe ikintu dukora ari uko gusa turonse akanya.

15. Ni ibiki abakiri bato be n’abageze mu zabukuru bokorera hamwe?

¹⁵ Nimba ukiri muto vyoshika ukibaza uti: «Noyaga ibiki n’uwugeze mu zabukuru? Hoho twokorana ibiki?» Ivyo ntibikwiye kuguhagarika umutima. Wewe gusa nubabere umugenzi mwiza. (Imig. 17:17) Nufate umwanya wo kubayagisha imbere y’amakoraniro canke inyuma yayo. Kumbure woshobora kubasaba ngo bakubwire icanditswe bakunda cane, canke ikintu gitwengeje cabashikiye igihe bari bakiri bato. Woshobora no kubatumira kugira murabire hamwe ikiganiro co kuri televiziyo ya JW. Vyongeye, woshobora kubafasha no mu tundi tuntu. Nk’akarorero, wobafasha gushira ku gihe utwuma twabo canke ukabafasha kuvoma ibitabu dukoresha mu kwiga biba biherutse gusohoka. Mushiki wacu yitwa Carol avuga ati: «Saba abageze mu zabukuru mukorane birya nyene ukunda gukora. Naho nshaje, kuryoherwa ntibingwa nabi. Ndakunda kuja kugura utuntu, kuja gufungurira muri restora, no kuja kwisamaza.» Mushiki wacu yitwa Maira na we avuga ati: «Umwe mu bagenzi banje afise imyaka 90, akaba andusha imyaka 57. Ariko ivyo sinkunda no kuvyibuka, kubera ko duhora dutera inkuru tugatwenga canke tukarabira hamwe isinema. Igihe na ho hagize uwugira ingorane muri twebwe, turafashanya tugahanahana ivyiyumviro.»

16. Kubera iki ari vyiza guherekeza kwa muganga abageze mu zabukuru?

¹⁶ Nubaherekeze kwa muganga. Uretse ukwunguruza abageze mu zabukuru, vyoba vyiza kandi ugumanye na bo kugira ngo urabe ko abaganga babitaho kandi ko babavura neza. (Yes. 1:17) Woshobora kubafasha mu kuza urandika ivyo umuganga ababwira. Mushiki wacu umwe yitereye mu myaka yitwa Ruth avuga ati: «Akenshi iyo nijanye kwa muganga, usanga umuganga adaha agaciro ivyo ndamubwira. Hari igihe abaganga bambwira ngo ‘nta co urwaye, ivyo ni vyo wishiramwo gusa.’ Ariko iyo hagize uwumperekeza, umuganga aranyitwararika cane. Ndashimira abavukanyi n’abadada bahora bafata akanya bakamperekeza.»

17. Ni imice iyihe y’igikorwa co kwamamaza twokorana n’abageze mu zabukuru?

¹⁷ Nujane na bo kwamamaza. Abageze mu zabukuru bamwebamwe usanga badafise inguvu zo kwamamaza inzu ku nzu. Ubona gute none nk’akarorero usavye mushiki wacu yitereye mu myaka ngo mujane kwamamaza ku mugaragaro? Woshobora no kumuha agatebe yicarako kugira bimworohere. Canke na ho, ubona gute usavye umuvukanyi yitereye mu myaka ngo aguherekeze ku nyigisho yawe, canke na ho ukaza kuyiyoborera muhira iwe? Abakurambere na bo boshobora kuraba nimba boza baragirira ikoraniro ryo gusohoka mu ndimiro ku mihana y’abitereye mu myaka, kugira biborohere kuja kwamamaza. Emwe, ikintu cose twokora kugira dutere iteka abageze mu zabukuru, Yehova aragishima.—Imig. 3:27; Rom. 12:10.

18. Tuzokwihweza ibiki mu kiganiro gikurikira?

¹⁸ Muri iki kiganiro, twibukijwe ko Yehova akunda abageze mu zabukuru kandi ko abaha agaciro. Na twebwe ni ko tubabona. Naho gusaza ari ugusahurwa, Yehova arashobora kugufasha kugumana umunezero. (Zab. 37:25) Ese ukuntu biremesha kumenya ko imbere ari heza. Tuvuge iki none ku bajejwe kwitwararika umuntu wo mu muryango yitereye mu myaka, umwana arwaye, canke umugenzi arwaye? Bokora iki kugira bagumane umunezero? Inyishu z’ivyo bibazo tuzozironka mu kiganiro gikurikira.